રક્ષા મંત્રી શ્રી રાજનાથ સિંહે 19 મે, 2026 ના રોજ હનોઈમાં વિયેતનામના ડેપ્યુટી પ્રાઇમ મિનિસ્ટર અને નેશનલ ડિફેન્સ મિનિસ્ટર જનરલ ફાન વાન ગિયાંગ સાથે દ્વિપક્ષીય બેઠક યોજી હતી. બંને મંત્રીઓએ બંને દેશો વચ્ચે વધતી જતી સંરક્ષણ ભાગીદારીની સમીક્ષા કરી હતી અને મેરીટાઇમ સિક્યુરિટી, સંરક્ષણ ઉદ્યોગ, તાલીમ અને પ્રાદેશિક સ્થિરતામાં સહયોગને વધુ ગાઢ બનાવવાની રીતો પર ચર્ચા કરી હતી.

બંને પક્ષોએ પરસ્પર હિતના પ્રાદેશિક અને વૈશ્વિક સુરક્ષા વિકાસ પર વિચારોનું આદાનપ્રદાન કર્યું હતું અને ઈન્ડો-પેસિફિક ક્ષેત્રમાં શાંતિ, સ્થિરતા, સુરક્ષા, સલામતી અને નેવિગેશનની સ્વતંત્રતા જાળવવાના મહત્વ પર ભાર મૂક્યો હતો. તેઓએ સૈન્ય તાલીમ, સંરક્ષણ ઉદ્યોગ સહયોગ, મેરીટાઇમ સિક્યુરિટી, ક્ષમતા નિર્માણ, સંયુક્ત રાષ્ટ્ર (United Nations) શાંતિ રક્ષા, સાયબર સિક્યુરિટી અને ઉચ્ચ સ્તરીય આદાનપ્રદાન સહિતના ક્ષેત્રોમાં સહયોગ વિસ્તારવાના માર્ગો પર ચર્ચા કરી હતી. તેઓ નિયમિત સંવાદો, સંયુક્ત કવાયતો અને વિનિમય કાર્યક્રમો દ્વારા બંને દેશોના સંરક્ષણ દળો વચ્ચે સહયોગ વધારવા પર પણ સંમત થયા હતા.

રક્ષા મંત્રીએ વિયેતનામ સાથે ભારતના એનહાન્સ્ડ કોમ્પ્રીહેન્સિવ સ્ટ્રેટેજિક પાર્ટનરશિપને મજબૂત કરવાની પ્રતિબદ્ધતાને પુનરોચ્ચાર કર્યો હતો. તેમણે દ્વિપક્ષીય સંરક્ષણ સહયોગના માળખા હેઠળ વિયેતનામના સંરક્ષણ આધુનિકીકરણ અને ક્ષમતા વધારવાની પહેલોને ટેકો આપવાના ભારતના સંકલ્પને દોહરાવ્યો હતો.

જનરલ ફાન વાન ગિયાંગે ભારતના સતત સમર્થનની પ્રશંસા કરી હતી અને બંને દેશો વચ્ચેની લાંબા સમયની મિત્રતા અને વધતી જતી વ્યૂહાત્મક ભાગીદારી પર ભાર મૂક્યો હતો.

બંને રક્ષા મંત્રીઓએ વિયેતનામના એરફોર્સ ઓફિસર્સ કોલેજ ખાતે લેંગ્વેજ લેબનું વર્ચ્યુઅલી ઉદ્ઘાટન કર્યું હતું. આ લેબ ભારતીય સહાયથી સ્થાપિત કરવામાં આવી છે. રક્ષા મંત્રીએ ન્હા ત્રાંગ (Nha Trang) ખાતે ટેલિકોમ્યુનિકેશન્સ યુનિવર્સિટીમાં આર્ટિફિશિયલ ઇન્ટેલિજન્સ લેબની સ્થાપના કરવાની પણ જાહેરાત કરી હતી.

મિલિટરી કોલેજ ઓફ ટેલિકોમ્યુનિકેશન એન્જિનિયરિંગ, ભારત અને ટેલિકોમ્યુનિકેશન્સ યુનિવર્સિટી, વિયેતનામે પણ આર્ટિફિશિયલ ઇન્ટેલિજન્સ અને કવોન્ટમ ટેકનોલોજીના ક્ષેત્રમાં એક MoUનું આદાનપ્રદાન કર્યું હતું, જે બંને દેશો વચ્ચેના એનહાન્સ્ડ કોમ્પ્રીહેન્સિવ સ્ટ્રેટેજિક પાર્ટનરશિપમાં વધુ એક મહત્વપૂર્ણ પ્રકરણ ચિહ્નિત કરે છે.

દ્વિપક્ષીય બેઠક પછી, રક્ષા મંત્રીએ વિયેતનામના જનરલ સેક્રેટરી અને પ્રેસિડેન્ટ મિસ્ટર તો લમ (Mr To Lam) સાથે મુલાકાત કરી હતી. તેમણે ભારતના રાષ્ટ્રપતિ અને પ્રધાનમંત્રી તરફથી હાર્દિક શુભેચ્છાઓ પાઠવી હતી અને સંરક્ષણ અને સુરક્ષા, વ્યાપાર અને રોકાણ, દરિયાઈ સહયોગ, કનેક્ટિવિટી, ડિજિટલ ટ્રાન્સફોર્મેશન અને લોકો વચ્ચેના આદાનપ્રદાન સહિત વિવિધ ક્ષેત્રોમાં દ્વિપક્ષીય સહયોગને વધુ ગાઢ બનાવવા માટે ભારતની પ્રતિબદ્ધતા દોહરાવી હતી.

બંને નેતાઓએ વહેંચાયેલી સભ્યતાની કડીઓ, પરસ્પર વિશ્વાસ અને સમાન વ્યૂહાત્મક હિતોમાં રહેલી ભારત અને વિયેતનામ વચ્ચેની મજબૂત અને કાયમી મિત્રતાનો પુનરોચ્ચાર કર્યો હતો. તેમણે ભારત-વિયેતનામ કોમ્પ્રીહેન્સિવ સ્ટ્રેટેજિક પાર્ટનરશિપના સતત વિકાસ પર સંતોષ વ્યક્ત કર્યો હતો.

પોતાની ભારત મુલાકાતને ઉષ્માપૂર્વક યાદ કરતા, વિયેતનામના રાષ્ટ્રપતિએ વધતા જતા દ્વિપક્ષીય જોડાણની પ્રશંસા કરી હતી અને વિયેતનામના વિકાસ અને વ્યૂહાત્મક પ્રાથમિકતાઓમાં મુખ્ય ભાગીદાર તરીકે ભારતની ભૂમિકાનો સ્વીકાર કર્યો હતો. તેમણે બંને દેશો વચ્ચેના એનહાન્સ્ડ કોમ્પ્રીહેન્સિવ પાર્ટનરશિપના મુખ્ય સ્તંભ તરીકે વિસ્તરતા સંરક્ષણ સહયોગને આવકાર્યો હતો અને વિશ્વાસ વ્યક્ત કર્યો હતો કે આગામી વર્ષોમાં દ્વિપક્ષીય સંબંધો વધુ મજબૂત થતા રહેશે.

શ્રી રાજનાથ સિંહે દિવસના કાર્યક્રમોની શરૂઆત વિયેતનામના સ્થાપક પિતા, ભૂતપૂર્વ રાષ્ટ્રપતિ હો ચી મિન્હની 136મી જન્મજયંતિ પર મેસોલિયમ (Mausoleum) ખાતે તેમને શ્રદ્ધાંજલિ અર્પણ કરીને કરી હતી. તેમણે X પરની એક પોસ્ટમાં જણાવ્યું હતું કે, "તેમની દ્રષ્ટિ, નેતૃત્વ અને રાષ્ટ્રીય મુક્તિ અને વૈશ્વિક એકતા પ્રત્યેની કાયમી પ્રતિબદ્ધતા પેઢીઓને પ્રેરણા આપતી રહેશે. તેમણે મજબૂત ભારત-વિયેતનામ મિત્રતાનો પાયો પણ નાખ્યો જે વહેંચાયેલા મૂલ્યો અને પરસ્પર સન્માનમાં મૂળ ધરાવે છે."

ભારત અને વિયેતનામ પરસ્પર વિશ્વાસ, વહેંચાયેલા મૂલ્યો અને સંરક્ષણ, સુરક્ષા અને પ્રાદેશિક સ્થિરતામાં ગાઢ સહયોગ પર આધારિત મજબૂત બંધન ધરાવે છે.

IJ/DK/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com