યુનિયન પબ્લિક સર્વિસ કમિશન (UPSC), પારદર્શિતા વધારવા અને પરીક્ષા સંચાલનના સર્વોચ્ચ ધોરણો જાળવી રાખવા માટે, પરીક્ષાના ટૂંક સમય બાદ પ્રથમ વખત સિવિલ સર્વિસીસ (પ્રિલિમિનરી) પરીક્ષા 2026 માટે પ્રોવિઝનલ આન્સર કી જાહેર કરશે.

આને "એક નવી શરૂઆત" ગણાવતા UPSC ના અધ્યક્ષ ડૉ. અજય કુમારે જણાવ્યું હતું કે, "યુનિયન પબ્લિક સર્વિસ કમિશન પ્રથમ વખત સિવિલ સર્વિસીસ પરીક્ષા માટે પ્રોવિઝનલ આન્સર કી જાહેર કરશે. આ પહેલ ઉમેદવારો સાથે વધુ પારદર્શિતા, જવાબદારી અને સમયસર સંચાર લાવવા માટેના કમિશનના સતત પ્રયાસોને પ્રતિબિંબિત કરે છે". તેમણે વધુમાં ઉમેર્યું હતું કે, "આ નીતિનો ઉદ્દેશ્ય પરીક્ષાની પવિત્રતા, અખંડિતતા અને મેરિટ-આધારિત માળખાને જાળવી રાખીને પરીક્ષા પ્રક્રિયાને વધુ સહભાગી બનાવવાનો છે."

પ્રોવિઝનલ આન્સર કી જાહેર થયા પછી, સિવિલ સર્વિસીસ પરીક્ષાના ઉમેદવારો તેમની રજૂઆતો (representations), જો કોઈ હોય તો, 31 મે 2026 ના રોજ સાંજે 6 વાગ્યા સુધીમાં, સમર્પિત ઓનલાઈન પોર્ટલ એટલે કે "ઓનલાઈન ક્વેશ્ચન પેપર રિપ્રેઝન્ટેશન પોર્ટલ (QPRep)" દ્વારા સબમિટ કરી શકે છે, જે https://upsconline.nic.in/login પર ઉપલબ્ધ છે. ઉમેદવારો પોતાની સમજણ મુજબ સાચી કી (જવાબ) દર્શાવીને, તેની સાથે ટૂંકું વર્ણન અને ત્રણ અધિકૃત સ્ત્રોતોમાંથી સહાયક દસ્તાવેજો જોડીને પોતાની રજૂઆતો સબમિટ કરી શકશે. આનાથી ઉમેદવારો માત્ર પરીક્ષામાં પોતાના પ્રદર્શનનું વહેલું અને માહિતગાર મૂલ્યાંકન કરવા માટે સક્ષમ બનશે એટલું જ નહીં, પરંતુ તેમને પોતાની રજૂઆતો સબમિટ કરવા માટે પૂરતો સમય અને તક પણ મળશે.

ઉમેદવારો તરફથી મળેલી તમામ રજૂઆતોને વ્યાપક અને ઝીણવટભરી સમીક્ષા માટે વિષય નિષ્ણાતોની ટીમ (ટીમો) સમક્ષ મૂકવામાં આવશે. આ નિષ્ણાતો સંબંધિત ક્ષેત્રનું જ્ઞાન અને વિષયની કુશળતા ધરાવે છે. તેઓ દરેક રજૂઆતની કાળજીપૂર્વક તપાસ કરશે, સહાયક દસ્તાવેજોનું મૂલ્યાંકન કરશે અને સંબંધિત પ્રશ્નો માટેની આન્સર કીની શુદ્ધતા અંગે તેમના વિચારેલા મંતવ્યો નોંધશે. ત્યારબાદ, મળેલી તમામ રજૂઆતો પર યોગ્ય વિચારણા કર્યા પછી જ આન્સર કીને આખરી ઓપ આપવામાં આવશે.

પ્રોવિઝનલ આન્સર કીના પ્રકાશન માટે ઉમેદવારોની લાંબા સમયથી ચાલી આવતી માંગને પૂરી કરવા માટે આ નવો સુધારો રજૂ કરવામાં આવ્યો છે. કમિશને પ્રોવિઝનલ આન્સર કી પ્રકાશિત કરવાની નીતિ અમલમાં મૂકી છે, જે પારદર્શિતા, જવાબદારી અને પરીક્ષા પ્રણાલીમાં ઉમેદવારોના વિશ્વાસને મજબૂત કરવા પ્રત્યેની કમિશનની પ્રતિબદ્ધતાને આગળ ધપાવવા માટે પણ હતું.

IJ/JY/JD