یونین پبلک سروس کمیشن (یو پی ایس سی) ، پہلی بار ، امتحان کے فورا بعد سول سروسز (پریلمینری) امتحان 2026 کی ‘عارضی جوابی کلید’  جاری کرے گا ۔ اس کا مقصد شفافیت کو بڑھانا اور امتحان کے انعقاد میں اعلی ترین معیار کو برقرار رکھنا ہے ۔

اسے ‘‘ایک نئی شروعات’’قرار دیتے ہوئے یو پی ایس سی کے چیئرمین ڈاکٹر اجے کمار نے کہا ، ‘‘پہلی بار یونین پبلک سروس کمیشن سول سروسز امتحان کے لیے عارضی جوابی کلید جاری کرے گا ۔ یہ پہل امیدواروں کے ساتھ زیادہ شفافیت ، فوری ردعمل اور بروقت بات چیت کو یقینی بنانے کے لیے کمیشن کی مسلسل کوشش کی عکاسی کرتی ہے ۔ انہوں نے مزید کہا کہ اس پالیسی کا مقصد امتحان کے عمل کو مزید شراکت پر مبنی  بنانا اور اس کے وقار ، دیانتداری اور میرٹ کے تعلق سے فریم ورک کو بھی برقرار رکھنا ہے ۔ ’’

عارضی جوابی کلید جاری ہونے کے بعد، سول سروسز امتحان کے امیدوار، اگر کوئی ہوں تو، 31 مئی 2026 شام 6 بجے تک ایک مخصوص آن لائن پورٹل یعنی آن لائن کوئسچن پیپر ریپریزنٹیشن پورٹل (کیو پی آر ای پی) کے ذریعے اپنی گزارشات/اعتراضات جمع کرا سکیں گے۔ یہ پورٹل https://upsconline.nic.in/loginپر دستیاب ہے۔ امیدوار اپنی سمجھ کے مطابق درست جوابی کلید کی نشاندہی کرتے ہوئے، ایک مختصر وضاحت اور تین معتبر ذرائع سے معاون دستاویزات کے ساتھ اپنی گزارشات جمع کرا سکیں گے۔ اس سے نہ صرف امیدواروں کو امتحان میں اپنی کارکردگی کا جلد اور درست اندازہ لگانے میں مدد ملے گی بلکہ انہیں اپنی گزارشات جمع کرانے کے لیے مناسب وقت اور موقع بھی فراہم ہوگا۔

امیدواروں سے موصول ہونے والے تمام اعتراضات کو موضوع کے ماہرین کی ٹیم کے سامنے رکھا جائے گا تاکہ ان کا مکمل اور باریکی سے جائزہ لیا جا سکے ۔ ان ماہرین کے پاس اپنے شعبے کا علم اور موضوع کی مہارت ہوتی ہے ۔ وہ باریک بینی سے ہر اعتراض کا جائزہ لیں گے ، معاون دستاویزات کا تجزیہ کریں گے اور متعلقہ سوالات کے لئے جوابی کلید کی درستگی کے بارے میں اپنے خیالات ریکارڈ کریں گے ۔ اس کے بعد موصولہ تمام اعتراضات پر غور کرنے کے بعد ہی جوابی کلید کو حتمی شکل دی جائے گی ۔

یہ نئی اصلاح عارضی جوابی کلید جاری کرنے کے امیدواروں کے دیرینہ مطالبے کو پورا کرنے کے لئے متعارف کرائی گئی ہے ۔ مزید برآں ، شفافیت ، جوابدہی اور امتحان کے نظام میں امیدواروں کے اعتماد کو مضبوط بنانے کے لیے کمیشن کے عزم کو آگے بڑھاتے ہوئے ، کمیشن نے عارضی جوابی کلیدوں کوشائع کرنے کی  پالیسی کو نافذ کیا ہے ۔

***

ش ح۔ ک ا۔ ع ا

U.NO.7217