ভারত ইমানা য়াইফরে।

ভারত ইমানা য়াইফরে।

গুজরাতকী মীয়াম্না পাম্নরবা মুখ্য মন্ত্রী শ্রী ভুপেন্দ্র ভাই পতেল, উপ-মুখ্য মন্ত্রী হর্শ সংঘভি জী, কেন্দ্রগী মন্ত্রী অমসুং ফাউন্দিং ত্রস্তী মনসুখ ভাই মান্দবীয়া, সরদার ধামগী প্রসিদেন্ত গগজী ভাই সুতারিয়া জী, দুশিয়ান্ত ভাই পতেল, পঙ্কজ ভাই পতেল, রাজ্যগী বি.জে.পি.গী প্রসিদেন্ত জগদীশ বিশ্বকর্মা জী, ফম্পাক অসিদা লেংশিল্লিবা গুজরাত সরকারগী মন্ত্রী পুম্নমক, দোনর পুম্নমক, ত্রস্তীশিং, শক্নাইরবা মীথুংলেনশিং অমসুং গুজরাতকী মফম খুদিংমক্তগী লাক্লিবা ঐহাক্কী নুংশিরবা ইচিল-ইনাওশিং।

ঙসিগী নুমিৎ অসি অশেংবা কুমহৈদগী হন্থবা নত্তে। মফমসিদা লাকদ্রিঙৈদা, ঐহাক সোমনাথ লাইশঙদা লৈরম্মি। সোমনাথ লাইশঙ শঙ্গাখিবা চহি ৭৫ মপুং ফারক্লে। সোমনাথ লাইশঙ অসি অমুক হন্না শেমগৎপা অসি সরদার পতেলগী ৱারেপকী মতুং ইন্না পাংথোকখি। থৌরম অসিদা, সোমনাথ অমৃত মহোৎসব অসি প্রভাস পতানদা পাংথোক্লি। অমসুং হায়রিবা নুমিৎ অসিদা, ভদোদরাদা, সরদার ধামগা মরী লৈনবা মরুওইবা প্রোজেক্ত কয়াগী শঙ্গাবগী অমসুং উরেপ উয়ুং তম্বগী থৌরম পাংথোক্লি। দোক্তর দুশিয়ান্ত অমসুং দাক্ষা পতেল কমপ্লেক্স শঙ্গাখ্রে, এজুকেস্নেল এসিস্তেন্স স্কিম হৌদোকপা, অমসুং অনৌবা প্রোজেক্তশিংগী উরেপ উয়ুং তম্বগী থৌরমশিং অসি পুম্নমক অসি তুংলমচৎতা লৈবাক শেমগৎপদা ইফেক্তিব ওইবা খুৎলাই ওইগনি। মওং অমদা, ইন্সতিত্যুসনশিং অসিনা ঐখোয়গী নহারোলশিংগী তুংগী কেরিয়রগীদমক লোঞ্চ পেদশিং ওইনা মথৌ তৌগনি। ঐহাক্না ময়াম পুম্নমকপু অমসুং খুন্নাই অসিগী মীহুৎ খুদিংমকপু মসিগী অফবা থবক অসিগীদমক নুংঙাইবা ফোংদোকচরি।

মরুপশিং,

ঙসি ময়ামগী মরক্তা লাকপা অসিনা ঐঙোন্দা অতোপ্পা নুংঙাইবা অমা পীরি। বেঙ্গল, আসাম অমসুং পুদুচেরীদা পাংথোকখিবা মীখলগী ফলনা লৈবাক শীনবা থুংনা নুংঙাইবা ফিভম অমা লৈহল্লে। মসিগা লোয়ননা, ময়াম পুম্নমক্না পুন্না পুৱারী শেমখ্রে। গুজরাতকী ম্যুনিসিপাল অমসুং পঞ্চায়ত ইলেক্সনগী রিজল্তশিংসু মশক থোক্না লৈরি, অমসুং লৈবাক শীনবা থুংনা খন্ন-নৈনরি।

মরুপশিং,

গুজরাতকী মীয়াম্না মতম পুম্নমক্তা রাজনিতীগী ওইবা স্তেবিলিতীবু মরু ওইদুনা লাক্লি। মসিনা মখোয়গী রাজনিতীগী ওইবা মাংজৌননা উবা ঙম্বা অদু উৎলি। মখোয়না পোলিতিকেল স্তেবিলিতীগী মরুওইবা অদু খঙই, মরমদি পোলিতিকেল স্তেবিলিতী লৈবা মফম খুদিংদা, ইকোনোমিক গ্রোথ অসি খুমাং চাউশিল্লি। গুজরাতনা মসি মতম কুইনদগী খঙনরক্লি। গুজরাতকী চাউখৎপা অমসুং মীখলগী ফল অমমমদা মসিগী মহৈ অদু উবা ফংলে।

মরুপশিং,

ময়ামগী মরক্তা লাকপা অমসুং অদোমগী প্রোগ্রামশিংগী শরুক অমা ওইরকপা অসি ঐহাক্কী ওইনা মতম পুম্নমক্তা নুংঙাইবা অমনি; য়ুমদা হল্লকপগুম ফাওই। মরমদি, ময়ামগী মরক্তা, খুন্নাইগী মপাঙ্গল অদু থেংনৈ। ঐখোয়না পুম্নমক্না খঙই মদুদি তশেংবা অহোংবা অমা লাকপা মতমদা, মসি খুন্নাইগী অপুনবা শক্তিগী মতেংনা ফংই। অখন্ননা এজুকেসনবু মরুওইবা পীরিবা অমসুং এজুকেসন্দা মান্নবা শরুক য়াবা অসি মখোয়গী পান্দম ওইরিবা কম্যুনিতীশিংনা মতম পুম্নমক্তা খুমাং চাউশিল্লি অমসুং অনৌবা অৱাংবা থাক্তা য়ৌরি।

মরম অদুনা ইচিল-ইনাওশিং,

সরদার ধামগী থবক খুদিংমক্তা, ঐহাক্না খুদোংচাবা ফংবা মতম খুদিংদা, ঐহাক্না অদোমগা লোয়ননা লেপ্ননবা হোৎনরি। গাগজী ভাইনা অকুপ্পা মরোলদা শন্দোক্না তাকখিবগুম্না, ২০২১দা ঐহাক্না অহমদাবাদতা সরদার ধাম প্রোগ্রাম অমদা শরুক য়াখি। মফম অদুদা নুপীমচাশিংগী হোস্তেল অমগী উরেপ উয়ুং তমখি। হৌখিবা চহিদা, মসি শঙ্গাখি। ঙসিদি, নুপীমচা লিশিং কয়া মফম অসিদা মহৈ তম্বা ফংলি অমসুং মখোয়গী মঙলানবু অনৌবা মায়কৈদা পুখৎলি। সুরত, রাজকোৎ, ভুজ, মেহসানা অমসুং দিল্লীদা সরদার ধামগী অসিগুম্বা ইন্সতিত্যুসন কয়ানা নহারোলশিংগী তুংলমচৎ শেমগৎলি। ঙসি অহমদাবাদকী নিকোলদা নুপীমচা লিশিং অমগী অনৌবা হোস্তেল অমগী উরেপ উয়ুংসু তমখ্রে।

মরুপশিং,

অহোংবা অসি পাক শন্না শন্দোক্নবা অমসুং মসিগী মহৈশিং অসি মতম শাংনা চৎহন্নবগীদমক্তা, খুন্নাই অমসুং সরকারনা পুন্না থবক তৌমিন্নবা তাই। মরম অদুনা হৌজিক্তি তশেং-তশেংনা ওইরিবা ফিভমদা য়ুম্ফম ওইবা এজুকেসনগী লমদা থবক পায়খৎলি। নেস্নেল এজুকেসন পোলিসী অসি মসিগী মরুওইবা খুদম অমনি। ঙসি নহারোলশিংগী লম্বীদা লৈরিবা অথিংবশিং অসি লৌথোক্লে। লোলদা য়ুম্ফম ওইবা খেন্নবগী থৌওং লোইশিল্লে। হৌজিক্তি লাইরিক অমসুং দিগ্রী খক্তদা মীৎয়েং চংদ্রে। স্কিল দিবেলপমেন্ত অমসুং ইনোবেসন অসি এজুকেসনগী শরুক অমা ওইরে। রিসর্চতা পুক্নিং চংবা নহাশিংদা অচুম্বা অকোয়বগী ফিভম পীরি। নহারোলশিংনা মখোয়গী দিগ্রী লোইরবা মতুংদা এক্সপরিয়েন্স লৈতনা চত্থোক চৎশিন তৌদনবা, এপরেন্তিসশিপকী খুদোংচাবশিং ফংহল্লি। লৈবাক অসিনা তুংলমচৎতা হৈ-শিংলবা শিন্মী কয়া অমা লৈরক্কদগে হায়বদু খল্লু। মসিগী খ্বাইদগী চাউবা কান্নবা অসি ভারতকী মেন্যুফেকচরিং সেক্তরদা ফংহনগনি।

মরুপশিং,

গুজরাতকী নহারোলশিংদা মহৌশানা ওন্তপ্রিন্যুওরশিপকী শক্তি লৈ। ঙসিদি, স্তার্ত অপ ইন্দিয়া মিসননা মখোয়গী মঙলানশিং মপুং ফাহন্নবগীদমক মতেং পাংলি। অপীকপা সহরশিংগী নহাশিংসু ওন্তপ্রিন্যুওর ওইরক্লি। অচৌবা স্তার্তঅপশিং অসি অপীকপা সহরশিংদগী হৌরক্লি। স্তার্ত-অপশিংদা নুপীশিংগী শরুক য়াবগী চাং লেপ্তনা হেনগৎলক্লি। হান্ননা রিস্ক লৈ হায়না লৌনরম্বা সেক্তরশিং অসি হৌজিক্তি নহারোলশিংনা খ্বাইদগী পাম্নবা ওইরক্লি। স্পোর্তসতগী স্পেস তেক্নোলোজী ফাওবদা, হৌখিবা চহি ১০-১২ অসিদা লৈবাক অসিনা ফংখিবা মগুনশিং অসি মসিগী খ্বাইদগী চাউবা খুদম্নি। অমসুং গুজরাতকী ঐখোয়গী ইচানুপা-নুপীশিংনা মসিদগী কান্নবা কয়া ফংলি।

মরুপশিং,

খুন্নাইগী চাউখৎপগী খ্বাইদগী চাউবা য়ুম্ফমদি নুপীশিংনা শরুক য়াবনি। গুজরাতনা মসি চহি তরাগী খুজিং অনিগী মমাংদা খঙখি অমসুং মসিগী মাইকৈ অসিদা অকনবা খোঙথাংশিং লৌখৎখি।

মরুপশিং,

ঙসিদি গুজরাত মোদেলগী মায় পাকপা অসি লৈবাক শিনবা থুংনা অমুক হন্না উবা ফংলে। নুপী করোর কয়াদা বেঙ্ক একাউন্ত পীখ্রে। তোইলেৎ, পাইপকী ঈশিং অমসুং গ্যাস কনেক্সনশিং ফংহল্লে। মুদ্রা য়োজনাগী খুত্থাংদা নুপীশিংনা মশা-মরোমদোম লেপচবা ঙমহল্লে। আয়ুশ্মান ভারত অমসুং মাত্রু বন্দনগুম্বা স্কিমশিং অসি নুপীশিংনা ইমুং মনুংদা হকচাং ফনা লৈহন্নবা ঙাক্লৌ পথাপ ওইনা থবক তৌরি।

মরুপশিং,

মমাংদদি, লম কয়াদা নুপীমচাশিংনা থবক তৌবা য়াদে। ঙসিদি, নুপীশিং অসি সেক্তরশিং অসিদা লুচিংবা ওইরক্লি। নুপী কেদেৎশিংনা হৌজিক নেস্নেল দিফেন্স একাদেমীদা ত্রেনিং ফংলি। ঐখোয়গী মচানুপীশিংনা ফাইতর পাইলোৎশিং ওইরক্লি। রাজনিতীদা নুপীশিংগী শরুক য়াবা হেনগৎহন্নবা লেপ্পা লৈতনা হোৎনরি। নারী শক্তি বন্দন অধিনিয়মগী খুত্থাংদা ঐখোয়না মসিগী মাইকৈ অসিদা অতোপ্পা খোঙথাং অমা লৌখৎখি। রাজনিতীগী ওইবা মরমশিংদগী মসি পাংথোকপা ঙমখিদে, অদুবু ঐহাক্না অদোম অমসুং লৈবাক অসিগী নুপীশিংবু থাজবা পীজরি মদুদি ঐখোয়না মসিগী মাইকৈ অসিদা মখা তানা হোৎনখিগনি।

মরুপশিং,

হীরম খুদিংমক্তা নুপীশিংগীদমক খুদোংচাবা ফংহন্নবা থোঙ হাংদোকপা অসি সরকারগী থৌদাং খক্তমক নত্তে, খুন্নাইগীসু থৌদাং অমনি। সরদার ধামনা মসিগী থৌদাং অসি মপুং ফানা নিংথিনা লৌরিবা অসিদা ঐহাক নুংঙাইবা ফাওই। ঐহাক্না অখন্ননা ময়াম পুম্নমকপু মসিগী খোঙথাংশিং অসিগীদমক থাগৎপা ফোংদোকচরি অমসুং থাগৎচরি।

মরুপশিং,

গুজরাতকী খ্বাইদগী চাউবা মপাঙ্গল অমা মতম পুম্নমক্তা লৈদুনা লাক্লি মদুদি মফমসিগী খুন্নাই অসিনা মতমগী মায়কৈ অদু য়াম্না থুনা খঙবা ঙম্মী। অহোংবশিংবু খুদোংচাবদা ওন্থোকপা, অনৌবা ওইথোকপা য়াবশিংবু লৌশিনবা অমসুং তুংলমচৎকীদমক ঙন্না শেম-শাবা অসি মতম পুম্নমক্তা গুজরাতকী থবক তৌবগী চৎনবীগী শরুক অমনি। ঙসিদি, মালেম অসিনা তুংলমচৎকী তেক্নোলোজীগী মায়কৈদা চংশিল্লকপগা লোয়ননা, গুজরাতনসু অনৌবা খোঙজেল য়াংনা মাংলোমদা চংশিল্লি। সেমিকন্দক্তর মেন্যুফেকচরিং, এরোস্পেস, এদভান্স ইঞ্জিনীয়রিং, গ্রীন ইনর্জী অমসুং ফাইনান্সিএল সর্বিসশিংদা গুজরাতনা অনৌবা মশক অমা শেমগৎলি। সানন্দা মেদ-ইন-ইন্দিয়া সেমিকন্দক্তরশিং পুথোক্লি। কেন্স সেমিকন্দক্তর প্লান্ততা পুথোকপা হৌখ্রে। ধোলেরা অমসুং সুরততা অনৌবা সেমিকন্দক্তর প্রোজেক্তশিংসু মাংলোমদা চংশিল্লি।

মরুপশিং,

ভারত অমসুং গুজরাতপু মালেমগী সপ্লাই চেনগী মরুওইবা সেন্তর ওইহন্নবা ঐখোয়না লেপ্পা লৈতনা থবক তৌরি। লাক্কদৌরিবা চহিশিংদা, ভদোদরাসু মসিগী মরু ওইবা থৌদাং অমা লৌরগনি। মফম অসিদা পুথোকপা মেত্রো কোচশিং অসি অতোপ্পা লৈবাকশিংদা থাদোক্লম্মি। হৌজিক্কী মতমগী রেল সিস্তেম অমসুং কোচশিং অসি সাভলিদা পুথোক্লি। ইঞ্জিনীয়রিং, হেভি মেছিনরী, কেমিকেলস অমসুং ফার্মাস্যুতিকেল্স, পাৱর ইক্বিপমেন্ত, অমসুং এম.এস.এম.ই.শিংদা, ভদোদরা অসি মপাঙ্গল কনবা মেন্যুফেকচরিং হব অমা ওইরে। মফম অসিদা লৈরিবা গতি শক্তি য়ুনিভর্সিতী অসিনা ত্রান্সপোর্ত অমসুং লোজিতিক্সতা প্রোফেস্নেলশিং শেমগৎলি। হৌজিক ভদোদারাসু এয়রোস্পেস সেক্তরদা অনৌবা মশক অমা শেমগৎনবা হোৎনরি। মফম অসিদা এয়রক্রাফ্ট মেন্যুফেকচরিং প্রোজেক্ত অসি খোঙজেল য়াংনা খুমাং চাউশিল্লি।

মরুপশিং,

গুজরাত অমসুং লৈবাক অসিদা চাউখৎ-থৌরাংগী থবকশিং অসিগী মরক্তা, অতোপ্পা ৱাফম অমনা হেন্না হেন্না সেন্সিতিব ওইরক্লি। হৌখিবা চহি খরা অসিদা, মালেম অসি তংদু লৈতাদবা ফিভমদা লৈরি। অহানবদা কোরোনাগী খুদোংচাদবা লাকখি, মতুংদা মালেমগী শেন্মিৎলোনগী শিংনবশিং লাকখি, অমসুং হৌজিক্তি নোংচুপ এসিয়াদা অৱাবা হেনগৎলক্লি। অসিগুম্বা ফিভমশিং অসিনা মালেম পুম্বদা লেপ্তনা শোকহল্লি, অমসুং ভারত অসি মখোয়না শোকহনবা ঙমদ্রি। করিগুম্বা কোরোনাগী লাইচৎ অসি চহিচা অসিগী খ্বাইদগী চাউবা অৱাবা ওইরম্লবদি, নোংচুপ এসিয়াদা লানগী মতুং ইন্না ওইরক্লিবা ফিভমশিং অসি চহি তরাগী মনুংদা খ্বাইদগী চাউবা অৱাবা ওইরিবশিংগী মরক্তা অমনি। ঐখোয়না অমত্তা ওইনা লাইচৎ অসিবু মায়থিবা পীরম্বগুম্না, ঐখোয়না হায়রিবা অৱাবা অসিসু মায়থিবা পীগনি।

অসিগুম্বা অৱাবা ফিভমশিং অসিনা মীচম প্রজাশিংদা য়ারিবা মখৈ শোকহন্দনবা সরকারনা লেপ্পা লৈতনা হোৎনরি। অদুবু অসিগুম্বা মতম অসিদা লৈবাক অসিনা মীয়াম্না শরুক য়াবগী শক্তি অসি য়াম্না মথৌ তাই। ভারতকী নাগরিক অমা ওইনা, ঐখোয়না ঐখোয়গী মথৌশিংবু মরুওইনা লৌগদবনি। মমাংগী দিকেদশিংদসু, লৈবাক অসিনা লান নৎত্রগা অচৌবা ক্রাইসিস থেংনরকপা মতমদা, নাগরিকশিংনা সরকারগী অপাম্বদা পাউখুম পীরদুনা মখোয়গী থৌদাংশিং অদু পাংথোকখি। ঙসিসু, লৈবাক অসিগী রিসোর্সশিংদা চৈথেং হন্থহন্নবা ঐখোয় পুম্নমক্না পুন্না থবক তৌমিন্নগদবনি। ভারতনা পোৎলম কয়া পুশিল্লকপদা ফোরেন এক্সচেঞ্জদা লুপা করোর লাখ কয়া চাদিং তৌরি। মতম অমত্তদা, ইম্পোর্ত তৌরবা পোৎলমশিংগী মমল হেনগৎলক্লি অমসুং সপ্লাই চেনশিং য়াম্না শোকহল্লি। মরম অদুনা, লৈবাক অসিনা অনিরক থোক্না অৱাবা মায়োক্নরি।

মতৌ অসুম্না পাত্র অমবু তপ্না তপ্না থলহনবগুম্না, ঐখোয়নাসু ইম্পোর্ত তৌরবা পোত্থোকশিং শীজিন্নবা হন্থহনগদবনি, অমসুং দরকার লৈতনা ফোরেন এক্সচেঞ্জতা চাদিং তৌবা লনাইগী ওইবা থবক থৌরমশিং তৌরোইদবনি।

মরুপশিং,

ভারতকী ইম্পোর্তকী মরুওইবা শরুক অমা ক্রুদ ওইলনি। লাইবক থিবদি, মালেমগী ওইল অয়াম্বা সপ্লাই তৌরিবা লমদম অসি হৌজিক্কি ওইনা লানদা পন্দুনা লৈরি। মরম অদুনা, ফিভমশিং অসি নোর্মেল ওইদ্রিফাওবা, ঐখোয় পুম্নমক্না অপীকপা ৱাশকশিং পুন্না লৌগদবনি। ঙরাং ঐহাক্না কর্নাতকা অমসুং তেলঙ্গনাদা মসিগী মতাংদা ৱা ঙাংখি অমসুং ঙসি ঐহাক্না গুজরাত্তা অমুক্কা হন্না হায়জরি। অমসুং ঐহাক্না অদোমগী মথক্তা অহেনবা হক অমা লৈবনা, ঐহাক্না মসি নুংশিবা মওংদা হায়জরি: ওইথোকপা য়াবা মফম খুদিংমক্তা, পেট্রোল অমসুং দিজল শিজিন্নবা হন্থহল্লু। মেত্রো সর্ভিসশিং, ইলেক্ত্রিক বসশিং, অমসুং পব্লিক ত্রান্সপোর্তপু হেন্না শিজিন্নৌ। কারপুলিংবু প্রোমোৎ তৌবা। কার লৈবা মীওইশিংনা মীওই কয়াগা পুন্না চৎমিন্নগদবনি। ইলেক্ত্রিক ভেহিকল লৈবা মীওইশিংনসু অতোপ্পশিংদা মতেং পাংনবা মাংলোমদা চংশিনগদবনি।

মরুপশিং,

দিজিতেল তেক্নোলোজীনা থবক কয়া অমা লায়থোকহল্লে। তেক্নোলোজীনা ঐখোয়দা য়াম্না কান্নবা পীবা য়াই। গবর্নমেন্ত অমসুং প্রাইবেৎ ওফিস অনিমক্না ভর্চুএল মীফমশিং অমসুং য়ুমদগী থবক তৌবগী থৌরাংশিংবু মরুওইনা লৌবা অসি য়াম্না মরু ওই। ঐহাক্না স্কুল খরদা মতম খরগী ওইনা ওনলাইন ক্লাসকী থৌরাং তৌনবা হায়জরি।

মরুপশিং,

ফ্যুএল খক্তমক নত্তনা, চিঞ্জাক্কী ওইল ইম্পোর্ত তৌবদসু অচৌবা মশিং অমগী ফোরেন এক্সচেঞ্জ শিজিন্নৈ। করিগুম্বা ঐখোয়না চেকশিন থৌরাং লৌখৎলবদি অমসুং অচাথাও শিজিন্নবা হন্থরবদি, লৈবাক অমসুং ঐখোয়গী হকশেল অনিমক কান্নবা ফংগনি। অমসুং ঐহাক্না মসি মরু ওইনা সুরতকী মীয়ামদা হায়জরি।

অদোমগী ইমুং মনুংগী মীশক অমা ওইনা, ঐহাক্না ইচিল-ইনাও পুম্নমক্তা হায়জরি মদুদি সনা পুশিল্লকপসিনা ফোরেন এক্সচেঞ্জগী অচৌবা শেল চাদিং তৌহল্লি। ঐহাক্না লৈবাক মীয়াম পুম্নমক্তা হায়জরি মদুদি ফিভম অসি নোর্মেল ওইদ্রিফাওবা ঐখোয়না সনা লৈবা তোক্কদবনি। হৌজিক্তি সনাগী মথৌ তাদ্রে।

মরুপশিং,

ঙসি, মতমগী মথৌ তাবা অসি 'ভোকেল ফোর লোকেল' অসি মীয়ামগী খোঙজং অমা ওইহনবা অসিনি। মপানগী পোৎথোকশিংবু মফমসিগী পোৎথোকশিংগা মহুৎ শিন্দোক্কদবনি। অদোমগী খুঙ্গংশিং, সহরশিং অমসুং লৈবাকশিংদগী ওন্তপ্রিন্যুওরশিংবু মপাঙ্গল কনখৎহনবা। মফম অসিদা লৈরিবা মীওই কয়ানা অফবা অমসুং মালেমগী থাক্কী পোৎলমশিং পুথোকই।

মরুপশিং,

ঐখোয়গী অয়াম্বনা লৌউ-শিংউগী লমদগীনি। লৌউ-শিংউদা, ঐখোয়না লমদমসিগী ফর্তিলাইজরশিং অমসুং নেচরেল ফার্মিংবু থৌগৎকদবনি। সোলর পম্পশিংনা দিজল পম্পশিংবু মহুৎ শিনগদবনি। ঐখোয়না লৌমীশিংগী মচানুপা অমসুং মচানুপীশিংনি। ঐখোয়না অহানবদা ঐখোয়গী লমশিং অমসুং ইমা পৃথীবি কনগদবনি। ঐখোয়না কেমিকেল ফর্তিলাইজর শিজিন্নদুনা ঐখোয়গী লৈহাও অসি মাংহল্লোইদবনি। মরম অদুনা, ঐহাক্না ময়াম পুম্নমকপু, অদোমগী খুঙ্গংদা লৈরিবা লৌমী খুদিংমকপু কেমিকেল ফর্তিলাইজরদগী লাপথোক্নবা অমসুং নেচরেল ফার্মিংগী মায়কৈদা লমজিংনবা হায়জরি।

মরুপশিং,

নখোয় কয়ানা শীজিন্নবা য়াবা অতোপ্পা মরুওইবা ৱাফম অমসু লৈরি – শাওবিগনুকো। ছুতি হৌরকপগা লোয়ননা অঙাংশিংদা মপান লৈবাক্তা চৎনবগী তিকেৎশিং পীবা অসি চৎনবী অমা ওইরক্লি। মীশিংনা মপান্দা ছুতি চৎলি। কালেন ছুতি অদু য়ৌরক্লে। হৌজিক্কী মতমদা মপাল লমদা চৎপা অমসুং মপাল লমদা লুহোংবা অসি হেনগৎলক্লিবা চৎনবী অমা ওইরক্লি। মমাংদদি, মীশিংনা ঐঙোন্দা চেপাউ পীরম্মি; হৌজিক্তি থাদ্রে, মরমদি মপান্দা লুহোংবগী থৌরমশিং পাংথোক্লি। অদুম ওইনমক মসিনা অচৌবা ফোরেন এক্সচেঞ্জ চাদিং থোকহল্লি।

মরুপশিং,

মসিগী মতাংদা খল্লু - ভারত্তা ঐখোয়না ঐখোয়গী ছুতিশিং কায়থোকপা ঙম্বা ফজরবা মফমশিং লৈব্রা? ঐখোয়না ঐখোয়গী অঙাংশিংদা ঐখোয়গী পুৱারী তাকপীগদবনি অমসুং ঐখোয়গী মফমশিং অসিদা চাউথোকচগদবনি। ঐখোয়না ভারত মনুংদা ছুতিদা চৎপা অসি য়াম্না মরু ওই। অমসুং লুহোংবগী মতাংদসু, ঐহাক্না থাজৈ মদুদি ভারত্তগী হেন্না অশেংবা মফম অমা লৈরম্লোই। মফম অসিদা লুহোংবগী থৌরম পাংথোকপা মতমদা, ঐখোয়গী ‌ইপা-ইপুগী লৈহাও অসিমক্না ঐখোয়দা য়াইফ-মঙ্গোল পীরি।

লুহোংবগীদমকসু, ভারত্তা অফবা মফম কয়া লৈ, অমসুং ঐখোয়না মখোয়শিং অসি খনগদবনি। গুজরাত মশাদা, মশীং থীঙমদ্রবা ফজরবা মফম কয়া লৈ। ঐহাক্না অখন্ননা ঐহাক্কী পতিদার ব্রাদরশিংদা হায়জরি মদুদি হৌজিক্তি অদোম্না স্তেচু ওফ য়ুনিতীদা লুহোংবগী থৌরমশিং পাংথোক্কদবনি, মদুদা সরদার সাহেবনা লুহোংবা খুদিংমক্তা য়াইফ-মঙ্গোল পীগনি। শান্তি অমসুং স্পিরিচুএলিতিগীদমক হরিদ্বার অমসুং ঋষিকেশতা শেম-শারিবা অসিগুম্না, স্তেচু ওফ য়ুনিতীদসু লুহোংবগীদমক্তা মান্নবা খুদোংচাবশিং শেমগৎকদবনি।

হৌখিবা চহিশিংদা স্তেচু ওফ য়ুনিতী অমসুং একতা নগর অসি মরু ওইবা তুরিজম সেন্তরশিং ওইনা থোরক্লে। স্তেচ্যু ওফ য়ুনিতীদা মী কয়া অমা লাক্নবগীদমক ঐখোয়না য়ারিবমখৈ মীওই কয়া অমা পুক্নিং থৌগৎপা ঙমগদ্রা? ভারত মচা কয়ানা মপান্দা লৈরি। ঐনা মখোয়দা হায়জরি মদুদি মপান্দা লৈবা ইমুংশিংবু ভারত্তা পুরকপা অসি মখোয়গী থৌদাংনি। স্তেচু ওফ য়ুনিতী য়েংদ্রিবা ভারতকী নৎত্রগা মপাল লৈবাক্কী ইমুং মনুং খুদিংমকপু য়ামদ্রবদা মফম অদুদা চৎনবা পুক্নিং থৌগৎপীয়ু। একতা নগর অসি লুহোংবগীদমক্তা অফবা মফম অমা ওইরকপা য়াই। স্তেচ্যু ওফ য়ুনিতীদা লৈরিবা খুদোংচাবশিং অসি য়াম্না ফৈ, অমসুং মালেমগী খ্বাইদগী ৱাংবা স্তেচ্যু অসি সরদার বল্লভভাই পতেলগীনি হায়না ঐখোয় পুম্নমক্না চাউথোকচরি। লৈবাক অসিগী নাগরিক অমত্তনা মসিদা চাউথোকচবা পোক্তবা ঙম্লোই।

মরুপশিং,

ঐনা পনখিবা খোঙথাং পুম্নমক অসি অপীকপা খোঙথাংশিংনি; ঐনা অদোমদা অরুবা থবক অমত্তা তৌনবা হায়খিদে। অদুবু নীংশিংবীয়ু, ভারত মচা করোর ১৪০না অমত্তা ওইনা হোৎনমিন্নবা মতমদা অপীকপা থবকশিং অসিমক লৈবাক অসিগী খ্বাইদগী চাউবা শক্তি ওইরকই। মীওই করোর ১৪০না খোঙথাং অমা মাংদা চংশিল্লকপা মতমদা, লৈবাক অসি খোঙথাং করোর ১৪০না খুমাং চাউশিলহল্লি।

মরম অদুনা, ঐখোয়না অমুক্কা হন্না অমত্তা ওইনা পুনশিনবা তাই, মসিনা খুমাং চাউশিনবা অমসুং চাউখৎ-থৌরাংদা অৱাবা অমত্তনা অপনবা পীবা ঙমলোই। ঐহাক্না থাজবা থম্লি মদুদি ঐখোয় পুন্না ৱারেপশিং অসি মপুং ফাহনগনি অমসুং লৈবাক অসিবু মপাঙ্গল কনখৎহল্লগনি।

অমসুং গাগজী ভাইদা ঐহাক্না ৱাফম অমা হায়জনীংই। অদোম্না সরদার গৌরব রত্ন এৱার্দ পীদুনা ঐবু ইকায় খুম্নবা উৎখ্রে। সরদার সাহেবকী মিংদা এৱার্দ অমা পীরকপা মতমদা, থৌদাং অসি য়াম্না হেনগৎলকই। গাগজী ভাইনা ঐবু য়াম্না হৈনা শম্নহল্লে অমসুং ঐবু তুং হন্দনবা হায়খ্রে। সরদার সাহেবকী মঙলান অমসুং লোইশিন্দবা থবক পুম্নমক ঐহাক্না মপুং ফাহনগদৌরিবনি হায়বসি ঐহাক্কী লাইবক্তা তম্লম্বা ওইরম্বা য়াই।

ঙসি, মসিগী ইকাই খুম্নবা অমসুং এৱার্দ অসি ফংলবা মতুংদা, ঐহাক্না ময়াম পুম্নমক্কী য়াইফ-মঙ্গোলগা লোয়ননা গুজরাতকী লৈহাওদগী ঐহাক্না ফংলকপা শক্তি অমসুং মগুনশিং অসিনা সরদার সাহেবকী মঙলানশিং মপুং ফাহন্নবগীদমক থবক তৌবদা ঐহাক্না মনিং হল্লোই হায়না ঐহাক্না থাজবা পীজরি। গুজরাতনা ঐহাক্কী মওং অদু য়াম্না ফজনা খঙই – মনিং হনবা হায়বা অসি ঐহাক্না তৌগদবা নত্তে।

মসিগী ইকাই খুম্নবা অসিনা ঐগীদমক য়াম্না মরু ওই। ঐহাক্না জেনরেল কেরিয়াপ্পাগী মতাংদা ৱারী অমা ইখি। মহাক্কী খুঙ্গংদা মহাকপু ইকায় খুম্নবা উৎনবা থৌরম অমা পাংথোক্নবা তৌরম্মি অমসুং মহাক্না য়াম্না নুংঙাইখি। করিগীদমক্তা হায়রিবনো হায়না মীয়াম্না হংবদা, মহাক্না হায়খি মদুদি মালেম পুম্বদা মহাক্না মিলিতরীগী চৎনবীগী মতুং ইন্না সেল্যুতশিং অমসুং ইকায় খুম্নবা ফংখি, অদুবু য়ুমদা ইকায় খুম্নবা ফংবগী নুংঙাইবা অদুদি য়াম্না খেন্নৈ।

ঙসিদি, ভারতকী প্রধান মন্ত্রীবু মালেম পুম্বনা ইকায় খুম্নৈ মরমদি ভারত অসি শক্তি লৈরক্লি। অদুবু করিগুম্বা মীওই অমনা মশাগী মীওইশিংদগী, মশাগী ইমুং মনুংদগী ময়ামগী য়াইফ-মঙ্গোল লৌরকপা মতমদা, থবক তৌবগী পাঙ্গল অদু য়াম্না হেনগৎলকই।

সরদার রত্ন এৱার্দকী মওংদা অদোম্না ঐঙোন্দা পীরক্লিবা য়াইফ-মঙ্গোল অসিগীদমক্তা ঐহাক ময়াম পুম্নমক্কী মফমদা য়াম্না থাগৎচরি। অমসুং ঐহাক্না মসিগী ইকায়খুম্নবা অসি লমন তোনশিনবগী মওংদা লৌজরি।

অদোম্না মাংলোমদা চংশিল্লিবা অদোমগী মঙলানশিং অমসুং ৱারেপশিং অদু মপুং ফাহন্নবগীদমক ঈশ্বরনা অদোমদা অমুক্কা হন্না শক্তি পীবীয়ু। সরদার সাহেবকী য়াইফ-মঙ্গোল অসি অদোমদা মতম পুম্নমক্তা লৈহল্লকপা ওইরসনু, অমসুং অদোম্না পঙ্কজ ভাইগুম্বা মরুপশিং অসি অদোমদা পীনবিবা ওইরসনু। ঐখোয় অহুম্না অখন্নবা মরী অমা লৈনরি - পঙ্কজ ভাই, নরহরি অমিন অমসুং ঐহাক ঐখোয় পুম্নমক নবনির্মন মুভমেন্তকী মচাশিংনি। ঙসি পঙ্কজ ভাইনা অচৌবা থৌদাং অমা লৌরকপা অসিদা ঐহাক নুংঙাইবা ফাওই।

হন্না-হন্না থাগৎচরি।

সরদারনা য়াইফরে! সরদারনা য়াইফরে! থাগৎচরি। থাগৎচরি।

***