న్యూఢిల్లీలో జరిగిన అత్యున్నత సమావేశంలో వరదలు, వడగాలులను ఎదుర్కోవడంలో దేశ సన్నద్ధతను కేంద్ర హోం, సహకార శాఖ మంత్రి శ్రీ అమిత్ షా సమగ్రంగా సమీక్షించారు.

జాతీయ విపత్తు నిర్వహణ సంస్థ (ఎన్‌డీఎంఏ) సహకారంతో జమ్మూ కశ్మీర్, లద్ధాఖ్, ఉత్తరాఖండ్, హిమాచల్‌ప్రదేశ్, అరుణాచల్‌ప్రదేశ్, సిక్కింలోని అత్యధిక ముప్పు కలిగిన 30 సరస్సుల కోసం అభివృద్ధి చేస్తున్న ముందస్తు హెచ్చరికల వ్యవస్థలో కనీసం 60 సరస్సులను చేర్చాలని ఈ సమావేశంలో కేంద్ర హోం మంత్రి అమిత్ షా చెప్పారు. కేంద్ర, రాష్ట్ర స్థాయుల్లో వరద అంచనా కోసం సమీకృత వ్యవస్థ ఉండాలని శ్రీ షా అన్నారు.

దేశంలోని ప్రతి రాష్ట్రంలోనూ వరద సంక్షోభ నిర్వహణ బృందాలను (ఎఫ్‌సీఎంటీ) ఏర్పాటు చేసి, వాటిని క్రియాశీలకంగా మార్చాలని కేంద్ర హోం మంత్రి శ్రీ షా చెప్పారు. విపత్తులకు సంబంధించి జాతీయ విపత్తు నిర్వహణ సంస్థ (ఎన్‌డీఎంఏ) జారీ  చేసిన మార్గదర్శకాలు.. అవగాహన పెరగడానికి, ఏకోన్ముఖ ప్రభుత్వ విధాన అభివృద్ధికి దోహదపడ్డాయన్నారు. అయితే రాష్ట్రం, జిల్లా, మున్సిపల్ స్థాయుల్లో ఈ మార్గదర్శకాల అమలును సమీక్షించడం ద్వారా వాటి ఆచరణను మరింత బలోపేతం చేయవచ్చని తెలిపారు. అటవీ అగ్ని ప్రమాదాలు, వడగాలులు, వరదలకు సంబంధించి హోం మంత్రిత్వ శాఖ ఆదేశాలను, ఎన్‌డీఎంఏ మార్గదర్శకాలను ఎన్ని రాష్ట్రాలు అనుసరిస్తున్నాయో అంచనా వేసేందుకు ఎన్‌డీఎంఏ ఓ అధ్యయనం చేపట్టాలని ఆయన అన్నారు.

ప్రధానమంత్రి శ్రీ నరేంద్ర మోదీ నాయకత్వంలో సున్నా ప్రాణనష్టంతో విపత్తు నిర్వహణ దార్శనికతను అమలు చేసేందుకు కృషి చేయాలని కేంద్ర హోం శాఖ మంత్రి అన్నారు. నీటి నిల్వ, చెక్‌డ్యామ్ ప్రాజెక్టుల ద్వారా జల సంరక్షణ, భూగర్భ నీటి మట్టాలను పెంచేందుకున్న అవకాశాలను అన్వేషించాలని చెప్పారు. చెక్ ‌డ్యాముల నిర్మాణం ద్వారా నీటిని నిల్వ చేయడం, వడగాలుల ప్రభావాన్ని తగ్గించాలని తెలిపారు. పర్యావరణ సమతుల్యతను నిర్వహించడానికి చేస్తున్న ప్రయత్నాలు మరింత బహుముఖంగా ఉండేలా సీఏఎంపీఏ నిధులను ఉపయోగించుకోవాలని చెప్పారు.

శీతోష్ణస్థితి మార్పుల కారణంగా మారుతున్న వాతావరణ పరిస్థితులు, దానివల్ల పెరుగుతున్న విపత్తు సంబంధిత సవాళ్లను పరిష్కరించేందుకు ఏకోన్ముఖ ప్రభుత్వం, ఏకోన్ముఖ సమాజం అనే విధానాన్ని అనుసరిస్తూ ఒక బృహత్ ప్రణాళికను సిద్ధం చేయాలని శ్రీ అమిత్ షా చెప్పారు. కొత్త వెబ్‌సైట్లను, యాప్‌లను అభివృద్ధి చేయడానికి కాకుండా ఇప్పటికే ఉన్నవాటిని ఏకీకృతం చేయడం, మెరుగుపరచడంపై దృష్టి సారించాలని ఈ సమావేశానికి హాజరైన మంత్రిత్వ శాఖలు, విభాగాల అధికారులకు సూచించారు. వాతావరణ సూచనలను, హెచ్చరికలను విస్తృతంగా, సమర్థంగా ప్రసారం చేయాలని కూడా ఆయన అన్నారు.

వర్షాకాలంలో సంభవించే ప్రాణ నష్టాన్ని, వాతావరణ సూచనల కచ్చితత్వాన్ని, వ్యవసాయ రంగానికి జరిగిన నష్టాన్ని అధ్యయనం చేయడం ద్వారా వచ్చే వర్షాకాలానికి అంచనాలను మరింత మెరుగుపరిచే ప్రయత్నాలు చేపట్టాలని కేంద్ర హోం మంత్రి అమిత్ షా అన్నారు.

సమావేశంలో పాల్గొన్న మంత్రిత్వ శాఖలు, విభాగాలు చేపడుతున్న పనిని, వాటి మధ్య సమన్వయాన్ని శ్రీ అమిత్ షా అభినందించారు. వాతావరణ సంబంధిత ప్రణాళికలను క్షేత్ర స్థాయికి చేర్చాల్సిన సమయం ఆసన్నమైందని ఆయన అన్నారు.

ప్రధానమంత్రి శ్రీ నరేంద్ర మోదీ నాయకత్వంలో వరదలు, ఇతర విపత్తుల ప్రభావాన్ని తగ్గించేందుకు కేంద్ర హోం మంత్రి శ్రీ అమిత్ షా అత్యున్నత ప్రాధాన్యమిచ్చారు. ఏటా వరదల సన్నద్ధతపై కేంద్ర హోం మంత్రి సమగ్ర సమీక్ష నిర్వహిస్తారు. ఆయన అందించిన ఆదేశాలకు అనుగుణంగా ముఖ్యమైన చర్యలు చేపట్టారు. వీటిలో భాగంగా భారత వాతావరణ విభాగం (ఐఎండీ), కేంద్ర జల సంఘం (సీడబ్ల్యూసీ) ద్వారా వర్షపాతం, వరదలకు సంబంధించిన ముందస్తు అంచనా వ్యవధిని మూడు నుంచి ఏడు రోజులకు పెంచారు. అలాగే వడగాలుల అంచనా ప్రమాణాలను సైతం మెరుగుపరిచారు.

ఈ సమావేశంలో కేంద్ర జల శక్తి మంత్రి శ్రీ సీఆర్ పాటిల్, కేంద్ర హోం కార్యదర్శి, వివిధ మంత్రిత్వ శాఖలకు చెందిన కార్యదర్శులు, ఉన్నతాధికారులు, జాతీయ విపత్తు నిర్వహణ సంస్థ (ఎన్‌డీఎంఏ) సభ్యులు, విభాగాధిపతులు, విపత్తు ప్రతిస్పందన దళం (ఎన్డీఆర్ఎఫ్), భారత వాతావరణ విభాగం (ఐఎండీ) డైరెక్టర్ జనరళ్లు, భారత జాతీయ రహదారుల సంస్థ (ఎన్‌హెచ్ఏఐ), కేంద్ర జల సంఘం (సీడబ్ల్యూసీ) ఛైర్ పర్సన్లు, జాతీయ రిమోట్ సెన్సింగ్ కేంద్రం (ఎన్‌ఆర్‌ఎస్‌సీ), ఇతర సంబంధిత శాఖల ఉన్నతాధికారులు హాజరయ్యారు.

***