U Myntri kam pohïing ka sorkar pdeng bad u Myntri ka tnad ïatreilang, u Amit Shah, u la peit bniah ïa ka jingpynkhreh jong ka ri ban ïakhun ïa ki jingshlei um bad ka jingshit kaba lah ban mih ha ka rukom kaba bniah ha ka jingïalang jong ki heh sorkar kaba la pynlong ha New Delhi.

Haba ai jingkren ha kane ka jingialang, u Myntri kam pohiing jong ka sorkar pdeng u Amit Shah u la ong ba dei ban kynthup ym duna ia ka 60 tylli ki pung ha ka jingthmu ban thaw ia ka rukom ai jingmaham kloi na ka bynta ki 30 tylli ki pung kiba don jingma ha Jammu & Kashmir, Ladakh, Uttarakhand, Himachal Pradesh, Arunachal Dipradesh, bad Sikkim ryngkat ka jingkyrshan jong ka National Disaster Management Authority (NDMA). U Shah u la ong ruh ba dei ban don ka rukom treikam kaba ïasohlang na ka bynta ban ioh jingtip lypa shaphang ka jingshlei um ha ki kyrdan jong ka Sorkar Pdeng bad Sorkar Jylla.

U Myntri kam pohiing ka sorkar pdeng u Amit Shah u la ong ba dei ban thaw bad pyntreikam ia ki Flood Crisis Management Team (FCMT) ha man la ki jylla jong ka ri. U la ong ba ki jingbthah ba la pynmih da ka National Disaster Management Authority (NDMA) na ka bynta ki jingjia lynshop ki bor ka mariang ki la ialam sha ka jingsngewthuh kaba kham bha bad ka jingpynwandur ia ka rukom treikam “Jong baroh kawei ka Sorkar”, hynrei ka jingbishar bniah ia ka jingbud ryntih ia kine ki jingbthah ha ki jylla, distrik, bad municipal ka lah ban pynkhlain shuh shuh ia ka jingpyntreikam ia ki. U la ong ruh ba ka NDMA kadei ban pynlong ïa ka jingwad bniah ban bishar katno tylli ki jylla ki bud ïa ki jingbthah jong ka Tnad kam pohiing bad ki kyndon jong ka NDMA na ka bynta ban ialeh pyrshah ïa ki jingpluh khlaw, ka jingshit, bad ki jingshlei um.

U Myntri kam pohiing jong ka sorkar pdeng u la ong ba hapoh ka jingialam jong u Myntri Rangbahduh ka ri u Narendra Modi, dei ban shim ia ki sienjam ban pyntreikam ia ka jingthmu jong ka Zero Casualty Disaster Management. U la ong ba dei ban wad ia ki lad ki lynti kiba kham heh na ka bynta ban pynneh pynsah ia ka um bad ban kyntiew ia ka um kaba don hapoh khyndew lyngba ki projek pynlang um bad check dam. Ka jingthmu jong ngi kadei ban long ban pynneh pynsah ia ka um da kaba shna ia ki check dam ha ki wah katba dang pynduna ruh ia ka jingktah jong ka jingshit. U la ong shuh shuh ba dei ban pyndonkam ia ka CAMPA Fund ban shim ia ki sienjam kiba kham bun bynta kiba thmu ban pynneh ia ka jinglong ryntih jong ka mariang.

U Amit Shah u la ong ba dei ban pynkhreh ia ka master plan ban weng ia ki jingkylla ha ka jinglong ka suinbneng kiba mih na ka jingkylla ka suinbneng bad ki jingeh kiba nang kiew kiba iadei bad ki jingjia lynshop ki bor ka mariang kiba mih na ki da kaba pdiang ia ka rukom treikam “Jong baroh kawei ka sorkar” bad “Jong baroh kawei ka imlang sahlang”. U la bthah ia ki ophisar jong ki tnad sorkar pdeng bad ki tnad kiba don ha kane ka jingialang ba kin pynleit jingmut ha kaba pynskhem bad kyntiew ia ki app bad ki portal kiba la don lypa ha ka jaka ban shna thymmai. U la ong ruh ba dei ban pynsaphriang jingtip lypa shaphang ka jinglong ka suinbneng bad ki jingai jingtip lypa.

U Myntri kam pohiing jong ka sorkar pdeng u Amit Shah u la ong ba dei ban shim ia ki sienjam ban kyntiew shuh shuh ia ka jingkhein jong ngi ia ka aiom slap ban wan da kaba wad bniah ia ki jingiap ha ka aiom slap, ka jinglong thikna jong ki jingbatai lypa jong ngi, bad ka jingjulor ia ka kam rep kam riang.

U Amit Shah u la iaroh ia ki kam ba la pyntrei da ki tnad sorkar pdeng bad ki tnad ba iashim bynta ha kane ka jingialang, bad kumjuh ruh ia ka jingiatreilang hapdeng jong ki. U la ong ba ka por mynta ka la dei ba ki jingthmu jong ngi kiba iadei bad ka jinglong ka suinbneng kin poi sha ki jaka nongkyndong.

Hapoh ka jingïalam jong u Myntri Rangbahduh ka ri u Narendra Modi, u Myntri kam pohïing ka sorkar pdeng u Amit Shah u la buh hakhmat eh ïa ka jingpynkhreh na ka bynta ban pynduna ïa ka jingktah na ki jingshlei um bad kiwei kiwei ki jingjia lynshop ki bor ka mariang. Man la u snem, u Myntri kam pohiing jong ka sorkar pdeng u ju pynlong ia ka jingbishar bniah ia ka jingpynkhreh shwa ka jingshlei um, bad la shim katto katne ki sienjam kiba kongsan katkum ki jingbthah jong u. Kine ki kynthup ia ka jingpynjlan ia ka por ba la buh lypa na ka bynta ka jingantad ia ka por slap bad jingshlei um da ka India Meteorological Department (IMD) and the Central Water Commission (CWC) na ka 3 sngi sha ka 7 sngi, kumjuh ruh ban kyntiew ia ki jingthew ia ka bor ban khein lypa ia ka jingshit.

Ha kane ka jingialang la iadonlang u Myntri ka tnad Jal Shakti jong ka sorkar pdeng u C. R. Patil, u Union Home Secretary, ki secretary bad ki heh ophisar jong ki tnad bapher bapher, ki dkhot bad ki heh jong ki tnad jong ka National Disaster Management Authority (NDMA), ki Director General jong ka National Disaster Response Force (NDRF) bad ka India Meteorological Department (IMD), ki Chairperson jong ka National Highways Authority of India (NHAI) bad ka Central Water Commission (CWC), nalor ki heh ophisar na ka National Remote Sensing Centre (NRSC) bad kiwei kiwei ki tnad kiba don bynta.

***