তেলঙ্গানাগী রাজ্যপাল শ্রী সিব প্রতাপ সুক্লা, রাজ্যগী চীফ মিনিষ্টর শ্রী বেভান্থ রেদি, কেন্দ্রগী মন্ত্রীমন্দলগী ঐগী মরুপ কিসন রেদি, বুন্দি কুমার, সংসদকী ঐগী মরুপশিং কোন্দা বিশ্বেশ্বার রেদি, তেলঙ্গানা সরকারগী মিনিষ্টরশিং, অতোপ্পা মীয়ামগী মীহুৎশিং, ইবেম্মাশিং অমসুং ইবুংঙোশিং!

সাইবরবাদকী মরুওইবা অসি লৈবাক মনুং অমসুং মালেম অনিমক্কীনি। মসি তেলঙ্গানা অমসুং লৈবাক অসি য়াংনা চাউখৎনবগী মরুওইবা মফম অমনি। তেলঙ্গানা লৈবাক অসিদা খ্বাইদগী চাউবা মেনুফেকচরিংগী মফম অমা ওইনবা ঙসি সাইবরবাদতা অচৌবা প্রোজেক কয়া হৌদোক্লে। ঙসি শঙ্গারিবা অমসুং উরেপ-উয়ুং তম্লিবা প্রোজেকশিংনা তেলঙ্গানাগী অনৌবা থবক কয়া ফংহনগনি অমসুং লম্বী-থোঙ ফগৎহনগনি। প্রোজেকশিং অসিগীদমক ঐনা তেলঙ্গানাগী মীয়ামদা হরাওবা ফোঙদোকচরি।

মরুপশিং,

ঙসি, ভারত রিফোর্ম এক্সপ্রেস তোংদুনা চৎলি। ঙসিগী ভারতনা অনৌবা মতমগী ইনফ্রাষ্টকচর শেমগৎলি। মসি জহিরাবাদ ইন্দষ্ট্রিয়েল এরিয়া শেমগৎপগী পান্দম অদুনি। মসি ইন্দষ্ট্রিয়েল এরিয়াশিং, ইন্দষ্ট্রিয়েল কোরিদোরশিং শেমগৎনবা ভারত সরকারগী লৈবাক শীনবা থুংনা পায়খৎলিবা খোঙজংগী শরুক্নি। মসি ইন্দষ্ট্রিয়েল স্মার্দ সিতিগী শরুক অমা ওইরগনি। মফম অসিদা মালেম থাক্কী ইনফ্রাষ্ট্রকচর, ঈশিং মরাংকাইনা ফংহনবা, অৱাংবা থাক্কী আই.তি.সি নেতৱার্ক লৈগনি, মালেম শীনবা থুংবগী ইনভেষ্টরশিংনা মখোয়গী উদ্যোগকী দরকার ওইবা খুদিংমক ফংগনি। হায়রিবা খুদোংচাবশিং অসি  শেম-শাগৎপদা ভারত সরকারনা লুপা করোর লিশিং কয়া চাদিং তৌগনি অমসুং তেলঙ্গানা অমসুং হায়দ্রবাদতা নহারোল লিশিং কয়াদা থবক পীগনি। মফম অসিদা শাগৎকদৌরিবা গারিশিং, মেছিন্নরি অমসুং চীঞ্জাক শেম-শাবগী উদ্যোগশিংনা তেলঙ্গানাগী লৌমীশিং অমসুং শিন্মীশিংগী ফিবম ফগৎহনগনি।

মরুপশিং,

মমাংঙৈদা, ভারতনা খ্বাইদগী চাউবা ইকোনোমি ওইরিঙৈদা, ঐখোয়গী তেক্সতাইল ইন্দষ্ট্রিনা অচৌবা থৌদাং অমা লৌখি। হৌজিক ঐখোয়না ঐখোয়গী অফবা পুৱারিশিং অমুক হন্না ফগৎহল্লে। ৱারাঙ্গালগী পি.এম মিত্রা পার্কনা লৈবাক অসিগী তেক্সতাইলগী অওনবা পুরকপদা য়াংখৎহনগনি। পি.এম মিত্রা পার্কতা য়ুনিতশিংসু কেন্দ্র সরকারগী স্কিমশিংগী কান্নবশিং মপুংফানা ফংগনি। মখোয়সু কেন্দ্র সরকারগী পি.এল.আই স্কিমগী কান্নবা ফংগনি। অতোপ্পা ৱাহৈশিংদা, তেক্সতাইল পার্কনা মশিং য়াম্লবা থবক পীগনি। মরুওইনা, ঐখোয়গী ইচলশিং অমসুং ইচানুপীশিং খুদোংচাবা কয়া ফংলগনি।

মরুপশিং,

হৌখিবা চহি ১২ দা অনৌবা মতমগী লম্বী-থোঙদসু ভারত সরকারনা মরুওইনা লৌরে। মসি লম্বীশিং, রেলৱেজশিং, এয়রপোর্তশিং ওইবা য়াই, মখলগী খুদিংমক্কী লম্বী-থোঙদা মমাঙদা অমুক্ত ওইখিদ্রিবা মওংদা শেন থাদরে। নেসনেল হায়ৱেশিং খক্তদা লুপা করোর লাখ ২.৫ রোম থাদরে। মসিগী কান্নবা তেলঙ্গানাসু ফংলে। হৌখিবা চহি ১২ দা, তেলঙ্গানাদা নেসনেল হায়ৱে নেতৱার্ক শরুক অনি হেনগৎলে। তেলঙ্গানা অমসুং কর্নাতকা শম্নবা নেসনেল হায়ৱে পাকথোকহনবা অসিনা য়াম্না খুদোংচারগনি। মসিনা চৎথোক-চৎশিনগী মতম হন্থরগনি অমসুং ভারা কল্লগনি।

মরুপশিং,

২০১৪ গী মমাঙদা, অপুনবা অন্ধ্র প্রদেসকী রেলৱেজ বজেত লুপা করোর ১,০০০ য়ৌখিদে। রেভান্তা তারি, চুম্বরা? অপুনবা অন্ধ্র প্রদেসকী মতমদা, রেলৱেজ বজেত লুপা করোর ১,০০০ য়ৌখিদে। ঐনা হায়রিবা অসি অপুনবা অন্ধ্র প্রদেস খক্তগী নত্তে, ঙসিদি তেলঙ্গানাগী রেলৱে বজেত লুপা করোর ৫,৫০০ রোম্নি। হৌজিক লুপা করোর ৫০,০০০ রোমগী রেলৱেজ প্রোজেকশিং থবক পায়খৎলি। তেলঙ্গানাদা বন্দে ভারত মঙা অমসুং অমৃত ভারত ত্রেন তরুক চেল্লি।

মরুপশিং,

হন্দক কাজিপেত-বিজয়াৱাদা মল্তি-ত্রেক্কিং প্রোজেক্কী সেক্সন খর শঙ্গাখ্রে। মসিগী মথক্ত, কাজিপেত রেল অন্দর বাইপাস লাইনসু মীয়ামদা কৎথোকখ্রে। থবকশিং অসিনা চৎথোক-চৎশিন নুংঙাইহনগনি অমসুং পোৎ-চৈ পুথোক-পুশিন হেন্না য়াংখৎহনগনি।

মরুপশিং,

২১শুবা চহিচাগী মালেম অসিদা ইনর্জি য়াওদ্রবদি থবক খুদিংমক লেপকনি। মালেমগী মীওই খুদিংমক্না ইনর্জি সেকুরিতিগী মরুওইবা খঙলে। মরম অদুনা, কেন্দ্র সরকারনা ভারতকী ইনর্জি সেকুরিতিদা মমাঙদা অমুক্ত ওইখিদ্রিবা মওংদা শেন থাদরে। মালকাপুরদা ইন্দিয়ান ওইলগী অনৌবা তর্মিনেল শঙ্গাবা অসি মাইকৈ অসিদা থাংজিনবা মরুওইবা খোঙথাং অমনি। তর্মিনেল অসিনা তেলঙ্গানাগী দরকার ওইবা ইনর্জ ফংহনগনি, সপ্লাই চেন মপাঙ্গল কনখৎহনগনি।

মরুপশিং,

হৌখিবা চহিশিংদা, সোলার পৱারগী লমদা ভারতনা মালেমগী লৈবাকশিংগী মকোক্ত লৈরে। পেত্রোলদা ইথানোল য়ানশিনবগী অনৌবা থবক পায়খৎলে। মমাঙদা ঐখোয়না চাদা ১০০ এল.পি.জি ফংহন্নবা মীৎয়েং চঙখি, হৌজিক পাইপশিংদা মমল হোংবা গ্যাস ফংহন্নবা ঐখোয়না মীৎয়েং চঙলি, সি.এন.জিদা য়ুম্ফম ওইবা থবকশিং য়োকখৎলি। অসিগুম্বা থবকশিংনা মরম ওইদুনা ভারতনা মালেমগী অচৌবা ইনর্জিগী অৱাবা মায়োক্নবা ঙম্লে। ঙসি মপান লৈবাক্তগী পুশিল্লকপা পেত্রোল, দিজল অমসুং গ্যাস হৈশিংনা শীজিন্নগদবনি। মসিনা ফোরেন একচেঞ্জ কনবা ঙমগনি অমসুং লালগী অৱাবশিং মায়োক্নবা ঙমগনি।

মরুপশিং,

ঙসি, তেলঙ্গানাগী নহারোলশিং অনৌবা মঙলানশিং মঙলি। মফম অসিগী লৌমীশিং অনৌবা থাজবশিংগা লোয়ননা মাঙলোমদা চঙশিনবা পাম্লি। মফম অসিগী উদ্যোগশিং, এম.এস.এম.ইশিং, ষ্টার্দঅপশিংনা বিকসিত তেলঙ্গানা অমা শেমগৎপদা মখোয়গী থৌদাং লৌবা পাম্লি। করিগুম্বা তেলঙ্গানা চাউখৎলবদি, ভারত চাউখৎকনি। অদোমগী মঙলানশিং মঙফাওনবা ঙম্নবা কেন্দ্র সরকারনা মখা তানা থবক পায়খৎকনি হায়না তেলঙ্গানাগী মীওই খুদিংমক্ত ঐনা থাজবা পীরি। হৌজিক ঐখোয়গী রেভান্থ জিনা হায়খি মদুদি ঐখোয়না রাজনিতিগী ৱারি শারোই, ঐসু রাজনিতিগী ৱা ঙাংলোই। মরম অদুনা, রাজনিতিগী নত্তবা লম্বী অমদা ঐনা রেভান্থ জিদা হায়রি মদুদি চহি ১০ গী লৈবাক ঙাকপদা, ভারত সরকারনা গুজরাত্ত পীরিবা খুদিংমক, অদোমদা পীনবা ঐনা থৌরাং তৌরে। অদোম্না পাম্লিবা মফম অদুদা চৎপদা অদোম য়ৌবা ঙম্লোই। মরম অদুনা ঐগা লোয়ননা থবক তৌমিন্নবনা হেন্না ফগনি।

মরুপশিং,

ঐখোয়না গনতন্ত্রদা অচেৎপা থাজবা থম্লি, রাজ্যশিংদা তোঙান তোঙানবা সরকারশিং লৈবা অসি ফত্তবা থবক অমা নত্তে। অদুবু লৈবাক অসি চাউখৎনবগীদমক, রাজ্যশিং চাউখৎহনবা য়াম্না মরুওই। রাজ্যশিং চাউখত্তনা, চাউখৎপা লৈবাক অমা শেমগৎপা ওইথোক্লোই। মরম অদুনা, থৌরাংশিংগী মরুওইবদি রাজ্যশিং চাউখৎহনবনি, য়াংনা চাউখৎহনবা অমসুং মসিগী ৱাখল্লোনগা লোয়ননা ঐখোয় খুদিংমক পুন্না চাউখৎমিন্নবনি, অমসুং ঐখোয়গী মীৎমাঙদা ২০৪৭ দা বিকসিত ভারত অমা উবা ফংগনি। মসি মীওই খুদিংমক্ত পীবা ঐগী য়াইফ পাউজেলনি। অদোম ঙমখৈ লৈতনা থাগৎচরি।

দিসক্লেমর : মসি প্রধান মন্ত্রীগী ৱারোলদগী চাউরাকপা হন্দোকপনি। অশেংবা ৱারোল হিন্দীদা পীখি।

***

(রিলিজ আই.দি.: 2259591) ভিজিতর কাউন্তর : 3