وزیر اعظم جناب نریندر مودی 10 مئی 2026 کو کرناٹک اور تلنگانہ کا دورہ کریں گے۔ صبح 11 بجے کے قریب، وزیر اعظم بنگلورو میں دی آرٹ آف لیونگ کی 45 ویں سالگرہ کی تقریبات میں شرکت کریں گے اور اس موقع پر اجتماع سے خطاب کریں گے۔ اس کے بعد وزیر اعظم حیدرآباد کا سفر کریں گے اور دوپہر 3 بجے کے قریب، وہ تقریباً 9,400 کروڑ روپے کے متعدد ترقیاتی پروجیکٹوں کا سنگ بنیاد رکھیں گے، افتتاح کریں گے اور قوم کے نام وقف کریں گے۔ اس موقع پر وہ اجتماع سے خطاب بھی کریں گے۔ تقریباً 3:45 بجے، وزیر اعظم حیدرآباد میں سندھو ہسپتال کو قوم کے نام وقف کریں گے۔

وزیر اعظم بنگلورو میں

گرودیو شری شری روی شنکر کے ذریعہ 1981 میں قائم کیا گیا، دی آرٹ آف لیونگ 182 ممالک میں موجود ایک عالمی رضاکارانہ طور پر چلنے والی انسانی اور تعلیمی تنظیم بن گئی ہے۔ وزیر اعظم تنظیم کی 45ویں سالگرہ کی تقریبات اور گرودیو شری شری روی شنکر کی 70ویں سالگرہ کی تقریبات میں شرکت کریں گے۔

وزیر اعظم بنگلورو میں آرٹ آف لیونگ انٹرنیشنل سنٹر میں نو تعمیر شدہ دھیان مندر کا بھی افتتاح کریں گے، ایک وقف مراقبہ ہال جس کا تصور داخلی امن اور مجموعی فلاح و بہبود کی جگہ کے طور پر کیا گیا ہے۔ وہ آرٹ آف لیونگ کے ملک گیر خدمت کے اقدامات کا بھی آغاز کریں گے، جس میں ذہنی بہبود، دیہی ترقی، فطرت کے تحفظ اور سماجی تبدیلی پر مرکوز سال بھر کے منصوبوں کو شامل کیا جائے گا۔

وزیر اعظم حیدرآباد میں

وزیر اعظم تقریباً 9,400 کروڑ روپے کے متعدد ترقیاتی منصوبوں کا سنگ بنیاد رکھیں گے، افتتاح کریں گے اور قوم کو وقف کریں گے۔ ان منصوبوں کا مقصد اجتماعی طور پر رابطے کو مضبوط بنانا، لاجسٹکس کی کارکردگی کو بہتر بنانا، حفاظت کو بڑھانا اور مسافروں کو سفر کا بہتر تجربہ فراہم کرنا ہے۔

وزیر اعظم 3,175 کروڑ روپے سے زیادہ کی مجموعی پروجیکٹ لاگت سے حیدرآباد-پنجی اقتصادی راہداری پر گڈبیلور سے محبوب نگر تک قومی شاہراہ 167 کو چار لین کرنے کا سنگ بنیاد رکھیں گے۔ یہ منصوبہ ہموار، محفوظ اور بلاتعطل ٹریفک کی نقل و حرکت کو یقینی بنائے گا، سفر کے وقت میں تقریباً ایک گھنٹہ 30 منٹ کی تخفیف کرے گا جبکہ ایندھن کی کھپت اور گاڑیوں کی دیکھ بھال کے اخراجات کو کم کرے گا۔ یہ شاہراہ تلنگانہ اور کرناٹک کے درمیان رابطے کو مضبوط کرے گی اور دونوں ریاستوں میں صنعتی ترقی کو آسان بنائے گی۔

وزیر اعظم سنگاریڈی ضلع میں ظہیر آباد انڈسٹریل ایریا کا بھی سنگ بنیاد رکھیں گے، جسے حیدرآباد-ناگپور انڈسٹریل کوریڈور (ایچ این آئی سی) کے تحت قومی صنعتی گلیارہ ترقیاتی پروگرام کے حصے کے طور پر تیار کیا جا رہا ہے۔ 3,245 ایکڑ اراضی پر 2,350 کروڑ روپے سے زیادہ کی کل لاگت سے تیار کیا جا رہا ہے، یہ منصوبہ قومی شاہراہ -65 کے ساتھ اہم مقام پر واقع ہے اور بڑے شہروں، بندرگاہوں، ریل نیٹ ورکس اور ہوائی اڈوں کو ہموار ملٹی موڈل کنیکٹیویٹی فراہم کرے گا۔

ایک اسمارٹ انٹیگریٹڈ انڈسٹریل ٹاؤن شپ کے طور پر تصور کیا گیا، ظہیر آباد انڈسٹریل ایریا جدید اور پائیدار انفراسٹرکچر اور آئندہ نسل کی صنعتوں کو سپورٹ کرے گا۔ جن اہم شعبوں کی نشاندہی کی گئی ہے ان میں آٹوموبائل، فوڈ پروسیسنگ، مشینری، دھاتیں اور برقی آلات شامل ہیں۔ اس پروجیکٹ سے تقریباً 10,000 کروڑ روپے کی سرمایہ کاری کو راغب کرنے اور بڑے پیمانے پر روزگار کے مواقع پیدا کرنے کی توقع ہے، جو علاقائی اقتصادی ترقی میں نمایاں طور پر تعاون دے گی۔

وزیر اعظم وارنگل میں پی ایم متر پارک کا افتتاح کریں گے، جسے کاکتیہ میگا ٹیکسٹائل پارک بھی کہا جاتا ہے، اور جسے پی ایم متر اسکیم کے تحت تیار کیا گیا ہے۔ تقریباً 1,700 کروڑ روپے کی تخمینہ لاگت سے تیار کیا گیا، یہ بھارت کا اولین مکمل طور پر فعال پی ایم متر پارک ہے اور حکومت ہند کے 5ایف پر مبنی وژن - فارم سے فائبر سے فیکٹری سے فیشن سے فارن (بیرونِ ملک)تک -کو فعال کرتا ہے۔ اسٹریٹجک طور پر مجوزہ ناگپور-وجئے واڑہ گرین فیلڈ ایکسپریس وے (این ایچ-163جی) کے قریب اور این ایچ – 163 کے قریب واقع، یہ پارک بڑے ریلوے نیٹ ورکس اور بندرگاہوں کے لیے بہترین ملٹی موڈل کنیکٹیویٹی پیش کرتا ہے، جو عالمی تجارت کے لیے بغیر کسی رکاوٹ کے لاجسٹکس کو یقینی بناتا ہے۔ ایک عالمی معیار کے صنعتی ماحولیاتی نظام کے طور پر ڈیزائن کیا گیا، یہ پارک جدید ترین انفراسٹرکچر سے لیس ہے جس میں ایک وسیع اندرونی روڈ نیٹ ورک، وقف پاور سب سٹیشن اور یقینی پانی کی فراہمی شامل ہے۔ یہ صفر مائع اخراج کی تکنالوجی کے ساتھ مشترکہ صنعتی گندے پانی کی صفائی کے  مرکز کے ذریعے پائیدار ترقی پر بھی زور دیتا ہے۔

وزیر اعظم تقریباً 1,535 کروڑ روپے کے اہم ریلوے بنیادی ڈھانچہ پروجیکٹوں کو قوم کے نام وقف کریں گے۔ ان میں کازی پیٹ-وجئے واڑہ ملٹی ٹریکنگ پروجیکٹ کے متعدد حصے شامل ہیں جو 118 کلومیٹر پر محیط ہیں۔ یہ منصوبہ مصروف گرینڈ ٹرنک کوریڈور پر لائن کی گنجائش میں اضافہ کرے گا، تیز رفتار ٹرین آپریشنز کو یقینی بنائے گا، بھیڑ کو کم کرے گا، وقت کی پابندی کو بہتر بنائے گا اور پورے خطے میں مال بردار ٹریفک کو فروغ دے گا۔

مزید برآں، کازی پیٹ ریل انڈر ریل بائی پاس کو بھی قوم کے نام وقف کیا جائے گا۔ یہ اسٹریٹجک پروجیکٹ کازی پیٹ جنکشن کو حیدرآباد، بلہارشاہ اور وجئے واڑہ کی جانب بیک وقت ٹرینوں کی نقل و حرکت کو قابل بنا کر، آپریشنل کارکردگی کو بہتر بنائے گا اور تاخیر کو کم کرے گا۔

وزیر اعظم حیدرآباد میں انڈین آئل کے ملکاپور ٹرمینل پروجیکٹ کو قوم کے نام وقف کریں گے، جو 600 کروڑ روپے سے زیادہ کی لاگت سے تیار کیا گیا ہے۔ ملکاپور ٹرمینل پٹرولیم مصنوعات کی ہینڈلنگ کی صلاحیت کو بڑھانے اور خطے کی بڑھتی ہوئی توانائی کی طلب کو پورا کرنے کے لیے قائم کیا گیا ہے۔ ٹرمینل کی کل ٹینکیج کی گنجائش 1,65,000 کلو لیٹر (کے ایل) کے بقدر ہے۔

بھارت کے حفظانِ صحت کے بنیادی ڈھانچے کے لیے ایک اہم سنگ میل کے تحت، وزیر اعظم حیدرآباد میں ایک جدید ترین، کینسر کے لیے مخصوص ملٹی سپر اسپیشلٹی کواٹرنری کیئر غیر منافع بخش ادارہ سندھو ہسپتال بھی قوم کے نام وقف کریں گے۔ 18 منزلوں پر مشتمل2.1 ملین مربع فٹ رقبے میں پھیلے اس ہسپتال میں 1500 بستر، 150 سے زیادہ ڈاکٹروں کے مشاورتی کمرے اور 29 جدید آپریشن تھیٹر ہیں۔ ہسپتال میں جامع نگہداشت کیموتھراپی، ریڈی ایشن تھراپی، کینسر کی سرجری، بون میرو ٹرانسپلانٹس، جدید ترین کریٹیکل کیئر اور 33 سے زیادہ سپر سپیشلٹیز سہولتیں موجود ہیں، جو جدید تشخیص، جدید لیبارٹری اور بلڈ سنٹر کی سہولیات سے آراستہ ہیں۔

یہ پروجیکٹس وکست بھارت کے لیے وزیراعظم کے وکست تلنگانہ وژن کی عکاسی کرتے ہیں، جو اقتصادی ترقی کو آگے بڑھانے، معیارِ زندگی کو بہتر بنانے اور ایک تیز تر، زیادہ مربوط ملک کی تعمیر کے لیے مربوط بنیادی ڈھانچے کی ترقی پر توجہ مرکوز کرتے ہیں۔

**********

 (ش ح –ا ب ن)

U.No:6845