1.     2026 మే 6న ముగిసిన శాసనసభల సార్వత్రిక ఎన్నికలు, ఉప ఎన్నికలకు సంబంధించిన ఇండెక్స్ కార్డులు, గణాంక నివేదికలను భారత ఎన్నికల సంఘం ప్రచురించింది. ఎన్నికలు జరిగిన మొత్తం 830 అసెంబ్లీ నియోజకవర్గాలకు సంబంధించి కార్డులు, నివేదికలు ప్రచురితమయ్యాయి. పశ్చిమ బెంగాల్‌లోని 144-ఫల్తా నియోజకవర్గానికి 2026 మే 21న తిరిగి ఎన్నికలు జరగనున్నాయి.

2.     మునుపెన్నడూ లేనివిధంగా ఎన్నికల ఫలితాలు వెలువడిన 72 గంటల్లోనే శాసనసభల సాధారణ ఎన్నికలు, ఉప ఎన్నికలకు సంబంధించిన ఇండెక్స్ కార్డులు అందుబాటులోకి వచ్చాయి. గత ఏడాది కాలంలో ఎన్నికల సంఘం చేపట్టిన 30కి పైగా కార్యక్రమాల్లో ఇండెక్స్ కార్డులు, గణాంక నివేదికల డిజిటల్ నవీకరణ, వేగవంతమైన ప్రచురణ ఒకటిగా గుర్తించవచ్చు. ఈసీఐనెట్‌ను ప్రవేశపెట్టక ముందు క్షేత్రస్థాయి అధికారులు డేటాను వారే స్వయంగా నింపాల్సి రావడం వల్ల ఈ ప్రక్రియకు కొన్ని వారాల నుంచి నెలల వరకు సమయం పట్టేది.

3.     ఇండెక్స్ కార్డుల్లో అభ్యర్థులు, ఓటర్లు, పోలైన ఓట్లు, లెక్కించిన ఓట్లు, పార్టీల వారీగా, అభ్యర్థుల వారీగా పోలైన ఓట్లు మొదలైన అనేక అంశాలకు సంబంధించిన సమాచారముంటుంది. ఈసీఐనెట్ యాప్ (ఎబోట్ ఎలక్షన్స్ ట్యాబ్ → కరెంట్ ఎలక్షన్స్ → ఇండెక్స్ కార్డులు), ఈసీఐ అధికారిక వెబ్‌సైట్ https://www.eci.gov.in/statistical-reports రెండింటి నుంచి ఈ కార్డులను పొందవచ్చు.

4.     సార్వత్రిక ఎన్నికలకు సంబంధించి ఈసీఐ ఏకకాలంలో 14 గణాంక నివేదికలను ప్రచురించింది. ఎన్నికల ఫలితాలు వెలువడిన 72 గంటల్లోపే గణాంక నివేదికలను ప్రచురించడం ఇదే మొదటిసారి.

5.     రాష్ట్ర స్థాయి, అసెంబ్లీ నియోజకవర్గాల వారీగా వివరాలు, పోలింగ్ కేంద్రాల సంఖ్య, రాష్ట్ర/ అసెంబ్లీ నియోజకవర్గాల వారీగా ఓటింగ్ శాతం, ఓట్లు వేసిన స్త్రీలు, పురుషుల సంఖ్య, పార్టీల వారీగా ఓట్ల వాటా, నియోజకవర్గ డేటా సంగ్రహ నివేదిక, నియోజకవర్గాల వారీగా వివరణాత్మక ఫలితాల వంటి అనేక అంశాలు గణాంక నివేదికల్లో ఉంటాయి.

6.     విద్యావేత్తలు, పరిశోధకులు, ప్రజలందరికీ ఎన్నికల సంబంధిత సమాచారాన్ని అందుబాటులోకి తెచ్చి పారదర్శకతను ప్రోత్సహించడం లక్ష్యంగా.. ఎన్నికల సంఘం సుమోటోగా గణాంక నివేదికలను ప్రచురిస్తోంది. ఇండెక్స్ కార్డుల్లో నింపిన తుది సమాచారం ద్వారా ఈ నివేదికలను రూపొందించారు.

7.     సంబంధిత రిటర్నింగ్ అధికారులు నిర్వహించే చట్టబద్ధమైన పత్రాల్లో ప్రాథమిక సమాచారం ఉంటుంది. వాటిలోని సమాచారమే అంతిమమైనది. 

***