য়োর এক্সিলেন্সী,

জেনরেল সেক্রেতরী অমসুং প্রসিদেন্ত তো লম,

লৈবাক অনিগী দেলিগেৎশিং,

মীয়ামগী মরুপশিং,

খুরুমজরি!

সিন জাৱো!

ঐহাক্না রাস্ত্রপতি তো লমবু ভারত্তা তরাম্না ওকপদা য়াম্না নুংঙাইবা ফাওই। ভিয়েৎনামগী রাস্ত্রপতি ওইরবা মতুং থা অমগী মনুংদা মহাক্না অৱাংবা থাক্কী মীহুৎ কাংবু অমসুং বিজিনেস লিদর কয়াগা লোয়ননা ভারত্তা লাকখিবা অসিনা মহাক্না ভারত-ভিয়েৎনামগী মরীদা অৱাংবা থাক্কী মরুওইবা পীরিবা অদু ময়েক শেংনা উৎলি।

মসিগী মথক্তা, মহাক্না ভারতকী খোঙচৎ অসি বোধ গয়াদগী হৌখি। মসিনা ঐখোয়গী লৈবাক অনিগী মরক্তা লৈনরিবা সিভিলাইজেস্নেল অমসুং স্পিরিচুএল হেরিতেজ অদু উৎলি। খোঙচৎ অসিগী খুত্থাংদা অমসুং ঐখোয়গী মরু ওইবা খন্ন-নৈনবগী খুত্থাংদা, ঐখোয়না ঐখোয়গী অমগা অমগা লৈনরিবা অফবা মরী অসি কংক্রিৎ ওইবা ফলশিংদা ওইনা ওন্থোক্লি।

মরুপশিং,

ভারত অমসুং ভিয়েৎনামগী মরক্তা লৈরিবা পার্তনরশিপ অসিদা হেরিতেজ অমসুং দিবেলপমেন্ত অনিমক্না চপ মান্ননা মরুওইবা লৌই। হৌখিবা চহিদা, ভারত্তগী বুদ্ধিস্তকী রেলিকশিং ভিয়েৎনামদা পুখিবা মতমদা, ভিয়েৎনামগী অপুনবা মীশিং অসিগী চাদা ১৫ ওইরিবা মীওই মিলিয়ন ১৫ হেনবনা মখোয়বু ইকায় খুম্নখি। ঐখোয়গী শেয়র হেরিতেজ অসি হিংহন্নবা, ঐখোয়না ভিয়েৎনামগী অরিবা মতমগী চম্পা সিভিলাইজেসনগী লেমহৌরিবা মাই সন অমসুং নন তাৱর লাইশঙশিং অমুক হন্না শেমগৎনবা থবক পায়খৎলি। ঐখোয়না হৌজিক চম্পা সিভিলাইজেসনগী মেনুস্ক্রিপ্তশিং দিজিতেলদা ওন্থোক্লগনি, মসিনা তুংগী চারোন-শুরোনগীদমক মমল য়াম্লবা হেরিতেজ অসিবু ঙাক-শেনগনি।

মরুপশিং,

চহী তরাগী মমাংদা ঐহাক্কী ভিয়েৎনাম খোঙচৎ মনুংদা, ভিয়েতনাম অসি আসিয়ানগী মনুংদা ভারতকী অহানবা কমপ্রিহেন্সিব স্ত্রেতেজিক পার্তনর ওইখি। মদুদগী হৌরগা, ঐখোয়গী মরীশিং অসি য়াম্না থুনা অমসুং পাক-শন্না চাউখৎলকখি। ঐখোয়গী সিভিলাইজেসনগী মরীশিংগা লোয়ননা, ঐখোয়গী মরীশিং অসি ললোন-ইতিক, তেক্নোলোজী অমসুং তুরিজমগী লমদসু মপাঙ্গল কনখৎলক্লি।

মপাঙ্গল কনবা য়ুম্ফম অসিদা য়ুম্ফম ওইদুনা, ঙসি ঐখোয়না ঐখোয়গী মরী অসি এনহেন্স কমপ্রিহেন্সিব স্ত্রেতেজিক পার্তনরশিপকী থাক্তা পুখৎলি। হৌজিক ঐখোয়না ঐখোয়গী পার্তনরশিপ অসি হেন্না ৱাংবা পান্দম অমগী মায়কৈদা লমজিংগনি। কলচর, কনেক্তিবিতী অমসুং কেপাসিতী বিল্দিংদগী হৌরগা সেক্যুরিতী, সস্তেনেবিলিতী অমসুং সপ্লাই চেন রেসিলিয়েন্স ফাওবদা সেক্তর খুদিংমক্তা ঐখোয়গী কোওপরেসন অসি অনৌবা অৱাংবা থাক্তা য়ৌরগনি।

মরুপশিং,

ভারত অমসুং ভিয়েৎনামগী মরক্তা নাকল অনিগী ওইবা ললোন-ইতিক অসি হৌখিবা চহী তরা অসিদা শরুক অনি হেনগৎতুনা দোল্লর বিল্লিয়ন ১৬ য়ৌখ্রে। ঙসি ঐখোয়না ২০৩০ ফাওবদা মসিগী মশিং অসি দোল্লর বিল্লিয়ন ২৫দা হেনগৎহন্নবা মরু ওইবা ৱারেপ কয়া লৌখ্রে। ঐখোয়গী মরি লৈনবা দ্রগ রেগ্যুলেতরী ওথোরিতীশিংগী মরক্তা এম ও য়ু অমনা ভিয়েৎনামগী মনুংদা ভারতকী ফার্মাস্যুতিকেল্স ফংহনবদা মতেং পাংগনি। ভারতকী লৌউ-শিংউ, ঙা য়োকপা অমসুং শা-ষনগী পোত্থোকশিং ভিয়েৎনামদা পুথোক-পুশিন তৌবগী থবকসু হেন্না মওং তানা পায়খৎকনি। য়াম্না থুনা, ভিয়েৎনামনা ভারতকী অঙ্গুর অমসুং কম্ফোই চাবা ফংলগনি, অদুগা ঐখোয়না ভিয়েৎনামগী থৈবোং অমসুং নোবাপশিং চাবা ফংলগনি।

মসিগী মথক্তা, ঐখোয়না চহি অসিগী অরোইবা ফাওবদা ভারত-আসিয়ান ত্রেদ এগ্রীমেন্ত "এ.আই.তি.আই.জি.এ.” অপদেৎ তৌনবা য়ানবা অমা পুরকপা ঙমখ্রে। মসিনা ভারত অমসুং আসিয়ানগী লৈবাক পুম্নমক্কী মরক্তা ত্রেদ অমসুং ইনভেস্তমেন্তদা অনৌবা ইনর্জী পীগনি। ক্রিতিকেল মিনরেলশিং, রিয়র আর্থশিং অমসুং ইনর্জী কোওপরেসনদা অনৌবা খোঙথাংশিং পায়খৎতুনা ঐখোয়না নাকল অনিমক্কী শেন্মিৎলোনগী সেক্যুরিতী অমসুং সপ্লাই চেনগী রেসিলিয়েন্স লৈহল্লগনি।

মরুপশিং,

কনেক্তিবিতী অমসুং কেপাসিতী বিল্দিং অসি ঐখোয়গী পার্তনরশিপকী মরুওইবা য়ুম্বীশিংনি। ঐখোয়গী লৈবাক অনিগী মরক্তা এয়র কনেক্তিবিতী অসি লেপ্পা লৈতনা হেনগৎলক্লিবা অসিদা ঐখোয়না নুংঙাইবা ফাওই।

ফাইনান্সিএল কনেক্তিবিতী মখা তানা হেনগৎহন্নবা, ঐখোয়না ঙসি ঐখোয়গী সেন্ত্রেল বেঙ্কশিংগী মরক্তা তেংবাং পীনবা হেনগৎহন্নবা ৱারেপ লৌরে। ভারতকী য়ু.পি.আই. অমসুং ভিয়েৎনামগী ফাস্ত পেমেন্ত সিস্তেম অসিসু অথুবা মতমদা লিঙ্ক তৌনবা শেম শাখ্রে। মসিগী মথক্তা, ঐখোয়না হৌজিক ঐখোয়গী লৈবাক অনিগী মরক্তা স্তেত-তু-স্তেত অমসুং সিতী-তু-সিতীগী মরক্তা তেংবাং পীনবা মপাঙ্গল কনখৎহল্লগনি।

মরুপশিং,

ভিয়েৎনাম অসি ভারতকী এক্ত ইস্ত পোলিসী অমসুং ভিজন সাগরগী মরুওইবা য়ুম্বী অমনি। ইন্দো-পেসিফিক রিজনগী মতাংদা ঐখোয়না মান্নবা মীৎয়েং অমসু থম্লি। ঐখোয়গী দিফেন্স অমসুং সেক্যুরিতী কোওপরেসন মপাঙ্গল কনখৎহন্দুনা, ঐখোয়না রুল ওফ লো, শান্তি, স্তেবিলিতী অমসুং চাউখৎপা পুরকপদা মখা তানা মতেং পাংগনি। ভিয়েৎনামগী মতেংগা লোয়ননা, ভারতনা আসিয়ানগা লোয়ননা মরী হেন্না পাকথোক চাউথোকহল্লগনি।

য়োর এক্সিলেন্সী,

ঐখোয়না ভিয়েৎনামবু পহলগামদা থোকখিবা তেরোরিস্ত এতেক অদু অকনবা মওংদা য়ানিংদবা ফোঙদোকপগীদমক অমসুং তেরোরিজমগী মায়োক্তা ঐখোয়গী লান্থেং অসিদা লেপচবগীদমক থাগৎপা ফোংদোক্লি।

মালেমগী অৱাবা অমসুং শেন্মিৎলোনগী শিংনবশিংগী মতম অসিদা, ঐখোয়গী হৈশিংবা, অফবা লৈঙাক অমসুং শেন্মিৎলোনগী রিফোর্মশিংনা থৌনা পীদুনা, ভারত অমসুং ভিয়েৎনাম অসি মালেমগী খ্বাইদগী য়াঙনা চাউখৎলক্লিবা শেন্মিৎলোন অনিগী মনুংদা অমা ওইরক্লি। হৌজিক, ঐখোয়গী এনহেন্স স্ত্রেতেজিক পার্তনরশিপকী খুত্থাংদা, ঐখোয়না অমনা অমগী অঙকপা গ্রোথকী কেতালাইস্তর ওইনা থবক তৌমিন্নগনি।

বুদ্ধগী পাউতাক্কী ৱাখল্লোন্দা য়াওরিবসিগুম্না: "করিগুম্বা অদোম্না কনাগুম্বগী থাওমৈ অমা চুখৎপা তারবদি, মসিনা অদোমগী লম্বীসু মঙাল পীগনি।"

অসিগুম্বা ৱাখল্লোন অসিগা লোয়ননা, অমনা অমগী মীৎয়েং অমসুং পান্দমদা মতেং পাংদুনা, ঐখোয়না চাউখৎলবা লৈবাক অমা ওইনবগী অপাম্বা পুন্না ফংবা ঙমগনি।

ঐখোয় পুন্না চৎমিন্নগনি, পুন্না চাউখৎমিন্নগনি, অমসুং পুন্না মায় পাক্কনি।

হন্না-হন্না থাগৎচরি।

***