ਭਾਰਤ ਦੀ ਵਿਲੱਖਣ ਪਛਾਣ ਅਥਾਰਟੀ (ਯੂਆਈਡੀਏਆਈ) ਅਤੇ ਰਾਸ਼ਟਰੀ ਫੋਰੈਂਸਿਕ ਵਿਗਿਆਨ ਯੂਨੀਵਰਸਿਟੀ (ਐੱਨਐੱਫਐੱਸਯੂ) ਨੇ ਡਿਜੀਟਲ ਫੋਰੈਂਸਿਕ, ਸਾਈਬਰ ਸੁਰੱਖਿਆ ਅਤੇ ਉੱਨਤ ਤਕਨਾਲੋਜੀ ਖੋਜ ਦੇ ਖੇਤਰਾਂ ਵਿੱਚ ਇੱਕ ਢਾਂਚਾਗਤ, ਪੰਜ-ਸਾਲਾ ਸਹਿਯੋਗ ਸਥਾਪਤ ਕਰਨ ਲਈ ਹੱਥ ਮਿਲਾਇਆ ਹੈ।

ਇਹ ਸਮਝੌਤਾ ਪੱਤਰ ਸਹਿਯੋਗ ਲਈ ਇੱਕ ਵਿਆਪਕ ਢਾਂਚਾ ਪ੍ਰਦਾਨ ਕਰਦਾ ਹੈ ਅਤੇ ਯੂਆਈਡੀਏਆਈ ਦੇ ਡਿਜੀਟਲ ਬੁਨਿਆਦੀ ਢਾਂਚੇ ਵਿੱਚ ਸਾਈਬਰ ਮਜ਼ਬੂਤੀ ਨੂੰ ਅਟੁੱਟ ਬਣਾਉਣ ਲਈ ਦੋ ਮੁੱਖ ਰਾਸ਼ਟਰੀ ਸੰਸਥਾਵਾਂ ਨੂੰ ਇਕਜੁੱਟ ਕਰਦਾ ਹੈ, ਜੋ ਭਾਰਤ ਦੇ ਡਿਜੀਟਲ ਪਛਾਣ ਈਕੋਸਿਸਟਮ ਨੂੰ ਆਧਾਰ ਬਣਾਉਂਦਾ ਹੈ।

ਇਸ ਸਮਝੌਤੇ ਦਾ ਆਦਾਨ-ਪ੍ਰਦਾਨ ਯੂਆਈਡੀਏਆਈ ਦੇ ਸੀਈਓ ਸ਼੍ਰੀ ਵਿਵੇਕ ਚੰਦਰ ਵਰਮਾ ਅਤੇ ਐੱਨਐੱਫਐੱਸਯੂ ਦੇ ਗੁਜਰਾਤ ਕੈਂਪਸ ਦੇ ਡਾਇਰੈਕਟਰ ਪ੍ਰੋਫੈਸਰ (ਡਾ.) ਐੱਸ.ਓ. ਜੁਨਾਰੇ ਦਰਮਿਆਨ ਕੀਤਾ ਗਿਆ। ਇਸ ਸਮਾਗਮ ਵਿੱਚ ਯੂਆਈਡੀਏਆਈ ਦੇ ਡਿਪਟੀ ਡਾਇਰੈਕਟਰ ਜਨਰਲ ਸ਼੍ਰੀ ਅਭਿਸ਼ੇਕ ਕੁਮਾਰ ਸਿੰਘ ਅਤੇ ਦੋਵਾਂ ਧਿਰਾਂ ਦੇ ਕਈ ਸੀਨੀਅਰ ਅਧਿਕਾਰੀਆਂ ਨੇ ਸ਼ਿਰਕਤ ਕੀਤੀ।

ਇਹ ਸਹਿਯੋਗ ਛੇ ਰਣਨੀਤਕ ਥੰਮ੍ਹਾਂ 'ਤੇ ਕੇਂਦ੍ਰਿਤ ਹੋਵੇਗਾ, ਜਿਵੇਂ ਕਿ ਅਕਾਦਮਿਕ ਅਤੇ ਪੇਸ਼ੇਵਰ ਵਿਕਾਸ, ਸੂਚਨਾ ਸੁਰੱਖਿਆ ਅਤੇ ਸਿਸਟਮ ਇਕਸਾਰਤਾ, ਫੋਰੈਂਸਿਕ ਬੁਨਿਆਦੀ ਢਾਂਚਾ ਅਤੇ ਪ੍ਰਯੋਗਸ਼ਾਲਾ ਉੱਤਮਤਾ, ਸਾਈਬਰ ਸੁਰੱਖਿਆ ਗਤੀਵਿਧੀਆਂ ਲਈ ਤਕਨੀਕੀ ਸਹਾਇਤਾ, ਤਕਨੀਕੀ ਸਲਾਹਕਾਰੀ ਅਤੇ ਖੋਜ ਜਿਸ ਵਿੱਚ ਏਆਈ, ਬਲਾਕਚੇਨ, ਡੀਪਫੇਕ ਖੋਜ ਅਤੇ ਕ੍ਰਿਪਟੋਗ੍ਰਾਫਿਕ ਤਕਨਾਲੋਜੀਆਂ ਆਦਿ ਵਰਗੇ ਉੱਭਰ ਰਹੇ ਖੇਤਰਾਂ ਵਿੱਚ ਸਾਂਝੀ ਖੋਜ ਸ਼ਾਮਲ ਹੈ ਅਤੇ ਰਣਨੀਤਕ ਪਲੇਸਮੈਂਟ ਅਤੇ ਆਊਟਰੀਚ, ਜਿਸ ਵਿੱਚ ਐੱਨਐੱਫਐੱਸਯੂ ਦੇ ਵਿਦਿਆਰਥੀਆਂ ਲਈ ਪਲੇਸਮੈਂਟ ਅਤੇ ਆਊਟਰੀਚ ਦੇ ਮੌਕਿਆਂ ਲਈ ਇੱਕ ਮਾਰਗ ਸ਼ਾਮਲ ਹੈ।

ਸ਼੍ਰੀ ਵਿਵੇਕ ਚੰਦਰ ਵਰਮਾ, ਸੀਈਓ ਯੂਆਈਡੀਏਆਈ ਨੇ ਕਿਹਾ, "ਇਹ ਸਹਿਯੋਗ ਭਾਰਤ ਦੇ ਡਿਜੀਟਲ ਜਨਤਕ ਬੁਨਿਆਦੀ ਢਾਂਚੇ ਦਾ ਸਮਰਥਨ ਕਰਨ ਵਾਲੀ ਸੁਰੱਖਿਆ, ਮਜ਼ਬੂਤੀ ਅਤੇ ਫੋਰੈਂਸਿਕ ਸਮਰੱਥਾਵਾਂ ਨੂੰ ਹੋਰ ਮਜ਼ਬੂਤ ਕਰਨ ਅਤੇ ਭਾਰਤ ਦੇ ਡਿਜੀਟਲ ਪਛਾਣ ਪ੍ਰਣਾਲੀਆਂ ਲਈ ਹੋਰ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਵੱਲ ਇੱਕ ਮਹੱਤਵਪੂਰਨ ਕਦਮ ਦਰਸਾਉਂਦਾ ਹੈ।"

********

ਐੱਮਐੱਸਜ਼ੈੱਡ/ਆਰਐੱਨ