প্রধান মন্ত্রী শ্রী নরেন্দ্র মোদীনা পাউজেল পীদুনা, রিপব্লিক রিপব্লিক ওফ কোরিয়া (ROK) গী রাস্ত্রপতি হিজ এক্সেলেন্সী লী জে ম্যুংনা এপ্রিল ১৯ দগী ২১, ২০২৬ ফাওবা ভারত্তা স্তেত ভিজিত অমদা লাকখি, মসি কোরিয়াগী রাস্ত্রপতি অমনা মহাক্কী ওফিস পায়রবা মতুংদা খ্বায়দগী থুনা ভারত্তা লাকপা খোঙচৎ অমা ওইরি। রাস্ত্রপতি লী জে ম্যুংগা লোয়ননা মন্ত্রীশিং, সেনিয়র ওফিসিয়েলশিং অমসুং কোরিয়াগী মাঙজিল থাবা কম্পনীশিংগী CEO শিং য়াওবা অৱাংবা থাক্কী দেলিগেশন অমা লাকখি।

২. লুচিংবা অনিমক্না এপ্রিল ২০, ২০২৬ তা নই দিল্লিদা মরুপ মপাং ওইবা, মহৈ য়ানবা অমসুং তুংলমচৎকী মীৎয়েং লৈবা বাইলেতরেল মীফম অমা পাঙথোকখি। অয়েৎ-অপন ৱাংবা অমসুং থুনা হোংলক্লিবা মালেম অসিদা মখোয়গী মীয়ামগীদমক মতম পুম্নমক্কী ওইবা নুংঙাই-য়াইফবা, ইং-তপ্পা অমসুং চাওখৎপা পুরক্নবা অমসুং মরক্তা কান্নবা তেংবাংনবা লৈহন্নবা তোঙান তোঙানবা লমশিংদা চপ চাবা মওংদা পুন্না থবক তৌনবা মখোয় মখোয়গী লৈঙাকশিংগী ফীরেপ অদু মখোয়না ময়েক শেংনা ফোঙদোকখি। মখোয়না লাক্কদবা চহী মঙা (২০২৬-২০৩০) গী মনুংদা ভারত-ROK স্পিসিএল স্ত্রেতেজিক পার্তনরশিপ অসি থবক ওইনা পায়খৎনবা অমসুং মসিদা হেন্না মচাক মথুম হাপচিন্নবগীদমক মখাগী পুন্না শেমবা স্ত্রেতেজিক ভীজন অসি লাউথোকখি।

৩. এসিয়াগী মতিং লৈবা অমসুং ফীরেপ চেৎপা দেমোক্রেসী অনি অমসুং মালেমগী মাঙজিল থারিবা ইকোনোমীশিং ওইরিবা ভারত অমসুং ROK অসি অরীবা পুৱারীগী মরীশিং অমসুং মখোয়গী মীয়ামগী মরক্তা লৈনবা নুংশিবগী মান্নবা মরীনা শম্নরি। লৈবাক অনিমক্না দেমোক্রেসী অমসুং খুন্থোক্লোনগী ভেল্যুশিং অমসুং রিজনল অমদি গ্লোবেল ইস্যুশিংদা মান্নবা মীৎয়েঙ লৈ। ভারতনা ROK বু মহাক্কী "এক্ত ইস্ত" পোলিসীগী খ্বায়দগী মরুওইবা পার্তনর অমা ওইনা উই। লোয়ননা, ROK নসু ভারতপু মখোয়গী চৎনবা য়াবা মওংগী দিপ্লোমেসীগী মরুওইবা য়ুম্বী অমা ওইনা উই অমসুং মসি "ন্যু সাউদর্ন পোলিসী" গী মায় পাকপশিং অদু ফংহনবা অমসুং মখা তানা চাউখৎহনবনি হায়না উই। ভারত অমসুং ROK না ইন্দো-পেসিফিক লমদমদা ইং-তপ্পা, তংদু-লৈতাবা অমসুং চেকশিন-থৌরাং পুরকপদা মখোয়গী পার্তনরশিপ অসিনা লৌরিবা মরুওইবা থৌদাং অদু শকখঙলি।

অৱাংবা থাক্কী এক্সচেঞ্জশিংগী খুত্থাঙদা রাজনীতিগী য়ুম্ফম মপাঙ্গল কনখৎহনবা

৪. জুন ২০২৫ দা কানানাসকিসতা পাঙথোকপা G7 মীফম অমসুং নভেম্বর ২০২৫ দা জোহানেসবর্গতা পাঙথোকপা G20 মীফমগী নাকোয়ননা পাঙথোকখিবা মখোয়গী হান্নগী মীফম অনি অদু নুংশিনা নিংশিংলদুনা, ভারত-ROK স্পিসিএল স্ত্রেতেজিক পার্তনরশিপকী লৈরিবা মতিং পুম্নমক মঙফাওনহন্নবা অমসুং মসি মখা তানা মাঙলোমদা পুখৎনবা লেপ্তনা লম্বী তাক্নবা লুচিংবা অনিমক্না চহিগী ওইনা লৈবাক অনিগী অমা নত্ত্রগা অমদা নত্ত্রগা মালেমগী ওইবা থৌরমশিংগী নাকয়য়ননা লুচিংবগী থাক্তা মীফম পাঙথোক্নবা য়ানখি।

৫. বাইলেতরেল ওইবা মরীশিংদা অনৌবা খোঙজেল অমা পীখিবদা অৱাংবা থাক্কী এক্সচেঞ্জবশিং অসিগী চাংদা অপেনবা ফোঙদোক্লদুনা, লুচিংবা অনিমক্না লৈবাক অনিগী মরক্তা রাজনীতিগী ওইবা চৎথোক-চৎশিন অমসুং মন্ত্রীগী থাক্তা পাঙথোকপা দাইলোগশিং মখা তানা হেনগৎহন্নবা য়ানখি। পান্দম অসিগীদমক, ফোরেন মিনিস্তরশিংনা লুচিংবা ভারত-ROK জোইন্ত কম্মিসনগী মীফমশিং, ফাইনান্স মিনিস্তরশিংগী মীফম, অমসুং S&T মন্ত্রীশিংগী জোইন্ত কম্মিতীগী মীফমশিং চহি অসিদা পাঙথোক্নবা লুচিংবশিংনা ফীরেপ লৌখ্রে। মখা তানা, কোরিয়াগী লানদা ভারতনা শরুক য়াখিবগী নীংশিং খুদম ওইনা শারিবা ৱার মেমোরিএল অদু পুন্না মীয়ামদা কত্থোকমিন্ননবগীদমক ভারতকী দিফেন্স মিনিস্তরনা মে, ২০২৬ তা ROK তা চৎকনি হায়না য়ানখি। লৈবাক অনিগী ইন্দস্ত্রীগী থৌদাং পুবা মন্ত্রীশিংনা শরুক য়াগদবা অনৌবা দাইলোগ মেকানিজম অমা ওইরিবা ভারত-ROK ইন্দস্ত্রিয়েল কো-ওপরেসন কম্মিতী অমা হৌদোক্কনি অমসুং চহি অসিদা মসিগী অহানবা মীফম পাঙথোক্কনি হায়বসিসু মখোয়না য়ানখি।

৬. জানুৱারী ২০২৬ তা ROK গী দিপুতী স্পিকরনা ভারত্তা লাকখিবদু শকখঙলদুনা, লুচিংবা অনিমক্না ভারতকী পার্লিয়ামেন্ত অমসুং ROK গী নেস্নেল এসেমব্লীগী স্পিকরশিং অমসুং মেম্বরশিংগী মরক্তা লেপ্তনা পাউ ফাওনবদা শৌগৎখি। লৈবাক অনিমক্তা ভারত-ROK পার্লিয়ামেন্তরী ফ্রেন্দশিপ গ্রুপশিং শেমগৎলকপদা মখোয়না অপেনবা ফোঙদোকখি।

৭. ভারত অমসুং ROK গী তুংলমচৎকী ৱাখল্লোন লুচিংবশিংবু হেন্না নকশিনহন্নবগীদমক, চহি অসিদগী হৌদুনা লৈবাক অনিগী ফোরেন মিনিস্ত্রী অনিমক্না নহা ওইরিবা লেজিস্লেতরশিং, দিপ্লোমেতশিং, শক্নাইরবা মীওইশিং, মেদিয়া অমসুং ওফিসিয়েলশিংবু অমনা অমগী লমদা চৎননবা, অমনা অমবু খঙমিন্নবা হেনগৎহনবা অমসুং মান্নবা শীংনবা অমদি খুদোংচাবশিংদা পুন্না থবক তৌহন্নবা তোঙান তোঙানবা প্রোগ্রাম অমসুং ইনিসিএতিভশিং হৌদোকপবু লুচিংবা অনিমক্না তরাম্না ওকখি।

৮. লমদমশিংগী ওইবা মান্নবা চাওখৎপা, মপাঙ্গল অমসুং হিংগৎহনবা পুরক্নবা মখোয় মখোয়গী লৈবাক্কী স্তেত অমসুং প্রোভিন্সশিংগী মরক্তা হেন্না চৎথোক-চৎশিন লৈননবা লুচিংবা অনিমক্না পুক্নিং থৌগৎখি। লুচিংবা অনিমক্না বুসান-মুম্বই, ইঞ্চিয়ন-কোলকাতা, অমসুং উলসান-চেন্নাইগুম্বা সিস্তর-সিতী অমসুং ফ্রেন্দশিপ-সিতী মরীশিং অদুবুসু শকখঙখি।

হেন্না চাউবা স্ত্রেতেজিক থাজবগী খুত্থাঙদা হেন্না মমুৎ তানা ৱাখল তামিন্ননবা থৌরাং শেমগৎপা

৯. কাংলোন পরমদা য়ুম্ফম ওইবা ওপন, মীয়ামগী ওইবা, ইং-তপ্পা অমসুং নুংঙাই-য়াইফবা ইন্দো-পেসিফিক লমদম অমগী মতাংদা লৈবাক অনিমক্না থম্লিবা মীৎয়েঙ মঙলানশিং অদু মান্নৈ হায়বা লুচিংবা অনিমক্না শকখঙখি। মসিগা মরী লৈননা, ROK না ইন্দো-পেসিফিক ওসীন্স ইনিসিএতিভ (IPOI) দা শরুক য়াখিববু প্রধান মন্ত্রী মোদীনা তরাম্না ওকখি।

১০. সেনিয়র ওফিসিয়েলশিংগী মরক্তা অনৌবা স্ত্রেতেজিক অমসুং সিক্যুরিতীগা মরী লৈনবা চাওখৎ থৌরাংশিংগী মতাংদা লেপ্তনা তান্ন-নৈনবগী মরুওইবা অদু মখোয়না ময়েক শেংনা ফোঙদোকখি। ফেব্রুৱারী ২০২৬ তা লৈবাক অনিগী ফোরেন মিনিস্ত্রী অনিগী মরক্তা পাঙথোকখিবা ভারত-ROK ফোরেন পোলিসী অমসুং সিক্যুরিতী দাইলোগকী মতুং ইন্না, নাকল অনিমক্না ভাইস মিনিস্তরগী থাক্তা দিফেন্স ইন্দস্ত্রী কো-ওপরেসন্দা জোইন্ত কম্মিতী মীফম অমসুং অহানবা ওইবা দিফেন্স এন্দ ফোরেন এফিয়ার্স ২+২ দাইলোগ অমা অনিমক্না য়ানবা মতমদা পাঙথোক্নবা পান্দম থম্লি।

১১. লৈবাক অনিগী মরক্তা লৈরিবা স্ত্রেতেজিক থাজবদা য়ুম্ফম ওইরগা সপ্লাই চেনশিং মপাঙ্গল কনখৎহনবা, কৈথেলবু তোঙান তোঙানবা মওংদা শন্দোকপা অমসুং খ্বাইদগী নৌবা তেক্নোলোজীশিংদা তেংবাংনবা হেনগৎহন্নবা পান্দম থম্লিবা ভারত-ROK ইকোনোমিক সিক্যুরিতী দাইলোগ হৌদোকপবু লুচিংবা অনিমক্না তরাম্না ওকখি।

১২. লুচিংবা অনিমক্না ঙমখৈ লান্না তৌরকপা তেরোরিজম য়াওনা তেরোরিজমগী মখল খুদিংমক অমসুং হিংশাগী লমচৎপু ময়েক শেংনা অমদি অকনবা মওংদা য়ানিংদবা ফোঙদোকখি। তেরোরিস্তশিংগী লৈফমশিং মুত্থৎনবা, তেরোরিস্তশিংদা পীরিবা শেল-থুমগী পাম্বৈশিং অমসুং ঙমখৈ লান্না তৌবা ক্রাইমশিংগা মরী লৈনবা মখোয়গী লমবীশিং মুত্থৎনবা, অমসুং তেরোরিস্তশিং লৈবাক লান্না চৎথোক-চৎশিন তৌবা থিংনবা তেংবাংনবা হেনগৎহন্নবা মখোয়না য়ানখি। নাকল অনিমক্না ২২ এপ্রিল ২০২৫ দা জম্মু অমসুং কাশ্মীরগী পহলগামদা থোকখিবা তেরোরিস্ত এত্তেক অদুবু অকনবা মওংদা যানিংদবা ফোঙদোকখি অমসুং মসিদা শরুক য়াখিবা, শিন-লাঙখিবা অমসুং শেল থাদখিবশিংবু মখা তানা মতম খায়দনা ৱায়েল চত্থনবা ৱাফম ফোঙদোক্নখি। প্রধান মন্ত্রী মোদীনা রাস্ত্রপতি লীদা 'দি রেজিস্তেন্স ফ্রন্ত' না এত্তেক অসিগী থৌদাং লৌখি হায়না খঙহনখি। রাস্ত্রপতি লীনা মসিদা পুক্নিং চঙনা তাখি।

ইন্দস্ত্রিয়েল দাইনামিজমগী খুত্থাঙদা নাকল অনিমক্কী মায় পাকপা পুরকপা

১৩. লৈবাক অনিগী ইকোনোমিক মরীশিং মপাঙ্গল কনখৎহন্নবা, ললোন-ইতিক অমসুং ইনভেস্তমেন্ত শন্দোকহন্নবা, অমসুং ওতোমোবাইল, শিপবিল্ডিং, কেমিকেলস, সেমিকন্দক্তরস, তেলিকম ইকুইপমেন্ত, দিসপ্লে, সেকেন্দরী ব্যেতরীগুম্বা লমশিংদা মীৎয়েঙ থমদুনা ইন্দস্ত্রী পুম্বদা তেংবাংনবগী অনৌবা খুদোংচাবশিং হাংদোক্নবা ভারত-ROK ইন্দস্ত্রিয়েল কো-ওপরেসন কম্মিতীগী MOU খুৎয়েক পীনখিববু লুচিংবা অনিমক্না তরাম্না ওকখি। লোয়ননা স্ত্রেতেজিক রিসোর্সশিং, ক্রিতিকেল মিনেরলশিং অমসুং রীয়র আর্থশিংগী সপ্লাই চেন মপাঙ্গল কনখৎহন্নবা; গ্রীন হাইদ্রোজেন অমসুং মসিগী মচাকশিংগী ললোন-ইতিক, নিউক্লিয়ার পাৱর প্লান্ত প্রোজেক্তশিং; অমসুং সমুদ্র লান্না লৈবা রিসোর্স দিভেলপমেন্ত প্রোজেক্তশিংদা তেংবাংনবা য়ানখি।

১৪. ভারতকী 'মেরিতাইম অমৃত কাল ভীজন' অসিনা শিপবিল্ডিং অমসুং সমুদ্রগী লমদা মাঙজিল থারিবা লৈবাক অমা ওইরিবা ROK গা লোয়ননা কুইনা চৎনগদবা অমসুং স্ত্রেতেজিক ওইবা বাইলেতরেল তেংবাংনবগী অনৌবা খুদোংচাবশিং হাংদোকলে। নাকল অনিমক্না শিপবিল্ডিং, শিপিং অমসুং মেরিতাইম লোজিস্তিক্সকী মতাংদা 'কমপ্রিহেন্সিব ফ্রেমৱার্ক ফোর পার্তনরশিপ' অমা লৌখৎখি অমসুং মসিবু থুনা থবক ওইনা পায়খৎনবা থাজবা ফোঙদোক্নখি। ভারত্তা শিপয়ার্দ চাউখৎহনবা, শিপয়ার্দ লিংখৎনবা মথৌ তাবা ক্রিতিকেল ইনফ্রাস্ত্রকচর শেমগৎপা, পোর্ত ওপরেসন, অমসুং শিপিং অমদি মেরিতাইম লোজিস্তিক্সকীদমক ভারত অমসুং কোরিয়াগী বিজিনেসশিংগী মরক্তা বি২বি তেংবাংনবগী থৌরাংশিংবু লুচিংবা অনিমক্না তরাম্না ওকখি অমসুং মতেং পীখি। মুম্বইদা কোরিয়া মেরিন ইকুইপমেন্ত এসোসিএসন (KOMEA) গী ওফিস হাংদোকখিববু মখোয়না তরাম্না ওকখি, মসি অহানবা ওফিসনি মদুনা মেরিতাইম ইন্দস্ত্রীবু মতেং পীনবা মরী লৈনবা ইকোসিস্তেম চাউখৎহনবদা শরুক য়াগনি।

১৫. ২০ এপ্রিল ২০২৬ তা ভারত-ROK বিজিনেস ফোরম মায় পাক্না পাঙথোকখিববু লুচিংবশিংনা শকখঙখি। বিজিনেসকী মরীশিং লেপ্তনা লৈহন্নবগীদমক, ইন্দস্ত্রিয়েল কো-ওপরেসন কম্মিতী অমসুং মসিগী ৱার্কিং গ্রুপশিংগী মীফমশিংগী নাকোয়ননা মাঙজিল থারিবা ইন্দস্ত্রী এসোসিএসনশিংগী মরক্তা লেপ্তনা খন্ন-নৈনবগী থৌরাং নাকল অনিমক্না য়ানখি। ভারত অমসুং কোরিয়াগী বিজিনেসশিংনা ইনভেস্তমেন্ত অমসুং বি২বি তেংবাংনবগীদমক লাউথোকখিবশিং অদুবু লুচিংবা অনিমক্না তরাম্না ওকখি।

১৬. কোরিয়া অমসুং ভারতকী কম্পনীশিংনা অমগা অমগগী কৈথেলদা হেন্না ইনভেস্তমেন্ত তৌনবা পুক্নিং থৌগৎনবা হেন্না ফবা বিজিনেসকী ফীভম অমা শেমগৎনবা লুচিংবশিংনা য়ানখি।

১৭. স্মোল অমসুং মেদিয়ম সাইজ এন্তর্প্রাইজ (SME) গী লমদা তেংবাংনবগী MOU খুৎয়েক পীনখিববু লুচিংবা অনিমক্না তরাম্না ওকখি। মরী লৈনবা দিপার্তমেন্ত/মিনিস্ত্রীশিংনা ভারত-ROK তেংবাংনবা অসি লৈবাক অনিগী SME শিং ফাওবা শন্দোক্নবা পাম্বৈশিং থিনবা মখোয়না য়াথং পীখি, মসিদা অপীকপা অমসুং ময়াই ওইরপ তৌবা বিজিনেসশিংবু শম্নহন্নবা অমসুং SME শিংনা নাকল অনিমক্কী কৈথেলশিংদগী কান্নবা লৌবা য়াহন্নবা MOU গী মখাদা থবকশিং তৌবা য়াওগনি।

১৮. স্তীল ইন্দস্ত্রীদা খোঙজেল য়াঙনা চাউখৎলক্লিবা অচৌবা ইকোনোমী অমা ওইরিবা ভারত অমসুং গ্রীন স্তীল শেমবদা তেক্নোলোজীগী লুচিংবা অমা ওইরিবা ROK গী মরক্তা তেংবাংনবা অসি য়াম্না মরুওই। মখোয়না ভারত-ROK চহীগী স্তীল দাইলোগ পাঙথোক্নবা য়ানখি, মদুনা ললোন-ইতিক্কী খুদোংচাবশিং হেনগৎহনবা, ইকোনোমিক মরীশিং চেৎশিনহনবা অমসুং স্তীল সেক্তরদা হেন্না শেংবা ইনর্জী পুক্নিং থৌগৎপদা মীৎয়েঙ থমগনি। ওরিশাদা ৬ MMT গী ইন্তিগ্রেতেদ স্তীল প্লান্ত অমা লিংখৎনবা POSCO অমসুং JSW গী মরক্তা MOU খুৎয়েক পীনখিববুসু মখোয়না তরাম্না ওকখি।

ললোন-ইতিক, ফাইনান্স অমসুং চাউখৎ থৌরাংদা মীৎয়েঙ থমদুনা পার্তনরশিপশিং মপাঙ্গল কনখৎহনবা

১৯. ভারত-ROK বাইলেতরেল ত্রেদকী মতিং পুম্নমক মঙফাওনহনবগী মরুওইবা অমসুং দিজিতেল ত্রেদ, সপ্লাই চেন কোলাবোরেসন অমসুং গ্রীন ইকোনোমীনচিঙবা ললোন-ইতিক্কী অনৌবা লম্বীশিংদা অমগা অমগা কান্নবা লৈনবা খোঙচৎশিং পুক্নিং থৌগৎনবা, লুচিংবা অনিমক্না CEPA অপগ্রেড নেগোসিয়েসন অসি অমুক হন্না হৌনবা অমসুং থুনা লোইশিন্নবা ফীরেপ অদুবু তরাম্না ওকখি।

২০. য়ুনিফাইদ পেমেন্তস ইন্তর্ফেস (UPI) অমসুং রেগুলেতরী ওইবা অনৌবা থৌরাংশিংনা উৎলিবা ভারতকী ফিনতেক য়াওল অসিনা লৈবাক লান্না তেংবাংনবগী খুদোংচাবা কয়া শেমলে। লৈবাক অনিগী দিজিতেল পেমেন্ত সিস্তেমশিং অসি তাঙ্কক তাঙ্কক্কী ওইনা শম্নহন্নবা, ইন্তর-ওপরেবিলিতী হেনগৎহন্নবা অমসুং ইকোনোমিক অমদি মীগা মীগা লৈনবা মরীশিং মপাঙ্গল কনখৎহন্নবা নেস্নেল পেমেন্ত কর্পোরেসন ওফ ইন্দিয়া লিমিতেদ (NPCIL) অমসুং কোরিয়া ফাইনান্সিয়েল তেলিকম্ম্যুনিকেসন এন্দ ক্লিয়রিংস ইনস্তিত্যুৎ (KFTC) গী মরক্তা MOU খুৎয়েক পীনখিববু লুচিংবা অনিমক্না তরাম্না ওকখি। লৈবাক লান্না শেল-থুমগী পোত্থোকশিং শেমগৎপা অমসুং য়েংশিনবদা তেংবাংনবা অমসুং খন্ন-নৈনবগীদমক ভারতকী ইন্তরনেসনেল ফাইনান্সিয়েল সার্ভিসেস সেন্তর্স অথোরিতী (IFSCA) অমসুং ROK গী ফাইনান্সিয়েল সার্ভিসেস কম্মিসন (FSC) / ফাইনান্সিয়েল সুপরভাইজরী সার্ভিস (FSS) গী মরক্তা MOU খুৎয়েক পীনখিববুসু মখোয়না তরাম্না ওকখি।

২১. বেঙ্কিং, কেপিতেল মার্কেত অমসুং ফিন-তেক য়াওনা ফাইনেন্সিএল সেক্তরদা তেংবাংনবা হেনগৎহন্নবগীদমক লৈবাক অনিমক্কী ফাইনেন্সিএল ওথোরিতী অমসুং ইনস্তিত্যুসনশিংনা শরুক য়াদুনা ‘ROK-ইন্দিয়া ফাইনেন্সিএল কো-ওপরেসন ফোরম’ মায় পাক্না পাঙথোকখিবদা লুচিংবা অনিমক্না অপেনবা ফোঙদোক্নখি।

২২. ROK গী ফাইনেন্সিএল এন্তিতীশিং অসি ভারতকী ইকোনোমিক চাউখৎ থৌরাংদা মরুওইবা শরুক য়ারিবশিংনি, মখোয়না মখোয়গী ইনভেস্তমেন্তশিং অসি ইনফ্রাস্ত্রকচর, মেনুফেকচরিং অমসুং চাউখৎলক্লিবা ফাইনেন্সিএল মার্কেত্তা মীৎয়েঙ থম্লি। মসিগা মরী লৈননা, লুচিংবা অনিমক্না ভারত্তা কোরিয়া ইনভেস্তমেন্ত কোর্পোরেসনগী মায় পাক্লবা থবক-থৌরমশিং অদুবু শকখঙখি অমসুং কোরিয়া দিভেলপমেন্ত বেঙ্কনা ভারত্তা ওফিস অমা হাংদোক্নবা থম্লিবা মীৎয়েঙবু তরাম্না ওকখি। প্রধান মন্ত্রী মোদীনা ROK গী নেস্নেল পেন্সন সর্বিসপু ভারত্তা মসিগী ওফিস হাংদোকপগী ওইথোকপা য়াবশিং থিজিন্নবা ৱাফম থমখি।

২৩. ভারত অমসুং ROK গী মরক্তা চাউখৎ থৌরাংগী পার্তনরশিপ ওইনবগী লৈরিবা মতিং অদু শকখঙলদুনা, লুচিংবা অনিমক্না KOICA না থবক ওইনা পায়খৎলিবা প্রোজেক্তশিং য়াওনা ভারত্তা হৈথোই-শিংথোইবা ইন্দস্ত্রিএল হ্যুমেন রিসোর্সশিংগী মতিং শেমগৎনবগীদমক চাউখৎ থৌরাংগী তেংবাংনবা অসি মাঙদা পুখৎনবা মখা তানা পুন্না থবক তৌনবা য়ানখি। লৈবাক অনিগী মরক্তা কান্নবা চাউখৎ থৌরাংগী তেংবাংনবা লৈহন্নবা নাকল অনিমক্না পুন্না থবক তৌনবা য়ানখি।

অনৌবা ইন্দস্ত্রীশিংদা পার্তনরশিপকী খুত্থাঙদা তুংগী চাউখৎপা চেৎশিনহনবা

২৪. দিজিতেলগী মতিং মপাঙ্গল লৈবা অমসুং অমগা অমগা মপুং ফাহনবগী থৌদাং লৌরিবা ভারত অমসুং ROK লৈবাক অনিসিনা মালেমগী তুংলমচৎ লেপকদবা ইন্দস্ত্রী অমসুং তেক্নোলোজীশিংদা শরুক য়াবা ঙমগনি। AI, দেতা গভর্নেন্স অমসুং দিজিতেল বিজিনেসশিংদা মীৎয়েঙ থম্লিবা 'ফ্রেমৱর্ক ফোর ইন্দিয়া-কোরিয়া দিজিতেল ব্রিজ' হৌদোকপবু লুচিংবা অনিমক্না তরাম্না ওকখি, লোয়ননা দিজিতেল ইন্নোভেশন অমসুং তেংবাংনবদা সেমিকন্দক্তর য়াওনা তেংবাংগদবা তেক্নোলোজীশিংগী থৌদাং অদুবুসু শকখঙখি। প্রধান মন্ত্রী মোদীনা ভারত্তা সেমিকন্দক্তর ইন্দস্ত্রী চাউখৎলক্লিবা অসিগী মরমদা রাস্ত্রপতি লীদা খঙহনখি অমসুং কোরিয়াগী বিজিনেসশিংনা লৈঙাক্কী ইনসেন্তিবশিং অমসুং চাউখৎলক্লিবা কৈথেল অসিগী কান্নবা লৌবা য়াগনি হায়না ফোঙদোকখি। মীয়াম পুম্নমক্কীদমক খুদোংচাবশিং ফংহনবা অমসুং পুম্নমক কোনশিনবগা লোয়ননা ইন্নোভেশন পুক্নিং থৌগৎলিবা "AI for All" অমসুং "MANAV" গী চৎন-পথাপশিংদগী ইথিল লৌবা AI চাউখৎহনবগী মখোয় মখোয়গী মীৎয়েঙ মঙলানশিং অদুবু লুচিংবা অনিমক্না থাগৎনখি। মখোয়না রিছর্চ অমসুং হৈশিংবা য়োকখৎপা য়াওনা AI ভর্তিকেল শিন থুংনা ভারত-কোরিয়া পার্তনরশিপ হেন্না নকশিনহন্নবা থাজবা ফোঙদোকখি।

২৫. লুচিংবা অনিমক্না ২০২০ গী ‘রোদমেপ তু দিফেন্স ইন্দস্ত্রী কো-ওপরেসন’গী MOU অদু অমুক হন্না হিংগৎহনবগী খুত্থাঙদা দিফেন্স ইন্দস্ত্রীশিংদা ভারত-ROK তেংবাংনবগী স্ত্রেতেজিক মরুওইবা অদু ময়েক শেংনা ফোঙদোকখি। মখোয়না K9-Vajra হাউইতজরশিংগী মায় পাক্লবা জোইন্ত ভেঞ্চর অমসুং মসিগী অনিশুবা বেত্চ পুথোকপগী থবক চত্থরিবা অসিদা অপেনবা ফোঙদোক্নখি। মখোয়না সেল্ফ-প্রোপেল্দ এয়র দিফেন্স গন-মিসাইল সিস্তেম অমসুং মরী লৈনবা অতোপ্পা লমশিংগুম্বা তুংগী দিফেন্স তেক্নোলোজী/প্লেতফোর্মশিংদা মোদেল অসি চৎনহন্নবা হোৎনরিবা থৌরাংশিং অদুবু তরাম্না ওকখি।

২৬. লৈবাক অনিমক্তা দিফেন্স ইন্দস্ত্রীদা থোক্লিবা ইন্নোভেশনশিং অদু শকখঙলদুনা, লুচিংবা অনিমক্না নাকল অনিমক্কী বিজিনেসশিং, ইনক্যুবেতরশিং, ইনভেস্তরশিং, দিফেন্স স্তার্ত-অপশিং অমসুং য়ুনিভর্সিতীশিংবু শম্নহন্নবা ‘কোরিয়া-ইন্দিয়া দিফেন্স এক্সিলরেটর’ (KIND-X) ইন্নোভেশন প্লেতফোর্ম অমা হৌদোক্নবা ফিরেপ লৌখি।

২৭. স্পেস অসি লৈবাক অনিমক্কী চাউখৎ থৌরাংগী ওইথোকপা য়াবা লম অমা ওইরকপনা, ইন্দিয়ান স্পেস রিছর্চ ওর্গনাইজেসন (ISRO) অমসুং কোরিয়া এরো স্পেস এদমিনিস্ত্রেসন (KASA) গী মরক্তা নেস্নেল স্পেস এজেন্সীগী থাক্তা তেংবাংনবগী খুদোংচাবশিং থিজিন্নবা জোইন্ত ৱার্কিং গ্রুপ অমা শেম্নবা থৌরাংশিং অদুবু লুচিংবা অনিমক্না তরাম্না ওকখি, অমসুং ২০ এপ্রিল ২০২৬ তা বেঙ্গলুরুদা IN-SPACe কা লোয়ননা স্পেস স্তার্ত-অপশিং, ইন্দস্ত্রীশিং অমসুং রিছর্চ ইনস্তিত্যুৎশিংগী মরক্তা তেংবাংনবা পুক্নিং থৌগৎনবা ভারত-ROK "স্পেস দে" পাঙথোকখিবদুবু তরাম্না ওকখি। লুচিংবা অনিমক্না মখোয় মখোয়গী সেতলাইত নেভিগেশন সিস্তেমশিংগীদমক অমগা অমগা মতেং পীননবগী খুদোংচাবশিং থিজিন্নবা পুক্নিং থৌগৎখি।

মালেম ইমাগীদমক অমত্তা ওইনা পুনশিনবা

২৮. মালেমগী ইনর্জী অমসুং রিসোর্স কৈথেলদা হৌজিক লৈরিবা অয়েৎ-অপনশিং অসিগী মমাঙদা, ভারত অমসুং ROK না হাইদ্রোকার্বোন অমসুং মরুওইবা মিনেরলশিং অচৌবা মওংদা লমদম লান্না পুশিল্লক্লিবা লৈবাকশিং ওইনা, ইনর্জী মতিং লৈনা শীজিন্নবা, মিনেরল লৌথোকপা, প্রোসেসিং অমসুং রিসাইক্লিং তৌবা, অমসুং অকোয়বগী ফীভমদা তুং কোইনা চৎনবা য়াবা মওংদা অতোপ্পা ইনর্জীশিং অমসুং মচাকশিং পুন্না শেমগৎপদা থবক তৌবা মথৌ তাই হায়বা লুচিংবা অনিমক্না শকখঙখি। লুচিংবশিংনা মরুওইবা মিনেরলশিং অমসুং এদভান্স তেক্নোলোজীশিংগী লমদা চেকশিনবা, মপাঙ্গল কনবা অমসুং ইন্নোভেশনদা য়ুম্ফম ওইবা সপ্লাই চেনশিং শেমগৎপগী মরুওইবা অদুসু ময়েক শেংনা ফোঙদোকখি। মসিগীদমক, লুচিংবা অনিমক্না আর্তিফিসিএল ইন্তেলিজেন্স শীজিন্নদুনা মরুওইবা মিনেরলশিং মশক খঙদোক্নবা অমসুং থিজিন্নবা লৈবাক অনিগী জিওলোজিকেল সর্ভে ওর্গনাইজেসনশিংগী মরক্তা মরী মপাঙ্গল কনখৎহনবা য়াওনা মরুওইবা মিনেরল ভেল্যু চেন পুম্বদা তেংবাংনবা য়ানখি। মখোয়না সার্কুলারিতী থৌরাংশিংগী শরুক অমা ওইনা ই-ৱেস্ত অমসুং মাইন তেলিংস কুমবা মহৌশাগী নত্তবা হৌরকফমশিংদগী মরুওইবা মিনেরলশিং ফংহন্নবা তেংবাংনবা অদুবু মতেং পীখি।

২৯. মখা তানা, রাস্ত্রপতি লীনা ভারতনা পেক্স সিলিকা থৌরাংদা শরুক য়াখিববু তরাম্না ওকখি, অমদি প্রধান মন্ত্রী মোদীনা ফোরম ওন রিসোর্স জিওস্ত্রেতেজিক এনগেজমেন্ট (FORGE) গী চেয়র ওইনা রিপব্লিক ওফ কোরিয়াগী লুচিংববু থাগৎপা ফোঙদোকখি। সপ্লাই থিংজিল্লকপা নত্ত্রগা কৈথেল তংদু-লৈতাবা মতমদা কৈথেলগী ফীভম অমসুং কারবারগী মীৎয়েঙদা য়ুম্ফম ওইরগা নাফথাগুম্বা মরুওইবা মচাকশিং ফংহন্নবা তেংবাংনবা মপাঙ্গল কনখৎহন্নবসু মখোয়না য়ানখি। নাকল অনিমক্না মরুওইবা মচাকশিংগী বাইলেতরেল ত্রেদ চাউখৎহন্নবগী খুদোংচাবশিং থিজিনগনি।

৩০. ভারত অমসুং ROK অসি অইং-অশাগী খল হোংলকপগী মালেমগী ওইবা শীংনবশিং অসিগী মায়োক্তা পোজিতিব অমসুং ইচঙ থৌবা এজেন্দাগী খুত্থাঙদা লান্থেংনরিবা পার্তনরশিংনি মদুনা মখোয়গী শেল-থুমগী নুংঙাই-য়াইফবসু পুক্নিং থৌগৎলি। মসিগা মরী লৈননা, লুচিংবা অনিমক্না পেরিস এগ্রীমেন্তগী আর্তিকল ৬.২ গী মখাদা MOC অমা লোইশিনখিববু তরাম্না ওকখি, মদুনা ইনভেস্তমেন্তদা য়ুম্ফম ওইবা মিটিগেশন প্রোজেক্তশিংগীদমক তেংবাংনবা মওং অমা লিংখৎলি, মখোয় মখোয়গী নেস্নলী দিতরমিনদ কন্ত্রিব্যুসনস (NDCs) মঙফাওনহন্নবা মাঙদা পুশিল্লি, অমসুং ক্লাইমেত এক্সনগী লমদা মখোয়গী স্ত্রেতেজিক পার্তনরশিপ অসি হেন্না মপাঙ্গল কনখৎহাল্লি।

৩১. অকোয়বগী ফীভমগী থৌদাং খঙবা লৈবাকশিং ওইনা, ভারত অমসুং ROK না অইং-অশা অমসুং অকোয়বগী ফীভমগী লমদা তেংবাংনবগী MOU অমগী খুত্থাঙদা ইন্সতিত্যুস্নেল ওইবা তেংবাংনবগী মরী থম্নবা ফিরেপ লৌখ্রে। ROK না ইন্তরনেসনেল সোলার এলাইন্স (ISA) গী মেম্বর অমা ওইনা অমসুং ভারতনা গ্লোবেল গ্রীন গ্রোথ ইনস্তিত্যুৎ (GGGI) গী মেম্বর অমা ওইনা শরুক য়াখিববু লুচিংবা অনিমক্না তরাম্না ওকখি। প্রধান মন্ত্রী মোদীনা ROK বু গ্লোবেল বাইওফুএল এলাইন্স অমসুং ইন্তরনেসনেল বিগ কেত এলাইন্স অমদি কোযএলিসন ফোর দিজাস্তর রেজিলিএন্ত ইনফ্রাস্ত্রকচর (CDRI) দা শরুক য়ানা ৱাফমসু থমখি।

৩২. মীওইবগী তুংলমচৎপু শোকহনগদবা মালেমগী ওইবা শীংনবশিং কোকহন্নবগীদমক ভারত-ROK না চাউনা পুক্নিং চঙববু শকখঙলদুনা, লুচিংবা অনিমক্না সস্তেনেবিলিতীগী লমদা তেংবাংনবগী পুন্না ফোঙদোকপা চেরোল অমা থোকখিববু তরাম্না ওকখি, মসিগা লোয়ননা অইং-অশা হোংলকপা, আর্কতিক অমসুং সমুদ্রগী লমদা তেংবাংনবগুম্বা মালেমগী ওইবা হিরমশিংদা লৈবাক অনিগী ফোরেন মিনিস্ত্রীশিংগী মরক্তা দাইলোগ অমা হৌদোকখিবদুসু তরাম্না ওকখি।

সোফ্ত পাৱরগী থাক হেনগৎহনবা

৩৩. ভারত অমসুং ROK গী মরক্তা লৈরিবা ইনাক খুল্লবা অমসুং মান্নবা নাৎকী লনশিংদা য়ুম্ফম ওইরগা, লুচিংবা অনিমক্না লৈবাক অনিগী ইনস্তিত্যুৎশিংগী মরক্তা নাৎকী ওইবা মরীশিং হেন্না মপাঙ্গল কনখৎহন্নবা মতেং পীখি। মখোয়না ২০২৬-২০৩০ মতমগীদমক কলচরেল এক্সচেঞ্জ প্রোগ্রাম (CEP) মখা তানবা য়ানখিববু তরাম্না ওকখি অমসুং মরী লৈনবা এজেন্সীশিংনা মসিবু মওং তানা থবক ওইনা পায়খৎনবগীদমক চুনবা থৌরাংশিং শেম্নবা পুক্নিং থৌগৎখি। মখোয়না চহি ২০২৮-২৯ বু নাৎকী ওইবা থৌরম কয়াগী খুত্থাঙদা 'ভারত-ROK ফ্রেন্দশিপ ইয়ার' ওইনা পাঙথোক্নবা ফিরেপ লৌখি।

৩৪. নাৎ অমসুং ক্রিয়েতিভ ইন্দস্ত্রী (CCI) গী লমদা তেংবাংনবগী MOU খুৎয়েক পীনখিববু লুচিংবা অনিমক্না তরাম্না ওকখি। মখা তানা, নাকল অনিমক্না কো-প্রদক্সন, ত্রেনিং এক্সচেঞ্জ, অমদি এনিমেসন অমসুং ভিজুএল ইফেক্ত (VFX) কুম্বা লমশিংদা তেক্নোলোজী তাথোক তাশিন তৌবা য়াওনা ফিল্ম সেক্তরদা তেংবাংননবা য়ানখি।

৩৫. লৈবাক অনিমক্কী ইনাক খুল্লবা নাৎকী লনশিংবু অমসুং সোফ্ত পাৱর উৎনবা থৌরাংশিংদা মতেং পীনবা লুচিংবা অনিমক্না য়ানখ্রে, মসিদা ROK তা 'ইন্দিয়া দে' অমসুং ভারততা 'কোরিয়া দে' পাঙথোকপা য়াওগনি।

৩৬. লৈবাক অনিগী মরক্তা লৈরিবা বুদ্ধ ধৰ্ম্মগী মান্নবা নাৎ অদুবু নিংশিংলদুনা অমসুং ভারত অমসুং ROK গী মরক্তা লৈরিবা পুৱারী অমসুং নাৎকী মরী হেন্না নকশিনহন্নবা পান্দমগা লোয়ননা, ভারতনা ROK দা অরিবা মতমগী পোৎলম ২০০ খুদোল পীববু লুচিংবা অনিমক্না তরাম্না ওকখি অমসুং লৈবাক অনিগী মরক্তা নাৎকী ওইবা এক্সচেঞ্জ হেনগৎহন্নবা গিমহেনা হোৎনরিবা থৌরাংশিং অদুবুসু তরাম্না ওকখি।

৩৭. স্পোর্তসকী লমদা তেংবাংনবগী MOU খুৎয়েক পীনখিববু লুচিংবা অনিমক্না তরাম্না ওকখি মদুনা এক্সপর্তশিং অমসুং থৌমীশিং এক্সচেঞ্জ তৌবা, কোচিংগা মরী লৈনবা প্রোগ্রাম অমসুং খঙ-হৈবশিং এক্সচেঞ্জ তৌবা, হৈশিংবা হেনগৎহনবা অমসুং স্পোর্তস সাইন্স, অমসুং ভারত অমসুং ROK গী স্পোর্তস ওথোরিতী অমসুং অতোপ্পা স্পোর্তস বোদীশিংগী মরক্তা তেংবাংনবদা পুক্নিং থৌগৎকনি অমসুং মতেং ওইগনি।

মীগা মীগা লৈনবা মরীশিং

৩৮. বাইলেতরেল পার্তনরশিপকী মরুওইবা মরুওইবা য়ুম্বী অমা ওইনা এজুকেসন্দা তেংবাংনবা মপাঙ্গল কনখৎহন্নবা মখোয়গী ফিরেপ অদু লুচিংবা অনিমক্না অমুক হন্না চেৎশিনহনখি। য়ুনিভর্সিতী অমসুং সেকেন্দরী স্কুলশিংগী মরক্তা ইনফোর্মেসন শেয়র তৌবা হেনগৎহনবা, লোয়ননা ফেকলতী অমসুং মহৈরোয় এক্সচেঞ্জ প্রোগ্রামশিং অমসুং পুন্না পাঙথোকপা একাদেমিক থৌরাংশিং—মরুওইনা আর্তিফিসিএল ইন্তেলিজেন্স অমসুং STEM গী লমদা তেংবাংনববু মখোয়না তরাম্না ওকখি।

৩৯. লোন অমসুং নাৎকী ওইবা খঙমিন্ননবগী মরুওইবা অদু শকখঙলদুনা, লুচিংবা অনিমক্না একাদেমিক করিক্যুলম, দিজিতেল তুলস, ওজাশিংগী ত্রেনিং অমসুং মরী লৈনবা ইনস্তিত্যুস্নেল ফ্রেমৱর্কশিংগী খুত্থাঙদা ভারত্তা কোরিয়ান লোন তম্বীবা-তম্বা অমসুং ROK দা ভারতকী লোনশিং, মরুওইনা হিন্দী লোন তম্বীবা-তম্বা অসিদা শৌগৎনখি। জানুৱারী ২০২৬ তা ভারত্তা অহানবা কোরিয়া এজুকেসন সেন্তর হৌদোকখিববু মখোয়না তরাম্না ওকখি।

৪০. নাকল অনিমক্না ভারতকী ইন্দিয়ান ইনস্তিত্যুৎ ওফ তেক্নোলোজী (IIT) ২৩ অমসুং ROK গী KNU10 কনসোর্তিয়মদা শরুক য়ামিন্নরিবা কোরিয়ান নেস্নেল য়ুনিভর্সিতী ১০ গী মরক্তা পুন্না রিছর্চ তৌবা, ক্রেদিত ত্রান্সফার অমসুং মহৈরোয়শিং এক্সচেঞ্জ তৌবগী খুত্থাঙদা য়ুনিভর্সিতী থাক্কী একাদেমিক তেংবাংনবা হেনগৎহন্নবসু য়ানখি।

৪১. লুচিংবা অনিমক্না ভারতীকী মহৈরোয়শিংগীদমক গ্লোবেল কোরিয়া স্কোলরশিপ (GKS) ফংহনবা, অমসুং কোরিয়াগী মহৈরোয়শিংগীদমক ইন্দিয়ান কাউন্সিল ফোর কলচরেল রিলেসন্স (ICCR) অতল বিহারী বাজপায়ী জেনেরেল স্কোলরশিপ অমসুং ICCR লতা মঙ্গেশকর স্কোলরশিপ স্কিম ফোর আর্ত এন্দ কলচর, অমসুং আয়ুশ (AYUSH) স্কোলরশিপ স্কিম ফোর হোলিস্তিক ৱেলনেসকী খুত্থাঙদা স্কোলরশিপশিং ফংহল্লিববু তরাম্না ওকখি। বাইলেতরেল এজুকেসন মরীশিং হেন্না নকশিনহন্নবা, লুচিংবা অনিমক্না মখোয় মখোয়গী স্কিমশিংগী মখাদা অমগা অমগগী লৈবাক মচাশিংগীদমক স্কোলরশিপকী মফম হেনগৎহন্দুনা প্রোগ্রামশিং অসি শন্দোকহন্নবা পান্দম থমখি।

৪২. ভারত অমসুং ROK না হ্যুমেন রিসোর্সকী লমদা মপাঙ্গল কনবা অমসুং অমগা অমগা মপুং ফাহনবা ঙম্বগী মচৎ চাউনা য়াওরি। লুচিংবা অনিমক্না অমগা অমগগী সাইন্তিফিক অমসুং তেক্নোলোজিকেল মতিং অদুবু শীজিন্ননবা, অমসুং মখোয়গী সাইন্তিফিক ইনস্তিত্যুৎশিং অমদি হ্যুমেন কেপিতেলগী মরক্তা মরী মপাঙ্গল কনখৎহন্নবা মখোয়গী ফিরেপ অদু অমুক হন্না চেৎশিনহনখি। মসিগা মরী লৈননা, লাক্কদবা জোইন্ত কম্মিতী ওন সাইন্স এন্দ তেক্নোলোজীগী খুত্থাঙদা পুন্না R&D পুক্নিং থৌগৎনবা ফিরেপ অদুবু মখোয়না তরাম্না ওকখি।

৪৩. মীগা মীগা উন্ন-চৎনবা হেন্না চাউনা লৈহন্নবগী মীৎয়েঙদা, নাকল অনিমক্না ভিজা অমসুং ইম্মিগ্রেসনগা মরী লৈনবা থৌওংশিং হেন্না মতিং লৈনা শেমগৎনবা পাম্বৈশিং থিবদা য়ানখি। মী অমসুং পোৎলমশিং হেন্না য়াঙনা চৎথোক-চৎশিন তৌবা য়াহন্নবা ভারত অমসুং ROK গী মরক্তা এয়র কন্নেক্তিভিতী মপাঙ্গল কনখৎহনবদা লুচিংবশিংনা মতেং পীখি।

৪৪. লৈবাক অমগা অমগগী মনুংদা লৈরিবা কোরিয়া অমসুং ভারতকী কাঙলুপশিংগী কন্ত্রিব্যুসন অদুবু থাগৎলদুনা, লুচিংবা অনিমক্না লৈবাক অনিমক্কী অফবা তুংলমচৎকীদমক মখোয় মখোয়গী খুন্নাইদা মখোয়গী নুংঙাই-য়াইফবা অমসুং থোইদোক্না শরুক য়াবদা মতেং পীনবা মখোয়গী ফিরেপ অদু অমুক হন্না চেৎশিনহনখি।

মালেমগী ফহন্নবা পার্তনরশিপ

৪৫. মালেমগী ওইবা নন-প্রোলিফরেসন হোৎনরিবা থৌরাংশিংদা লৈবাক অনিমক্কী কন্ত্রিব্যুসন অমসুং ফিরেপ অদুবু শকখঙলদুনা, নাকল অনিমক্না মালেমগী নন-প্রোলিফরেসন রেজিম হেন্না মপাঙ্গল কনখৎহন্নবা পান্দমগা লোয়ননা ভারতপু ন্যুক্লিয়ার সপ্লায়ার্স গ্রুপকী মেম্বর ওইহন্নবা মখা তানা পুন্না থবক তৌনবা ফিরেপ লৌখি।

৪৬. নাকল অনিমক্না ৱর্ল্ড ত্রেদ ওর্গনাইজেসন (WTO) বু ময়ায়দা থমদুনা কাঙলোন পরমদা য়ুম্ফম ওইবা, ওপন, থোং মান্নবা, অরোন অথুপ লৈতবা, পুম্নমকপু কোনশিনবা, অমসুং মীচঙ মীখায় নাইদবা মল্তিলেতরেল ত্রেদিং সিস্তেম অমগীদমক মখোয়গী ফিরেপ অদু অমুক হন্না চেৎশিনহনখি। মখোয়না মল্তিলেতরেল ত্রেদিং সিস্তেম অমসুং WTO গী থবক-থৌরমশিং মপাঙ্গল কনখৎহন্নবগীদমক কান্নবা মওংদা শরুক য়াবগী মরুওইবা অদু ময়েক শেংনা ফোঙদোকখি। ২০২৮ তা ROK না গ্রুপ অসিগী প্রসিদেন্সী পায়গদৌরিবা অসিদা মীৎয়েঙ থম্লগা, ভারত অমসুং ROK না G20 য়াওনা মম্তিলেতরেল ফোরা পুম্নমক্তা তেংবাংনবা হেনগৎহন্নবা য়ানখি।

৪৭. য়ুনাইতেদ নেসন্স কনভেন্সন ওন দি লো ওফ দি সী (UNCLOS) দা ময়েক শেংনা উৎলিবা মালেমগী কাঙলোন পরমদা য়ুম্ফম ওইরগা, লুচিংবা অনিমক্না নেভিগেসন অমসুং ওভরফ্লাইতকী নীংতম্বা, অমসুং অয়েৎ-অপন লৈতবা ললোন-ইতিক্কী ফিরেপ অদু অমুক হন্না ফোঙদোকখি। লুচিংবা অনিমক্না শরুক য়ারিবা পুম্নমক্কী মফমদা UNCLOS য়াওনা মালেম পুম্বনা শকখঙলবা কাঙলোন পরমগী মতুং ইন্না ইং-তপ্পা পাম্বৈশিংগী খুত্থাঙদা ৱাথোকশিং লোইশিন্নবা ৱাফম থমখি।

৪৮. লুচিংবা অনিমক্না ৱেষ্ত এসিয়াদা হৌজিক ওইরিবা ফীভম অসিদা চাউনা অৱাবা ফোঙদোকখি। মখোয়না শরুক য়ারিবা পুম্নমকপু লৈবাক্কী মনীং তমবা অমসুং লম অমগী অপুনবগী শক্তমবু ইকায়খুম্নবা য়াওনা মালেমগী ইং-তপ্পা অমসুং সিক্যুরিতীগী মরুওইবা চৎন-পথাপশিং অদুবু ঙাক্না চৎনবা, মীয়ামবু ঙাক-শেনবা অমসুং নেভিগেসনগী নীংতম্ববু খ্বায়দগী মরুওইনা লৌনবা ৱাফম থমখি। মখোয়না উংখৎনবা হন্থহন্নবা অমসুং মরুওইবা ৱাথোকশিং কোকহন্নবা দাইলোগ অমসুং দিপ্লোমেসীগী লম্বী চৎপা মরুওই হায়না ফোঙদোকখি।

৪৯. লুচিংবা অনিমক্না কোরিয়ন পেনিনসুলাদা মপুং ফানা দি-ন্যুক্লিয়রাইজেসন অমসুং মতম পুম্নমক্কী ইং-তপ্পা পুরক্নবা মখোয়গী ফিরেপ অদু অমুক হন্না চেৎশিনহনখি। কোরিয়ন পেনিনসুলাদা ইন্তর-কোরিয়ন এক্সচেঞ্জশিং শন্দোকহনবা, মরীশিং মওং চানা থম্বা, অমসুং তাঙ্কক তাঙ্কক্কী ওইনা দি-ন্যুক্লিয়রাইজেসন ফংহন্দুনা শান্তি লৈনা পুন্না হিংমিন্নবা অমসুং চাওখৎমিন্নবা পুরক্নবা পান্দম থম্লিবা পোজিতিব ওইবা দি-এস্কলেসন অমসুং থাজবা শেমগৎপগী পাম্বৈশিংগী খুত্থাঙদা ইন্তর-কোরিয়ন দাইলোগ অমুক হন্না হৌনবা ROK না হোৎনরিবা থৌরাংশিংদা ভারতনা মতেং পীরি। মখোয়না পুম্নমকপু মাঙ তাকহনবা ঙম্বা খুৎলায়শিং অমসুং মসি কাপ্পগী সিস্তেমশিং, মরুওইনা তেরোরিস্তশিং অমসুং লৈঙাক্কী নত্তবা মীয়ামগী খুত্তা য়ৌহন্দনবা ফিরেপ লৌখি।

৫০. লুচিংবা অনিমক্না UN চার্তর য়াওনা মালেমগী কাংলোন মতুং ইন্না য়ুক্রেনদা অচুম্বা অমসুং মতম কুইনা চৎনগদবা ইং-তপ্পা লৈহন্নবা মতেং পীখি। মখোয়না দাইলোগ অমসুং দিপ্লোমেসীগী খুত্থাঙদা য়ুক্রেনদা লান লেপহন্নবগী মরুওইবা অদু ময়েক শেংনা ফোঙদোকখি।

৫১. নাকল অনিমক্না য়ুএন বু হেন্না দেমোক্রেতিক ওইবা, থৌদাং খঙবা, পুম্নমক শরুক য়াবা অমসুং ঙসিগী মালেম অসিগী মশক তাকপা ওইহন্নবগীদমক সিক্যুরিতী কাউন্সিল পাকথোক-চাউথোকহনবা য়াওনা মপুং ফাবা য়ুএন রিফোর্মসকীদমক পুন্না থবক তৌনবা ফিরেপ লৌখ্রে। মসিগী মথক্তা, লুচিংবা অনিমক্না হৌজিক মতমগী মালেমগী ওইরিবা অচুম্বা ফীভমশিং অদু ময়েক শেংনা উৎনবগীদমক য়ুএন সিক্যুরিতী কাউন্সিল শেমদোক-শেমজিন তৌনবগী লমদা থবক তৌনবা য়ানখি।

৫২. লুচিংবা অনিমক্না মখোয়গী বাইলেতরেল ৱারী-ৱাতায় মনুংদা ভারত-রিপব্লিক ওফ কোরিয়া স্পিসিএল স্ত্রেতেজিক পার্তনরশিপকী মপুং ফাবা রিভিউ তৌখিবদা অপেনবা ফোঙদোক্নখি। ২০২৫ তা পার্তনরশিপ অসিগী চহি ১০ মপুং ফারকপবু নীংশিংলদুন, মসি তেংবাংনবা হেন্না নকশিন্নখিবগী দেকেদ ওইরি হায়না য়ানখি, অমসুং মখোয়না লাক্কদবা চহিশিংদা পার্তনরশিপ অসি মখা তানা মপাঙ্গল কনখৎহন্নবা মখোয়গী ফিরেপ অদু অমুক হন্না চেৎশিনহনখি।

***