প্ৰধানমন্ত্ৰী শ্ৰী নৰেন্দ্ৰ মোদীয়ে আজি ৰাজ্যসভাত ভাষণ দিয়ে আৰু অভূতপূৰ্বভাৱে তৃতীয়বাৰৰ বাবে ৰাজ্যসভাৰ উপ-সভাপতি হিচাপে নিৰ্বাচিত হোৱাৰ বাবে শ্ৰী হৰিবংশক আন্তৰিক অভিনন্দন জ্ঞাপন কৰে। এই ঐতিহাসিক সাফল্য সন্দৰ্ভত আলোকপাত কৰি প্ৰধানমন্ত্ৰীয়ে কয় যে ইয়ে শ্ৰী হৰিবংশৰ ওপৰত সদনৰ গভীৰ বিশ্বাস আৰু প্ৰতিষ্ঠানটোৰ প্ৰতি তেওঁৰ মূল্যৱান অভিজ্ঞতাক প্ৰতিফলিত কৰে। "একেৰাহে তৃতীয়বাৰৰ বাবে নিৰ্বাচিত হোৱাটো তেওঁৰ অভিজ্ঞতা, দৃষ্টিভংগী আৰু মৰ্য্যাদাপূৰ্ণ কৰ্মশৈলীৰ ওপৰতসদনৰ অনুমোদনৰ মোহৰ", শ্ৰী মোদীয়ে মন্তব্য কৰে।

প্ৰধানমন্ত্ৰীয়ে প্ৰাক্তন প্ৰধানমন্ত্ৰী চন্দ্ৰ শেখৰৰ জন্ম বাৰ্ষিকী উপলক্ষে ১৭ এপ্ৰিলৰ বিশেষ তাৎপৰ্যৰ কথা উল্লেখ কৰে। চন্দ্ৰ শেখৰ জীৰ সৈতে শ্ৰী হৰিবংশৰ ঘনিষ্ঠ সম্পৰ্কৰ  বিষয়ে দৃষ্টি আকৰ্ষণ কৰি প্ৰধানমন্ত্ৰী মোদীয়ে কয় যে উপ-সভাপতিগৰাকীয়ে তেওঁৰ সমগ্ৰ ৰাজনৈতিক যাত্ৰাত তেওঁৰ সহযোগী হিচাপে কাম কৰিছিল আৰু তেওঁৰ জীৱনৰ আধাৰত গ্ৰন্থ ৰচনা কৰিছিল। "চন্দ্ৰ শেখৰ জীৰ জয়ন্তীত আপোনাৰ তৃতীয়টো কাৰ্যকাল আৰম্ভ কৰাটোৱে এই অনুষ্ঠানটো বিশেষভাৱে অৰ্থপূৰ্ণ কৰি তুলিছে", শ্ৰী মোদীয়ে দৃঢ়তাৰে কয়।

সাংবাদিকতাৰ ক্ষেত্ৰখনত শ্ৰী হৰিবংশৰ কেৰিয়াৰৰ কথা স্মৰণ কৰি প্ৰধানমন্ত্ৰীয়ে উচ্চ মান আৰু প্ৰভাৱশালী লিখনিৰ প্ৰতি তেওঁৰ দায়বদ্ধতাক প্ৰশংসা কৰে। প্ৰধানমন্ত্ৰীয়ে কয় যে গুজৰাটত কাৰ্যকালৰ সময়তো, তেওঁ নিয়মিতভাৱে শ্ৰী হৰিবংশৰ প্ৰবন্ধসমূহ পঢ়িছিল, যি গভীৰ অধ্যয়ন আৰু দৃঢ় বিশ্বাসক প্ৰতিফলিত কৰে। শ্ৰী মোদীয়ে কয় যে, "তেওঁৰ লিখনিসমূহ তীক্ষ্ণ দিশৰ আছিল, কিন্তু তেওঁৰ ভাষণ আৰু আচৰণ সদায় কোমল আৰু বিনম্ৰ আছিল।"

প্ৰধানমন্ত্ৰীয়ে শ্ৰী হৰিবংশৰ সাংবাদিকতাৰ সময়ত 'হামাৰা সাংসদ কেইছা হো' (আমাৰ সংসদ সদস্য কেনেকুৱা হ’ব লাগে)শীৰ্ষক তেওঁৰ স্তম্ভ শৃংখলাৰ জৰিয়তে তেওঁৰ কৰ্মৰাজিৰ ওপৰত আলোকপাত কৰে। এই অভিজ্ঞতাৰ মূল্যৰ ওপৰত গুৰুত্ব আৰোপ কৰি প্ৰধানমন্ত্ৰী মোদীয়ে কয় যে উভয় সদনৰ নতুন সাংসদসকলে সংসদীয় আচৰণ, মৰ্যাদা আৰু দায়িত্ব সন্দৰ্ভত শ্ৰী হৰিবংশৰ অন্তৰ্দৃষ্টিৰ পৰা যথেষ্ট শিকিব পাৰে।"হয়তো তেতিয়া তেওঁ ভবা নাছিল যে তেওঁ নিজেই এদিন এই চকীখন দখল কৰিব, কিন্তু তেওঁৰ লিখনিসমূহে বিষয়টো গভীৰভাৱে সামৰি লৈছিল", শ্ৰী মোদীয়ে কয়।

প্ৰধানমন্ত্ৰীয়ে শ্ৰী হৰিবংশৰ দৃষ্টান্তমূলক সময়ানুবর্তিতা, শৃঙ্খলাবদ্ধ জীৱন আৰু কৰ্তব্যৰ প্ৰতি দায়বদ্ধতাক তেওঁৰ সাৰ্বজনীনভাৱে স্বীকৃত ব্যক্তিত্বৰ আঁৰৰ মূল কাৰক হিচাপে প্ৰশংসা কৰে। তেওঁ কয় যে ৰাজ্যসভাৰ সদস্য হোৱাৰ পিছৰে পৰা শ্ৰী হৰিবংশে সদনত পূৰ্ণকালীন উপস্থিতি বৰ্তাই ৰাখিছে, সভাপতিত্ব নকৰিলেও অধিৱেশনত উপস্থিত আছে। "ই দায়িত্বৰ প্ৰতি তেওঁৰ গভীৰ দায়বদ্ধতাক প্ৰতিফলিত কৰে আৰু আমাৰ সকলোৰে বাবে এক উদাহৰণ দাঙি ধৰে", শ্ৰী মোদীয়ে কয়।

প্ৰধানমন্ত্ৰীয়ে সংসদীয় কাম-কাজৰ বাহিৰেও শ্ৰী হৰিবংশৰ উল্লেখযোগ্য ৰাজহুৱা কৰ্মৰাজি বিশেষকৈ যুৱক-যুৱতীসকলৰ সৈতে তেওঁৰ কৰ্মৰ প্ৰতি দৃষ্টি আকৰ্ষণ কৰে। চকুত লগা পৰিসংখ্যা শ্বেয়াৰ কৰি তেওঁ কয় যে  ২০১৮ চনত উপ-সভাপতি হিচাপে কাৰ্যভাৰ গ্ৰহণ কৰাৰ পিছত শ্ৰী হৰিবংশে সমগ্ৰ দেশৰ মহাবিদ্যালয় আৰু বিশ্ববিদ্যালয়সমূহত ৩৫০ টাতকৈও অধিক কাৰ্যসূচী অনুষ্ঠিত কৰিছে। "ই যুৱক-যুৱতীসকলৰ সৈতে সংযোগ স্থাপন  কৰা, বিষয়সমূহ প্ৰস্তুত কৰা আৰু বিকশিত ভাৰতৰ দৃষ্টিভংগীৰে তেওঁলোকক অনুপ্ৰাণিত কৰাৰ এক অসাধাৰণ দায়বদ্ধতাক প্ৰতিনিধিত্ব কৰে", শ্ৰী মোদীয়ে গুৰুত্ব আৰোপ কৰে।

শিক্ষাৰ্থীসকলৰ মাজত আত্মবিশ্বাস গঢ়ি তোলাৰ সন্দৰ্ভত উপ-সভাপতিগৰাকীৰ গুৰুত্বৰ প্ৰশংসা কৰি প্ৰধানমন্ত্ৰীগৰাকীয়ে কয় যে, ভাৰতে পূৰ্বতে কিয় আকাংক্ষিত গতিত উন্নতি লাভ কৰিব নোৱাৰিলে আৰু ৰাষ্ট্ৰখনৰ অগ্ৰগতিৰ বাবে এতিয়া কি কি সুযোগ আছে, সেই সম্পৰ্কে ব্যাখ্যা কৰিবলৈ শ্ৰী হৰিবংশে ঐতিহাসিক প্ৰসংগ ব্যৱহাৰ কৰে। প্ৰধানমন্ত্ৰী মোদীয়ে লগতে দ্বিতীয় আৰু তৃতীয় পৰ্যায়ৰ চহৰসমূহত আয়োজিত সাহিত্য মহোৎসৱত শ্ৰী হৰিবংশৰ সক্ৰিয় অংশগ্ৰহণৰ কথা উল্লেখ কৰে, যিয়ে সমাজৰ বিভিন্ন শ্ৰেণীক প্ৰভাৱিত আৰু অনুপ্ৰাণিত কৰে।

প্ৰধানমন্ত্ৰীয়ে ১৯৯৪ চনত শ্ৰী হৰিবংশৰ প্ৰথম আমেৰিকা ভ্ৰমণৰ আকৰ্ষণীয় কাহিনী শ্বেয়াৰ কৰে। প্ৰধানমন্ত্ৰী মোদীৰ মতে, সেই উন্নত দেশত তেওঁ কি চাব বিচাৰে বুলি সোধাত শ্ৰী হৰিবংশে বিশ্ববিদ্যালয়সমূহ ভ্ৰমণ কৰি কি ধৰণৰ শিক্ষা আৰু সংস্কৃতিয়ে এনে প্ৰগতি সম্ভৱ কৰি তুলিছে সেয়া বুজাৰ ইচ্ছা প্ৰকাশ কৰে। "তেওঁ সেই ভ্ৰমণৰ অধিকাংশ সময় আমেৰিকাৰ বিশ্ববিদ্যালয়সমূহ অধ্যয়ন কৰি অতিবাহিত কৰিছিল, যি এক উন্নত ভাৰতৰ বাবে শৈক্ষিক উৎকৃষ্টতাৰ প্ৰতি তেওঁৰ গভীৰ দায়বদ্ধতাক প্ৰতিফলিত কৰিছিল", শ্ৰী মোদীয়ে মন্তব্য কৰে।

প্ৰধানমন্ত্ৰীয়ে শ্ৰী হৰিবংশৰ এমপিএলএডিএছ (সাংসদ স্থানীয় ক্ষেত্ৰ উন্নয়ন আঁচনিৰ সদস্য) পুঁজিৰ অনুকৰণীয় ব্যৱহাৰক অন্যান্য সাংসদসকলৰ বাবে আদৰ্শ হিচাপে উল্লেখ কৰে। প্ৰধানমন্ত্ৰীয়ে উপ-সভাপতি গৰাকীয়ে স্থাপন কৰা বিভিন্ন অধ্যয়ন আৰু গৱেষণা কেন্দ্ৰৰ বিষয়ে বিশদভাৱে বৰ্ণনা কৰে, যাৰ ভিতৰত আছে আই আই টি পাটনাৰ বিপন্ন ভাৰতীয় ভাষাৰ কেন্দ্ৰ, বিহাৰৰ অঞ্চলসমূহৰ ভূমিকম্পজনিত দুৰ্বলতা বিবেচনা কৰি ভূমিকম্প অভিযান্ত্ৰিক কেন্দ্ৰ আৰু খহনীয়াৰ সমস্যা সমাধানৰ বাবে পাটনাৰ আৰ্যভট্ট জ্ঞান বিশ্ববিদ্যালয়ত এটা নদী অধ্যয়ন কেন্দ্ৰ। "দীৰ্ঘম্যাদী প্ৰভাৱৰ বাবে কেনেদৰে এম পি এল এ ডি এছ পুঁজি এক কেন্দ্ৰীভূত দিশত ব্যৱহাৰ কৰিব পাৰি সেয়া তেওঁ প্ৰদৰ্শন কৰিছে", শ্ৰী মোদীয়ে দৃঢ়তাৰে কয়।

প্ৰধানমন্ত্ৰীয়ে চন্দ্ৰগুপ্ত ইনষ্টিটিউট অৱ মেনেজমেণ্টত এটা ব্যৱসায়িক ইনকিউবেচন এণ্ড ইনোভেচন চেণ্টাৰ আৰু মগধ বিশ্ববিদ্যালয়ত এটা কৃত্ৰিম বুদ্ধিমত্তা কেন্দ্ৰকে ধৰি শ্ৰী হৰিবংশৰ দ্বাৰা পুঁজি যোগান ধৰা অন্যান্য পদক্ষেপৰ কথাও উল্লেখ কৰে। নগৰত বাস কৰা স্বত্ত্বেও গাঁৱৰ মূলৰ সৈতে উপ-সভাপতিগৰাকীৰ অব্যাহত থকা সম্পৰ্কৰ প্ৰশংসা কৰি শ্ৰী মোদীয়ে কয়, "হৰিবংশ জী তেওঁৰ গাঁৱৰ সৈতে গভীৰভাৱে সংযুক্ত হৈ আছে আৰু তেওঁৰ নিজৰ সম্প্ৰদায়ৰ সুখ-দুখত নিৰন্তৰ অৱদান আগবঢ়াই আহিছে।"

নতুন সংসদ ভৱন নিৰ্মাণৰ সময়ত শ্ৰী হৰিবংশৰ সৈতে কাম কৰাৰ ব্যক্তিগত অভিজ্ঞতা শ্বেয়াৰ কৰি প্ৰধানমন্ত্ৰীয়ে তেওঁৰ সহযোগিতা কিমান মূল্যৱান আছিল সেই কথা ব্যক্ত কৰে। শ্ৰী হৰিবংশে কিদৰে দুদিনৰ আলোচনাৰ অন্তত অনুষ্ঠানৰ নামকৰণ, চেম্বাৰ, আৰ্ট গেলেৰী আৰু বিভিন্ন গেট চিনাক্তকৰণৰ বাবে নিখুঁত ধাৰণা কৰিছিল, প্ৰধানমন্ত্ৰী মোদীয়ে সেই কথা স্মৰণ কৰে। "সংসদ নিৰ্মাণৰ সময়ত একেলগে কাম কৰাটো এক অত্যন্ত উপভোগ্য আৰু ফলপ্ৰসূ অভিজ্ঞতা আছিল", শ্ৰী মোদীয়ে মন্তব্য কৰে।

প্ৰশিক্ষণ আৰু ক্ষমতা বিকাশৰ জৰিয়তে ৰাজ্যৰ বিধানসভা, বিধান পৰিষদ আৰু তেওঁলোকৰ প্ৰিজাইডিং বিষয়াসকলক সহায় কৰাৰ ক্ষেত্ৰত শ্ৰী হৰিবংশৰ প্ৰচেষ্টাৰ শলাগ লৈ প্ৰধানমন্ত্ৰীগৰাকীয়ে লগতে বিশ্বত ভাৰতৰ গণতান্ত্ৰিক ব্যৱস্থাৰ এক শক্তিশালী প্ৰভাৱ সৃষ্টি কৰাত কমনৱেলথ সংসদীয় সংঘত তেওঁৰ সক্ৰিয় ভূমিকাৰ প্ৰশংসা কৰে। শ্ৰী মোদীয়ে একবিংশ শতিকাৰ দ্বিতীয় চতুৰ্থাংশত সদনৰ গুৰুত্বপূৰ্ণ ভূমিকাৰ ওপৰত আস্থা প্ৰকাশ কৰি আৰু প্ৰিজাইডিং বিষয়াসকলৰ দায়িত্বৰ ওপৰত গুৰুত্ব আৰোপ কৰি ভাষণৰ সামৰণি মাৰে।

Speaking in the Rajya Sabha. https://t.co/0MhP3145LO

— Narendra Modi (@narendramodi) April 17, 2026

****

MJPS/PRK/NB