তথ্যচিত্ৰ, চুটি কল্পকাহিনী আৰু এনিমেশ্যন ছবিৰ ১৯ সংখ্যক মুম্বাই আন্তঃৰাষ্ট্ৰীয় চলচ্চিত্ৰ মহোৎসৱ ২০২৬ চনৰ ১৫ জুনৰ পৰা ২১ জুনলৈ এনএফডিচি কমপ্লেক্স, মুম্বাইত অনুষ্ঠিত হ’ব।

এই মহোৎসৱত ভাৰত আৰু সমগ্ৰ বিশ্বৰ তথ্যচিত্ৰ নিৰ্মাতা, চলচ্চিত্ৰ পেছাদাৰ, চিনেমা শিল্পী, লেখক, শিক্ষাবিদ, সমালোচক, সাংবাদিক, ছাত্ৰ, আৰু উৎসাহীসকলক চিনেমাৰ এই প্ৰাণোচ্চল মঞ্চৰ সৈতে অংশগ্ৰহণ আৰু জড়িত হ’বলৈ আমন্ত্ৰণ জনোৱা হয়।

সম্প্ৰতি প্ৰতিযোগিতা শাখাত প্ৰদৰ্শনৰ বাবে চলচ্চিত্ৰসমূহৰ অনলাইন দাখিলৰ কাম চলি আছে। দাখিলৰ শেষ তাৰিখ হৈছে ১২ এপ্ৰিল, ২০২৬। প্ৰযোজক, বিতৰক, স্বত্বাধিকাৰী বা তেওঁলোকৰ অনুমোদিত প্ৰতিনিধিয়ে নিয়মাৱলী যথাযথভাৱে পঢ়াৰ পিছত ফিল্ম ফ্ৰীৱে প্লেটফৰ্ম (https://filmfreeway.com/MumbaiInternationalFilmFestival-MIFF)ৰ জৰিয়তে তেওঁলোকৰ ছবিসমূহ দাখিল কৰিব পাৰিব। কোনো প্ৰৱেশ অফলাইন গ্ৰহণ কৰা নহ'ব।

তথ্য আৰু সম্প্ৰচাৰ মন্ত্ৰালয়ৰ ৰাষ্ট্ৰীয় চলচ্চিত্ৰ উন্নয়ন নিগম-ৰ উদ্যোগত (এন এফ ডি চি) আয়োজন কৰা এম আই এফ এফে নন-ফিচাৰ ফিল্ম খণ্ডৰ অন্যতম আকৰ্ষণীয় বঁটা পেকেজ আগবঢ়াই আহিছে, মুঠ নগদ ধনৰ পৰিমাণ ৫৫ লাখ টকা। শ্ৰেষ্ঠ তথ্যচিত্ৰৰ সন্মানীয় সোণালী শংখ বঁটাত থাকিব নগদ ১০ লাখ টকা। এই উৎসৱে নেটৱৰ্কিং আৰু কো-প্ৰডাকশ্যনৰ সুযোগৰ বাবেও এক মূল্যৱান মঞ্চ প্ৰদান কৰে।

এমআইএফএফ ২০২৬ৰ এটা মূল আলোকপাত হ’ব ২০২৬ চনৰ ১৬ জুন তাৰিখৰ পৰা ১৮ জুনলৈ নিৰ্ধাৰিত WAVES Doc Bazaarৰ দ্বিতীয় সংস্কৰণ। ইয়াৰ লক্ষ্য হৈছে নন-ফিচাৰ ছবিৰ গোলকীয় ক্ৰেতা আৰু বিক্ৰেতাসকলৰ মাজত সংযোগ সহজ কৰি তোলা, একে সময়তে তথ্যচিত্ৰ নিৰ্মাণ, নিৰ্মাণ আৰু বিতৰণৰ ক্ষেত্ৰত সহযোগিতা আৰু উদ্ভাৱনক লাভান্বিত কৰা। WAVES Doc Bazaar ত অংশগ্ৰহণ সন্দৰ্ভত অধিক বিৱৰণ অচিৰেই MIFF ৰ অফিচিয়েল ৱেবছাইটত ঘোষণা কৰা হ’ব। আগ্ৰহীসকলে https://miff.in/en/waves-doc-bazaar/about-waves-doc-bazaarত চকু ৰাখিব পাৰে।

১৯৯০ চনত স্থাপিত এম আই এফ এফ দক্ষিণ এছিয়াৰ আটাইতকৈ পুৰণি আৰু বৃহৎ নন-ফিচাৰ ফিল্ম ফেষ্টিভেল আৰু ই দ্বিবাৰ্ষিকভাৱে অনুষ্ঠিত হয়। বছৰ বছৰ ধৰি এই উৎসৱে তথ্যচিত্ৰ, চুটি কল্পকাহিনী, আৰু এনিমেশ্যন চলচ্চিত্ৰ নিৰ্মাণৰ ক্ষেত্ৰত উৎকৃষ্টতা প্ৰদৰ্শনৰ বাবে উল্লেখযোগ্য সুনাম অৰ্জন কৰি সমগ্ৰ বিশ্বৰ চলচ্চিত্ৰ নিৰ্মাতাসকলৰ অংশগ্ৰহণ আকৰ্ষণ কৰি আহিছে।

এম আই এফ এফ-ৰ ১৮ সংখ্যক সংস্কৰণত ৩০ খনতকৈয়ো অধিক দেশৰ ৩৫০ খনতকৈয়ো অধিক ছবিয়ে আপ্লুত সঁহাৰি লাভ কৰে। এই মহোৎসৱত আন্তঃৰাষ্ট্ৰীয় আৰু ৰাষ্ট্ৰীয় প্ৰতিযোগিতা শিতান, বঁটা বিজয়ী ছবি প্ৰদৰ্শন, পুনৰুদ্ধাৰ কৰা ক্লাছিক ছবি, আৰু বিশেষভাৱে কিউৰেট কৰা বিষয়ভিত্তিক খণ্ড আদি অনুষ্ঠিত কৰা হৈছিল।

অধিক তথ্য আৰু আপডেটৰ বাবে, যোগাযোগ কৰক: miff.india@nfdcindia.com বা www.miff.inচাওক

***

SriyankaChatterjee / RobinSingh / DineshYadav/KB