1. అస్సాం, కేరళ, పుదుచ్చేరి శాసనసభలకు సాధారణ ఎన్నికల సందర్భంగా భారత ఎన్నికల సంఘం ఈ రోజు న్యూఢిల్లీలో అంతర్జాతీయ ఎన్నికల సందర్శకుల కార్యక్రమం (ఐఈవీపీ)-2026ను ప్రారంభించింది.

2. భారత అంతర్జాతీయ ప్రజాస్వామ్యం, ఎన్నికల నిర్వహణ సంస్థ (ఐఐఐడీఈఎం)లో ఎన్నికల కమిషనర్లు డాక్టర్ ఎస్ ఎస్ సంధు, డాక్టర్ వివేక్ జోషితో కలసి ప్రధాన ఎన్నికల కమిషనర్ (సీఈసీ) శ్రీ జ్ఞానేష్ కుమార్ ఈ కార్యక్రమాన్ని ప్రారంభించారు.

3. భారత్‌లో జరిగే ఎన్నికలను ప్రజాస్వామ్య ఉత్సవాలుగా ఎన్నికల సంఘం పరిగణిస్తోందని, ఈ దిశగా ప్రత్యేక కార్యాచరణతో పనిచేస్తోందని ప్రారంభోపన్యాసంలో సీఈసీ శ్రీ జ్ఞానేశ్ కుమార్ చెప్పారు. ఈ కార్యక్రమంలో పాల్గొన్న వారు రాష్ట్రాలను సందర్శించాలని, అక్కడి విషయాలను తెలుసుకోవాలనీ, భారతీయ వైవిధ్యాన్ని చూడాలనీ సూచించారు.

4. ఈ కార్యక్రమ ప్రతినిధులు మొదటి దశలో 2026 ఏప్రిల్ 8, 9 తేదీల్లో అస్సాం, కేరళ, పుదుచ్చేరిలను సందర్శిస్తారు. రెండో దశలో 2026 ఏప్రిల్ 20 నుంచి పశ్చిమ బెంగాల్, తమిళనాడు రాష్ట్రాల్లో పర్యటిస్తారు.

5. 23 దేశాలకు చెందిన 43 మంది ప్రతినిధులు ఈ కార్యక్రమం మొదటి దశలో పాల్గొంటారు. ఢిల్లీలోని అయిదు విదేశాలకు చెందిన అధికార ప్రతినిధులు కూడా ఉన్నారు.

6. ఐఐఐడీఈఎంలో ఈవీఎంల గురించి ప్రతినిధులకు అవగాహన కల్పించారు. ఓటింగ్ ప్రక్రియ గురించి తెలుసుకోవడానికి ఈవీఎంలతో నిర్వహించిన మాక్ పోలింగ్‌లో వారు పాల్గొన్నారు.

7. భారత్‌లో నిర్వహిస్తున్న ఎన్నికల ప్రక్రియలో భాగమైన సాంకేతిక విధానాలపై, పరిపాలనపరమైన రక్షణ చర్యలపై ప్రతినిధులు ఆసక్తి కనబరిచారు. నిపుణులతో మాట్లాడి తమ సందేహాలను నివృత్తి చేసుకున్నారు.

8. అస్సాం, కేరళ, కేంద్రపాలిత ప్రాంతమైన పుదుచ్చేరిలకు 2026, ఏప్రిల్ 8న చేరుకుంటారు. జిల్లా స్థాయి కంట్రోలు రూములు, మీడియా పర్యవేక్షణ కేంద్రాలతో సహా రవాణా, పంపిణీ కేంద్రాలు, ఇతర సౌకర్యాలను పరిశీలిస్తారు. 2026 ఏప్రిల్ 9న నిర్వహించే పోలింగ్ ప్రక్రియను కూడా వీక్షిస్తారు.

9. ఇతర దేశాల ఎన్నికల సంఘాలు (ఈఎంబీలు), అంతర్జాతీయ సంస్థలతో ప్రపంచ సహకారానికి, భాగస్వామానికి ఈసీఐ ప్రారంభించిన ప్రతిష్ఠాత్మక కార్యక్రమమే ఐఈవీపీ.

10. విదేశీ ఈఎంబీల ప్రతినిధులకు ఎన్నికల నిర్వహణలో ఉత్తమ పద్ధతులను, ఆవిష్కరణలను పరిచయం చేస్తూనే భారత ఎన్నికల విధానం, సంస్థాగత వ్యవస్థలు, కార్యనిర్వాహక విధానం గురించి సమగ్రంగా వివరిస్తుంది.

11. అంతర్జాతీయ సమాజానికి భారత ఎన్నికల వ్యవస్థ సామర్థ్యాలను ఐఈవీపీ ప్రదర్శిస్తుంది. ప్రపంచంలోనే అతిపెద్ద ప్రజాస్వామ్య దేశంలో ఎన్నికల నిర్వహణలో అనుసరిస్తున్న ఉత్తమ పద్ధతులను పంచుకుంటుంది.

***