नवी दिल्‍ली, 4 एप्रिल 2026

अल्पसंख्याक व्यवहार मंत्रालयाने मुंबईत बॉम्बे पारशी पंचायतीच्या सहकार्याने आयोजित केलेल्या सार्वत्रिक पारशी नोंदणी मोहिमेच्या विशेष सुविधा शिबिराला आज प्रचंड प्रतिसाद मिळाला. शिबिरादरम्यान 'जियो पारशी' पोर्टलवर सुमारे 300 नवीन नोंदण्या पूर्ण झाल्या. ही मोहीम विविध योजनांचा लाभ पारशी समाजातील व्यक्तींपर्यंत पोहोचवण्याच्या दृष्टीने एक महत्त्वपूर्ण पाऊल आहे.

'जियो पारशी' ही भारत सरकारची एक प्रमुख केंद्रीय योजना आहे. पारशी समाजाची घटणारी लोकसंख्या रोखणे हा या मोहिमेचा प्रमुख उद्देश आहे.

2013-14 मध्ये सुरू झालेली ही योजना, नियोजित उपाययोजना आणि वैज्ञानिक सहाय्याद्वारे पारशी लोकसंख्या स्थिर ठेवण्याचा आणि वाढवण्याचा प्रयत्न करते.

या योजनेअंतर्गत खालील गोष्टी पुरवल्या जातात:

• वंध्यत्व उपचार आणि गर्भधारणेसंबंधित काळजीसाठी वैद्यकीय सहाय्य
• बालसंगोपन आणि परावलंबी वृद्ध व्यक्तींच्या देखभालीसाठी आर्थिक सहाय्यासह सामुदायिक आरोग्य सहाय्य
• समुपदेशन, जनजागृती मोहीम आणि संपर्क कार्यक्रमांद्वारे समाज प्रबोधन.

अल्पसंख्याक व्यवहार मंत्रालयाचे सहसचिव श्यामा प्रसाद रॉय यांनी उपस्थितांना संबोधित करताना पारशी समाजाच्या कल्याणासाठी सरकारच्या निरंतर वचनबद्धतेचे आश्वासन दिले. पात्र लाभार्थ्यांनी पुढे येऊन योजनांचे लाभ घ्यावेत असे आवाहन त्यांनी केले. विविध योजनांची अंमलबजावणी अधिक मजबूत करण्यासाठी नोंदणीकृत सदस्यांनी अभिप्राय द्यावेत, असेही ते म्हणाले.

शिबिराच्या यशस्वी आयोजनातून योजनेबद्दल वाढती जागरूकता आणि विश्वास दिसून येत असून पारशी समाजाचा समृद्ध सांस्कृतिक आणि लोकसंख्यात्मक वारसा जपण्याच्या सरकारच्या निर्धाराला अधिक बळ मिळाले.

* * *

शैलेश पाटील/श्रद्धा मुखेडकर/दर्शना राणे

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai