গুজরাতকী মুখ্য মন্ত্রী শ্রী ভুপেন্দ্র ভাই পতেল, রাজ্য অসিগী উপ মুখ্য মন্ত্রী শ্রী হর্শ ভাই সংঘভি, কেন্দ্রগী মন্ত্রীমন্দলদা ঐহাক্কী মরুপ অশ্বিনী বৈষ্ণোজী, রাজ্য মন্ত্রী ইনাও অর্জুন মোধৱাদিয়াজী, কেন্স অমসুং অল্ফা ওমেগা সেমিকন্দক্তরগী মীহুৎশিং, অতোপ্পা মশক নাইবা মীওইশিং, নুপীশিং অমসুং নুপাশিং।

মমাং থাগী অরোইবা নুমিত্তা ঐহাক সনান্দদা লৈরম্মি অমসুং থা অসিগী অরোইবা নুমিত্তা ঐহাক সনান্দদা লৈরি। ফেব্রুৱারী ২৮দা, মাইক্রোনগী প্লান্ততা প্রদক্সন হৌখি, অমসুং ঙসি মার্চ ৩১দা, কেন্স তেক্নোলোজীগী সেমিকন্দক্তর প্লান্ততা প্রদক্সন হৌরে। মসি চান্নরুবা খক্তা নত্তে, মসি ভারতকী সেমিকন্দক্তর ইকোসিস্তেম চাউখৎলক্লিবা খোঙজেল, অমদি ভেলোসিতী অদুগী খুদম্নি। কেন্স তেক্নোলোজীগী লুচিংবা পুম্নমকপু ঐনা থাগৎপা ফোংদোকচরি। রমেশ রাঘু, নুংঙাইবা ফোংদোকচরি। ঐহাক্না গুজরাত সরকার অমসুং প্লান্ত অসিদা থবক তৌরিবা ইচিল-ইনাও পুম্নমকপু থাগৎপা ফোংদোকচরি।

মরুপশিং,

ঙসি অয়ুক ঐহাক 'ঈশ্বর'গা মরী লৈনবা প্রোগ্রাম অমদা শরুক য়াখি অমসুং হৌজিক ঐহাক 'দিজিতেল'গা মরী লৈনবা প্রোগ্রাম অমদা শরুক য়াজরি।

মরুপশিং,

ভারতকী কম্পনী অমনা সেমিকন্দক্তর চিপশিং শাবদা পুক্নিং চংলকপা অসিদা ঐহাক য়াম্না নুংঙাইবা ফাওই। মসিগী ফল অসি ঐখোয়গী মাংদা লৈরে। ঐখোয়গী ইন্দিয়াগী মশাগী কেন্স কম্পনী অসি হৌজিক মালেমগী সেমিকন্দক্তর সপ্লাই চেনগী মপাঙ্গল লৈবা শরুক অমা ওইরে। ভারত মচা খুদিংমক্না চাউথোকচবা পোক্কদবা, ভারত মচা খুদিংমক্না চাউথোকচবা পোক্কদবা মতম অমনি। লাক্কদৌরিবা নুমিৎশিংদা, ভারতকী কম্পনী কয়ানা মালেমগী ওইনা খুৎশম্নদুনা মালেমদা রেসিলেন্ত সেমিকন্দক্তর সপ্লাই চেন অমা পীরগনি।

মরুপশিং,

ঙসিগী নুমিৎ অসিনা, অশেংবা ৱাখল্লোন্দা হায়রবদা, মেক ইন ইন্দিয়া, মেক ফোর ৱার্ল্দ হায়বা মন্ত্র অসিবু মংফাওনহল্লি। প্রোজেক্ত অসিদা পোত্থোক পুথোকপা হৌরকপগা লোয়ননা ভারতনা মালেমগী কৈথেলদা থাজবা য়াবা সেমিকন্দক্তর সপ্লাইয়র অমা ওইনা মসিগী থৌদাং অসি হেন্না মপাঙ্গল কনখৎহল্লে। ঙসি, সনান্দ অমসুং সিলিকোন ভেলীগী মরক্তা অনৌবা থোং অমা শেম্লে। কেলিফোর্নিয়াগী কম্পনী অমগীদমক, সনান্দদা লৈবা প্লান্ত অসিনা ইন্তেলিজেন্ত পাৱর মোদুলশিং ফংহল্লি। মফম অসিদা পুথোক্লিবা পোত্থোকশিংগী অয়াম্বা শরুক অসি মপাল লমদা পুথোক্নবা বুক তৌখ্রে হায়না ঐহাক্না খঙলে। সনান্দদা শাবা মোদ্যুলশিং অসি অমেরিকান কম্পনীশিংদা য়ৌরগনি, অমসুং মফম অদুদগী মালেম পুম্বদা পাৱর পীরগনি। মেক ইন ইন্দিয়া, মেক ফোর ৱার্ল্দগী মন্ত্র অসিগী মাইপাকপগী ইথিল অসি মালেমগী মফম খুদিংমক্তা য়ৌরগনি।

মরুপশিং,

ইন্তেলিজেন্ত পাৱর মোদ্যুলশিং অসিদগী ভারত অমসুং মালেমগী ইলেক্ত্রিক ভেহিকল ইকোসিস্তেম অমসুং হেভি ইন্দস্ত্রীদা অচৌবা শক্তি ফংলগনি। মালেমগী ওইবা পার্তনরশিপ অসি মালেমগী হেন্না ফবা তুংলমচৎ অমগী অচেৎপা য়ুম্ফম্নি।

মরুপশিং,

২১শুবা চহিচাগী চহি তরাগী খুজিং অসিনা হৌখিবা মতমদগী মালেম অসিগীদমক্তা অৱাবা কয়া অমা পুরক্লি। লাইনা-লাইচৎকী অৱাবা, লানগী অৱাবা লৈরি। মসিদসু, খ্বাইদগী চাউবা ভিক্তিম অসি গ্লোবেল সপ্লাই চেননি। চিপশিং, অতাংবা পৃথিবীগী খোঙগী পোৎলমশিং, নৎত্রগা ইনর্জী ওইগেরা, হায়রিবা অসি লান কয়া অমনা মরম ওইদুনা য়াম্না শোকহল্লি। মখোয়শিং অসি মীওইবা খুন্নাইগী খোঙজেল য়াংনা চাউখৎলকপগা মরী লৈনবা পোৎলমশিংনি। মখোয়গী সপ্লাই চেন, মখোয়গী ফ্লোদা অশোয়বা অমা লৈরকপনা মীওইবা খুন্নাইগী চাউখৎলকপদা অকায়বা পী। মরম অদুনা, ভারতকুম্বা দিমোক্রে সি লৈবাক্কী মাইকৈ অসিদা খোংজেল য়াংশিনবা অসি মালেম পুম্বগী চাউখৎ-থৌরাংগীদমক য়াম্না মরু ওই।

মরুপশিং,

ঐখোয়না কোরোনাগী খুদোংথীবা মতমগী মনুংদা ভারত অসি সেমিকন্দক্তর সেক্তরগী অনৌবা গ্লোবেল হব ওইনবা ৱারেপ লৌখি। সেক্তর অসিদা মশা-মরোমদোম লেপচবা ঙমগনি। সেমিকন্দক্তরশিংদা মশা-মশানা থাজবা থম্বা অসি চিপ অমখক্তদা য়ুম্ফম ওইদে। মসিনা তাকপদি মশা-মরোমদোম লেপচবা অসিনা এ.আই.দা, ইলেক্ত্রিক ভেহিকলশিংদা, ক্লিন ইনর্জীদা, দিফেন্সতা, ইলেক্ত্রোনিক্সতা, অসিগুম্বা সেক্তর কয়াদা পাঙ্গল হাপকনি। মরম অদুনা, চহি ২০২১দা ভারতনা ইন্দিয়া-সেমিকন্দক্তর মিসন হৌদোকখি। মসিগী মিসন অসি ইন্দস্ত্রীএল পোলিসী অমা খক্তা নত্তে, মসি ভারতকী মশা-মরোমদোম থাজবগী খোঙজং অমনি। অমসুং মসিগী শাফু অসি মীপুম খুদিংমক্কী মমাংদা লৈ। মিসন অসিগী মখাদা, লৈবাক অসিগী রাজ্য ৬তা লুপা লাখ ১.৬০,০০০গী প্রোজেক্ত ১০গী থবক পায়খৎলি। কেন্স অমসুং মাইক্রোনগী প্রোজেক্তশিং অসিসু মসিগী শরুক অমনি। সেমিকন্দক্তর চিপ দিজাইন অমসুং মেন্যুফেকচরিংদা মশা-মরোমদোম লেপচবা ঙম্নবগীদমক, ভারতনা ধ্রুব সিক্সতী-ফোরগুম্বা মোদর্ন মাইক্রোপ্রোসেসর অমা পুথোক্লে। মসিদগী ৫জি ইনফ্রাস্ত্রকচর, ওতোমোতিভ ইলেক্ত্রোনিক্স, ইন্দস্ত্রীএল ওতোমেসন, অসিগুম্বা সেক্তর কয়াগীদমক ঐখোয়না ঐখোয়গী ওইবা সেক্যুর প্লেৎফোর্ম অমা ফংলে।

মরুপশিং,

হৌজিক ফাওবদা সেমিকন্দক্তর মিসন মাই পাক্লবা মতুংদা, ভারতনা মসিগী মথংগী তাঙ্কক্কী মাইকৈদা খোঙথাং অমা লৌখৎলে। ৱাখল্লোন অসিগা লোয়ননা, ইন্দিয়া-সেমিকন্দক্তর মিসন ২.০ অসি চহি অসিগী বজেত্তা লাউথোকখ্রে। মসিগী ফেজ অসিদা মীৎয়েং অসি ভারত্তা সেমিকন্দক্তর ইক্বিপমেন্ত অমসুং মেতরিএলশিং পুথোকপদা থম্লি। হৌজিক ঐখোয়গী হোৎনবা অসি মপুং ফাবা ইন্দিয়ন সেমিকন্দক্তর ইকোসিস্তেম অমা শেমগৎপনি। মসিনা ঐখোয়না দোমেস্তিক অমসুং গ্লোবেল সপ্লাই চেনশিংদা অচৌবা পার্তনরশিপশিং শেম্বা ঙমগনি।

মরুপশিং,

ঙসি ভারতনা ইন্দস্ত্রীনা লুচিংবা রিসর্চ অমসুং ত্রেনিং সেন্তরশিংবু পুক্নিং থৌগৎলি। মসিনা তেক্নোলোজী দিবেলপমেন্তসু পাংথোকহল্লি অমসুং তুংলমচৎকীদমক শেম-শারবা স্কিল লৈরবা ৱার্কফোর্স অমা শেমগৎলি। য়াম্না থুনা লৈবাক অসিদা দিজাইনগী প্রোফেস্নেল লিশিং ৮৫ হেন্না শেমগৎনবা পান্দম অদু ফংলগনি। মসিগা লোয়ননা, ইকোসিস্তেম পুম্নমক্কী মথৌ তাবশিং য়েংলগা, প্রোফেস্নেলশিংগী ত্রেনিংগী থৌরাংসু পায়খৎলি। সেমিকন্দক্তর দিজাইন প্রমোৎ তৌনবা, চিপ্স তু স্তার্তঅপ প্রোগ্রামসু চৎথরি। ঙসিদি, লৈবাক অসিগী য়ুনিভর্সিতী অমসুং স্তার্ত অপ ৪০০ রোমদা মোদর্ন দিজাইন তুলশিং ফংহনখ্রে। মসিগী মতুং ইন্না চিপ ৫৫ হেন্না দিজাইন অমসুং মেন্যুফেকচর তৌখ্রে।

মরুপশিং,

ইন্দস্ত্রীগী ওইবা এস্তিমেন্তশিংগী মতুং ইন্না, ঙসিদি ভারতকী সেমিকন্দক্তরগী মার্কেত অসি চাউরাক্না দোল্লর বিল্লিয়ন মঙা ওইরে, মসিনা চাউরাক্না লুপা করোর লাখ মরি মখাই ওইরি। মসিনা চহি তরাগী খুদিং অসিগী লোইশিল্লকপদা দোল্লর বিল্লিয়ন ১০০, হায়বদি লুপা করোর লাখ ৯ হেনবা হেনগৎলকপা ঙমগনি। মসিনা ভারতকী সেক্তর অসিদা মতৌ করম্না পোতেন্সিএল লৈবগে হায়বদু উৎলি। ঐখোয়গী পান্দমদি ঐখোয়গী মথৌ তাবশিংগীদমক ভারত মশাদা চিপশিং হেন্না হেন্না পুথোকপা অসিনি। মালেম শিনবা থুংনা লৈরিবা ইনভেস্তরশিংগী মরক্তা ভারতকী ৱারেপ অসিগা মরী লৈননা উবা ফংলিবা পুক্নিং থৌগৎপা অসি ঐখোয়গীদমক য়াম্না চাউবা কেপিতেল অমনি।

মরুপশিং,

ভারতনা মপাঙ্গল কনবা সেমিকন্দক্তর ইকোসিস্তেম অমা শেমগৎপতা নত্তনা, মতম অমত্তদা রো মেতরিএলগী রেসিলিয়েন্ত সপ্লাই চেন অমগীদমকসু অচৌবা খোঙথাংশিংসু লৌখৎলি। ভারতপু পেক্স সিলিকাদা য়াওশিনবা অসিসু হায়রিবা হোৎনবা অসিগী শরুক অমনি। মালেম শীনবা থুংনা লৈরিবা ঐখোয়গী পার্তনরশিংগা লোয়ননা ঐখোয়না ভারত্তা সেক্যুর সপ্লাই চেন অমা লৈহন্নবা হোৎনরি।

মরুপশিং,

ক্রিতিকেল মিনরেলশিংদা মশা-মরোমদোম লেপচবা ঙম্নবা, ভারতনা নেস্নেল ক্রিতিকেল মিনরেল্স মিসনসু হৌদোক্লে। মসিগী মখাদা, ক্রিতিকেল মিনরেলশিং পুথোকপা অমসুং পুথোকপদা মরুওইবা পীরি। মিনরেলশিং রিসাইকল তৌনবগীদমকসু লুপা করোর ১৫০০গী স্কিম অমা হৌদোক্লে। চহি অসিগী বজেৎ অসিদা, ওরিশা, অন্ধ্র প্রদেশ, তামিল নাদু, কেরলামগুম্বা কোস্তেল স্তেতশিংবু পুনশিন্দুনা, রিয়র আর্থ কোরিদোর অমা শাগৎনবা লাউথোকখ্রে। কোরিদোর অসিনা মাইনিং, রিফাইনিং অমসুং মেন্যুফেকচরিংগী মপাঙ্গল লৈবা চেন অমা শেমগদবা অসিগুম্বা ইন্তিগ্রেতেদ নেৎৱার্ক অমা ওইগনি। লৈবাক অসিদা ক্রিতিকেল মিনরেলশিংগী নেস্নেল স্তোকপল অমা লৈহন্নবা ঐখোয়না হোৎনরি। থবক অসি চহি ৩০-৪০গী মমাংদা হৌখিবা ওইরম্বা য়াই। অদুবু হৌজিক ভারতনা মসিগীদমক মিসন মোদতা থবক তৌরি।

মরুপশিং,

ভারতনা থাজৈ মদুদি ২১শুবা চহি চাগী মতম অসি শেন্মিৎলোনগী চাংয়েং তৌবগী মতম খক্তা নত্তে। তুংলমচৎকী তেক্নোলোজীগী লমদম শেমগৎপগী মতমনি। মরম অদুনা, ঐহাক্না মসিগী চহি তরাগী খুজিং অসিবু, মসিগী চহি তরাগী খুজিং অসিবু, ভারতকী তেকেদ হায়না কৌই। চহি তরাগী খুদিং অসিদা ভারতনা লৌখৎলিবা তেক্নোলোজীগা মরী লৈনবা খোঙথাংশিং অসিনা লাক্কদৌরিবা চহি তরাগী খুজিং অসিদা ভারতকী লুচিংবগী শক্তম অদু মপাঙ্গল কনখৎহল্লগনি। ময়াম পুম্নমক্না হন্দক্তা পাংথোকখিবা এ.আই. ইম্পেক্ত সম্মিতকী মাই পাকপগী মতাংদা খঙনরে। করিগুম্বা ঐখোয়না এ.আই. শীজিন্নবগী মতাংদা য়েংবীরবদি, ভারতনা মালেমগী মীপুম খুদিংমক্কী মমাংদা লৈ। ঐখোয় ইন্দিয়নশিংনা তেক্নোলোজী নৈনৈ। দিজিতেল ইন্দিয়াগী মাই পাকপা, ফিনতেকতা পাংথোক্লিবা থবকশিং, মসিদা ঐখোয়না ভারত মচাশিংনা তেক্নোলোজীদা থাজবা থম্লিবা অদু উবা ফংলি। অমসুং ভারতনা লৈরিবা এ.আই. ইকোসিস্তেম অসি ঐখোয়গী সেমিকন্দক্তর সেক্তরগী হৌরকপদগী মতেং য়াম্না ফংলগনি।

মরুপশিং

২১শুবা চহি চাগী ভারত অসি অহোংবা পুরকপগী খুদম খক্তমক ওইদ্রে, অদুবু অহোংবা পুরক্নবা হোৎনবগী থৌনাগা লোয়ননা মাংলোমদা চংশিল্লি। ঐখোয়গী পোলিসীশিং অমসুং ঐখোয়গী ৱারেপশিং অসিনা লাক্কদৌরিবা চহি তরাগী খুজিংশিংদা তেক্নোলোজী অমসুং ইনর্জী সেক্যুরিতীগীদমক অচেৎপা য়ুম্ফম অমা শেমগৎলি। মরম অদুনা, ঙসিদি ভারতনা মরুওইবা তেক্নোলোজী খুদিংমক্তা মমাংদা অমুক্তা ওইখিদ্রিবা মওংদা শেন থাদরি, অমসুং রিফোর্মশিং পাংথোক্লি। ঐখোয়না স্পেস সেক্তর অসি প্রাইবেৎ প্লেয়রশিংগীদমক হাংদোক্লে, ইন-স্পেসগুম্বা ইন্সতিত্যুসনশিং শেম্লে। মসিগী মহৈ ঙসিদি উবা ফংলি। স্পেসকা মরী লৈনবা ঐখোয়গী স্তার্তঅপশিংনা য়াম্না ফবা থবকশিং পায়খৎলি। মতৌ অসুম্না, ন্যুক্লিয়র সেক্তরদা শান্তি বিলগুম্বা পুৱারী ওইরবা ৱারেপশিং ঐখোয়না লৌখ্রে। মসিনা রিন্যুএবল ইনর্জী মিক্সতা ন্যুক্লিয়র ইনর্জীগী শরুক অদু য়াম্না হেনগৎহনগনি। মসি ঐখোয়গী এ.আই.গী তুংলমচৎকীদমক্তসু য়াম্না মথৌ তাই।

মরুপশিং,

ভারতনা ক্বান্তম কম্প্যুতিংবু স্ত্রেতেজিক এসেৎ অমা ওইনা লৌদুনা মিসন মোদতা থবক তৌরি। মসিনা ভারতকী দিজিতেলগী তুংলমচৎপু মপাঙ্গল কনখৎহনবদা অচৌবা থৌদাং অমা লৌগনি। হায়বদি, ঙসি ভারতনা তেক্নোলোজী দিবেলপমেন্ত অমসুং তেক্নোলোজী শীজিন্নবগী হীরম অনিমক্তা য়াম্না থুনা থবক তৌরি। মসি মালেম শীনবা থুংনা লৈরিবা ইনভেস্তরশিংগীদমক্তা অচৌবা খুদোংচাবা অমনি। ঐখোয়না ইজ ওফ দুইং বিজিনেস, ইজ ওফ মেনুফেকচরিং, ইজ ওফ লোজিস্তিক্সতা লেপ্পা লৈতনা থবক তৌরি।

মরুপশিং,

ঐহাক্না থাজবা থম্লি মদুদি কেন্সকী প্লান্ত অসিদগী পুথোকপা পোত্থোকশিংনা ভারতকী মালেমগী ফেক্তরী ওইবগী খোঙচৎ অসিদা হেন্না শক্তি পীরগনি। অমুক্কা হন্না, ময়াম পুম্নমকপু য়াইফ-পাউজেল পীজরি। ময়ামবু হন্না-হন্না থাগৎচরি।

খঙহঞ্জবা: মসি প্রধান মন্ত্রীগী ৱারোলগী চাউরাকপা ৱাহন্থোক পীবনি। তশেংবা ৱারোলদি হিন্দীদা পীখি।

***