Kum shi bynta ki sienjam jong ka Sorkar India ban ai jingtip man ka por ïa ki nongshong shnong shaphang ki jingjia ha West Asia, la pynlong ïa ki jingïalang hapdeng ki myntri sorkar na ka bynta ki lad pathai khubor ha ka National Media Centre. Ha kaba iade bad kane, la pynlong ïa ka jingïalang mynta ka sngi, ha kaba ki heh ophisar na ki tnad Petroleum and Natural Gas, Ports, Shipping and Waterways and External Affairs, ki la ïasam ïa ki jingtip ba thymmai halor ka jingpynbiang umphniang, ki kam ba iadei bad ka duriaw, ki jingïarap ïa ki nong India ba don ha kane ka thaiñ, bad ki sienjam ban pynthikna ïa ka jingshong shngaiñ ha kylleng kine ki bynta.

Ka jingpynbiang bording bad ka jingdon ka umphniang

Ka Tnad Petroleum and Natural Gas ka la ïasam ïa ka jingtip ha kaba iadei bad ka jinglong jingman ka jingpynbiang umphniang, da kaba batai ïa ki sienjam ban pynthikna ïa ka jingdon jong ki mar umphniang bad LPG khlem jingthut ha kaba ïadei bad ka jingkhang ia ka Strait of Hormuz, bad ka la ong:

Ka umphniang bym pat pynkhuid bad ki jaka pynkhuid umphniang

· Baroh ki jaka pynkhuid umphniang ki dang trei borbah bad ki dang pynbiang ia ka umphniang ka bym pat pynkhuid bad la pynbiang ia ka jingdon ka petrol bad ka diesel.

· Ka jingpynmih LPG hapoh ka ri na ki jaka pynkhuid umphniang ka la nang kiew haba ianujor bad ki kyrdan shwa ka jingeh.

Ki Jaka die umphniang

· Baroh ki jaka die umphniang ki treikam kumba ju long ha kylleng ka ri.

· La ioh jingtip ba la don ka jingthied kyrkieh ha ki katto katne ki jaka namar ki katto katne ki khubor hamsaia, kaba la pynlong ia ka jingdie kaba bun bad ka jingbun briew ha ki jaka die mar.

· Ka sorkar ka la ai jingmut ia ki paidbah ba kim dei ban ngeit ia ki khubor hamsaïa bad ka la ban biang ba ka jingdon ka petrol bad diesel ka biang ha kylleng ka ri.

Natural Gas

· Ki kam ba kongsan ki dang bteng ban ioh ia ki jingpynbiang ba la iada, kynthup ia ka jingpynbiang 100 percent sha ka PNG hapoh ka ri bad ka jingkit CNG, katba ki jingpynbiang sha ki nongpyndonkam ha ki karkhana bad ki kam khaii kiba la pyniasoh bad ka grid ki dang pynneh ha ka 80 percent jong ka jingpyndonkam jong ki.

· La ai jingmut ia ki kynhun ka City Gas Distribution (CGD) ba kin buh hakhmat eh ia ki connection PNG na ka bynta ki jaka treikam kum ki hotel, ki jaka bam bad ki canteen.

· Ki kompeni CGD kiba kynthup ia ka IGL, MGL, GAIL Gas bad ka BPCL ki ai jingmyntoi ban kyntiew ia ka jingpyniasoh PNG ha ka kam khaii bad ka jingpyndonkam ha ki iing ki sem.

· Ka sorkar India lyngba ka shithi kaba ha ka 16.03.2026 ka la kyrpad ia ki sorkar jylla/UT ban pynkloi ban ai jingmynjur ia ki aplikeshon kiba donkam na ka bynta ban pyniar ia ka rynsan jong ka CGD.

· Ka sorkar India lyngba ka shithi ha ka 18.03.2026 ka la tyrwa sha baroh ki Jylla/UT ban mang sa 10% ia ka LPG ha ka kam kkhaii sha ki Jylla tang lada ki lah ban iarap ha ka jingkylla kaba jrong samoi na ka LPG sha ka PNG.

· Ka sorkar India ka la kyrpad ia baroh ki tnad sorkar pdeng kiba dei khmih ban pynsted ka jingbuddien bad pyndep ia baroh ki jingai jingbit kiba dang sahteng bad kiba thymmai kiba iadei bad ki jingdon jingem jong ka CGD.

· Ka sorkar India lyngba ka shithi kaba ha ka 20.03.2026 ka la kyrpad ia baroh ki tnad sorkar pdeng ban sdang ia ka jingbishar bniah ia ka jingdawa na ka bynta ki connection PNG ha ki jaka treikam kiba don hapoh ki tnad sorkar pdeng/ki tnad bapher bapher jong ka sorkar India bad ban thung ia u nodal officer na man ka Tnad sorkar pdeng/ Tnad ban iatreilang ha kane ka kam.

· Ka Petroleum and Explosive Safety Organisation (PESO) ka la ai jingmut ia ki ophis treikam jong ka ban pyndepnoh ia ki aplikeshon CGD katkum ka jingbuh hakhmat eh hapoh ka 10 sngi.

· La kyrpad ia ki nongpyndonkam LPG ha ka kam khaii ha ki sorbah bad ki jaka sor ba kin pynkylla noh sha ka PNG.

· Ka Petroleum and Natural gas Regulatory Board (PNGRB) lyngba ka hukum jong ka ha ka 23.03.2026 ka la bthah ïa ki kynhun ka CGD ban buh hakhmat eh ïa ki connection PNG na ka bynta ki skul, ki kolej, ki hostel, ki jaka shet jingshet paidbah bad ki jaka shet jingshet jong ki anganwadi, lyngba ka PNG hapoh san sngi ha kaba ki pipeline ki la don.

· Palat 7,500 tylli ki connection PNG hapoh ki iing ki sem bad na ka bynta ka khaii pateng la pyndep ne pyntreikam hynnin ka sngi ha ki 110 tylli ki jaka.

LPG

· Ka jingpynbiang ia ka LPG ka dang iai bteng ban shah ktah namar ka jinglong jingman ka sain pyrthei.

· Ym don kano kano ka jingjia ha kaba ym don umphniang kumba la ioh jingtip ha ki jaka sam.

· Ka jingphah buh kyrkieh ka la pyni ia ka jingkiew kaba malu mala hynnin ka sngi, katba ka jingpynpoi ia ki tyndong LPG hapoh ka ri ka dang bteng kumba ju long.

· Ka Sorkar ka la dep ban pynbiang ïa ka jingpynpoi ia ka Partial Commercial LPG (20%) sha ki nongpyndonkam. Shuh shuh, ka Sorkar India lyngba ka shithi ha ka 18.03.2026 ka la tyrwa ban mang sa 10% na ka LPG ha ka kam khaii pateng sha ki Jylla/UT katkum ki jingpynkylla ia ka jingsuk ban leh ia ki kam khaii pateng na ka bynta ka jingpyniar ia ka PNG.

· Ka Sorkar. of India lyngba ka shithi ha ka 21.03.2026 ka la ailad ban mang sa 20% ia ka LPG ba pyndonkam ha ka kam khaii sha ki Jylla, kaba pynlong ia ka jingmang baroh ban kot sha ka 50% (kynthup ia ka jingmang 10% kaba pynshong nongrim ha ka jingsuk ban leh ia ki jingpynkylla na ka bynta ban pyniar ia ka PNG). Ia kane ka jingmang sa 20% yn ai ha ki kam ba kongsan kum ki jaka bam, ki dhaba, ki hotel, ki canteen ha ki karkhana, ki jaka shna jingbam/dud, ki canteen/ki jaka die jingbam ba ioh jingiarap ba pyniaid da ka Sorkar Jylla ne ki bor shnong na ka bynta ki jingbam, ki jaka shet paidbah, 5 Kg FTL na ka bynta ki nongbylla kiba nabar.

· 24 tylli ki Jylla/UT ki la pynmih ïa ki hukum ban mang ïa ka Non-domestic LPG katkum ki kyndon ba la pynmih da ka sorkar India. Na ka bynta kiwei pat ki Jylla/UT, ki kompeni umphniang PSU ki dang pyllait ia ki tyndong LPG Commercial. Baroh kumba 18,784 MT la kyntiew naduh ka 14 tarik Lber 2026 da ki kynhun ba iadei bad ki kam khaii ha ki Jylla/UT.

Ka umphniang sharak

· La mang sa 48,000 KL ka umphniang sharak sha ki Jylla bad ki UT, ha kaba la kyrpad ban ithuh ia ki jaka sam umphniang sharak ha ki district.

· 15 tylli ki Jylla bad ki UT ki la pynmih ia ki hukum ban ai SKO, katba ka Himachal Pradesh bad ka Ladakh ki la pyntip ba kam don kano kano ka jingdawa SKO ha ka Jylla/UT. Kat haduh mynta, 17 tylli ki Jylla/UT kim pat pynmih ïa ki hukum ai bhah SKO.

Ka Bynta jong ki Sorkar Jylla / UT

· Hapoh ka Essential Commodities Act, 1955 bad ka LPG Control Order, 2000, la ai bor ïa ka Sorkar Jylla ban leh tyngeh ïa kino kino ki jingkynshew bad ka jingdie beain. Ki Sorkar Jylla/UT ka don ka bynta ba kongsan ha kaba buddien bad pynbeit ia ka jinglong jingman jong ka jingpynbiang ia ki mar ba kongsan kynthup ia ka Petrol, Diesel bad LPG.

Ka sorkar India lyngba ka shithi ha ka 13.03.2026 bad ka 18.03.2026 ka la kyrpad ia baroh ki Jylla/UT:

Ø Ban pyrkhing ka jingpeitngor khnang ban tehlakam ia ka jingpynlang, jingpyniaid iew beain, ka jingpynkylla ia ka LPG hapoh ka ri bad kiwei kiwei ki jingpyndonkam bakla.

Ø Lah ban shim ia ka jingpynshitom kaba tyngeh ia kiba pynkhein hapoh ki kyndon jong ka Essential Commodities Act, 1955, Petroleum Act, 1934, Petroleum Rules 2002, Motor Spirit bad HSD order 2005 bad kiwei kiwei ki ain ba lah ban pyntreikam.

Ø Ban pynwandur ia ki rukom sam kiba biang na ka bynta ka LPG ba pyndonkam ha ka kam khaii, da kaba buh jingmut ia ki jingthmu bad ki jingdonkam ba kongsan jong ka thain.

Ø Ban pynmih ia ki jingai jingmut paidbah ban iada na ka jingthied kyrkieh, pynshlur ia ka jingpyndonkam hok ia ka LPG bad ban pynphriang ia ki jingtip kiba thikna.

· La kyrpad ia baroh ki District Collector bad ki ophisar jong ka Food and Civil Supplies (FC&S) ba kin pynlong ia ki kam pynjari ain man ka sngi.

· 32 tylli ki Jylla/UT ki la buh ia ki control room. Bun ki Jylla/UT ki pynlong ia ki jingialang ai jingtip man ka sngi bad ki lad pathai khubor.

· 33 tylli ki Jylla/UT ki la thaw ia ka District Level Monitoring Committee.

· Baroh kito ki Jylla/UT ki bym pat buh ia ki Control room bad thaw ia ki District Monitoring committee la kyrpad ba kin leh kyrkieh ia kane.

Ki kam na ka bynta ka jingtehlakam

· Ki kam na ka bynta ka jingtehlakam ki dang ïai bteng ha kylleng ki Jylla ban tehlakam ïa ka jingpynlang bad jingpyniaid iew beain, ha kaba la pynlong kumba 3,400 tylli ki jingkhynra bad la ioh kurup kumba 1,000 tylli ki cylinder ha ki 24 kynta ba ladep.

· Ki la don ki kam ba kongsan ba la ioh jingtip ha Andhra Pradesh, Haryana, Madhya Pradesh, Rajasthan bad Telangana.

· Ki kompeni umphniang PSU ki la pynlong palat 1,500 tylli ki jingleit jurip kynsan ha ki jaka die umphniang bad ki jaka sam LPG hynnin ka sngi.

· Haduh mynta, kumba 642 tylli ki FIR la rejister bad kumba 155 ngut ki briew ki la shah kem.

Kiwei kiwei ki sienjam jong ka Sorkar

· Ka Sorkar ka dang bteng ban buh hakhmat eh ïa ka jingpynbiang LPG khlem jingthut bad ka jingpyniar ïa ka PNG, khamtam na ka bynta ki longïing bad ki kam ba kongsan kum ki hospital bad ki jaka pule.

· Ki sienjam ki kynthup ia ka jingpyniar ia ka jingpynmih ïa ki jaka pynkhuid umphniang, ka jingpynkylla ïa ka por phah buh na ka 21 sha ka 25 sngi ha ki jaka sor bad haduh 45 sngi ha ki jaka nongkyndong, bad ka jingpeit kyrpang ia ka jingmang na ka bynta ka jingpynbiang.

· La tyrwa ia kiwei pat ki lad pyndonkam umphniang kum ka umphniang sharak bad u dewiong ban pynduna ia ka jingeh ha ka jingdawa LPG.

· Ka Tnad kam Dewiong ka la dep ai hukum ia ka Coal India bad Singareni Coallieries ban ai kham bun sha ki Jylla na ka bynta ban sam ia u dewiong sha ki nongpyndonkam dewiong kiba rit, kiba pdeng bad kiwei kiwei.

· La ai jingmut ia ki jylla ban pynsuk ia ki connection na ka bynta ka PNG ia ki nongpyndonkam hapoh ka ri bad ki nongpyndonkam ha ka kam khaii.

Ka jingai jingmut ia ki paidbah

· La ai jingmut ia ki nongshong shnong ban kiar na ka jingthied kyrkieh ia ka Petrol, Diesel bad LPG bad ban shaniah tang ha ki tyllong ai khubor jong ka sorkar.

· La kyrpad ia ki nongpyndonkam ban pyndonkam ia ki rynsan phah buh lyngba ki lad digital na ka bynta ka LPG bad ban kiar ban leit sha ki jaka sam.

· La pynshlur ia ki nongshong shnong ban pyndonkam da kiwei ki pat ki umphniang kum ka PNG bad ki tiar shet elektrik lane induction.

· La kyrpad ia baroh ki nongshong shnong ban tyngkai ia ka bording ha kane ka jinglong jingman kaba mynta.

Ka jingshngain ha ki kam duriaw bad ki kam pyniaid jhad

Ia ki jingtip halor ka jinglong jingman jong ka kam duriaw kaba mynta ha Persian Gulf bad ki sienjam ba la shim ban pynthikna ia ka jingshngain jong ki lieng bad ki nongtrei jong ka  India la iasam ha ka jingialang ai jingtip da ka Ttnad Ports, Shipping and Waterways. Ka tnad ka la ong ba:

· Baroh ki nongleit nongwan jong ka India lyngba ki duriaw kiba don ha ka thain ki don ha ka jingshngain bad ym don kano kano ka jingjia ba iadei bad ki jhad kiba don ka lama India ha kine ki 24 kynta ba la dep.

· Ar tylli ki jhad kit LPG jong ka India, ka Pine Gas bad ka Jag Vasant, ki la iaid lyngba ka Strait of Hormuz hynnin ka miet bad ki dang don ha lynti ban wan sha India da kaba kit ia ki mar LPG. Ka Pine Gas (kumba 45,000 MT LPG) kan leit sha New Mangalore ryngkat ka ETA ha ka 27 tarik Lber mynstep, katba ka Jag Vasant (kumba 47,612.59 MT LPG) kan leit sha Kandla bad ka ETA ha ka 26 tarik Lber mynstep.

· Hadien ka jingïaid lynti kaba shngaiñ jong ki, 20 tylli ki jhad kiba don ïa ka lama India bad kumba 540 ngut ki nongleit jingleit jong India lyngba ki duriaw ki dang don ha ka thaiñ Persian Gulf shaphang sepngi. Ka Directorate General of Shipping (DG Shipping) ka dang ïai bteng ban peitngor bha ha ryngkat ka jingïatreilang bad ki trai jong ki lieng, ki agency jong ka RPSL bad ki Indian Mission.

· Ka DG Shipping Control Room ka dang treikam baroh arphew saw kynta bad ka la jubab haduh 3,921 tylli ki jingphone bad 7,447 tylli ki email naduh ba la pyntreikam, kynthup 146 tylli ki jingphone bad 226 tylli ki email ha ki 24 kynta ba ladep.

· Ka DG Shipping ka la pynsuk ban pynphai biang ïa palat 585 ngut ki nongleit jingleit jong ka India lyngba ki duriaw, kynthup 26 ngut ha ki 24 kynta ba ladep bad 39 ngut ha ki 48 kynta ba ladep, na ki kad liengsuiñ bad ki jaka ba don ha ka thain.

· Ka kam duriaw jong ka India ka dang ïai bteng ban treikam khlem kano kano ka jingkhapngiah ha ki kad lieng, kumba la pynthikna da ki State Maritime Board  kynthup ka Gujarat, Maharashtra, Goa, Keralam, Andhra Pradesh bad Puducherry.

· Ki kad lieng ki buddien bha ia ka jingleit jingwan jong ki lieng bad ka jingpynkit ia ki mar, bad ki don ia ka jaka buh mar kaba biang ha ki kad lieng ba kongsan kum ka Jawaharlal Nehru Port Authority (JNPA), V.O.Chidambaranar Port (VOCPA), Visakhapatnam Port bad Mundra, Deendayal Port Authority, New Mangalore Port Authority (NMPA) Cochin Port Authority, bad Chennai Port Authority ban pynthikna ka jingpynkit mar kaba iaid beit iaid ryntih.

· Ha Kamarajar Port Limited (KPL), la ai jingbit sa 20 sngi ka por buh mar khlem jingsiew (baroh 40 sngi) na ka bynta ki kali kiba leit sha Gulf, ryngkat bad ka jingpynbiang sa kumba 10 akar ka jaka buh mar ban pynsuk ia ka jingpynkit ia ki mar.

· Ka Tnad Ports, Shipping and Waterways ka dang bteng ban buddien ia ka jingleit jingwan jong ki lieng, ka jingtreikam jong ki kad lieng, ka jingshngain jong ki nongleit nongwan lyngba ki duriaw bad ka jingbteng jong ka kam khaii pateng lyngba ki duriaw ha kaba iadei bad ka jinglong jingman kaba nang kylla ha ka thain West Asia.

Ka jingshngain jong ki briew ka India ha ka thain

Ia ki jingjia ba dang shen ha kane ka thaiñ, kynthup ïa ki jingïarap lyngba ki Indian Mission, la iasam ha ka jingïalang. La pyntip ba:

· U Myntri kam bar ri u la ïakren bad u U.S. Secretary of State Marco Rubio bad la iakren halor ka jinglong jingman kaba nang kylla ha West Asia bad ka jingktah jong ka ia ka ioh ka kot ha kylleng ka pyrthei, da kaba pynleit jingmut kyrpang halor ki jingeh ba iadei bad ka jingshngain ha ka bording.

· U Myntri kam bar ri u la iakren ruh bad u Myntri kam bar ri u Vijitha Herath jong ka Sri Lanka, ha kaba baroh arliang ki la iakren ia ki jingktah na ka jingiakynad ha West Asia. U Myntri u la pynskhem biang ïa ka jingkular jong ka India ïa ka polisi Neighbourhood First bad ka Vision MAHASAGAR.

· U Myntri kam bar ri u la ïakynduh ïa ki Ambassador jong ki ri Gulf Cooperation Council ha New Delhi bad la ïaphylliew jingmut halor ka jingïakynad kaba dang ïaid mynta ha West Asia. U la ai khublei ia ki namar ka jingiai kyrshan jong ki ia ki briew jong ka India ba don ha ka thain.

· Ka Tnad kam bar ri ka dang bteng ban buddien ia ki jingjia ha West Asia bad ka thain Gulf, ha kaba ka jingshngain, bad ka bha ka miat jong ki nong India kalong kaba kongsan tam.

· Ka control room ba kyrpang jong ka MEA ka dang treikam, bad ka jingiatreilang ka dang iaid shakhmat bad ki Sorkar Jylla bad ki Union Territory.

· Ki Indian Mission bad ki Post ha kylleng ka thain ki dang bteng ban treikam baroh arphew saw kynta, ki iakren bad ki ki iakren bad ki kynhun jong ki nong India bad pynmih ia ki jingai jingmut ba thymmai.

· Ki Mission ki dang iakren bad ki bor ba dei khmih ha ka thain bad bteng ban ai jingïarap ïa ki nongleit nongwan lyngba ki duriaw, ki samla pule, ki nongshong shnong jong ka India kiba sahkut bad ki nongleit jngohkai da ka jingkyrshan na ka bynta ka visa, ki jingshakri jong ki nongïalam bad ka jingkyrshan ha ka liang ka jingdonkam.

· Naduh ka 28 tarik Rymphang, kumba 4,02,000 ngut ki nongleit nongwan ki la wanphai na ka thain sha India, bad ka jingpyntreikam ia ki liengsuin ka la  nang kiew.

· Ha UAE, ki liengsuin bym shym la buh por ki bteng ban treikam, bad la khmih lynti kumba 85 tylli ki liengsuiñ kin poi ha India mynta ka sngi.

· Ki liengsuin ki la bteng ka jingtreikam na Saudi Arabia bad Oman sha India.

· Ka Qatar airspace ka dang plie shi bynta, ha kaba la khmih lynti ba ka Qatar Airways kan pyntreikam kumba 9 tylli ki liengsuin bym shym la buh por, sha India mynta ka sngi.

· Ki airspace jong ka Kuwait bad Bahrain ki dang khang. Ka Jazeera Airways jong ka Kuwait, ka pynher ia ki liengsuin sha ki jaka bapher bapher jong ka India, na ka Al Qaisumah Airport (AQI) ha Saudi Arabia. Ka Gulf Air jong ka Bahrain ka dang ïai bteng ruh ban pyntreikam ïa ki liengsuiñ kamai ba kyrpang ki bym shym la buh por na ka kad liengsuiñ Dammam jong ka Saudi Arabia sha India. Kane ka pynsuk ïa ka leit ka wan jong ki nong India na Kuwait bad Bahrain sha India.

· Dang bteng ban pynsuk ia ka leit ka wan jong ki nong India lyngba ka Saudi Arabia na ka bynta kito kiba don ha Kuwait, Bahrain bad Iraq.

· Dang bteng ban ai jingiarap ia ki nong India kiba don ha Iran ban wanphai sha India lyngba ka Armenia bad Azerbaijan.

· La pynsuk ia ki nong India kiba don ha Israel ban wanphai sha India lyngba ka Jordan.

*****