પશ્ચિમ એશિયામાં ચાલી રહેલા ઘટનાક્રમ વિશે નાગરિકોને નિયમિતપણે માહિતગાર રાખવાના ભારત સરકારના સતત પ્રયાસોના ભાગરૂપે, નેશનલ મીડિયા સેન્ટર ખાતે મીડિયા માટે આંતર-મંત્રાલય બ્રીફિંગનું આયોજન કરવામાં આવી રહ્યું છે. આ સંદર્ભમાં, આજે એક બ્રીફિંગ યોજવામાં આવી હતી, જ્યાં પેટ્રોલિયમ અને કુદરતી ગેસ, બંદરો, શિપિંગ અને જળમાર્ગો અને વિદેશ મંત્રાલયના વરિષ્ઠ અધિકારીઓએ ઇંધણ પુરવઠા, દરિયાઈ કામગીરી, પ્રદેશમાં ભારતીય નાગરિકોને સહાય અને આ ક્ષેત્રોમાં સ્થિરતા સુનિશ્ચિત કરવાના પગલાં અંગેની માહિતી શેર કરી હતી.

ઊર્જા પુરવઠો અને ઇંધણની ઉપલબ્ધતા

પેટ્રોલિયમ અને કુદરતી ગેસ મંત્રાલયે ઇંધણ પુરવઠાની સ્થિતિ અંગે અપડેટ શેર કરી હતી, જેમાં હોર્મુઝની સામુદ્રધુની બંધ હોવાને કારણે પેટ્રોલિયમ પેદાશો અને LPG ની અવિરત ઉપલબ્ધતા સુનિશ્ચિત કરવાના પગલાંની રૂપરેખા આપવામાં આવી હતી અને નોંધ્યું હતું કે:

ક્રૂડ અને રિફાઇનરીઓ:

· તમામ રિફાઇનરીઓ પર્યાપ્ત ક્રૂડ ઇન્વેન્ટરી સાથે ઉચ્ચ ક્ષમતા પર કાર્યરત છે અને પેટ્રોલ અને ડીઝલનો પૂરતો સ્ટોક જાળવવામાં આવી રહ્યો છે.

· રિફાઇનરીઓમાંથી સ્થાનિક LPG ઉત્પાદનમાં કટોકટી પૂર્વેના સ્તરની સરખામણીમાં વધારો કરવામાં આવ્યો છે.

રિટેલ આઉટલેટ્સ:

· દેશભરમાં તમામ રિટેલ આઉટલેટ્સ સામાન્ય રીતે કાર્યરત છે.

· કેટલીક અફવાઓને કારણે કેટલાક વિસ્તારોમાં ગભરાટમાં ખરીદી (panic buying) ના અહેવાલ મળ્યા હતા, જેના પરિણામે રિટેલ આઉટલેટ્સ પર અસાધારણ રીતે વધુ વેચાણ અને ભીડ જોવા મળી હતી.

· સરકારે જનતાને અફવાઓ પર વિશ્વાસ ન કરવાની સલાહ આપી છે અને પુનરોચ્ચાર કર્યો છે કે દેશભરમાં પેટ્રોલ અને ડીઝલનો પૂરતો સ્ટોક ઉપલબ્ધ છે.

કુદરતી ગેસ:

· પ્રાથમિકતા ધરાવતા ક્ષેત્રોને સુરક્ષિત પુરવઠો મળવાનું ચાલુ છે, જેમાં સ્થાનિક PNG અને CNG પરિવહનને 100 ટકા પુરવઠો આપવામાં આવે છે, જ્યારે ગ્રીડ સાથે જોડાયેલા ઔદ્યોગિક અને વ્યાપારી ગ્રાહકોને પુરવઠો તેમના સરેરાશ વપરાશના લગભગ 80 ટકા જાળવવામાં આવે છે.

· સિટી ગેસ ડિસ્ટ્રિબ્યુશન (CGD) સંસ્થાઓને હોટલ, રેસ્ટોરન્ટ અને કેન્ટીન જેવી વ્યાપારી સંસ્થાઓ માટે PNG કનેક્શનને પ્રાથમિકતા આપવા સલાહ આપવામાં આવી છે.

· IGL, MGL, GAIL Gas અને BPCL સહિતની CGD કંપનીઓ ઘરેલું અને વ્યાપારી PNG કનેક્શનને પ્રોત્સાહન આપવા માટે પ્રોત્સાહનો આપી રહી છે.

· ભારત સરકારે પત્ર તારીખ 16.03.2026 દ્વારા રાજ્યો/કેન્દ્રશાસિત પ્રદેશોની સરકારને CGD નેટવર્કના વિસ્તરણ માટે જરૂરી અરજીઓની મંજૂરી ઝડપી બનાવવા વિનંતી કરી છે.

· ભારત સરકારે પત્ર તારીખ 18.03.2026 દ્વારા તમામ રાજ્યો/કેન્દ્રશાસિત પ્રદેશોને વ્યાપારી LPG ની વધારાની 10% ફાળવણીની ઓફર કરી છે, જો તેઓ LPG થી PNG માં લાંબા ગાળાના પરિવર્તનમાં મદદ કરી શકે.

· ભારત સરકારે CGD ઈન્ફ્રાસ્ટ્રક્ચર સંબંધિત તમામ બાકી અને નવી પરવાનગીઓને ફાસ્ટ ટ્રેક કરવા અને તેનો નિકાલ કરવા માટે તમામ સંબંધિત કેન્દ્રીય મંત્રાલયોને વિનંતી કરી છે.

· ભારત સરકારે પત્ર તારીખ 20.03.2026 દ્વારા તમામ કેન્દ્રીય મંત્રાલયોને ભારત સરકારના વિવિધ મંત્રાલયો/વિભાગો હેઠળની સંસ્થાઓમાં PNG કનેક્શન માટેની સંભવિત માંગનું વ્યાપક મૂલ્યાંકન કરવા અને આ કવાયતના સંકલન માટે દરેક મંત્રાલય/વિભાગમાંથી એક નોડલ ઓફિસરની નિમણૂક કરવા વિનંતી કરી છે.

· પેટ્રોલિયમ એન્ડ એક્સપ્લોઝિવ સેફ્ટી ઓર્ગેનાઈઝેશન (PESO) એ તેની ઓફિસોને 10 દિવસની અંદર પ્રાથમિકતાના ધોરણે CGD અરજીઓનો નિકાલ કરવા સલાહ આપી છે.

· મોટા શહેરો અને શહેરી વિસ્તારોમાં વ્યાપારી LPG ગ્રાહકોને PNG પર સ્વિચ કરવા વિનંતી કરવામાં આવી છે.

· પેટ્રોલિયમ એન્ડ નેચરલ ગેસ રેગ્યુલેટરી બોર્ડ (PNGRB) એ તેના તારીખ 23.03.2026 ના આદેશ દ્વારા CGD સંસ્થાઓને પાંચ દિવસની અંદર રહેણાંક શાળાઓ, કોલેજો, હોસ્ટેલ, કોમ્યુનિટી કિચન અને આંગણવાડી કિચન માટે જ્યાં પાઈપલાઈન ઉપલબ્ધ છે ત્યાં PNG દ્વારા કનેક્શનને પ્રાથમિકતા આપવા નિર્દેશ આપ્યો છે.

· ટોચના 110 ભૌગોલિક વિસ્તારોમાં ગઈકાલે 7,500 થી વધુ ઘરેલું અને વ્યાપારી PNG કનેક્શન જારી અથવા સક્રિય કરવામાં આવ્યા હતા.

LPG:

· પ્રવર્તમાન ભૌગોલિક રાજકીય પરિસ્થિતિને કારણે LPG પુરવઠો પ્રભાવિત થવાનું ચાલુ છે.

· ડિસ્ટ્રિબ્યુટરશીપ પર કોઈ ડ્રાય-આઉટ (સ્ટોક ખતમ થવો)ના અહેવાલ મળ્યા નથી.

· ગઈકાલે ગભરાટમાં કરાયેલા બુકિંગમાં મામૂલી વધારો જોવા મળ્યો હતો, જ્યારે સ્થાનિક LPG સિલિન્ડરોની ડિલિવરી સામાન્ય રીતે ચાલુ છે.

· સરકારે ગ્રાહકોને અંશતઃ વ્યાપારી LPG પુરવઠો (20%) પહેલેથી જ પુનઃસ્થાપિત કર્યો હતો. વધુમાં, ભારત સરકારે પત્ર તારીખ 18.03.2026 દ્વારા PNG વિસ્તરણ માટે ઈઝ ઓફ ડુઈંગ બિઝનેસ સુધારાઓના આધારે રાજ્યો/કેન્દ્રશાસિત પ્રદેશોને વ્યાપારી LPG ની વધારાની 10% ફાળવણી કરવાનો પ્રસ્તાવ મૂક્યો હતો.

· ભારત સરકારે પત્ર તારીખ 21.03.2026 દ્વારા રાજ્યોને વ્યાપારી LPGની બીજી 20% ફાળવણીની મંજૂરી આપી છે, જે કુલ ફાળવણીને 50% પર લઈ જશે (PNG વિસ્તરણ માટે ઈઝ ઓફ ડુઈંગ સુધારાઓ પર આધારિત 10% ફાળવણી સહિત). આ વધારાની 20% ફાળવણી રેસ્ટોરન્ટ, ઢાબા, હોટલ, ઔદ્યોગિક કેન્ટીન, ફૂડ પ્રોસેસિંગ/ડેરી, રાજ્ય સરકાર અથવા સ્થાનિક સંસ્થાઓ દ્વારા ચલાવવામાં આવતી સબસિડીવાળી કેન્ટીન/આઉટલેટ્સ, કોમ્યુનિટી કિચન અને સ્થળાંતરિત મજૂરો માટે 5 કિલો FTL ને પ્રાથમિકતાના ધોરણે આપવામાં આવશે.

· 24 રાજ્યો/કેન્દ્રશાસિત પ્રદેશોએ ભારત સરકાર દ્વારા જારી કરાયેલ માર્ગદર્શિકા મુજબ નોન-ડોમેસ્ટિક LPG ફાળવવાના આદેશો જારી કર્યા છે. બાકીના રાજ્યો/કેન્દ્રશાસિત પ્રદેશો માટે, PSU ઓઈલ માર્કેટિંગ કંપનીઓ વ્યાપારી LPG સિલિન્ડરો રિલીઝ કરી રહી છે. 14 માર્ચ 2026 થી રાજ્યો/કેન્દ્રશાસિત પ્રદેશોમાં વ્યાપારી સંસ્થાઓ દ્વારા કુલ અંદાજે 18,784 મેટ્રિક ટનનો ઉપાડ કરવામાં આવ્યો છે.

કેરોસીન:

· રાજ્યો અને કેન્દ્રશાસિત પ્રદેશોને 48,000 KL કેરોસીનની વધારાની ફાળવણી પૂરી પાડવામાં આવી છે, જેમને જિલ્લા સ્તરીય વિતરણ પોઈન્ટ્સ ઓળખવા વિનંતી કરવામાં આવી છે.

· 15 રાજ્યો અને કેન્દ્રશાસિત પ્રદેશોએ SKO (કેરોસીન) ફાળવણીના આદેશો જારી કર્યા છે, જ્યારે હિમાચલ પ્રદેશ અને લદ્દાખે જણાવ્યું છે કે રાજ્ય/UT માં SKO ની કોઈ જરૂરિયાત નથી. આજની તારીખે, 17 રાજ્યો/કેન્દ્રશાસિત પ્રદેશોએ હજુ સુધી SKO ફાળવણીના આદેશો જારી કર્યા નથી.

રાજ્ય સરકારો / કેન્દ્રશાસિત પ્રદેશોની ભૂમિકા

· આવશ્યક ચીજવસ્તુ ધારો, 1955 અને LPG કંટ્રોલ ઓર્ડર, 2000 હેઠળ, રાજ્ય સરકારો કોઈપણ સંગ્રહખોરી અને કાળાબજાર વિરુદ્ધ કાર્યવાહી કરવા માટે સક્ષમ છે. પેટ્રોલ, ડીઝલ અને LPG સહિતની આવશ્યક ચીજવસ્તુઓની પુરવઠાની સ્થિતિ પર દેખરેખ રાખવા અને તેનું નિયમન કરવામાં રાજ્યો/UTs ની સરકારોએ પ્રાથમિક ભૂમિકા ભજવવાની છે.

· ભારત સરકારે પત્ર તારીખ 13.03.2026 અને 18.03.2026 દ્વારા તમામ રાજ્યો/કેન્દ્રશાસિત પ્રદેશોને વિનંતી કરી છે:

o સંગ્રહખોરી, કાળાબજાર, સ્થાનિક LPGના ડાયવર્ઝન અને અન્ય ગેરરીતિઓને રોકવા માટે કડક તકેદારી રાખવા.

o આવશ્યક ચીજવસ્તુ ધારો 1955, પેટ્રોલિયમ એક્ટ 1934, પેટ્રોલિયમ રૂલ્સ 2002, મોટર સ્પિરિટ અને HSD ઓર્ડર 2005 અને અન્ય લાગુ કાયદાઓની જોગવાઈઓ હેઠળ ઉલ્લંઘન કરનારાઓ સામે કડક કાર્યવાહી કરવી.

o સ્થાનિક પ્રાથમિકતાઓ અને જરૂરિયાતોને ધ્યાનમાં રાખીને વ્યાપારી LPG માટે યોગ્ય વિતરણ પદ્ધતિઓ વિકસાવવી.

o ગભરાટમાં ખરીદી અટકાવવા, LPG ના વિવેકપૂર્ણ ઉપયોગને પ્રોત્સાહિત કરવા અને સચોટ માહિતીના પ્રસાર માટે જાહેર એડવાઈઝરી જારી કરવી.

· તમામ જિલ્લા કલેક્ટરો અને ફૂડ એન્ડ સિવિલ સપ્લાય (FC&S)ના અધિકારીઓને દૈનિક ધોરણે નિયમિત અમલીકરણ કાર્યવાહી કરવા વિનંતી કરવામાં આવી છે.

· 32 રાજ્યો/કેન્દ્રશાસિત પ્રદેશોએ કંટ્રોલ રૂમ સ્થાપ્યા છે. ઘણા રાજ્યો/કેન્દ્રશાસિત પ્રદેશો દૈનિક પ્રેસ બ્રીફિંગ પણ કરી રહ્યા છે.

· 33 રાજ્યો/કેન્દ્રશાસિત પ્રદેશોએ જિલ્લા કક્ષાની મોનિટરિંગ કમિટીની રચના કરી છે.

· જે તમામ રાજ્યો/કેન્દ્રશાસિત પ્રદેશોએ કંટ્રોલ રૂમ અને જિલ્લા મોનિટરિંગ કમિટીની રચના કરી નથી તેમને તાત્કાલિક ધોરણે તેમ કરવા વિનંતી કરવામાં આવી છે.

અમલીકરણ કાર્યવાહી

· સંગ્રહખોરી અને કાળાબજારને ડામવા માટે રાજ્યોમાં અમલીકરણની કાર્યવાહી ચાલુ છે, જેમાં છેલ્લા 24 કલાકમાં અંદાજે 3,400 દરોડા પાડવામાં આવ્યા છે અને લગભગ 1,000 સિલિન્ડરો જપ્ત કરવામાં આવ્યા છે.

· આંધ્રપ્રદેશ, હરિયાણા, મધ્યપ્રદેશ, રાજસ્થાન અને તેલંગાણામાં મુખ્ય કાર્યવાહીના અહેવાલ મળ્યા છે.

· PSU ઓઈલ માર્કેટિંગ કંપનીઓએ ગઈકાલે રિટેલ આઉટલેટ્સ અને LPG ડિસ્ટ્રિબ્યુટરશીપ પર 1,500થી વધુ સરપ્રાઈઝ ઇન્સ્પેક્શન (આકસ્મિક તપાસ) હાથ ધર્યા હતા.

· અત્યાર સુધીમાં અંદાજે 642 FIR નોંધવામાં આવી છે અને લગભગ 155 લોકોની ધરપકડ કરવામાં આવી છે.

અન્ય સરકારી પગલાં

· સરકાર અવિરત LPG પુરવઠો અને PNG વિસ્તરણને પ્રાથમિકતા આપવાનું ચાલુ રાખે છે, ખાસ કરીને પરિવારો અને હોસ્પિટલો તથા શૈક્ષણિક સંસ્થાઓ જેવા અગ્રતા ધરાવતા ક્ષેત્રો માટે.

· પગલાંઓમાં રિફાઇનરી ઉત્પાદનમાં વધારો, શહેરી વિસ્તારોમાં 21થી 25 દિવસ અને ગ્રામીણ વિસ્તારોમાં 45 દિવસ સુધીના સુધારેલા બુકિંગ અંતરાલ (booking intervals) અને અગ્રતાના ધોરણે પુરવઠાની ફાળવણીનો સમાવેશ થાય છે.

· LPG ની માંગ પરનું દબાણ ઘટાડવા માટે કેરોસીન અને કોલસા જેવા વૈકલ્પિક ઈંધણના વિકલ્પો ઓફર કરવામાં આવ્યા છે.

· કોલસા મંત્રાલયે નાના, મધ્યમ અને અન્ય ગ્રાહકોને કોલસો વહેંચવા માટે રાજ્યોને વધુ માત્રામાં કોલસો ફાળવવા માટે કોલ ઈન્ડિયા અને સિંગરેની કોલિયરીઝને આદેશ જારી કરી દીધો છે.

· રાજ્યોને ઘરેલું અને વ્યાપારી બંને ગ્રાહકો માટે PNG કનેક્શનની સુવિધા આપવા સલાહ આપવામાં આવી છે.

જાહેર એડવાઈઝરી

· નાગરિકોને પેટ્રોલ, ડીઝલ અને LPGની ગભરાટમાં ખરીદી ટાળવા અને માત્ર સત્તાવાર માહિતી સ્ત્રોતો પર આધાર રાખવાની સલાહ આપવામાં આવે છે.

· ગ્રાહકોને LPG માટે ડિજિટલ બુકિંગ પ્લેટફોર્મનો ઉપયોગ કરવા અને ડિસ્ટ્રિબ્યુટર્સની મુલાકાત લેવાનું ટાળવા વિનંતી કરવામાં આવે છે.

· નાગરિકોને PNG અને ઇલેક્ટ્રિક અથવા ઇન્ડક્શન કૂકટોપ્સ જેવા વૈકલ્પિક ઇંધણનો ઉપયોગ કરવા પ્રોત્સાહિત કરવામાં આવે છે.

· તમામ નાગરિકોને વર્તમાન પરિસ્થિતિ દરમિયાન ઊર્જા બચાવવા વિનંતી કરવામાં આવે છે.

દરિયાઈ સુરક્ષા અને શિપિંગ કામગીરી

પર્શિયન ગલ્ફમાં પ્રવર્તતી દરિયાઈ સ્થિતિ અને ભારતીય જહાજો અને ક્રૂની સલામતી અને સુરક્ષા સુનિશ્ચિત કરવા માટે લેવામાં આવી રહેલા પગલાં અંગેની અપડેટ બંદરો, શિપિંગ અને જળમાર્ગ મંત્રાલય દ્વારા શેર કરવામાં આવી હતી. મંત્રાલયે જણાવ્યું કે:

· હાલમાં આ પ્રદેશમાં હાજર તમામ ભારતીય નાવિકો સુરક્ષિત છે અને છેલ્લા 24 કલાકમાં ભારતીય ધ્વજવાળા જહાજો સાથે સંકળાયેલી કોઈ શિપિંગ ઘટના નોંધાઈ નથી.

· બે ભારતીય LPG જહાજો, Pine Gas અને Jag Vasant, ગઈકાલે રાત્રે હોર્મુઝની સામુદ્રધુની ઓળંગી ગયા છે અને LPG કાર્ગો લઈને ભારત તરફ આગળ વધી રહ્યા છે. Pine Gas (લગભગ 45,000 મેટ્રિક ટન LPG) 27 માર્ચની સવારે ન્યૂ મેંગલોર પહોંચવાની ધારણા છે, જ્યારે Jag Vasant (લગભગ 47,612.59 મેટ્રિક ટન LPG) 26 માર્ચની સવારે કંડલા પહોંચવાની ધારણા છે.

· તેમના સુરક્ષિત પરિવહન પછી, અંદાજે 540 ભારતીય નાવિકો સાથેના 20 ભારતીય ધ્વજવાળા જહાજો પશ્ચિમ પર્શિયન ગલ્ફ ક્ષેત્રમાં છે. ડાયરેક્ટોરેટ જનરલ ઓફ શિપિંગ (DG શિપિંગ) જહાજના માલિકો, RPSL એજન્સીઓ અને ભારતીય મિશન સાથે સંકલન સાધીને નજીકથી નિરીક્ષણ કરવાનું ચાલુ રાખે છે.

· DG શિપિંગ કંટ્રોલ રૂમ 24×7 કાર્યરત છે અને સક્રિય થયા પછી 3,921 કૉલ્સ અને 7,447 ઇમેઇલ્સ હેન્ડલ કર્યા છે, જેમાં છેલ્લા 24 કલાકમાં 146 કૉલ્સ અને 226 ઇમેઇલ્સનો સમાવેશ થાય છે.

· DG શિપિંગે અત્યાર સુધીમાં 585 થી વધુ ભારતીય નાવિકોના સુરક્ષિત સ્વદેશ વાપસીની સુવિધા આપી છે, જેમાં છેલ્લા 24 કલાકમાં 26 અને છેલ્લા 48 કલાકમાં 39 નાવિકોનો સમાવેશ થાય છે, જેમને એરપોર્ટ અને પ્રાદેશિક સ્થાનો પરથી લાવવામાં આવ્યા છે.

· ભારતનું દરિયાઈ ક્ષેત્ર સરળતાથી કાર્ય કરવાનું ચાલુ રાખે છે અને ગુજરાત, મહારાષ્ટ્ર, ગોવા, કેરળ, આંધ્રપ્રદેશ અને પુડુચેરી સહિતના સ્ટેટ મેરીટાઇમ બોર્ડ દ્વારા પુષ્ટિ કરવામાં આવ્યા મુજબ બંદરો પર કોઈ ભીડ (congestion) નોંધાઈ નથી.

· બંદરો જહાજોની હિલચાલ અને કાર્ગો કામગીરી પર નજીકથી નજર રાખી રહ્યા છે, અને કાર્ગો હેન્ડલિંગ સુનિશ્ચિત કરવા માટે જવાહરલાલ નેહરુ પોર્ટ ઓથોરિટી (JNPA), V.O. ચિદમ્બરનાર પોર્ટ ઓથોરિટી (VOCPA), વિશાખાપટ્ટનમ પોર્ટ, મુંદ્રા, દીનદયાળ પોર્ટ ઓથોરિટી, ન્યૂ મેંગલોર પોર્ટ ઓથોરિટી (NMPA), કોચિન પોર્ટ ઓથોરિટી અને ચેન્નાઈ પોર્ટ ઓથોરિટી જેવા મુખ્ય બંદરો પર વધારાની જગ્યા પહેલેથી જ બનાવવામાં આવી છે.

· કામરાજાર પોર્ટ લિમિટેડ (KPL) ખાતે, ગલ્ફ માટે રવાના થતી કાર માટે વધારાના 20 દિવસનો મફત સ્ટોરેજ પિરિયડ (કુલ 40 દિવસ) મંજૂર કરવામાં આવ્યો છે, સાથે જ કાર્યક્ષમ કાર્ગો મેનેજમેન્ટ માટે આશરે 10 એકરની વધારાની સ્ટોરેજ જગ્યાની જોગવાઈ કરવામાં આવી છે.

· બંદરો, શિપિંગ અને જળમાર્ગ મંત્રાલય પશ્ચિમ એશિયામાં બદલાતી પરિસ્થિતિને ધ્યાનમાં રાખીને શિપિંગ હિલચાલ, બંદર કામગીરી, નાવિકોની સુરક્ષા અને દરિયાઈ વેપારની સાતત્યતા પર નજર રાખવાનું ચાલુ રાખે છે.

આ પ્રદેશમાં ભારતીય નાગરિકોની સુરક્ષા

ભારતીય મિશન દ્વારા આપવામાં આવતી સહાય સહિત પ્રદેશના તાજેતરના ઘટનાક્રમ અંગે બ્રીફિંગ દરમિયાન માહિતી શેર કરવામાં આવી હતી. જેમાં જણાવાયું હતું કે:

· વિદેશ મંત્રીએ યુએસ સેક્રેટરી ઓફ સ્ટેટ માર્કો રુબિયો સાથે વાત કરી અને પશ્ચિમ એશિયામાં બદલાતી પરિસ્થિતિ અને આંતરરાષ્ટ્રીય અર્થતંત્ર પર તેની અસર વિશે ચર્ચા કરી, જેમાં ખાસ કરીને ઊર્જા સુરક્ષાની ચિંતાઓ પર ધ્યાન કેન્દ્રિત કરવામાં આવ્યું હતું.

· વિદેશ મંત્રીએ શ્રીલંકાના વિદેશ મંત્રી વિજિથા હેરાથ સાથે પણ વાત કરી હતી, જ્યાં બંને પક્ષોએ પશ્ચિમ એશિયા સંઘર્ષના પ્રત્યાઘાતો પર ચર્ચા કરી હતી. મંત્રીએ 'નેબરહુડ ફર્સ્ટ' પોલિસી અને વિઝન સાગર (MAHASAGAR) પ્રત્યે ભારતની પ્રતિબદ્ધતાનો પુનરોચ્ચાર કર્યો હતો.

· વિદેશ મંત્રીએ નવી દિલ્હીમાં ગલ્ફ કોઓપરેશન કાઉન્સિલ (GCC) દેશોના રાજદૂતો સાથે મુલાકાત કરી અને પશ્ચિમ એશિયામાં ચાલી રહેલા સંઘર્ષ પર વિચારોનું આદાનપ્રદાન કર્યું. તેમણે આ પ્રદેશમાં ભારતીય સમુદાયને સતત સમર્થન આપવા બદલ તેમનો આભાર માન્યો હતો.

· વિદેશ મંત્રાલય પશ્ચિમ એશિયા અને ગલ્ફ ક્ષેત્રના ઘટનાક્રમ પર નજીકથી નજર રાખવાનું ચાલુ રાખે છે, જેમાં ભારતીય સમુદાયની સુરક્ષા અને સુખાકારી સર્વોચ્ચ પ્રાથમિકતા છે.

· સમર્પિત MEA કંટ્રોલ રૂમ કાર્યરત છે, જેમાં રાજ્ય સરકારો અને કેન્દ્રશાસિત પ્રદેશો સાથે સંકલન ચાલુ છે.

· સમગ્ર પ્રદેશમાં ભારતીય મિશનો ચોવીસે કલાક કાર્યરત છે, 24×7 હેલ્પલાઇન જાળવી રહ્યા છે, ભારતીય સમુદાય સંગઠનો સાથે જોડાઈ રહ્યા છે અને અપડેટેડ એડવાઈઝરી જારી કરી રહ્યા છે.

· મિશનો સ્થાનિક સત્તાવાળાઓ સાથે નજીકના સંપર્કમાં છે અને નાવિકો, વિદ્યાર્થીઓ, ફસાયેલા ભારતીય નાગરિકો અને ટૂંકા ગાળાના મુલાકાતીઓને વિઝા સુવિધા, કોન્સ્યુલર સેવાઓ અને લોજિસ્ટિકલ સપોર્ટ સાથે મદદ કરવાનું ચાલુ રાખે છે.

· 28 ફેબ્રુઆરીથી અત્યાર સુધીમાં આ પ્રદેશમાંથી લગભગ 4,02,000 મુસાફરો ભારત પરત ફર્યા છે, જેમાં ફ્લાઇટ કામગીરીમાં સુધારો ચાલુ છે.

· UAEમાં, મર્યાદિત નોન-શિડ્યુલ્ડ ફ્લાઇટ્સ ચાલુ છે, જેમાં આજે ભારત માટે અંદાજે 85 ફ્લાઇટ્સની અપેક્ષા છે.

· સાઉદી અરેબિયા અને ઓમાનથી ભારત માટે ફ્લાઇટ્સ ચાલુ છે.

· કતારનું હવાઈ ક્ષેત્ર અંશતઃ ખુલ્લું છે, જેમાં કતાર એરવેઝ આજે ભારત માટે અંદાજે 9 નોન-શિડ્યુલ્ડ ફ્લાઇટ્સ ચલાવશે તેવી અપેક્ષા છે.

· કુવૈત અને બહેરીનનું હવાઈ ક્ષેત્ર બંધ છે. કુવૈતની જઝીરા એરવેઝ સાઉદી અરેબિયાના અલ કાયસુમાહ એરપોર્ટ (AQI) પરથી ભારતના વિવિધ સ્થળો માટે ફ્લાઇટ્સ ચલાવી રહી છે. બહેરીનની ગલ્ફ એર પણ સાઉદી અરેબિયાના દમ્મામ એરપોર્ટથી ભારત માટે વિશેષ નોન-શિડ્યુલ્ડ કોમર્શિયલ ફ્લાઇટ્સ ચલાવવાનું ચાલુ રાખે છે. આનાથી કુવૈત અને બહેરીનથી ભારતીય નાગરિકોની ભારત મુસાફરીમાં સુવિધા મળી રહી છે.

· કુવૈત, બહેરીન અને ઇરાકમાં હોય તેવા લોકો માટે સાઉદી અરેબિયા મારફતે ભારતીય નાગરિકોના પરિવહનની સુવિધા આપવાનું ચાલુ છે.

· ઈરાનમાં રહેલા ભારતીય નાગરિકોને આર્મેનિયા અને અઝરબૈજાન થઈને ભારત પ્રવાસ માટે મદદ કરવામાં આવી રહી છે.

· ઈઝરાયેલમાં ભારતીય નાગરિકોને જોર્ડન થઈને ભારત મુસાફરીની સુવિધા આપવામાં આવી રહી છે.

SM/IJ/JD