U Myntri Rangbahduh, Narendra Modi u la pyniaid ia ka jingialang jong ka Cabinet Committee on Security ban peit ia ka jinglong jingman jong ka jingkulmar ha ka thain sepngi jong ka Asia bad ban pynduna ia ka jingktah jong kane ka jingkulmar.

U Cabinet Secretary u la batai bniah shaphang ka jinglong jingman bad ki sienjam ba la shim haduh mynta ban pynduna ia ka jingktah jong kane bad ruh ki sienjam ki ban wan da baroh ki that jong ka sorkar India. La iakren ruh shaphang ki jingktah ba la antad ban wan ia ka kam rep, ki dawai sboh, ki lad pynbiang mar bad kiwei kiwei ki kam. La iakren ruh shaphang ka jinglong jingman jong ka ioh ka kot bad ka imlang sahlang ha ka ri bad ki sienjam ba hap ban shim.

La peit kumno ki jingkulmar kaba dang jia ha ka thain sepngi jong ka Asia kin ktah ia ka India  bad la iakren shaphang ki sienjam ban iada na kane.

La peit bniah ia ka jingdon jong ki mar ba kongsan na ka bynta ki briew ba kynthup ia ka bam, ka bording bad ka jingshngain ha kaba iadei bad ki tyllong bording. La iakren sani shaphang ki sienjam ban pynthikna ia ka jingpynbiang ia kine ki mar ba kongsan.

La peit ruh ia ka jingktah ia ki nongrep bad ka jingdonkam jong ki ia ki dawai sboh na ka bynta ka samoi Kharif. Ki sienjam ba la shim ha kine ki snem ba la dep ban pynbiang lypa ia ki dawai sboh kin pynthikna ia ka jingbiang jong kine ki dawai sboh bad ka jingshngain ha ka jingioh ia ki mar bam. La iakren ruh shaphang kiwei kiwei ki lad ban pynthikna ia ka jingioh ia ki dawai sboh ha ki por ban wan.

La pyni ruh ba ka jingdon lypa u dewiong ha baroh ki jaka pynmih bording kan pynthikna ba yn ym don ka jingduna ka bording ha India.

La iakren shaphang ki sienjam ban pyniar ia ki tyllong jong ki mar ba shalan nabar ka ri kiba donkam ha kaba iadei bad ki chemical, pharmaceutical, petrochemical bad kiwei kiwei ki kam karkhana. Kumjuh la iakren shaphang ka jingplie shen ia kiwei kiwei ki iew ban kyntiew ia ki mar jong ka India.

Ia ki sienjam ba la ai jingmut da ki tnat sorkar yn pynkhreh bad pyntreikam ha kine ki sngi ban wan ha ka jingiamir jingmut lang bad kito kiba don bynta ha kine ki kam.

U Myntri Rangbahduh u la bthah ban sdang ia kawei ka kynhun jong ki Myntri bad ki Secretary ban trei ha ka rukom treikam jong baroh kawei ka sorkar. U Myntri Rangbahduh u la bthah ruh ia ki kynhun kiba iadei bad ki kam bapher bapher ba kin treikam da kaba iamir jingmut lang bad kito kiba don bynta ha ki kam

U Myntri Rangbahduh u la ong ba ka jinglong jingman ka la kylla ha ka rukom kaba ktah ia baroh kawei ka pyrthei. Ha kum kane ka jinglong jingman, dei ban shim lut ia ki sienjam ban iada ia ki briew jong ka ri na ki jingktah jong kane ka jingkulmar. U Myntri Rangbahduh u la bthah ia baroh ki tnat jong ka sorkar ban iatreilang ban pynthikna ba kane ka jingkulmar kan ym ktah palat ia ki nongshong shnong. U Myntri Rangbahduh u la ong ruh ba dei ban don ka jingiatreilang bad ki sorkar jylla ban pynthikna ba ym don kano kano ka jingdie beain ne ka jinglum ia ki mar ba kongsan.

***