ಕೇಂದ್ರ ವಾರ್ತಾ ಮತ್ತು ಪ್ರಸಾರ ಸಚಿವರಾದ ಶ್ರೀ ಅಶ್ವಿನಿ ವೈಷ್ಣವ್ ಅವರು ಇಂದು ಭಾರತದ ಮಾಧ್ಯಮ, ಪ್ರಸಾರ ಮತ್ತು ಡಿಜಿಟಲ್ ಕ್ಷೇತ್ರವನ್ನು ಬಲಪಡಿಸುವ ಮತ್ತು ಸೃಜನಶೀಲ ಆರ್ಥಿಕತೆಯನ್ನು ಉತ್ತೇಜಿಸುವ ಗುರಿಯನ್ನು ಹೊಂದಿರುವ ಮೂರು ಪ್ರಮುಖ ಉಪಕ್ರಮಗಳಿಗೆ ಚಾಲನೆ ನೀಡಿದರುರು. ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಕ್ರಿಯೇಟಿವ್ ಟೆಕ್ನಾಲಜೀಸ್ (ಐಐಸಿಟಿ) ಮೂಲಕ ಗೂಗಲ್ ಮತ್ತು ಯೂಟ್ಯೂಬ್ ಸಹಭಾಗಿತ್ವದಲ್ಲಿ ರಾಷ್ಟ್ರೀಯ ಎಐ ಕೌಶಲ್ಯ ಉಪಕ್ರಮ; ವೇವ್ಸ್‌ ಒಟಿಟಿಯಲ್ಲಿ ನಾಗರಿಕ ಕ್ರಿಯೇಟರ್ ಪ್ಲಾಟ್‌ಫಾರ್ಮ್ ಆದ ಮೈವೇವ್ಸ್; ಮತ್ತು ಡಿಡಿ ಫ್ರೀ ಡಿಶ್ ಸೇವೆಗಳ ಪ್ರವೇಶವನ್ನು ಹೆಚ್ಚಿಸಲು ಟೆಲಿವಿಷನ್ ಸೆಟ್‌ ಗಳಲ್ಲಿ ಸುಧಾರಿತ ಎಲೆಕ್ಟ್ರಾನಿಕ್ ಪ್ರೋಗ್ರಾಂ ಗೈಡ್ (ಇಪಿಜಿ) ಹಾಗೂ ಅಂತರ್ನಿರ್ಮಿತ ಸ್ಯಾಟಲೈಟ್ ಟ್ಯೂನರ್‌ ಗಳ ಪರಿಚಯ - ಈ ಮೂರು ಉಪಕ್ರಮಗಳು 'ಆರೆಂಜ್ ಎಕಾನಮಿ' (ಸೃಜನಶೀಲ ಆರ್ಥಿಕತೆ) ಯನ್ನು ಉತ್ತೇಜಿಸುವ, ಸಾರ್ವಜನಿಕ ಪ್ರಸಾರವನ್ನು ಬಲಪಡಿಸುವ ಮತ್ತು ಮಾಧ್ಯಮ ಹಾಗೂ ಮನರಂಜನಾ ಕ್ಷೇತ್ರದಲ್ಲಿ ಎಐ ಕೌಶಲ್ಯ ಹೊಂದಿದ ಕಾರ್ಯಪಡೆಯನ್ನು ನಿರ್ಮಿಸುವ ಗುರಿಯನ್ನು ಹೊಂದಿವೆ. ಈ ಕಾರ್ಯಕ್ರಮದಲ್ಲಿ ಪ್ರಮುಖ ಮಾಧ್ಯಮ ಮತ್ತು ಮನರಂಜನಾ ಉದ್ಯಮದ ಪ್ರತಿನಿಧಿಗಳು, ಯೂಟ್ಯೂಬ್ ಇಂಡಿಯಾದ ಮುಖ್ಯಸ್ಥರು ಮತ್ತು ಸಚಿವಾಲಯದ ಹಿರಿಯ ಅಧಿಕಾರಿಗಳು ಭಾಗವಹಿಸಿದ್ದರು.

ಎಲ್ಲರಿಗೂ ಕೈಗೆಟಕುವ ತಂತ್ರಜ್ಞಾನ

ತಂತ್ರಜ್ಞಾನವನ್ನು ಪ್ರಜಾಪ್ರಭುತ್ವೀಕರಣಗೊಳಿಸುವ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ದೂರದೃಷ್ಟಿಯನ್ನು ಒತ್ತಿ ಹೇಳಿದ ಶ್ರೀ ಅಶ್ವಿನಿ ವೈಷ್ಣವ್, ಈ ಉಪಕ್ರಮಗಳು ತಂತ್ರಜ್ಞಾನವನ್ನು ಹೆಚ್ಚು ಕೈಗೆಟಕುವಂತೆ ಮತ್ತು ಸುಲಭವಾಗಿ ಲಭ್ಯವಾಗುವಂತೆ ಮಾಡಲಿವೆ ಎಂದು ಹೇಳಿದರು. ಅಂತರ್ನಿರ್ಮಿತ ಸ್ಯಾಟಲೈಟ್ ಟ್ಯೂನರ್‌ ಗಳು ಮತ್ತು ಸುಧಾರಿತ ಕಾರ್ಯಕ್ರಮ ಮಾರ್ಗದರ್ಶಿಯೊಂದಿಗೆ, ನಾಗರಿಕರು ಈಗ ಯಾವುದೇ ಹೆಚ್ಚುವರಿ ಉಪಕರಣಗಳಿಲ್ಲದೆ ವಿಷಯವನ್ನು ಸುಲಭವಾಗಿ ವೀಕ್ಷಿಸಬಹುದು ಎಂದು ಅವರು ತಿಳಿಸಿದರು.

ಎರಡನೇ ಉಪಕ್ರಮದ ಬಗ್ಗೆ ಮಾತನಾಡಿದ ಅವರು, ಮೈವೇವ್ಸ್ ಅನ್ನು ವಿಷಯ (ಕಂಟೆಂಟ್)‌ ರಚನೆಕಾರರಿಗೆ ಒಂದು ಶಕ್ತಿಶಾಲಿ ವೇದಿಕೆಯೆಂದು ಬಣ್ಣಿಸಿದರು, ಇದು ಅವರಿಗೆ ವಿಷಯವನ್ನು ರಚಿಸಲು, ಅಪ್‌ಲೋಡ್ ಮಾಡಲು ಮತ್ತು ಹಂಚಿಕೊಳ್ಳಲು ಅನುವು ಮಾಡಿಕೊಡುತ್ತದೆ, ಆ ಮೂಲಕ ಭಾರತದ ಡಿಜಿಟಲ್ ಪರಿಸರ ವ್ಯವಸ್ಥೆಯನ್ನು ಬಲಪಡಿಸುತ್ತದೆ ಎಂದು ಹೇಳಿದರು. ಕೇಂದ್ರ ಬಜೆಟ್ ಘೋಷಣೆಗಳನ್ನು ಉಲ್ಲೇಖಿಸಿದ ಅವರು, 'ಆರೆಂಜ್ ಎಕಾನಮಿ'ಯನ್ನು ಉತ್ತೇಜಿಸಲು ಮತ್ತು ಸೃಜನಶೀಲ ಕ್ಷೇತ್ರವನ್ನು ಬೆಂಬಲಿಸಲು ಸರ್ಕಾರದ ಬದ್ಧತೆಯನ್ನು ಒತ್ತಿಹೇಳಿದರು.

ಯೂಟ್ಯೂಬ್‌ನ ಬೆಂಬಲದೊಂದಿಗೆ ಅನುಷ್ಠಾನಗೊಳ್ಳುತ್ತಿರುವ ರಾಷ್ಟ್ರೀಯ ಎಐ ಕೌಶಲ್ಯ ಉಪಕ್ರಮದ ಅಡಿಯಲ್ಲಿ ಸುಮಾರು 15,000 ಯುವಜನರಿಗೆ ಯಾವುದೇ ಶುಲ್ಕವಿಲ್ಲದೆ ತರಬೇತಿ ನೀಡಲಾಗುವುದು ಎಂದು ಸಚಿವರು ತಿಳಿಸಿದರು. ಅವರು 'ಕ್ರಿಯೇಟರ್ಸ್ ಕಾರ್ನರ್' ಉಪಕ್ರಮದ ಬಗ್ಗೆಯೂ ಮಾತನಾಡಿ, ಅದರ ಬೆಳೆಯುತ್ತಿರುವ ಜನಪ್ರಿಯತೆಯನ್ನು ಗಮನಿಸಿದರು, ಕೆಲವು ವಿಷಯಗಳು ಈಗಾಗಲೇ 30 ಲಕ್ಷಕ್ಕೂ ಹೆಚ್ಚು ವೀಕ್ಷಣೆಗಳನ್ನು ಪಡೆದಿವೆ. ಭಾರತದ ಶ್ರೀಮಂತ ಸಂಸ್ಕೃತಿ, ಸಂಪ್ರದಾಯಗಳು ಮತ್ತು ಪ್ರಾದೇಶಿಕ ವೈವಿಧ್ಯತೆಯನ್ನು ಪ್ರದರ್ಶಿಸಲು ದೂರದರ್ಶನ ಮತ್ತು ಮೈವೇವ್ಸ್ ನಂತಹ ವೇದಿಕೆಗಳನ್ನು ಸಕ್ರಿಯವಾಗಿ ಬಳಸಿಕೊಳ್ಳುವಂತೆ ಅವರು ದೇಶದಾದ್ಯಂತದ ಕ್ರಿಯೇಟರ್‌ ಗಳಿಗೆ ಕರೆ ನೀಡಿದರು.

ತಮ್ಮ ಪ್ರದೇಶಗಳ ಕಥೆಗಳನ್ನು ಪ್ರಸ್ತುತಪಡಿಸಲು ಮತ್ತು ರೋಮಾಂಚಕ ಹಾಗೂ ಅಂತರ್ಗತ ಮಾಧ್ಯಮ ಕ್ಷೇತ್ರಕ್ಕೆ ಕೊಡುಗೆ ನೀಡಲು ಈ ವೇದಿಕೆಗಳನ್ನು ಬಳಸಿಕೊಳ್ಳುವಂತೆ ಅವರು ಕ್ರಿಯೇಟರ್‌ ಗಳಿಗೆ ಕರೆ ನೀಡಿದರು.

ಕ್ರಿಯೇಟರ್‌ ಗಳ ಸಬಲೀಕರಣ, ಪ್ರವೇಶದ ವಿಸ್ತರಣೆ

ರಾಷ್ಟ್ರೀಯ ಎಐ ಕೌಶಲ್ಯ ಉಪಕ್ರಮ, ಮೈವೇವ್ಸ್ ಪ್ಲಾಟ್‌ಫಾರ್ಮ್ ಮತ್ತು ಟೆಲಿವಿಷನ್ ಸೆಟ್‌ ಗಳಲ್ಲಿ ಅಂತರ್ನಿರ್ಮಿತ ಸ್ಯಾಟಲೈಟ್ ಟ್ಯೂನರ್‌ ಗಳೊಂದಿಗೆ ಸುಧಾರಿತ ಎಲೆಕ್ಟ್ರಾನಿಕ್ ಪ್ರೋಗ್ರಾಂ ಗೈಡ್ ಬಿಡುಗಡೆಯ ಕುರಿತು ಮಾತನಾಡಿದ ವಾರ್ತಾ ಮತ್ತು ಪ್ರಸಾರ ಕಾರ್ಯದರ್ಶಿ ಶ್ರೀ ಸಂಜಯ್ ಜಾಜು, ಈ ಮೂರೂ ಉಪಕ್ರಮಗಳು ಸಾಮಾನ್ಯ ನೀತಿ ನಿರ್ದೇಶನವನ್ನು ಪ್ರತಿಬಿಂಬಿಸುತ್ತವೆ ಎಂದು ಹೇಳಿದರು. ಈ ಉಪಕ್ರಮಗಳು ಕ್ರಿಯೇಟರ್‌ ಗಳಿಗಾಗಿ ಬಲವಾದ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವ ಗುರಿಯನ್ನು ಹೊಂದಿವೆ ಮತ್ತು ಗುಣಮಟ್ಟದ ಪ್ರಸಾರದ ವ್ಯಾಪಕ ಪ್ರವೇಶವನ್ನು ಖಚಿತಪಡಿಸುತ್ತವೆ ಎಂದು ಅವರು ಹೇಳಿದರು.

ರಾಷ್ಟ್ರೀಯ ಎಐ ಕೌಶಲ್ಯ ಉಪಕ್ರಮವು ಕ್ರಿಯೇಟರ್‌ ಗಳಿಗೆ ಸಾಮರ್ಥ್ಯ ವೃದ್ಧಿಸಿಕೊಳ್ಳಲು ಮತ್ತು ವಿಕಸನಗೊಳ್ಳುತ್ತಿರುವ ಡಿಜಿಟಲ್ ಜಗತ್ತಿನಲ್ಲಿ ತಮ್ಮ ಗುರಿಗಳನ್ನು ಸಾಧಿಸಲು ಸಹಾಯ ಮಾಡುತ್ತದೆ. ಮೈವೇವ್ಸ್ ರೋಮಾಂಚಕ ಡಿಜಿಟಲ್ ಪರಿಸರ ವ್ಯವಸ್ಥೆಯ ರಚನೆಯನ್ನು ಬೆಂಬಲಿಸುತ್ತದೆ, ನಾಗರಿಕರಿಗೆ ವಿಷಯವನ್ನು ರಚಿಸಲು, ಅಪ್‌ಲೋಡ್ ಮಾಡಲು ಮತ್ತು ಹಂಚಿಕೊಳ್ಳಲು ಅನುವು ಮಾಡಿಕೊಡುತ್ತದೆ. ಡಿಡಿ ಫ್ರೀ ಡಿಶ್‌ ಗೆ ಸಂಬಂಧಿಸಿದ ಮೂರನೇ ಉಪಕ್ರಮವು ಸೆಟ್-ಟಾಪ್ ಬಾಕ್ಸ್‌ ನ ಅಗತ್ಯವಿಲ್ಲದೇ ನಾಗರಿಕರು ವಿಷಯವನ್ನು ವೀಕ್ಷಿಸಲು ಅನುವು ಮಾಡಿಕೊಡುತ್ತದೆ, ಆ ಮೂಲಕ ವಿಶೇಷವಾಗಿ ದೂರದ ಪ್ರದೇಶಗಳಲ್ಲಿ ತಲುಪುವಿಕೆಯನ್ನು ಸುಧಾರಿಸುತ್ತದೆ.

ಒಟ್ಟಾರೆಯಾಗಿ, ಮೊದಲ ಉಪಕ್ರಮವು ಜನರನ್ನು ಸಮರ್ಥರನ್ನಾಗಿ ಮಾಡುತ್ತದೆ, ಎರಡನೆಯದು ಅವಕಾಶಗಳ ವಿಸ್ತರಣೆಗೆ ಅನುವು ಮಾಡಿಕೊಡುತ್ತದೆ ಮತ್ತು ಮೂರನೆಯದು ಎಲ್ಲರಿಗೂ ವಿಷಯದ ಲಭ್ಯತೆಯನ್ನು ಖಚಿತಪಡಿಸುತ್ತದೆ.

ಎಐ ಮೂಲಕ ಕ್ರಿಯೇಟರ್‌ ಗಳ ಸಬಲೀಕರಣ

ಕ್ರಿಯೇಟರ್‌ ಗಳ ಮೇಲೆ ಈ ಪಾಲುದಾರಿಕೆಯ ಪ್ರಭಾವದ ಬಗ್ಗೆ ಮಾತನಾಡಿದ ಯೂಟ್ಯೂಬ್‌ನ ಭಾರತದ ವ್ಯವಸ್ಥಾಪಕ ನಿರ್ದೇಶಕರಾದ ಗುಂಜನ್ ಸೋನಿ, ಭಾರತದ ಕ್ರಿಯಾತ್ಮಕ ಸೃಜನಶೀಲ ಆರ್ಥಿಕತೆಗೆ ಎಐ ಗಮನಾರ್ಹ ಅವಕಾಶಗಳನ್ನು ತೆರೆಯುವ ಸಾಮರ್ಥ್ಯವನ್ನು ಹೊಂದಿದೆ ಎಂದು ನಮಗೆ ವಿಶ್ವಾಸವಿದೆ ಎಂದರು. ವಾರ್ತಾ ಮತ್ತು ಪ್ರಸಾರ ಸಚಿವಾಲಯ ಮತ್ತು ಐಐಸಿಟಿಯೊಂದಿಗಿನ ನಮ್ಮ ಸಹಯೋಗದ ಮೂಲಕ, ಭವಿಷ್ಯದ ಸಾಧನಗಳನ್ನು ಕರಗತ ಮಾಡಿಕೊಳ್ಳಲು, ಹೆಚ್ಚು ಆಕರ್ಷಕ ಕಥೆಗಳನ್ನು ಹೇಳಲು ಎಐ ಅನ್ನು ಬಳಸಿಕೊಳ್ಳಲು, ಹೊಸ ಪ್ರೇಕ್ಷಕರನ್ನು ತಲುಪಲು ಮತ್ತು ಮಾಧ್ಯಮದ ಭವಿಷ್ಯವನ್ನು ರೂಪಿಸುವಲ್ಲಿ ಪಾತ್ರವಹಿಸಲು ಅಗತ್ಯವಿರುವ ಕೌಶಲ್ಯಗಳನ್ನು ಕ್ರಿಯೇಟರ್‌ ಗಳು ಮತ್ತು ವೃತ್ತಿಪರರಿಗೆ ಒದಗಿಸುವ ಗುರಿಯನ್ನು ನಾವು ಹೊಂದಿದ್ದೇವೆ. ಈ ಉಪಕ್ರಮವು ತಂತ್ರಜ್ಞಾನವು ಎಲ್ಲರಿಗೂ ಸಕ್ರಿಯ ಸಾಧನವಾಗಿ ಕಾರ್ಯನಿರ್ವಹಿಸುವ 'ಡಿಜಿಟಲ್ ಇಂಡಿಯಾ' ಕಡೆಗಿನ ನಮ್ಮ ನಿರಂತರ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ ಎಂದು ಅವರು ಹೇಳಿದರು.

ರಾಷ್ಟ್ರೀಯ ಎಐ ಕೌಶಲ್ಯ ಉಪಕ್ರಮ

ವಾರ್ತಾ ಮತ್ತು ಪ್ರಸಾರ ಸಚಿವಾಲಯವು ಗೂಗಲ್ ಮತ್ತು ಯೂಟ್ಯೂಬ್ ಸಹಭಾಗಿತ್ವದಲ್ಲಿ, ಸೃಜನಶೀಲ ಮತ್ತು ಮಾಧ್ಯಮ ಕ್ಷೇತ್ರಗಳ 15,000 ಅಭ್ಯರ್ಥಿಗಳಿಗೆ ತರಬೇತಿ ನೀಡಲು ರಾಷ್ಟ್ರೀಯ ಎಐ ಕೌಶಲ್ಯ ಉಪಕ್ರಮವನ್ನು ಘೋಷಿಸಿದೆ. ಈ ಉಪಕ್ರಮವನ್ನು ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಕ್ರಿಯೇಟಿವ್ ಟೆಕ್ನಾಲಜೀಸ್ (ಐಐಸಿಟಿ) ಮೂಲಕ ಜಾರಿಗೊಳಿಸಲಾಗುತ್ತಿದೆ ಮತ್ತು ಅನಿಮೇಷನ್, ವಿಶ್ಯುಯಲ್ ಎಫೆಕ್ಟ್ಸ್, ಗೇಮಿಂಗ್, ಕಾಮಿಕ್ಸ್ (ಎವಿಜಿಸಿ) ಮತ್ತು ಮಾಧ್ಯಮ ತಂತ್ರಜ್ಞಾನದಂತಹ ಕ್ಷೇತ್ರಗಳಲ್ಲಿ ಎಐ ಸಾಮರ್ಥ್ಯಗಳನ್ನು ಬಲಪಡಿಸುವ ಗುರಿಯನ್ನು ಹೊಂದಿದೆ.

ಎಐ ಕೌಶಲ್ಯ ಕಾರ್ಯಕ್ರಮವನ್ನು ಎರಡು ಹಂತಗಳಲ್ಲಿ ನಡೆಸಲಾಗುವುದು. ಮೊದಲನೆಯ ಹಂತವು ಮಾರ್ಚ್ 23 ರಿಂದ ಜೂನ್ 30, 2026 ರವರೆಗೆ ನಡೆಯಲಿದ್ದು, ಗೂಗಲ್ ಕೆರಿಯರ್ ಸರ್ಟಿಫಿಕೇಟ್‌ ಗಳು ಮತ್ತು ಗೂಗಲ್ ಕ್ಲೌಡ್ ಜನರೇಟಿವ್ ಎಐ ಲರ್ನಿಂಗ್ ಪಾತ್‌ ಗಳ ಮೂಲಕ ದೊಡ್ಡ ಪ್ರಮಾಣದಲ್ಲಿ ಮೂಲಭೂತ ಎಐ ಕಲಿಕೆಯ ಮೇಲೆ ಗಮನ ಕೇಂದ್ರೀಕರಿಸುತ್ತದೆ. ಅಭ್ಯರ್ಥಿಗಳು ಎಐ ಎಸೆನ್ಷಿಯಲ್ಸ್, ಪ್ರಾಂಪ್ಟಿಂಗ್ ಎಸೆನ್ಷಿಯಲ್ಸ್, ಇಂಟ್ರೊಡಕ್ಷನ್ ಟು ಜನರೇಟಿವ್ ಎಐ ಮತ್ತು ಜನರೇಟಿವ್ ಎಐ ಲೀಡರ್ ಪಾತ್ ನಂತಹ ಕೋರ್ಸ್‌ ಗಳನ್ನು ಪಡೆಯಲಿದ್ದಾರೆ. ಮುಂದಿನ ಹಂತಕ್ಕೆ ಹೋಗಲು ಈ ಹಂತವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸುವುದು ಕಡ್ಡಾಯವಾಗಿದೆ.

ಎರಡನೆಯ ಹಂತ ಜುಲೈನಿಂದ ಡಿಸೆಂಬರ್ 2026 ರವರೆಗೆ ನಡೆಯಲಿದ್ದು, ಸೃಜನಶೀಲ ಉದ್ಯಮಕ್ಕಾಗಿ ಸುಧಾರಿತ, ಪ್ರಾಯೋಗಿಕ ಮತ್ತು ಯೋಜನೆ-ಆಧಾರಿತ ವಿಶೇಷತೆಯ ಮೇಲೆ ಗಮನ ಕೇಂದ್ರೀಕರಿಸುತ್ತದೆ. ಪಠ್ಯಕ್ರಮವು ಕಥೆ ಹೇಳುವ ಕಲೆ, ಯೂಟ್ಯೂಬ್ ಅತ್ಯುತ್ತಮ ಅಭ್ಯಾಸಗಳು ಮತ್ತು ಜೆಮಿನಿ 3, ನ್ಯಾನೋ ಬನಾನಾ, ವಿಯೋ ಮತ್ತು ವರ್ಟೆಕ್ಸ್ ಎಐ ನಂತಹ ಎಐ ಸಾಧನಗಳನ್ನು ಬಳಸಿಕೊಂಡು ಸುಧಾರಿತ ತರಬೇತಿಯನ್ನು ಒಳಗೊಂಡಿರುತ್ತದೆ. ದೇಶದ ಪ್ರಮುಖ ನಗರಗಳಲ್ಲಿ ತರಬೇತಿ ನಡೆಯಲಿದೆ.

ಈ ಉಪಕ್ರಮವು ಕ್ರಿಯೇಟರ್‌ ಗಳು, ಮಾಧ್ಯಮ ವೃತ್ತಿಪರರು, ವಿದ್ಯಾರ್ಥಿಗಳು ಮತ್ತು ಡೆವಲಪರ್‌ ಗಳಿಗೆ ಭವಿಷ್ಯಕ್ಕೆ ಸಿದ್ಧವಾದ ಕೌಶಲ್ಯಗಳನ್ನು ನಿರ್ಮಿಸಲು ಬೆಂಬಲ ನೀಡುತ್ತದೆ ಮತ್ತು ಡಿಜಿಟಲ್ ವಿಷಯ ಮತ್ತು ನಾವೀನ್ಯತೆಗಾಗಿ ಭಾರತವು ಜಾಗತಿಕ ಕೇಂದ್ರವಾಗಿ ಹೊರಹೊಮ್ಮಲು ಕೊಡುಗೆ ನೀಡುತ್ತದೆ.

ಮೈವೇವ್ಸ್ – ವೇವ್ಸ್‌ ಒಟಿಟಿ ಅಡಿಯಲ್ಲಿ ನಾಗರಿಕ ಕ್ರಿಯೇಟರ್ ಪ್ಲಾಟ್‌ಫಾರ್ಮ್

ಸಚಿವಾಲಯವು ವೇವ್ಸ್‌ ಒಟಿಟಿ ಪ್ಲಾಟ್‌ಫಾರ್ಮ್‌ ನಲ್ಲಿ ಮೈವೇವ್ಸ್ ಎಂಬ ಹೊಸ ವೈಶಿಷ್ಟ್ಯವನ್ನು ಘೋಷಿಸಿದೆ, ಇದು ನಾಗರಿಕರಿಗೆ ವಿಷಯವನ್ನು ರಚಿಸಲು, ಅಪ್‌ಲೋಡ್ ಮಾಡಲು ಮತ್ತು ಹಂಚಿಕೊಳ್ಳಲು ಅನುವು ಮಾಡಿಕೊಡುತ್ತದೆ. ಮೈವೇವ್ಸ್ ಅನ್ನು ಬಳಕೆದಾರ-ರಚಿಸಿದ ವಿಷಯಕ್ಕಾಗಿ (ಉಜಿಸಿ) ಒಂದು ರಚನಾತ್ಮಕ ವೇದಿಕೆಯಾಗಿ ವಿನ್ಯಾಸಗೊಳಿಸಲಾಗಿದೆ, ಇದು 'ಕ್ರಿಯೇಟ್ ಇನ್ ಇಂಡಿಯಾ ಚಾಲೆಂಜ್' ನಂತಹ ರಾಷ್ಟ್ರೀಯ ಉಪಕ್ರಮಗಳಲ್ಲಿ ಭಾಗವಹಿಸುವಿಕೆಯನ್ನು ಬೆಂಬಲಿಸುತ್ತದೆ.

ಈ ವೇದಿಕೆಯು ಕೇವಲ ವಿಷಯ ವೀಕ್ಷಣೆಯಿಂದ ಸಕ್ರಿಯ ವಿಷಯ ಭಾಗವಹಿಸುವಿಕೆಗೆ ಬದಲಾವಣೆಯನ್ನು ಸೂಚಿಸುತ್ತದೆ, ಇದು ವೇವ್ಸ್‌ ಒಟಿಟಿಯನ್ನು ಕೇವಲ ವೀಕ್ಷಣೆಗಾಗಿ ಮಾತ್ರವಲ್ಲದೆ ಸೃಷ್ಟಿಗೂ ಒಂದು ವೇದಿಕೆಯನ್ನಾಗಿ ಮಾಡುತ್ತದೆ. ಮೈವೇವ್ಸ್ ಕಿರು ವೀಡಿಯೊಗಳು, ವರ್ಟಿಕಲ್ ವೀಡಿಯೊಗಳು ಮತ್ತು ಎಪಿಸೋಡಿಕ್ ವಿಷಯ ಸೇರಿದಂತೆ ಬಹು ಸ್ವರೂಪಗಳನ್ನು ಬೆಂಬಲಿಸುತ್ತದೆ ಮತ್ತು ಭಾರತೀಯ ಭಾಷೆಗಳಲ್ಲಿ ಬಹುಭಾಷಾ ಇಂಟರ್ಫೇಸ್ ಅನ್ನು ನೀಡುತ್ತದೆ. ದೇಶದಾದ್ಯಂತ ಉದಯೋನ್ಮುಖ ಕ್ರಿಯೇಟರ್‌ ಗಳು ಮತ್ತು ಕಥೆಗಾರರಿಗೆ ಮೈವೇವ್ಸ್ ಒಂದು ಪ್ರಮುಖ ವೇದಿಕೆಯಾಗಿ ಕಾರ್ಯನಿರ್ವಹಿಸುವ ನಿರೀಕ್ಷೆಯಿದೆ.

ಸುಧಾರಿತ ಇಪಿಜಿ (ಇಪಿಜಿ) ಮತ್ತು ಟೆಲಿವಿಷನ್ ಸೆಟ್‌ ಗಳಲ್ಲಿ ಅಂತರ್ನಿರ್ಮಿತ ಸ್ಯಾಟಲೈಟ್ ಟ್ಯೂನರ್

ದೂರದರ್ಶನ ವೀಕ್ಷಣೆಯನ್ನು ಸರಳ ಮತ್ತು ಹೆಚ್ಚು ಸುಲಭವಾಗಿ ಲಭ್ಯವಾಗುವಂತೆ ಮಾಡುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯಾಗಿ, ವಾರ್ತಾ ಮತ್ತು ಪ್ರಸಾರ ಸಚಿವಾಲಯವು ಹೊಸ, ಬಳಕೆದಾರ ಸ್ನೇಹಿ ಕಾರ್ಯಕ್ರಮ ಮಾರ್ಗದರ್ಶಿಯೊಂದಿಗೆ (ಇಪಿಜಿ) ಅಂತರ್ನಿರ್ಮಿತ ಸ್ಯಾಟಲೈಟ್ ಟ್ಯೂನರ್‌ ಗಳನ್ನು ಹೊಂದಿರುವ ಟೆಲಿವಿಷನ್ ಸೆಟ್‌ ಗಳನ್ನು ಪರಿಚಯಿಸಿದೆ. ಈ ಉಪಕ್ರಮದೊಂದಿಗೆ, ವೀಕ್ಷಕರು ಪ್ರತ್ಯೇಕ ಸೆಟ್-ಟಾಪ್ ಬಾಕ್ಸ್‌ ನ ಅಗತ್ಯವಿಲ್ಲದೇ ನೇರವಾಗಿ ತಮ್ಮ ಟೆಲಿವಿಷನ್ ಸೆಟ್‌ ಗಳಲ್ಲಿ ಡಿಡಿ ಫ್ರೀ ಡಿಶ್ ಚಾನೆಲ್‌ ಗಳನ್ನು ವೀಕ್ಷಿಸಲು ಸಾಧ್ಯವಾಗುತ್ತದೆ, ಆ ಮೂಲಕ ಹೆಚ್ಚುವರಿ ವೆಚ್ಚಗಳು, ವೈರಿಂಗ್ ಮತ್ತು ಬಹು ರಿಮೋಟ್‌ ಗಳ ತೊಂದರೆಯನ್ನು ಕಡಿಮೆ ಮಾಡುತ್ತದೆ. ಅದೇ ಸಮಯದಲ್ಲಿ, ಹೊಸ ಸುಧಾರಿತ ಕಾರ್ಯಕ್ರಮ ಮಾರ್ಗದರ್ಶಿಯು ಬಳಕೆದಾರರಿಗೆ ಚಾನೆಲ್‌ ಗಳು ಮತ್ತು ಕಾರ್ಯಕ್ರಮಗಳ ವೇಳಾಪಟ್ಟಿಯನ್ನು ಒಂದೇ ಸ್ಥಳದಲ್ಲಿ ಸರಳವಾಗಿ ವೀಕ್ಷಿಸಲು ಅನುವು ಮಾಡಿಕೊಡುತ್ತದೆ. ಇದು ದೇಶದಾದ್ಯಂತದ ಮನೆಗಳಿಗೆ ಟಿವಿ ವೀಕ್ಷಣೆಯ ಅನುಭವವನ್ನು ಹೆಚ್ಚು ಸುಲಭ ಮತ್ತು ಆರಾಮದಾಯಕವಾಗಿಸಲಿದೆ.

ವಾರ್ತಾ ಮತ್ತು ಪ್ರಸಾರ ಸಚಿವಾಲಯವು 'ಆರೆಂಜ್ ಎಕಾನಮಿ'ಯನ್ನು (ಸೃಜನಶೀಲ ಆರ್ಥಿಕತೆ) ಉತ್ತೇಜಿಸುವ, ಸುಧಾರಿತ ಪ್ರವೇಶದೊಂದಿಗೆ ಸಾರ್ವಜನಿಕ ಪ್ರಸಾರವನ್ನು ಬಲಪಡಿಸುವ ಮತ್ತು ಮಾಧ್ಯಮ ಹಾಗೂ ಮನರಂಜನಾ ಕ್ಷೇತ್ರಕ್ಕಾಗಿ ಎಐ ಕೌಶಲ್ಯ ಹೊಂದಿದ, ಭವಿಷ್ಯಕ್ಕೆ ಸಿದ್ಧವಾದ ಕಾರ್ಯಪಡೆಯನ್ನು ನಿರ್ಮಿಸುವ ತನ್ನ ಬದ್ಧತೆಯ ಭಾಗವಾಗಿ ಈ ಪ್ರಯತ್ನಗಳನ್ನು ಮುನ್ನಡೆಸುತ್ತಿದೆ. ಸಾರ್ವಜನಿಕ ಪ್ರಸಾರವನ್ನು ಸುಧಾರಿಸುವಲ್ಲಿ ಪ್ರಸಾರ ಭಾರತಿಯು ಪ್ರಮುಖ ಪಾತ್ರವನ್ನು ಮುಂದುವರಿಸಲಿದೆ, ಸೃಜನಶೀಲ ಕ್ಷೇತ್ರಕ್ಕಾಗಿ ಎಐ ಕೌಶಲ್ಯ ಕಾರ್ಯಕ್ರಮವನ್ನು ಐಐಸಿಟಿ ನಡೆಸಲಿದೆ ಮತ್ತು ವೇವ್ಸ್‌ ಒಟಿಟಿ ಪ್ಲಾಟ್‌ಫಾರ್ಮ್ ನಾಗರಿಕರ ಭಾಗವಹಿಸುವಿಕೆ ಹಾಗೂ ವಿಷಯ ರಚನೆಗಾಗಿ ವೇದಿಕೆಯನ್ನು ಒದಗಿಸಲಿದೆ; ಇದು 'ಕ್ರಿಯೇಟ್ ಇನ್ ಇಂಡಿಯಾ' ಚಾಲೆಂಜ್ ಅನ್ನು ಈ ಯೋಜನೆಯೊಂದಿಗೆ ಸಂಯೋಜಿಸುವುದನ್ನೂ ಒಳಗೊಂಡಿದೆ.

*****