नवी दिल्‍ली, 19 मार्च 2026

पंतप्रधान नरेंद्र मोदी यांनी जॉर्डनचे राजे महामहिम अब्दुल्ला द्वितीय यांच्याशी दूरध्वनीवरून संवाद साधला; यावेळी आगामी सणांच्या निमित्ताने एकमेकांत शुभेच्छांची देवाणघेवाण केली, तसेच पश्चिम आशिया क्षेत्रातील बदलत्या सुरक्षा परिस्थितीवर उभय नेत्यांनी चर्चा केली.

पंतप्रधानांनी राजे अब्दुल्ला द्वितीय यांच्याशी संवाद साधला आणि त्यांना ईदच्या सणाच्या आगाऊ शुभेच्छा दिल्या. या दरम्यान झालेल्या चर्चेच्या वेळी , दोन्ही नेत्यांनी पश्चिम आशियातील बदलत्या परिस्थितीबद्दल चिंता व्यक्त केली आणि या प्रदेशात लवकरात लवकर शांतता, सुरक्षा आणि स्थैर्य निर्माण करण्यासाठी धोरणात्मक संवाद साधण्याच्या आवश्यकतेवर भर दिला.

पश्चिम आशियातील ऊर्जेच्या पायाभूत स्रोतांवरील हल्ले अत्यंत निंदनीय आहेत आणि त्यामुळे वाढलेला तणाव टाळता आला असता, असे पंतप्रधानांनी नमूद केले. भारत आणि जॉर्डन हे वस्तू आणि ऊर्जेच्या निर्वेध वाहतुकीच्या समर्थनार्थ ठामपणे उभे राहतील, असे प्रतिपादन मोदींनी केले. या प्रदेशात अडकलेल्या भारतीयांना सुरक्षितपणे परत आणण्याची सोय करण्यासाठी जॉर्डनने केलेल्या प्रयत्नांबद्दल पंतप्रधानांनी त्यांची प्रशंसा केली. 

आपल्या एक्स पोस्टवर पंतप्रधानांनी लिहिले आहे :

"माझे बंधू, जॉर्डनचे राजे महामहिम अब्दुल्ला द्वितीय यांना ईदच्या निमित्ताने दूरध्वनीवरून आगाऊ शुभेच्छा दिल्या. पश्चिम आशियामध्ये निर्माण झालेल्या परिस्थितीबाबत आम्ही उभयतांनी चिंता व्यक्त केली; तसेच, या प्रदेशात लवकरात लवकर शांतता, सुरक्षा आणि स्थैर्य निर्माण करण्यासाठी संवाद आणि धोरणात्मक मुत्सद्देगिरीची आवश्यकता असल्याचे त्यांनी अधोरेखित केले. पश्चिम आशियातील ऊर्जा पायाभूत स्रोतांवर होणारे हल्ले निंदनीय असून, त्यामुळे टाळता येण्याजोगा तणाव वाढू शकतो. वस्तू आणि ऊर्जेची  वाहतूक सुरळीतपणे करण्याच्या भूमिकेला भारत आणि जॉर्डन यांचा पाठिंबा आहे. "जॉर्डन मधे अडकलेल्या भारतीयांच्या सुरक्षित परतीच्या प्रवासासाठी जॉर्डनने केलेल्या प्रयत्नांचे मी मनापासून कौतुक करतो."

Conveyed advance Eid wishes to my brother, His Majesty King Abdullah II, the King of Jordan, over phone.

We expressed concern at the evolving situation in West Asia and highlighted the need for dialogue and diplomacy for the early restoration of peace, security and stability in…

— Narendra Modi (@narendramodi) March 19, 2026

* * *

राधिका अघोर/संपदा पाटगांवकर/दर्शना राणे

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai