লৌমীবশিংগী য়াইফ-থৌরাং মপাঙ্গল কনখৎহনবা অমসুং আত্মনির্ভর ভারতকী মঙলান মাঙলোমদা পুখৎপগী মরুওইবা খোঙথাং অমা ওইনা, প্রধান মন্ত্রী শ্রী নরেন্দ্র মোদীনা লুচিংবা ওইবা কেবিনেত কম্মিতী ওন ইকনমিক এফিয়র্সনা ২০২৩–২৪গী লশিংগী থারুক্কীদমক কত্তন কোর্পোরেসন ওফ ইন্দিয়া (সি.সি.আই.)দা লুপা করোর ১,৭১৮.৫৬গী মিনিমম সপ্পোর্ত প্রাইস (এম.এস.পি.) ফন্দিং অয়াবা পীখ্রে। ফন্দিং অসিগী পান্দমদি লৈবাক শিনবা থুংনা লৈরিবা লশিং থারিবা লৌমীশিংদা হকথেংননা মমলগী মতেং পীবনি।

এম.এস.পি.গী থবকশিং অসি মরুওইনা কৈথেলগী মমলনা এম.এস.পি.দগী হন্থরকপা মতমদা লশিং থারিবা লৌমীশিংগী খুদোংচাবা ঙাক্নবগীদমক পায়খৎপনি। অসিগুম্বা ইনতরভেন্সনশিং অসিনা লশিংগী মমল লেপহনবা, অৱাবা ফীভমদা লৌমীশিংনা পোত্থোক মমল তানা য়োনবা থিংবা অমসুং লৌমীশিংদা কান্নবা মহৈ ফংহনবদা মরুওইবা থৌদাং লৌরি। লৌউ-শিংউগী কৈথেলশিংদা মীপুম খুদিংমক শরুক য়াহন্দুনা, এম.এস.পি.গী থবকশিং অসিনা লশিং থাবা কাঙলুপশিংগী শেন্মিৎলোন্দা চাউনা মতেং পাংলি।

লশিং অসি ভারতকী খ্বায়দগী মরুওইবা শেল চংবা মহৈ-মরোংশিংগী মনুংদা অমা ওইরি, মসিনা লৌমী লাখ ৬০ গী পুন্সি হিংবগী পাম্বৈ ওইরি অমসুং প্রোসেসিং, ললোন-ইতিক অমসুং তেক্সতাইল য়াওনা অসিগা মরি লৈনবা থবকশিংদা লৈরিবা মীওই লাখ ৪০০–৫০০ দা মতেং পীরি।

২০২৩–২৪ গী লশিংগী থারুক অসিদা, লশিং থাবা মফম অসি হেক্তর লাখ ১১৪.৪৭ নি হায়না পারি, অমসুং লশিং পুথোকপগী চাংনা বেল লাখ ৩২৫.২২ নি হায়না পারি, মসি মালেম শিনবা থুংবগী লশিং পুথোকপগী চাংগী চাদা ২৫ রোম ওইরি।  ভারত লৈঙাক্না কমিশন ফোর এগ্রিকলচরেল কোস্তস এন্দ প্রাইসেস (সি.এ.সি.পি.)গী রিকম্মেন্দেসনশিংদা য়ুম্ফম ওইরগা লশিং মরু (কাপাস)গী এম.এস.পি. লেপ্পি।

লৈঙাক্না লশিংগী এম.এস.পি. থবকশিং পায়খৎনবা কত্তন কোর্পোরেসন ওফ ইন্দিয়া (সি.সি.আই.)বু সেন্ত্রেল নোদেল এজেন্সী ওইনা খনখ্রে। কৈথেলগী মমলনা এম.এস.পি.গী চাংদগী হন্থরকপা মতমদা, সি.সি.আই.না লৌমীশিংদগী অকক্নবা চাং থমদনা ফ্যার এভরেজ ক্বালিতী (এফ.এ.কিউ.) লশিং পুম্নমক লৈরি, মসিনা লৌমীশিংদা থাজনিংঙাই সেফতী নেত অমা পীরি।

মসিগী শেম-শাবগী শরুক অমা ওইনা, সি.সি.আই.না লশিং থাবা মরুওইবা স্তেত ১১ মক্তা মপাঙ্গল কনবা প্রোক্যুরমেন্ত নেতৱর্ক অমা শেমগৎলে, দিস্ত্রিক্ত ১৫২ দা প্রোক্যুরমেন্ত সেন্তর ৫০৮ হেন্না থবক তৌহল্লে, মসিনা লৌমীশিংগীদমক খুদোংচানা অমদি অপনবা লৈতনা পোত্থোক লৈবা য়াহল্লে।

মখা তানা, এম.এস.পি.গী থবকশিং অসি হেন্না মতিক চানা অমসুং শেংনা চত্থনবা সি.সি.আই.না তেক্নোলোজীদা য়ুম্ফম ওইবা অমসুং লৌমীদা কান্নবা খোঙথাং কয়া পায়খৎলে। মসিগী মনুংদা এম.এস.পি.গা মরী লৈনবা পাউশিং শন্দোকপা, বেল আইদেনতিফিকেসন এন্দ ত্রেসেবিলিতী সিস্তেম (বি.আই.তি.এস.) চৎনহনবা অমসুং লৌমীশিংদা হেন্না ফবা থৌগলশিং পীনবা "কোৎ-এলাই" (Cott-Ally) মোবাইল এপ হৌদোকপসু য়াওরি।

***