1. ભારતના ચૂંટણી પંચ (ECI) એ 15 માર્ચ, 2026ના રોજ આસામ, કેરળ, પુડુચેરી, તમિલનાડુ અને પશ્ચિમ બંગાળની વિધાનસભાની સામાન્ય ચૂંટણી અને 6 રાજ્યોમાં પેટાચૂંટણીનું સમયપત્રક જાહેર કર્યું હતું.
2. આ 5 રાજ્યો/કેન્દ્રશાસિત પ્રદેશોમાં ચૂંટણીના વિવિધ તબક્કાઓની સુચારૂ અને વ્યવસ્થિત પ્રગતિ સુનિશ્ચિત કરવા માટે, 25 લાખથી વધુ ચૂંટણી અધિકારીઓ નિયુક્ત કરવામાં આવ્યા છે. આ ચૂંટણીઓમાં મતદાન કરવા માટે પાત્ર કુલ મતદારોની સંખ્યા 17.4 કરોડથી વધુ છે. આ આંકડો દર 70 મતદારો દીઠ લગભગ 1 ચૂંટણી અધિકારી જેટલો થાય છે.
3. મુખ્ય ચૂંટણી કમિશનર શ્રી જ્ઞાનેશ કુમારે ચૂંટણીના સમયપત્રકની જાહેરાત કરતી વખતે જણાવ્યું હતું કે, અધિકારીઓને સંપૂર્ણ નિષ્પક્ષતા સાથે કામ કરવા સૂચના આપવામાં આવી છે જેથી એ સુનિશ્ચિત કરી શકાય કે ચૂંટણીઓ હિંસા-મુક્ત અને પ્રલોભન-મુક્ત હોય, જેથી દરેક મતદાર કોઈપણ ડર કે પક્ષપાત વગર મતદાન કરી શકે.
4. નિયુક્ત કરાયેલા કર્મચારીઓમાં લગભગ 15 લાખ પોલિંગ સ્ટાફ, 8.5 લાખ સુરક્ષા કર્મચારીઓ, 40 હજાર ગણતરી સ્ટાફ, 49 હજાર માઇક્રો ઓબ્ઝર્વર્સ, 21 હજાર સેક્ટર ઓફિસર્સ, ગણતરી માટે 15 હજાર માઇક્રો-ઓબ્ઝર્વર્સ અને અન્ય અધિકારીઓનો સમાવેશ થાય છે.
5. 2.18 લાખથી વધુ BLO (બૂથ લેવલ ઓફિસર્સ) સહિતની ફિલ્ડ-લેવલની ચૂંટણી મશીનરી મતદારો માટે ફોન કોલ પર અને ECINet એપ પર 'બુક-એ-કોલ ટુ BLO' (Book-a-call to BLO) સુવિધા દ્વારા ઉપલબ્ધ છે. DEO/RO સ્તરે કોઈપણ ફરિયાદ/પૂછપરછ નોંધાવવા માટે કોલ સેન્ટર નંબર +91 (STD Code) 1950 પણ ઉપલબ્ધ છે.
6. નિયુક્ત કરાયેલા તમામ કર્મચારીઓને લોક પ્રતિનિધિત્વ અધિનિયમ, 1951 ની કલમ 28A ની જોગવાઈઓ મુજબ ચૂંટણી પંચમાં ડેપ્યુટેશન પર હોવાનું માનવામાં આવશે.
7. સામાન્ય ચૂંટણીઓ અને પેટાચૂંટણીઓ દરમિયાન પંચની આંખ અને કાન તરીકે કામ કરવા માટે 832 વિધાનસભા મતવિસ્તારોમાં 1,111 કેન્દ્રીય નિરીક્ષકો (Central Observers) નિયુક્ત કરવામાં આવ્યા છે. આમાં 557 જનરલ ઓબ્ઝર્વર્સ, 188 પોલીસ ઓબ્ઝર્વર્સ અને 366 એક્સપેન્ડિચર (ખર્ચ) ઓબ્ઝર્વર્સ સામેલ છે. નિયુક્ત કરાયેલા મોટાભાગના કેન્દ્રીય નિરીક્ષકો પહેલેથી જ તેમના સંબંધિત સોંપાયેલ વિધાનસભા મતવિસ્તારોમાં પહોંચી ગયા છે.
8. નિરીક્ષકો તેમની સંપર્ક વિગતો શેર કરશે અને દરરોજ નિર્દિષ્ટ સમયે ઉમેદવારો, રાજકીય પક્ષો અથવા તેમના પ્રતિનિધિઓ અથવા જનતાના કોઈપણ સભ્યને તેમની ચૂંટણી સંબંધિત ફરિયાદો સાંભળવા માટે મળશે.

SM/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com