ನೆಟ್ಫ್ಲಿಕ್ಸ್ ಹೈದರಾಬಾದ್ ನಲ್ಲಿ ತನ್ನ ಜಾಗತಿಕ ಉತ್ಪಾದನೆ ಮತ್ತು ನಾವೀನ್ಯತೆ ಸ್ಟುಡಿಯೋವಾದ ಐಲೈನ್ ಸ್ಟುಡಿಯೋಸ್ ಅನ್ನು ಪ್ರಾರಂಭಿಸಿದೆ, ಇದು ಭಾರತದ ಬೆಳೆಯುತ್ತಿರುವ ಅನಿಮೇಷನ್, ವಿಷುಯಲ್ ಎಫೆಕ್ಟ್ಸ್, ಗೇಮಿಂಗ್ ಮತ್ತು ಕಾಮಿಕ್ಸ್ (ಎವಿಜಿಸಿ) ಪರಿಸರ ವ್ಯವಸ್ಥೆಯಲ್ಲಿ ಹೂಡಿಕೆಯನ್ನು ಗುರುತಿಸುತ್ತದೆ. ಈ ಉಪಕ್ರಮವು ಜಾಗತಿಕ ಉತ್ಪಾದನಾ ನಿಟ್ಟಿನಲ್ಲಿ ಭಾರತದ ಪಾತ್ರವನ್ನು ಮತ್ತಷ್ಟು ಬಲಪಡಿಸುತ್ತದೆ ಮತ್ತು ಸುಧಾರಿತ ದೃಶ್ಯ ಪರಿಣಾಮಗಳು ಮತ್ತು ಮುಂದಿನ ಪೀಳಿಗೆಯ ಉತ್ಪಾದನಾ ತಂತ್ರಜ್ಞಾನಗಳ ವಿಸ್ತರಣೆಯನ್ನು ಬೆಂಬಲಿಸುತ್ತದೆ ಎಂದು ನಿರೀಕ್ಷಿಸಲಾಗಿದೆ.

ಉದ್ಘಾಟನಾ ಸಮಾರಂಭದಲ್ಲಿ ತೆಲಂಗಾಣದ ಗೌರವಾನ್ವಿತ ಮುಖ್ಯಮಂತ್ರಿ ಶ್ರೀ ಅನುಮುಲಾ ರೇವಂತ್ ರೆಡ್ಡಿ, ಕೇಂದ್ರ ವಾರ್ತಾ ಮತ್ತು ಪ್ರಸಾರ ಸಚಿವಾಲಯದ ಕಾರ್ಯದರ್ಶಿ ಶ್ರೀ ಸಂಜಯ್ ಜಾಜು, ಐಲೈನ್ ಸ್ಟುಡಿಯೋಸ್ ನ ಸಿಇಒ ಶ್ರೀ ಜೆಫ್ ಶಪಿರೊ ಮತ್ತು ಭಾರತೀಯ ನಟ ಮತ್ತು ಚಲನಚಿತ್ರ ನಿರ್ಮಾಪಕ ಶ್ರೀ ರಾಣಾ ದಗ್ಗುಬಾಟಿ ಅವರು ಭಾಗವಹಿಸಿದರು.

ಸುಮಾರು 32,000 ಚದರ ಅಡಿ ವಿಸ್ತೀರ್ಣದಲ್ಲಿರುವ ಹೈದರಾಬಾದ್ ಘಟಕವು ಹೈಬ್ರಿಡ್ ಕ್ಲೌಡ್ ಮೂಲಸೌಕರ್ಯದಿಂದ ಬೆಂಬಲಿತವಾದ ಸುಧಾರಿತ ಸುಸಜ್ಜಿತ ದೃಶ್ಯ ಪರಿಣಾಮಗಳು ಮತ್ತು ವರ್ಚುವಲ್ ಉತ್ಪಾದನಾ ತಂತ್ರಜ್ಞಾನಗಳನ್ನು ಹೊಂದಿದೆ. ಈ ಸ್ಟುಡಿಯೋ ಉನ್ನತ ಮಟ್ಟದ ದೃಶ್ಯ ಕಥೆ ಹೇಳುವಿಕೆಯನ್ನು ಬೆಂಬಲಿಸಲು ವಿಶೇಷವಾಗಿ ವಿನ್ಯಾಸಗೊಳಿಸಲಾಗಿದೆ ಮತ್ತು ಲಾಸ್ ಏಂಜಲೀಸ್, ವ್ಯಾಂಕೋವರ್, ಸಿಯೋಲ್ ಮತ್ತು ಲಂಡನ್ ನಲ್ಲಿರುವ ಕೇಂದ್ರಗಳನ್ನು ಒಳಗೊಂಡಿರುವ ಐಲೈನ್ ಸ್ಟುಡಿಯೋಸ್ ನ ಜಾಗತಿಕ ಜಾಲದ ಭಾಗವಾಗಿ ಇದು ಕಾರ್ಯನಿರ್ವಹಿಸುತ್ತದೆ.

ಭಾರತದನೀತಿ ಹಾಗು ಧೋರಣೆ, ಬೆಂಬಲ ಮತ್ತು ಉದಯೋನ್ಮುಖ ಮಾಧ್ಯಮ ವಲಯಗಳಲ್ಲಿ ಕೌಶಲ್ಯದ ಮೇಲೆ ಒತ್ತು ನೀಡುವ ಮೂಲಕ ಸೃಜನಶೀಲ ತಂತ್ರಜ್ಞಾನ ಮತ್ತು ಡಿಜಿಟಲ್ ಉತ್ಪಾದನೆಗೆ ಜಾಗತಿಕ ಕೇಂದ್ರವಾಗಿ ತನ್ನ ಸ್ಥಾನವನ್ನು ಸ್ಥಿರವಾಗಿ ಬಲಪಡಿಸುತ್ತಿದೆ. ಹೈದರಾಬಾದ್ ನಲ್ಲಿ ಐಲೈನ್ ಸ್ಟುಡಿಯೋಗಳ ಸ್ಥಾಪನೆಯು ಪ್ರತಿಭೆ ಅಭಿವೃದ್ಧಿ, ತಂತ್ರಜ್ಞಾನ ಅಳವಡಿಕೆ ಮತ್ತು ಜಾಗತಿಕ ಉತ್ಪಾದನಾ ಜಾಲಗಳೊಂದಿಗೆ ಏಕೀಕರಣವನ್ನು ಬೆಂಬಲಿಸುವ ಮೂಲಕ ಅನಿಮೇಷನ್, ವಿಷುಯಲ್ ಎಫೆಕ್ಟ್ಸ್, ಗೇಮಿಂಗ್ ಮತ್ತು ಕಾಮಿಕ್ಸ್ (ಎವಿಜಿಸಿ) ಪೂರಕ ಪರಿಸರ ವ್ಯವಸ್ಥೆಯ ಬೆಳವಣಿಗೆಗೆ ಕೊಡುಗೆ ನೀಡುತ್ತದೆ ಎಂದು ನಿರೀಕ್ಷಿಸಲಾಗಿದೆ.

ತೆಲಂಗಾಣದ ಮುಖ್ಯಮಂತ್ರಿ ಶ್ರೀ ಅನುಮುಲಾ ರೇವಂತ್ ರೆಡ್ಡಿ, ಹೈದರಾಬಾದ್ ಸೃಜನಶೀಲತೆ, ತಂತ್ರಜ್ಞಾನ ಮತ್ತು ಜಾಗತಿಕ ಪ್ರತಿಭೆಗಳು ಒಮ್ಮುಖವಾಗುವ ಒಂದು ರೋಮಾಂಚಕ ಕೇಂದ್ರವಾಗಿ ಹೊರಹೊಮ್ಮಿದೆ ಎಂದು ಹೇಳಿದರು. ಐಲೈನ್ ಸ್ಟುಡಿಯೋಗಳಂತಹ ಉಪಕ್ರಮಗಳು ಚಲನಚಿತ್ರ, ತಂತ್ರಜ್ಞಾನ ಮತ್ತು ಅನಿಮೇಷನ್, ವಿಷುಯಲ್ ಎಫೆಕ್ಟ್ಸ್, ಗೇಮಿಂಗ್ ಮತ್ತು ಕಾಮಿಕ್ಸ್ (ಎವಿಜಿಸಿ)  ವಲಯಕ್ಕೆ ಪ್ರಮುಖ ಕೇಂದ್ರವಾಗಿ ನಗರದ ಸ್ಥಾನವನ್ನು ಮತ್ತಷ್ಟು ಬಲಪಡಿಸುತ್ತದೆ ಎಂದು ಅವರು ತಿಳಿಸಿದರು. ಈ ಸಹಯೋಗವು ಜಾಗತಿಕವಾಗಿ ಸ್ಪರ್ಧಾತ್ಮಕ ಸೃಜನಶೀಲ ಪರಿಸರ ವ್ಯವಸ್ಥೆಯ ಅಭಿವೃದ್ಧಿಗೆ ಕೊಡುಗೆ ನೀಡುತ್ತದೆ ಮತ್ತು ಹೈದರಾಬಾದ್ ನಿಂದ ಜಗತ್ತಿಗೆ ಪ್ರತಿಭೆ ಮತ್ತು ಕಥೆ ಹೇಳುವಿಕೆಗೆ ಹೊಸ ಅವಕಾಶಗಳನ್ನು ಸೃಷ್ಟಿಸುತ್ತದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.

ಈ ಕಾರ್ಯಕ್ರಮದಲ್ಲಿ ಮಾತನಾಡಿದ ಕೇಂದ್ರ ವಾರ್ತಾ ಮತ್ತು ಪ್ರಸಾರ ಸಚಿವಾಲಯದ ಕಾರ್ಯದರ್ಶಿ ಶ್ರೀ ಸಂಜಯ್ ಜಾಜು ಅವರು, ಭಾರತದ ಶ್ರೀಮಂತ ಕಥೆಗಳನ್ನು ಹೇಳುವ ಸಂಪ್ರದಾಯ ಮತ್ತು ಬೆಳೆಯುತ್ತಿರುವ ತಾಂತ್ರಿಕ ಸಾಮರ್ಥ್ಯಗಳು ಮನರಂಜನಾ ವಲಯದ ವಿಸ್ತರಣೆಗೆ ಕಾರಣವಾಗಿವೆ ಎಂದು ಹೇಳಿದರು. ಹೈದರಾಬಾದ್ ಬಲವಾದ ಅನಿಮೇಷನ್, ವಿಷುಯಲ್ ಎಫೆಕ್ಟ್ಸ್, ಗೇಮಿಂಗ್ ಮತ್ತು ಕಾಮಿಕ್ಸ್ (ಎವಿಜಿಸಿ) ಪರಂಪರೆಯನ್ನು ಹೊಂದಿದ್ದು, ನಗರದಲ್ಲಿ ಹಲವಾರು ಜಾಗತಿಕ ಸ್ಟುಡಿಯೋಗಳು ಕಾರ್ಯನಿರ್ವಹಿಸುತ್ತಿವೆ ಎಂದು ಅವರು ತಿಳಿಸಿದರು. ಹೈದರಾಬಾದ್ನಲ್ಲಿ ಮುಂಬರುವ ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಕ್ರಿಯೇಟಿವ್ ಟೆಕ್ನಾಲಜೀಸ್ (ಐಐಸಿಟಿ) ಕ್ಯಾಂಪಸ್ ಸೃಜನಶೀಲ ತಂತ್ರಜ್ಞಾನ ವಲಯದಲ್ಲಿ ಕೌಶಲ್ಯ ಮತ್ತು ಸಾಮರ್ಥ್ಯ ವೃದ್ಧಿಯನ್ನು ಮತ್ತಷ್ಟು ಬಲಪಡಿಸುತ್ತದೆ ಎಂದು ಅವರು ಹೇಳಿದರು. ಕಳೆದ ವರ್ಷದ ವೇವ್ಸ್  ಉಪಕ್ರಮದ ಸಮಯದಲ್ಲಿ, ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಕಿತ್ತಳೆ ಆರ್ಥಿಕತೆ(ಸೃಜನಾತ್ಮಕ ಆರ್ಥಿಕತೆ)ಯ ಬೆಳವಣಿಗೆಗೆ ಒತ್ತು ನೀಡಿದ್ದರು. ದೇಶಾದ್ಯಂತ 15,000 ವಿಷಯ ರಚನೆಕಾರ ಪ್ರಯೋಗಾಲಯಗಳ ಘೋಷಣೆಯೊಂದಿಗೆ, ಸೃಜನಶೀಲ ಆರ್ಥಿಕತೆ (ಕಿತ್ತಳೆ ಆರ್ಥಿಕತೆ)ಯಲ್ಲಿ ಸುಮಾರು 2 ಮಿಲಿಯನ್ ಉದ್ಯೋಗಗಳನ್ನು ಸೃಷ್ಟಿಸುವ ನಿರೀಕ್ಷೆಯಿರುವ ನೀತಿ ಕ್ರಮಕ್ಕೆ ಗಮನ ಹರಿಸಲಾಗುತ್ತಿದೆ ಎಂದು ಅವರು ಹೇಳಿದರು.

ಈ ಕಾರ್ಯಕ್ರಮದ ಸಂದರ್ಭದಲ್ಲಿ ಭಾಗವಹಿಸಿದ ತೆಲಂಗಾಣ ಸರ್ಕಾರದ ಐಟಿ, ಎಲೆಕ್ಟ್ರಾನಿಕ್ಸ್ ಮತ್ತು ಸಂವಹನ, ಕೈಗಾರಿಕೆಗಳು ಮತ್ತು ವಾಣಿಜ್ಯ ಸಚಿವರಾದ ಶ್ರೀ ಡಿ. ಶ್ರೀಧರ್ ಬಾಬು ಅವರು ಮಾತನಾಡುತ್ತಾ, ದೃಶ್ಯ ಪರಿಣಾಮಗಳು ಮತ್ತು ಅನಿಮೇಷನ್ನಂತಹ ಕ್ಷೇತ್ರಗಳಲ್ಲಿ ಬಲವಾದ ಪ್ರತಿಭಾನ್ವಿತ ಗುಂಪನ್ನು ಅಭಿವೃದ್ಧಿಪಡಿಸಲು ಕೌಶಲ್ಯ ಉಪಕ್ರಮಗಳನ್ನು ಬಲಪಡಿಸುವತ್ತ ರಾಜ್ಯ ಸರ್ಕಾರ ಗಮನಹರಿಸಿದೆ ಎಂದು ಹೇಳಿದರು. ತ್ವರಿತ ತಾಂತ್ರಿಕ ಪ್ರಗತಿಗಳು ಮತ್ತು ಬೆಳೆಯುತ್ತಿರುವ ಕೈಗಾರಿಕಾ ಭಾಗವಹಿಸುವಿಕೆಯೊಂದಿಗೆ, ಹೈದರಾಬಾದ್ ಕಥೆ ಹೇಳುವಿಕೆ ಮತ್ತು ಸೃಜನಶೀಲ ತಂತ್ರಜ್ಞಾನದ ಪ್ರಮುಖ ಜಾಗತಿಕ ಕೇಂದ್ರವಾಗಿ ಹೊರಹೊಮ್ಮಲು ಉತ್ತಮ ಸ್ಥಾನದಲ್ಲಿದೆ ಎಂದು ಅವರು ತಿಳಿಸಿದರು.

ಐಲೈನ್ ಸ್ಟುಡಿಯೋಸ್ ನ ಸಿಇಒ ಜೆಫ್ ಶಪಿರೊ ಅವರು ಮಾತನಾಡುತ್ತಾ, ಭಾರತವು ಜಾಗತಿಕ ದೃಶ್ಯ ಪರಿಣಾಮಗಳ ಉದ್ಯಮದಲ್ಲಿ ಬಹಳ ಹಿಂದಿನಿಂದಲೂ ಪ್ರಮುಖ ಪಾತ್ರ ವಹಿಸಿದೆ, ಇದಕ್ಕೆ ಬಲವಾದ ಸೃಜನಶೀಲ ಮತ್ತು ತಾಂತ್ರಿಕ ಪ್ರತಿಭೆಗಳು ಬೆಂಬಲ ನೀಡುತ್ತವೆ ಎಂದು ಹೇಳಿದರು. ಹೈದರಾಬಾದ್ ನ ತಂತ್ರಜ್ಞಾನ ಪರಿಸರ ವ್ಯವಸ್ಥೆ ಮತ್ತು ಚಲನಚಿತ್ರ ಸಂಸ್ಕೃತಿಯು ದೀರ್ಘಕಾಲೀನ ಸಾಮರ್ಥ್ಯಗಳನ್ನು ನಿರ್ಮಿಸಲು ಮತ್ತು ಜಾಗತಿಕ ದೃಶ್ಯ ಕಥೆ ಹೇಳುವಿಕೆಗೆ ಕೊಡುಗೆ ನೀಡಲು ಸೂಕ್ತ ಸ್ಥಳವಾಗಿದೆ ಎಂದು ಅವರು ತಿಳಿಸಿದರು.

ಹೈದರಾಬಾದ್, ಕಳೆದ ಎರಡು ದಶಕಗಳಲ್ಲಿ ಚಲನಚಿತ್ರ ಮತ್ತು ಸೃಜನಶೀಲ ಕೈಗಾರಿಕೆಗಳಲ್ಲಿ ಗಮನಾರ್ಹ ಬೆಳವಣಿಗೆಯನ್ನು ಕಂಡಿದೆ ಎಂದು ನಟ ಮತ್ತು ನಿರ್ಮಾಪಕ ಶ್ರೀ ರಾಣಾ ದಗ್ಗುಬಾಟಿ ಅವರು ಹೇಳಿದರು. ಐಲೈನ್ ಸ್ಟುಡಿಯೋಸ್ ನಂತಹ ಉಪಕ್ರಮಗಳು ನಗರದ ಸೃಜನಶೀಲ ಪರಿಸರ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸುತ್ತದೆ ಮತ್ತು ಕಲಾವಿದರು ಮತ್ತು ಕಥೆಗಾರರಿಗೆ ಹೊಸ ಅವಕಾಶಗಳನ್ನು ತೆರೆಯುತ್ತದೆ ಎಂದು ಅವರು ತಿಳಿಸಿದರು.

*****