شہری ہوابازی کی وزارت، مشرق وسطی کے کچھ حصوں میں فضائی حدود میں ابھرتی ہوئی صورتحال اور بین الاقوامی پروازوں کی کارروائیوں پر اس کے اثرات پر گہری نظر رکھے ہوئے ہے۔

ہندوستانی کیریئرز نے اپنے نظام الاوقات میں معمولی تبدیلیاں کی ہیں ، طویل فاصلے اور بہت طویل فاصلے کی کارروائیاں آہستہ آہستہ متبادل راستوں پر دوبارہ شروع کی جا رہی ہیں ، جس سے محدود فضائی حدود سے گریز کیا جا رہا ہے ۔ جلد از جلد آپریشنل استحکام کو بحال کرنے کے لیے طیاروں اور عملے کی تبدیلی کے اقدامات کیے جا رہے ہیں۔

پھنسے ہوئے مسافروں کی سہولت کے لیے خصوصی انتظامات کیے جا رہے ہیں ۔ ایئر لائنز ضرورت پڑنے پر اضافی خدمات کا انتظام کر رہی ہیں اور مسافروں کی محفوظ اور بلاروک ٹوک نقل و حرکت کو یقینی بنانے کے لیے غیر ملکی ہوا بازی کے حکام اور بیرون ملک ہندوستانی مشنوں کے ساتھ مل کر کام کر رہی ہیں۔

انڈیگو نے 3 مارچ 2026 کو جدہ سے ہندوستان کے لیے 10 خصوصی امدادی کارروائیوں کا منصوبہ بنایا ہے تاکہ پھنسے ہوئے مسافروں کو ضروری منظوری اور موجودہ فضائی حدود کے حالات کا خیال کرتے ہوئے واپس لایا جا سکے ۔ مسافروں کی سہولت کے لیے انڈیگو جدہ میں ہندوستان کے قونصلیٹ جنرل کے ساتھ تال میل کر رہا ہے ۔

ہندوستان اور خلیجی خطے کے درمیان کام کرنے والی غیر ملکی ایئر لائنز بھی آپریشنل اور فضائی حدود کے حالات کو مدنظر رکھتے ہوئے محدود آپریشن کر رہی ہیں ۔

مسافروں کی حفاظت سب سے اہم ہے ۔ تمام ایئر لائنز کو مشورہ دیا گیا ہے کہ وہ مسافروں کے ساتھ شفاف مواصلات برقرار رکھیں اور رقم کی واپسی ، ری شیڈولنگ اور مسافروں کی مدد سے متعلق انضباطی تقاضوں کی تعمیل کو یقینی بنائیں ۔

مسافروں کو مشورہ دیا جاتا ہے کہ وہ ہوائی اڈے پر جانے سے پہلے براہ راست اپنی متعلقہ ایئر لائن سے تازہ ترین فلائٹ کی صورتحال چیک کریں اور تازہ ترین معلومات کے لیے صرف سرکاری ذرائع پر انحصار کریں۔

شہری ہوابازی کے وزیر جناب رام موہن نائیڈو کی صدارت میں آج ایک اعلی سطحی میٹنگ میں صورتحال کا جائزہ لیا گیا جس میں شہری ہوابازی کے سکریٹری جناب سمیر کمار سنہا اور تمام سینئر حکام نے شرکت کی۔

وزارت محفوظ آپریشن ، خدمات کی مناسب بحالی اور متاثرہ مسافروں کی سہولت کو یقینی بنانے کے لیے ایئر لائن ، ہوائی اڈے کے آپریٹر ، انضباطی حکام اور وزارت خارجہ کے ساتھ مسلسل  رابطے میں ہے۔

ضرورت کے مطابق اضافی اپڈیٹس فراہم کی جائیں گی۔

**********

) ش ح – ع ح-  ش ہ ب )

U.No. 3315