তথ্য আৰু সম্প্ৰচাৰ মন্ত্ৰালয়
উপ-ৰাষ্ট্ৰপতিয়ে তামিল পণ্ডিত, ঐতিহ্য আৰু সংস্কৃতিক উদযাপন কৰি ১৬টা প্ৰকাশন উন্মোচন কৰে
“ভাৰত বহু ভাষাৰ দেশ, কিন্তু ইয়াৰ আত্মা এক”: উপ-ৰাষ্ট্ৰপতি
অশ্বিনী বৈষ্ণৱে তামিলৰ চহকী আৰু কালজয়ী সভ্যতাক আলোকপাত কৰে
পোষ্ট কৰা হৈছে:
02 MAR 2026 8:48PM by PIB Guwahati
ভাৰতৰ উপ-ৰাষ্ট্ৰপতি চিপি ৰাধাকৃষ্ণনে আজি উপ-ৰাষ্ট্ৰপতি ভৱনত তথ্য আৰু সম্প্ৰচাৰ মন্ত্ৰালয়ৰ প্ৰকাশন বিভাগে প্ৰকাশ কৰা ১৬খন উল্লেখযোগ্য গ্ৰন্থ আনুষ্ঠানিকভাৱে উন্মোচন কৰে। এই প্ৰকাশনসমূহে প্ৰখ্যাত তামিল পণ্ডিতসকলৰ অৱদানৰ লগতে তামিল ঐতিহ্য, স্থাপত্য, সাহিত্য আৰু সংস্কৃতিক উদযাপন কৰে। মুকলি কৰা মুঠ গ্ৰন্থৰ ভিতৰত ১৩খন তামিল ভাষাৰ ওপৰত আধাৰিত।
তামিল ভাষাভিত্তিক এই গ্ৰন্থসমূহৰ ভিতৰত ৰামেশ্বৰম, ৰামানুজাৰ, নাডুকাল, আৰিকাইমেডু, বকথি ইলাক্কিয়াম, ইয়াৰকাই ভেলানমাই, পঝান্তমিঝান ইছাই কাৰুবিগাল, তামিঝাগা নাত্তৰ দেয়ভাংগল, পুধিয়া অৰিভিয়াল থোজিলনুটপাংগল, বংকিম চন্দ্ৰ চেটাৰ্জী, মাদুৰাই মীনাক্ষী আম্মান মন্দিৰ, থাঞ্জাভুৰ পেৰুভুদয়াৰ কয়ল, মণিমেগলাই আৰু মহাবিদ্বান মীনাক্ষী সুন্দৰম পিল্লাই সম্পৰ্কীয় গ্ৰন্থসমূহ অন্তৰ্ভুক্ত।
উন্মোচনী অনুষ্ঠানত ভাষণ দি উপ-ৰাষ্ট্ৰপতি চিপি ৰাধাকৃষ্ণনে কয় যে এই গ্ৰন্থসমূহে মন্দিৰ পৰম্পৰা, দৰ্শন, সাহিত্য, সংগীত আৰু বিজ্ঞানক সামৰি তামিল ঐতিহ্যৰ গভীৰতা, বৈচিত্ৰ্য আৰু সভ্যতামূলক ধাৰাবাহিকতাক সুস্পষ্টভাৱে প্ৰতিফলিত কৰে। তামিল ভাষাক বিশ্বৰ অন্যতম প্ৰাচীন ধ্ৰুপদী ভাষা বুলি আখ্যা দি তেওঁ উল্লেখ কৰে যে ভাৰত বহু ভাষাৰে গঠিত হ’লেও ইয়াৰ আত্মা একেই। তেওঁ প্ৰধানমন্ত্ৰী নৰেন্দ্ৰ মোদীয়ে বিশ্বব্যাপী তামিল ভাষা আৰু সংস্কৃতিক নিৰন্তৰ সন্মান জনোৱাৰ বাবে প্ৰশংসা কৰে। লগতে অৰ্থনৈতিক প্ৰগতিৰ সমান্তৰালকৈ সাংস্কৃতিক শক্তিকো সমান গুৰুত্ব দিবলৈ আহ্বান জনাই যুৱক-যুৱতীসকলক দৈনিক কমেও এঘণ্টা সময় পঢ়াৰ বাবে উৎসাহিত কৰে।
গ্ৰন্থ উন্মোচনী অনুষ্ঠানত ৰে’লৱে, যোগাযোগ আৰু ইলেক্ট্ৰনিক্স আৰু তথ্য প্ৰযুক্তি মন্ত্ৰী অশ্বিনী বৈষ্ণৱে এই অনুষ্ঠানক ঐতিহাসিক আখ্যা দিয়ে আৰু তামিল ভাষাক বিশ্বজুৰি স্বীকৃতিপ্ৰাপ্ত চহকী তথা প্ৰাচীন সংস্কৃতিৰে সমৃদ্ধ এক ধ্ৰুপদী ভাষা হিচাপে প্ৰশংসা কৰে। তেওঁ কয় যে প্ৰকাশন বিভাগে প্ৰকাশ কৰা এই গ্ৰন্থসমূহে এই গৌৰৱময় ঐতিহ্যক সুচাৰুভাৱে উদযাপন কৰিছে।
এই অনুষ্ঠানত ড° এল মুৰুগানো উপস্থিত থাকি তামিল সংগম সাহিত্যৰ ঐতিহাসিক গুৰুত্বৰ বিষয়ে আলোকপাত কৰে আৰু “এক ভাৰত শ্ৰেষ্ঠ ভাৰত” মনোভাৱৰ প্ৰাসংগিকতা স্পষ্ট কৰে।
অনুষ্ঠানটোৰ এক বিশেষ আকৰ্ষণ আছিল এছকে বসুৱে ৰচনা কৰা বংকিম চন্দ্ৰ চেটাৰ্জীৰ ওপৰত আধাৰিত গ্ৰন্থখন ইংৰাজী, হিন্দী আৰু তামিল ভাষাত একেলগে উন্মোচন কৰা। “বন্দে মাতৰম”ৰ ১৫০ বছৰীয়া জয়ন্তী উপলক্ষে প্ৰকাশিত এই সমৃদ্ধ সংস্কৰণত বিশিষ্ট সাহিত্যিকগৰাকীৰ জীৱন, সময় আৰু ভাৰতীয় সাহিত্য আন্দোলনলৈ আগবঢ়োৱা তেওঁৰ গুৰুত্বপূৰ্ণ অৱদানসমূহৰ গভীৰ বিশ্লেষণ কৰা হৈছে। ইংৰাজী পুনৰ্মুদ্ৰণত অতিৰিক্ত আৰ্কাইভ ফটো আৰু চিত্ৰকল্প সংযোজিত নতুনকৈ পৰিকল্পিত কভাৰ সংযোজন কৰা হৈছে। আইআইটি দিল্লীৰ সমৰ্থিত এটা ষ্টাৰ্ট-আপে এই কভাৰটো বিশেষভাৱে ডিজাইন কৰিছে, য’ত সমসাময়িক নান্দনিকতা আৰু ধ্ৰুপদী মনোভাৱৰ সুনিপুণ সমন্বয় ঘটোৱা হৈছে। হিন্দী আৰু তামিল অনুবাদ একেলগে উন্মোচনৰ ফলত বন্দে মাতৰমৰ স্ৰষ্টাৰ সাহিত্যিক উত্তৰাধিকাৰ অধিক বিস্তৃত পাঠক সমাজৰ বাবে সুলভ হৈ পৰিছে।
ৰামেশ্বৰমৰ ওপৰত আধাৰিত গ্ৰন্থখনত পুৰাণ আৰু সাহিত্যিক উৎসসমূহৰ পৰা সংগৃহীত নথিভুক্ত উল্লেখ উপস্থাপন কৰা হৈছে, য’ত ৰামেশ্বৰম মন্দিৰ কমপ্লেক্সৰ পবিত্ৰ স্থানসমূহ, স্থাপত্যগত বৈশিষ্ট্য, ভাস্কৰ্য্য আৰু উপাস্য দেৱতাসমূহৰ বিশদ বিৱৰণ অন্তৰ্ভুক্ত কৰা হৈছে। এই গ্ৰন্থখনৰ উদ্দেশ্য হৈছে পাঠকসকলক মন্দিৰটোৰ ইতিহাস আৰু আধ্যাত্মিক তাৎপৰ্য্যৰ বিষয়ে এক সম্যক আৰু বিস্তৃত বুজাবুজি প্ৰদান কৰা।
গ্ৰন্থসমূহৰ বিষয়ে অধিক তথ্য লাভ কৰিবলৈ ইয়াত ক্লিক কৰিব পাৰে।
*****
Mahesh Kumar/ Aparajita Priyadarshini/AA
(ৰিলিজ আই ডি : 2234806)
অতিথি কক্ষ : 64