ইকাই খুম্নরবা প্রধান মন্ত্রী মার্ক কার্নি, লৈবাক অনিমক্কী ললোন-ইতিক্কী লুচিংবশিং, নুপীশিং অমসুং নুপাশিং, খুরুমজরি!

ইন্দিয়া-কেনাদা সি.ই.ও. ফোরমদা ময়াম পুম্নমক্না শরুক য়াবদা ঐহাক নুংঙাইবা ফাওই। মহাক্কী অফবা ৱাখল্লোনশিং শেয়র তৌবগীদমক ঐহাক্না প্রধান মন্ত্রী কার্নিদা অখন্ননা থাগৎপা ফোংদোকচরি।

মরুপশিং,

ঙসি ঐখোয়না ভারত-কেনাদাগী মরীদা অনৌবা পন্দুপ অমা ইনবা ঙাইরি। প্রধান মন্ত্রী কার্নি চহি অমা মপুং ফাদ্রি, অদুবু ঐখোয়গী মরীদি লাইৎ ইয়র অমা মাংলোমদা চংশিল্লে। হৌখিবা থা খরা অসিদা থাজবা হেনগৎলক্লি, ময়েক শেংলে, অমসুং অনৌবা থৌনা ফংলে। অমসুং মসি মালেম অসিনা শেন্মিৎলোনগী ওইবা তংদু লৈতাব লৈতবগা লোয়ননা মালেমগী শেন্মিৎলোনগী কাংলোন অসি অকনবা প্রেসরগী মখাদা লৈরিঙৈ মতম অসিদা থোক্লি। অসিগুম্বা মতম অসিদা, ভারত অমসুং কেনাদাগী বিজিনেস লুচিংবশিংগী ৱাখল্লোন খন্নবগী মীফম অসিনা ঐখোয়গী পার্তনরশিপকী অনৌবা ব্লুপ্রিন্ত অমা শেমগনি। ময়াম পুম্নমকপু অদোমগী মীৎয়েং অমসুং থৌনাগীদমক ঐনা থাগৎচরি।

মরুপশিং,

ভারত অমসুং কেনাদা অসি মপাঙ্গল কনবা দেমোক্রেসীশিংনি, মালেমগী খ্বাইদগী চাউবা ইকোনোমী অনীনি, অমসুং মান্নবা ভেল্যুশিংদা য়ুম্ফম ওইবা খুন্নাইশিংনি। দেমোক্রেসী, দাইভর্সিতী, অমসুং দিবেলপমেন্তনা ঐখোয়বু মহৌশাগী ওইবা পার্তনরশিং ওইনা পুক্নিং থৌগৎলি। ঙসি, প্রধান মন্ত্রী কার্নি অমসুং ঐহাক্না ঐখোয়গী অপুনবা মীৎয়েং অসি খুমাং চাউশিলহন্নবা মরু ওইবা ৱারেপ অমা লৌখি। ঐখোয়না নাকল অনিগী ওইবা ললোন-ইতিক অসি দোল্লর বিল্লিয়ন ৫০দা য়ৌহন্নবগী মায়কৈদা লেপ্তনা চংশিল্লি। ঐখোয়না কমপ্রিহেন্সিব ইকোনোমিক পার্তনরশিপ এগ্রীমেন্ত অসি অথুবা মতমদা লেপথোক্লগনি।

অদুবু মরুপশিং,

সরকারশিংনা ফ্রেমৱার্কশিং শেম্বা ঙম্মি অমসুং পোলিসী দিরেক্সনশিং পীবা ঙম্মি, অদুবু ৱাখল্লোন অসি তশেং তশেংনা ওন্থোক্নবা শক্তি অসি ময়াম পুম্নমক্কী মফমদা লৈ।

মরুপশিং,

ঙসিদি, ভারত অসি মালেমগী খ্বাইদগী য়াঙনা চাউখৎলক্লিবা মরুওইবা ইকোনোমীশিংগী মরক্তা অমা ওইরে। অহোংবা অসি মপাঙ্গল কনবা দোমেস্তিক দিমান্দ, নহা ওইরিবা মীশিং, অচৌবা ইনভেস্তমেন্ত অমসুং দিজিতেল তেক্নোলোজীগী পাঙ্গলনা পুরক্লি। মসি ঐখোয়গী লেপ্পা লৈতবা রিফোর্ম দ্রাইবকী মহৈনি। পোলিসী সিম্প্লিফিকেসনদগী হৌরগা পোত্থোক পুথোকপগা মরী লৈনবা ইন্সেন্তিবশিং ফাওবা, লোজিস্তিক্স মোদর্নাইজেসনদগী হৌরগা তেক্স অমসুং বেঙ্ক্রপসী রিফোর্ম ফাওবা, ঐখোয়না লম খুদিংমক্তা ইজ ওফ দুই বিজিনেস মপাঙ্গল কনখৎহল্লি।

মরুপশিং,

ভারত অমসুং কেনাদা পুন্না লেপমিন্নবা মতমদা, ঐখোয়না শেন্মিৎলোন অনি শম্নহনবতা নত্তনা ঐখোয়না কেপিতেল অমসুং কেপাসিতীগী শেন্মিৎলোনগী পাঙ্গল অমা শেমগৎলি। ঐখোয়গী অপুনবা জি.দি.পি.না দোল্লর ত্রিলিয়ন ৬ হেল্লি। অদুবু ঐখোয়গী অশেংবা শক্তি অসি ঐখোয়গী এম্বিসনশিংদা লৈ। ঐহাক্না ঐখোয়গী অপাম্বা অসিবু খুমাং চাউশিলহন্নবা সজেসন খরা পীবা পাম্মি। অহানবদা, লৈবাক অনিমক্তা ক্লিন ইনর্জী অসি মরুওইবা অমনি। ঙসি ঐখোয়না য়ুরানিয়মগী অশাংবা মতমগী সপ্লাই লৈহন্দুনা ন্যুক্লিয়রগী লমদা তেংবাং পীনবা হেনগৎহন্নবা কন্ত্রেক্ত অমা খুৎয়েক পীনখ্রে। মতম খরগী মমাংদা, ঐখোয়না কোমিকোগী সি.ই.ও.শিংদগী অফবা ৱাখল্লোনশিং ফংবগী খুদোংচাবা ফংখি। ঐখোয়না অপীকপা মোদ্যুলর রিএক্তরশিং, এদভান্স রিএক্তরশিং, অমসুং ন্যুক্লিয়র ভেল্যু চেনদা পুন্না মাংলোমদা চংশিনগদবনি। ঙসিদি, ঐখোয়না মরুওইবা মিনরেলশিংদা রেসিলিয়েন্ত সপ্লাই চেন অমা শেমগৎনবা খোংথাংশিং লৌখৎলে। ঐখোয়না কেনাদাগী ইন্নোভেসন অমসুং ভারতকী বেতরী অমসুং ইনর্জী স্তোরেজগী স্কেলিং কেপাসিতীশিং পুনশিন্নদুনা মাংলোমদা চংশিনবা য়াই। অনিশুবা লমদি ইনফ্রাস্ত্রকচর অমসুং কেপিতেল পার্তনরশিপশিংনি। চহি অসিগী বজেৎ অসিদা, ঐখোয়না ইনফ্রাস্ত্রকচরগীদমক রেকোর্দ ওইনা দোল্লর বিল্লিয়ন ১৩০ থাদোক্লে। নেস্নেল ইনফ্রাস্ত্রকচর পাইপলাইননা শেন থাদনবদা দোল্লর ত্রিল্লিয়ন ১.৩গী শেনফম পুরক্লি। কেনাদিয়ন পেন্সন ফন্দশিংনা ভারত্তা বিলিয়ন ১০০ ইনবেস্ত তৌখ্রে। মসিদা থাজবা য়াম্না লৈ হায়বা উৎলি। ভারতকী ইনফ্রাস্ত্রকচর গ্রোথকী ৱারী অসিগী শরুক অমা ওইনবা ঐনা অদোমবু কৌজরি। অহুমশুবদা, এ.আই. ঐখোয় পুন্না স্তার্ত-অপশিংগীদমক এ.আই. কম্প্যুতর কোরিদোরশিং অমসুং এ.আই. ইন্নোবেসন সেন্দবোক্সশিং শেম্বা ঙমগনি। মরিশুবদা, মেন্যুফেকচরিং অমসুং তেক্নোলোজী। কেনাদাগী তেক্নোলোজী অমসুং ইলেক্ত্রোনিক্স, এয়রোস্পেস অমসুং ইঞ্জিনীয়রিংদা ভারতকী স্কেল পুনশিন্নদুনা ঐখোয়না মালেমগী ভেল্যু চেনশিংদা শক্তি পীবা ঙমগনি। মঙাশুবদা, ফুদ প্রোসেসিং। ঙসি ভারত্তা মেগা ফুদ পার্কশিং, কোল্দ চেনশিং অমসুং ফুদ তেস্তিং লেবোরেতরীশিং য়াম্না থুনা শেমগৎলি। মসি ঐখোয়গী ৱিন-ৱিন কোওপরেসনগী অতোপ্পা শক্তি লৈরবা খুদম অমা ওইরকপা য়াই।

মরুপশিং,

ঐখোয়গী পার্তনরশিপশিং অসি নেস্নেল কেপিতেলশিং খক্তদা য়ুম্ফম ওইদুনা লৈরোইদবনি; ঐখোয়না মখোয়বু স্তেতশিং অমসুং প্রোভিন্সশিংদা শন্দোক্কদবনি। অলবর্তাগী মহৌশাগী ওইবা রিসোর্সশিং অসি গুজরাত অমসুং রাজস্থানগী রিনিউএবল এম্বিশনশিংগা শম্নহনগদবনি। ওন্তারিওগী মেন্যুফেকচরিংগী মপাঙ্গল অসি তামিল নাদু অমসুং মহারাস্ত্রাগী ইন্দস্ত্রীএল ক্লস্তরশিংগা পুনশিন্নবা তাই। মোন্ত্রিএলগী তেক ইকোসিস্তেম অসি বেঙ্গালুরু অমসুং হায়দ্রাবাদকী ইন্নোবেসন হবশিংগা পুনশিনবা তাই। মসি পাংথোক্লবা খক্তদা ঐখোয়না অসিগুম্বা পার্তনরশিপ অসি পোলিসীদগী চাউখৎপা ওইহন্নবা শেমদোকপা ঙমগনি।

মরুপশিং,

অদোমগী মরক্তগী খরদি ক্রিকেৎ য়েংবীরমগনি। ভারত্তা পাংথোক্লিবা তি-২০ ক্রিকেৎ ৱার্ল্দ কপতা কেনাদাদা শান্নবা উবদা ঐখোয় পুম্নমক নুংঙাইবা ফাওই। তি-২০ ক্রিকেৎতা তৌবগুম্না, খোঙজেল য়াংনা ৱারেপ লৌবা, শিংথানীংদবা স্ত্রোক অমসুং মেৎচ-ৱিনিং পার্তনরশিপকী খুত্থাংদা ভারত অমসুং কেনাদানা পুন্না তুংলমচৎ শেমগনি। ৱারেপ অসিগা লোয়ননা, ঐহাক্না ময়াম পুম্নমকপু ভারতকী চাউখৎ-থৌরাংগী খোঙচৎ অসিদা শরুক য়ানবা কৌজরি।

হন্না-হন্না থাগৎচরি!

***

(রিলিজ আই.দি.: 2234749) ভিজিতর কাউন্তর : 4