మహారాష్ట్రలో బుల్ధానాలోని షెగావ్‌లో ఇవాళ (25 ఫిబ్రవరి 2026) జాతీయ ఆరోగ్య ఉత్సవం-2026ను భారత రాష్ట్రపతి శ్రీమతి ద్రౌపది ముర్ము ప్రారంభించారు. ఆయుష్ ఆరోగ్య సంరక్షణ రంగంలో విశేష కృషి చేసిన ఆరుగురు సీనియర్ వైద్యులను ఆమె సన్మానించారు.

ఈ సందర్భంగా రాష్ట్రపతి మాట్లాడుతూ.. మన సంప్రదాయంలో ఆరోగ్యమే మహాభాగ్యమని అన్నారు. దేశాన్ని శక్తిమంతగా మార్చటంలో ఆరోగ్యవంతమైన పౌరులు కీలక పాత్ర పోషిస్తారని తెలిపారు. ప్రజల ఆరోగ్య పరిరక్షణలో ఆయుష్ వైద్య విధానాలు ఎన్నో సేవలందించాయని, ఆధునిక వైద్యం అందుబాటులో లేనప్పటి నుంచే యోగ, ఆయుర్వేదం, సిద్ధ వంటి పద్ధతులు ప్రజలకు సేవలందిస్తున్నాయని కొనియాడారు.

మన పొలాలు, వంటిళ్లు, అడవుల్లో ఔషధ మొక్కలు, ఆరోగ్యాన్ని కాపాడే వనమూలికల వంటి విలువైన నిధులున్నాయని రాష్ట్రపతి అన్నారు. ఔషధాల తయారీకి అవసరమైన ముడి పదార్థాలను అందించటానికి, పర్యావరణ సమతుల్యతను కాపాడటానికి ఈ విలువైన సంపదను పరిరక్షించటం, అభివృద్ధి చేయటం కీలకమన్నారు. ఔషధ మొక్కలను పెంచటం వల్ల రైతుల ఆర్థికస్థితి మెరుగుపడటమే కాక, నేల సారాన్ని, సంరక్షణను కూడా పెంపొందించవచ్చని తెలిపారు. ఆయుష్ విధానాలను ప్రోత్సహించటం వల్ల ప్రజలు శారీరకంగా, ఆర్థికంగా మెరుగుపడటంతో పాటు పర్యావరణ పరిరక్షణకు మేలు జరుగుతుందని వ్యాఖ్యానించారు.

ఆరోగ్యకరమైన, సమతుల్యమైన జీవనశైలికి ఆయుర్వేదం, యోగా, ఇతర ఆయుష్ విధానాలు మార్గనిర్దేశం చేస్తాయని రాష్ట్రపతి అన్నారు. వ్యాధి నివారణలో సమగ్ర వైద్యం ప్రాముఖ్యతను నేడు ప్రపంచం గుర్తిస్తోందన్నారు. ఒత్తిడిని దూరం చేసుకుని, ఆరోగ్యకరమైన జీవనశైలిని అలవరచుకునేందుకు ప్రపంచవ్యాప్తంగా ప్రజలు యోగా సాధన చేస్తున్నారని.. ఆయుర్వేద చికిత్సలు, ఔషధాలతో ప్రయోజనం పొందుతున్నట్లు వెల్లడించారు.

ఆధారాలతో కూడిన పరిశోధన, ఔషధాల ప్రామాణీకరణ, నాణ్యత నియంత్రణ వంటివి ఆయుష్ వ్యవస్థల గుర్తింపును, ఆచరణను ప్రోత్సహిస్తాయని రాష్ట్రపతి తెలిపారు. ఈ దిశగా ఆయుష్ మంత్రిత్వ శాఖ చేస్తున్న కృషి పట్ల ఆమె సంతోషం వ్యక్తం చేశారు. ప్రపంచస్థాయి ప్రమాణాలకు అనుగుణంగా.. పరిశోధన, ఔషధాల అభివృద్ధికి సంబంధించిన సాధారణ మార్గదర్శకాలను రూపొందించినట్లు చెప్పారు. ఆధునిక ఆరోగ్య సవాళ్ల పరిష్కారానికి ఆయుర్వేద, యోగా, ఆయుష్ వ్యవస్థలను నెలకొల్పేందుకు ఎన్నో శాస్త్రీయ ప్రయత్నాలు జరుగుతున్నాయన్నారు. ఆధునిక శాస్త్రీయ పరిష్కారాలు, ఆవిష్కరణలు, అంతర్జాతీయ సహకారం ద్వారా సంప్రదాయ వైద్య పద్ధతులకు మరింత ప్రాచుర్యం కల్పించటం ద్వారా వాటిని సమగ్ర ఆరోగ్య సంరక్షణ వ్యవస్థలో అంతర్భాగంగా చేసి, విజయం సాధించవచ్చని ఆమె విశ్వాసం వ్యక్తం చేశారు.

Please click here to see the President's Speech-

***