কেন্দ্ৰীয় গৃহ আৰু সমবায় মন্ত্ৰী শ্ৰী অমিত শ্বাহে আজি অসমৰ গুৱাহাটীত কেন্দ্ৰীয় সংৰক্ষিত আৰক্ষী বাহিনী (চিআৰপিএফ)ৰ ৮৭সংখ্যক প্ৰতিষ্ঠা দিৱস উদযাপন অনুষ্ঠানত অংশগ্ৰহণ কৰে। এই উপলক্ষে অসমৰ মুখ্যমন্ত্ৰী ড^০ হিমন্ত বিশ্ব শৰ্মা, চিআৰপিএফৰ সঞ্চালক প্ৰধানৰ লগতে বহুতো বিশিষ্ট ব্যক্তি উপস্থিত থাকে।

কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহে তেওঁৰ ভাষণত কয় যে ৮৬ বছৰ ধৰি চিআৰপিএফে দেশৰ আভ্যন্তৰীণ সুৰক্ষাৰ ক্ষেত্ৰত উৎকৃষ্ট প্ৰদৰ্শন, বীৰত্ব, ধৈৰ্য্য, সাহস আৰু আত্মবলিদানৰ জৰিয়তে দেশৰ আভ্যন্তৰীণ সুৰক্ষাক সুদৃঢ় কৰি আহিছে। তেওঁ কয় যে চিআৰপিএফ অবিহনে দেশৰ আভ্যন্তৰীণ নিৰাপত্তাৰ কথা কল্পনাই কৰিব নোৱাৰি। তেওঁ কয় যে প্ৰতিষ্ঠাৰ পৰা বৰ্তমানলৈকে অৰ্থাৎ ৮৬ বছৰত চিআৰপিএফে কৰ্তব্যৰ প্ৰতি থকা নিষ্ঠাৰ বাবে দেশৰ আভ্যন্তৰীণ সুৰক্ষাৰ এক শক্তিশালী স্তম্ভ হিচাপে পৰিগণিত হৈছে আৰু ইয়াৰ ফলাফলো লাভ কৰি আহিছে। শ্ৰী শ্বাহে কয় যে দেশখনক সুৰক্ষিত কৰি ৰখাৰ বাবে চিআৰপিএফৰ ২,২৭০ জোৱানে সৰ্বোচ্চ ত্যাগ স্বীকাৰ কৰিছে আৰু সমগ্ৰ দেশবাসীয়ে তেওঁলোকক ধন্যবাদ আৰু শ্ৰদ্ধাঞ্জলি জ্ঞাপন কৰিছে। তেওঁ দৃঢ়তাৰে কয় যে কৰ্তব্যৰ প্ৰতি এই নিষ্ঠা আৰু ত্যাগৰ বাবেই চিআৰপিএফৰ জোৱানসকলে বহুবাৰ দেশক ৰক্ষা কৰিছে।

শ্ৰী অমিত শ্বাহে কয় যে ১১-১২ বছৰ পূৰ্বে দেশত জম্মু আৰু কাশ্মীৰ, মাওবাদ প্ৰভাৱিত অঞ্চল আৰু উত্তৰ-পূৰ্বাঞ্চলৰ দৰে তিনিটা প্ৰধান হটস্পট আছিল, যি দেশৰ আভ্যন্তৰীণ সুৰক্ষাৰ বাবে চিন্তাৰ বিষয় হৈ পৰিছিল। তেওঁ কয় যে আজি তিনিওটা স্থানত শান্তি প্ৰতিষ্ঠাৰ ক্ষেত্ৰত সফলতা লাভ কৰা হৈছে। শ্ৰী শ্বাহে কয় যে এই তিনিওটা হটস্পটত বোমা বিস্ফোৰণ, গুলীবৰ্ষণ, বন্ধ, অৱৰোধ আৰু ধ্বংসাত্মক কাৰ্যকলাপ এটা সময়ত প্ৰধান ঘটনা আছিল, কিন্তু এতিয়া এই তিনিওটা ক্ষেত্ৰ বিকাশৰ ইঞ্জিন হৈ পৰিছে, যি সমগ্ৰ দেশৰ বিকাশক আগুৱাই লৈ গৈছে। তেওঁ কয় যে চিআৰপিএফৰ এই শ্বহীদসকলৰ ত্যাগ অবিহনে এই তিনিওটা হটস্পটক বিকাশৰ পথত আগুৱাই নিয়াটো অসম্ভৱ হ'লহেঁতেন।

কেন্দ্ৰীয় গৃহমন্ত্ৰীয়ে কয় যে আজিৰ চিআৰপিএফ দিৱসৰ পেৰেড অন্য এক দিশৰ পৰাও গুৰুত্বপূৰ্ণ। তেওঁ কয় যে চিআৰপিএফৰ ৮৬ বছৰীয়া ইতিহাসত প্ৰথমবাৰৰ বাবে অসমৰ উত্তৰ-পূৰ্বাঞ্চলত বাহিনীটোৰ প্ৰতিষ্ঠা দিৱস উদযাপন কৰা হৈছে, যিটো আমাৰ সকলোৰে বাবে আৰু সমগ্ৰ উত্তৰ পূৰ্বাঞ্চলৰ বাবে গৌৰৱৰ বিষয়। তেওঁ কয় যে ২০১৯ চনত কেন্দ্ৰীয় সশস্ত্ৰ আৰক্ষী বাহিনীৰ (চিএপিএফ) বাৰ্ষিক পেৰেড দেশৰ বিভিন্ন প্ৰান্তত অনুষ্ঠিত কৰাৰ সিদ্ধান্ত গ্ৰহণ কৰা হৈছিল আৰু আজি চিআৰপিএফৰ পেৰেড দেশৰ অন্যতম গুৰুত্বপূৰ্ণ প্ৰান্ত উত্তৰ-পূৰ্বাঞ্চলত অনুষ্ঠিত হৈছে। শ্ৰী শ্বাহে কয় যে আজি ১৪ গৰাকী চিআৰপিএফ জোৱানক সাহসিকতাৰ বাবে আৰক্ষী পদক, ৫গৰাকী জোৱানক বিশিষ্ট সেৱাৰ বাবে ৰাষ্ট্ৰপতিৰ আৰক্ষী পদক আৰু ৫গৰাকী চিআৰপিএফ বেটেলিয়ানৰ জোৱানক উৎকৃষ্ট প্ৰদৰ্শনৰ বাবে পদক প্ৰদান কৰা হৈছে। তেওঁ কয় যে ১৯৩৯ চনত চিআৰপিএফৰ যাত্ৰা মাত্ৰ ২টা বেটেলিয়নেৰে আৰম্ভ হৈছিল আৰু আজি ২৪৮টা বেটেলিয়নেৰে আৰু ৩.২৫লাখ কৰ্মীৰে চিআৰপিএফ বিশ্বৰ সৰ্ববৃহৎ চিএপিএফ হিচাপে পৰিগণিত হৈছে। সমগ্ৰ দেশৰ আভ্যন্তৰীণ সুৰক্ষা আৰু সাৰ্বভৌমত্ব ৰক্ষাৰ ক্ষেত্ৰত চিআৰপিএফৰ গুৰুত্বপূৰ্ণ ভূমিকা আছে বুলি তেওঁ উল্লেখ কৰে। শ্ৰী শ্বাহে কয় যে ১৯৬৫ চনৰ ৯ এপ্ৰিলত কচ্ছৰ ৰণত চিআৰপিএফৰ জোৱানসকলে পাকিস্তানী সৈন্যৰ বিৰুদ্ধে ছর্দাৰ পোষ্টত অপৰিসীম বীৰত্ব প্রদর্শন কৰিছিল আৰু সেয়েহে ৯ এপ্ৰিলৰ দিনটো প্রতি বছৰে 'শৌৰ্য দিৱস' হিচাপে পালন কৰা হয়।

কেন্দ্ৰীয় গৃহ মন্ত্ৰীগৰাকীয়ে কয় যে কলকাতাত মাওবাদীৰ আক্ৰমণত ৭৮জন আৰক্ষী জোৱানৰ মৃত্যু হৈছিল, তেতিয়াও চিআৰপিএফৰ জোৱানসকলে সাহসেৰে এই সংগ্ৰাম অব্যাহত ৰাখিছিল। তেওঁ কয় যে  সংসদ ভৱন আৰু ২০০৫ চনত শ্ৰীৰাম জন্মভূমিত সন্ত্ৰাসবাদীৰ আক্ৰমণ চিআৰপিএফে প্ৰতিহত কৰিছিল। তেওঁ কয় যে চিআৰপিএফৰ জোৱানসকলে তেওঁলোকৰ কৰ্তব্য পালন কৰাত কেতিয়াও গাফিলতি কৰা নাই। শ্ৰী শ্বাহে লগতে কয় যে ৩৭০নং অনুচ্ছেদ প্ৰত্যাহাৰৰ পিছত জম্মু-কাশ্মীৰত এটাও গুলী চালনা কৰা হোৱা নাছিল আৰু এই কথা নিশ্চিত কৰাত চিআৰপিএফৰ গুৰুত্বপূৰ্ণ ভূমিকা আছিল। তেওঁ কয় যে জম্মু-কাশ্মীৰত শিলাবৰ্ষণৰ ঘটনা শূন্যলৈ হ্ৰাস পাইছে, ৰাজ্যখনলৈ উদ্যোগসমূহ আহি আছে আৰু চিআৰপিএফ, বিএছএফ আৰু বিশেষকৈ জম্মু-কাশ্মীৰ আৰক্ষীৰ বৃহৎ অৱদানৰ বাবে এতিয়া উন্নয়ন সম্ভৱ হৈ পৰিছে। তেওঁ লগতে কয় যে উত্তৰ-পূৰ্বাঞ্চলত শান্তি স্থাপনত চিআৰপিএফৰ  ভূমিকা গুৰুত্বপূৰ্ণ।

শ্ৰী অমিত শ্বাহে কয় যে দেশৰ ১২খন ৰাজ্য আৰু অগণন জিলাত মাওবাদীয়ে বিস্তাৰ লাভ কৰিছিল আৰু যেতিয়া ভাৰত চৰকাৰে এই ভাবুকি উৎখাত কৰাৰ সংকল্প লয় তেতিয়া চিআৰপিএফ আৰু কোব্ৰা বাহিনীৰ জোৱানসকলে এই প্ৰচেষ্টাত গুৰুত্বপূৰ্ণ ভূমিকা পালন কৰে। তেওঁ কয় যে ইমান বৃহৎ, জটিল আৰু কঠিন কাম মাত্ৰ তিনিটা বছৰত সম্পূৰ্ণ কৰা হৈছে আৰু চিআৰপিএফৰ জোৱানসকলৰ বাবে আমি আত্মবিশ্বাসৰ সৈতে ক'ব পাৰো যে ২০২৬ চনৰ ৩১ মাৰ্চৰ ভিতৰত দেশখন সম্পূৰ্ণৰূপে মাওবাদমুক্ত হ'ব। শ্ৰী শ্বাহে কয় যে অপাৰেশ্যন ব্লেক ফৰেষ্টৰ অধীনত চিআৰপিএফৰ জোৱানসকলে অতিশয় প্ৰত্যাহ্বানমূলক ভৌগোলিক পৰিস্থিতিত, ৪৫ ডিগ্ৰী চেলছিয়াছ তাপমাত্ৰা সহ্য কৰি ২১ দিন ধৰি অভিযান চলাইছিল আৰু মাওবাদীৰ ঘাটি ধ্বংস কৰিছিল। তেওঁ কয় যে চিআৰপিএফৰ জোৱানসকলে অসাধাৰণ সাহস প্ৰদৰ্শন কৰি ৪৫ ডিগ্ৰী চেলছিয়াছৰ তাপমাত্ৰাত উত্তপ্ত শিলৰ পাহাৰত ২১ দিন ধৰি অভিযান চলাই এক ইঞ্চিও পিছ হুঁহকি অহা নাছিল আৰু শেষত মাওবাদীৰ কৌশলগত ঘাটি ধ্বংস কৰিবলৈ সক্ষম হৈছিল। তেওঁ কয় যে চিআৰপিএফ আৰু কোব্ৰা ফ'ৰ্চে মাওবাদীৰ সন্ত্ৰাসবাদ(red terror)ৰ পৰা দেশক মুক্ত কৰাত গুৰুত্বপূৰ্ণ ভূমিকা পালন কৰিছে।

কেন্দ্ৰীয় গৃহ তথা সমবায় মন্ত্ৰীগৰাকীয়ে কয় যে চিআৰপিএফ জোৱানসকলে বিভিন্ন ধৰ্মীয় উৎসৱ, মহাকুম্ভ আৰু অমৰনাথ যাত্ৰাৰ সফল আয়োজনত গুৰুত্বপূৰ্ণ অৱদান আগবঢ়াইছে। তেওঁ কয় যে চিআৰপিএফ-এ দেশৰ আভ্যন্তৰীণ সুৰক্ষা ধাৰাবাহিভাৱে শক্তিশালী আৰু সুৰক্ষিত কৰি আহিছে।

****

RK/RR/PR/PS/DB