ಇಂಡಿಯಾ ಎಐ ಇಂಪ್ಯಾಕ್ಟ್ ಶೃಂಗಸಭೆ 2026 ರ ಐದನೇ ದಿನದಂದು, ಭಾರತವು ಅಧಿಕೃತವಾಗಿ 'ಪ್ಯಾಕ್ಸ್ ಸಿಲಿಕಾ' (Pax Silica) ಒಕ್ಕೂಟವನ್ನು ಸೇರಿಕೊಂಡಿತು. ಇದು ಭಾರತ ಮತ್ತು ಅಮೆರಿಕಾ ನಡುವಿನ ಕಾರ್ಯತಂತ್ರದ ತಂತ್ರಜ್ಞಾನ ಮತ್ತು ಪೂರೈಕೆ ಸರಪಳಿ ಸಹಕಾರವನ್ನು ಬಲಪಡಿಸುವಲ್ಲಿ ಒಂದು ಮಹತ್ವದ ಮೈಲಿಗಲ್ಲಾಗಿದೆ. ಈ ಸಹಿ ಹಾಕುವ ಸಮಾರಂಭವು ಉಭಯ ರಾಷ್ಟ್ರಗಳ ಹಿರಿಯ ಸರ್ಕಾರಿ ನಾಯಕರನ್ನು ಒಟ್ಟುಗೂಡಿಸಿತು, ಇದು ಎಐ-ಚಾಲಿತ ಜಾಗತಿಕ ಆರ್ಥಿಕತೆಗೆ ಶಕ್ತಿ ನೀಡುವ ಸಂಪೂರ್ಣ ತಂತ್ರಜ್ಞಾನದ ಸ್ಟ್ಯಾಕ್‌ ಅನ್ನು ಸುರಕ್ಷಿತಗೊಳಿಸುವ ಹಂಚಿಕೆಯ ಬದ್ಧತೆಯನ್ನು ಒತ್ತಿಹೇಳಿತು.

ಪ್ಯಾಕ್ಸ್ ಸಿಲಿಕಾವನ್ನು ನಿರ್ಣಾಯಕ ಖನಿಜಗಳು ಮತ್ತು ಸೆಮಿಕಂಡಕ್ಟರ್ ಫ್ಯಾಬ್ರಿಕೇಶನ್‌ನಿಂದ ಹಿಡಿದು ಸುಧಾರಿತ ಎಐ ವ್ಯವಸ್ಥೆಗಳು ಮತ್ತು ನಿಯೋಜನಾ ಮೂಲಸೌಕರ್ಯಗಳವರೆಗೆ "ಸಿಲಿಕಾನ್ ಸ್ಟ್ಯಾಕ್" ಅನ್ನು ಸುರಕ್ಷಿತಗೊಳಿಸಲು ಬದ್ಧವಾಗಿರುವ ವಿಶ್ವಾಸಾರ್ಹ ರಾಷ್ಟ್ರಗಳ ಕಾರ್ಯತಂತ್ರದ ಒಕ್ಕೂಟವಾಗಿ ರೂಪಿಸಲಾಗಿದೆ. ಈ ಉಪಕ್ರಮವು ಜಾಗತಿಕ ಪೂರೈಕೆ ಸರಪಳಿಗಳಲ್ಲಿನ ಅತಿಯಾದ ಕೇಂದ್ರೀಕರಣವನ್ನು ಕಡಿಮೆ ಮಾಡಲು, ಆರ್ಥಿಕ ಒತ್ತಡವನ್ನು ತಡೆಯಲು ಮತ್ತು ಉದಯೋನ್ಮುಖ ತಂತ್ರಜ್ಞಾನಗಳನ್ನು ಮುಕ್ತ, ಪ್ರಜಾಸತ್ತಾತ್ಮಕ ಸಮಾಜಗಳು ಅಭಿವೃದ್ಧಿಪಡಿಸುವುದನ್ನು ಮತ್ತು ನಿರ್ವಹಿಸುವುದನ್ನು ಖಚಿತಪಡಿಸಿಕೊಳುತ್ತದೆ.

ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ಕೇಂದ್ರ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವ ಅಶ್ವಿನಿ ವೈಷ್ಣವ್ ಅವರು, ಈ ಕ್ಷಣವನ್ನು ಕೇವಲ ಔಪಚಾರಿಕ ಸಹಿ ಹಾಕುವಿಕೆಗಿಂತ ಮೀರಿದ ಸಂದರ್ಭ ಎಂದು ಬಣ್ಣಿಸಿದರು. "ನಾವು ಕೇವಲ ಒಂದು ಶೃಂಗಸಭೆಯನ್ನು ನಡೆಸುತ್ತಿಲ್ಲ; ನಾವು ಭವಿಷ್ಯವನ್ನು ನಿರ್ಮಿಸುತ್ತಿದ್ದೇವೆ" ಎಂದು ಅವರು ಹೇಳಿದರು, ಯುವ ಪೀಳಿಗೆಗೆ ಹೊಸ ಅಡಿಪಾಯಗಳು ಮತ್ತು ಹೊಸ ಅವಕಾಶಗಳನ್ನು ಸೃಷ್ಟಿಸಲಾಗುತ್ತಿದೆ ಎಂದು ಅವರು ಒತ್ತಿಹೇಳಿದರು.

ಸ್ವಾತಂತ್ರ್ಯದ ನಂತರದ ಸಂಯೋಜಿತ ಬೆಳವಣಿಗೆಯ ಶಕ್ತಿಯ ಕಡೆಗೆ ಗಮನ ಸೆಳೆದ ಅವರು, "1947 ರಿಂದ ಭಾರತದ ಬೆಳವಣಿಗೆಯನ್ನು ನಾವು ನೋಡಿದರೆ, ಸಂಯೋಜಿತ ಬೆಳವಣಿಗೆಯ ಪ್ರಭಾವವನ್ನು ನಾವೆಲ್ಲರೂ ಊಹಿಸಬಹುದು" ಎಂದರು. ದೇಶದ ಬೆಳೆಯುತ್ತಿರುವ ಸೆಮಿಕಂಡಕ್ಟರ್ ಸಾಮರ್ಥ್ಯಗಳನ್ನು ಒತ್ತಿಹೇಳುತ್ತಾ, "ಇಂದು, ಭಾರತದ ಪ್ರತಿಭಾವಂತ ಎಂಜಿನಿಯರ್‌ ಗಳು ವಿಶ್ವದ ಅತ್ಯಂತ ಸುಧಾರಿತ ಎರಡು-ನ್ಯಾನೋಮೀಟರ್ ಚಿಪ್‌ ಗಳನ್ನು ವಿನ್ಯಾಸಗೊಳಿಸುತ್ತಿದ್ದಾರೆ. ಸೆಮಿಕಂಡಕ್ಟರ್ ಉದ್ಯಮಕ್ಕೆ ಸುಮಾರು ಹತ್ತು ಲಕ್ಷ ಹೊಸ ನುರಿತ ವೃತ್ತಿಪರರ ಅಗತ್ಯವಿರುತ್ತದೆ ಮತ್ತು ಇದು ಭಾರತಕ್ಕೆ ಬಹಳ ದೊಡ್ಡ ಅವಕಾಶವಾಗಿದೆ" ಎಂದರು.

ಸಮಾರಂಭದಲ್ಲಿ ಮಾತನಾಡಿದ ಅಮೆರಿಕಾದ ಆರ್ಥಿಕ ಬೆಳವಣಿಗೆ, ಇಂಧನ ಮತ್ತು ಪರಿಸರ ಇಲಾಖೆಯ ಅಧೀನ ಕಾರ್ಯದರ್ಶಿ ಶ್ರೀ ಜೇಕಬ್ ಹೆಲ್ಬರ್ಗ್ ಅವರು, ಈ ಘೋಷಣೆಯು ಕೇವಲ ಕಾಗದದ ಮೇಲಿನ ಒಪ್ಪಂದವಲ್ಲ, ಬದಲಿಗೆ ಹಂಚಿಕೆಯ ಭವಿಷ್ಯಕ್ಕಾಗಿ ಒಂದು ಮಾರ್ಗಸೂಚಿ ಎಂದು ಬಣ್ಣಿಸಿದರು.

ಉಭಯ ರಾಷ್ಟ್ರಗಳ ಹಂಚಿಕೆಯ ಪ್ರಜಾಸತ್ತಾತ್ಮಕ ಇತಿಹಾಸವನ್ನು ಸ್ಮರಿಸಿದ ಅವರು, "ಇಂದು, ನಾವು ಪ್ಯಾಕ್ಸ್ ಸಿಲಿಕಾ ಘೋಷಣೆಗೆ ಸಹಿ ಹಾಕುವಾಗ, ನಾವು ಶಸ್ತ್ರಸಜ್ಜಿತ ಅವಲಂಬನೆಗೆ 'ಬೇಡ' ಎಂದು ಹೇಳುತ್ತೇವೆ ಮತ್ತು ಬೆದರಿಕೆಗೆ 'ಬೇಡ' ಎಂದು ಹೇಳುತ್ತೇವೆ. ಒಟ್ಟಾಗಿ, ನಾವು ಆರ್ಥಿಕ ಭದ್ರತೆಯೇ ರಾಷ್ಟ್ರೀಯ ಭದ್ರತೆ ಎಂದು ದೃಢೀಕರಿಸುತ್ತೇವೆ" ಎಂದರು.

ಈ ಉಪಕ್ರಮದ ಹಿಂದಿನ ವಿಶಾಲವಾದ ಮಹತ್ವಾಕಾಂಕ್ಷೆಯನ್ನು ಎತ್ತಿ ತೋರಿಸಿದ ಅವರು, "ನಾವು ಭವಿಷ್ಯದ ಸಂಪೂರ್ಣ ಸ್ಟ್ಯಾಕ್‌ ಅನ್ನು (Full Stack) ಸುರಕ್ಷಿತಗೊಳಿಸುತ್ತಿದ್ದೇವೆ — ಭೂಮಿಯ ಆಳದಲ್ಲಿರುವ ಖನಿಜಗಳು, ನಮ್ಮ ಪ್ರಯೋಗಾಲಯಗಳು ಮತ್ತು ಫ್ಯಾಬ್‌ ಗಳಲ್ಲಿರುವ ಸಿಲಿಕಾನ್ ವೇಫರ್‌ ಗಳು ಮತ್ತು ಮಾನವ ಸಾಮರ್ಥ್ಯವನ್ನು ಅನಾವರಣಗೊಳಿಸುವ ಬುದ್ಧಿವಂತಿಕೆಯವರೆಗೆ. ಭವಿಷ್ಯವು ಅದನ್ನು ನಿರ್ಮಿಸುವವರಿಗೆ ಸೇರಿದ್ದು ಎಂಬುದೇ ಪ್ಯಾಕ್ಸ್ ಸಿಲಿಕಾ ಘೋಷಣೆಯಾಗಿದೆ" ಎಂದು ಹೇಳಿದರು.

ಈ ಭಾವನೆಗೆ ಸಹಮತ ವ್ಯಕ್ತಪಡಿಸಿದ ಭಾರತದ ಅಮೆರಿಕ ರಾಯಭಾರಿ ಶ್ರೀ ಸೆರ್ಗಿಯೋ ಗೋರ್ ಅವರು, ಪ್ಯಾಕ್ಸ್ ಸಿಲಿಕಾಕ್ಕೆ ಭಾರತದ ಪ್ರವೇಶವು "ಕಾರ್ಯತಂತ್ರ ಮತ್ತು ಅತ್ಯಗತ್ಯ" ಎಂದು ವಿವರಿಸಿದರು.

"ಪ್ಯಾಕ್ಸ್ ಸಿಲಿಕಾವು 21 ನೇ ಶತಮಾನದ ಆರ್ಥಿಕ ಮತ್ತು ತಾಂತ್ರಿಕ ಕ್ರಮವನ್ನು ವ್ಯಾಖ್ಯಾನಿಸುವ ಒಕ್ಕೂಟವಾಗಿದೆ" ಎಂದು ಅವರು ಹೇಳಿದರು. "ನಾವು ನಿರ್ಣಾಯಕ ಖನಿಜಗಳನ್ನು ಹೊರತೆಗೆಯುವ ಗಣಿಗಳಿಂದ ಹಿಡಿದು, ಚಿಪ್‌ ಗಳನ್ನು ತಯಾರಿಸುವ ಫ್ಯಾಬ್‌ ಗಳವರೆಗೆ, ಫ್ರಾಂಟಿಯರ್ ಎಐ ಅನ್ನು ನಿಯೋಜಿಸುವ ಡೇಟಾ ಸೆಂಟರ್‌ ಗಳವರೆಗೆ ಇಡೀ ಸಿಲಿಕಾನ್ ಸ್ಟ್ಯಾಕ್ ಅನ್ನು ಸುರಕ್ಷಿತಗೊಳಿಸಲು ಇದನ್ನು ವಿನ್ಯಾಸಗೊಳಿಸಲಾಗಿದೆ" ಎಂದು ಅವರು ಹೇಳಿದರು.

ಪಾಲುದಾರಿಕೆಯ ಪ್ರಜಾಸತ್ತಾತ್ಮಕ ಅಡಿಪಾಯದ ಬಗ್ಗೆ ಮಾತನಾಡಿದ ರಾಯಭಾರಿ ಗೋರ್ ಅವರು, "ಪ್ಯಾಕ್ಸ್ ಸಿಲಿಕಾವು ಮುಕ್ತ ಸಮಾಜಗಳು ಜಾಗತಿಕ ಆರ್ಥಿಕತೆಯ ಉನ್ನತ ಸ್ಥಾನಗಳನ್ನು ನಿಯಂತ್ರಿಸುತ್ತವೆಯೇ ಎಂಬ ಬಗ್ಗೆ ಆಗಿದೆ. ನಾವು ಸ್ವಾತಂತ್ರ್ಯವನ್ನು ಆರಿಸಿಕೊಳ್ಳುತ್ತೇವೆ. ನಾವು ಪಾಲುದಾರಿಕೆಯನ್ನು ಆರಿಸಿಕೊಳ್ಳುತ್ತೇವೆ. ನಾವು ಬಲವನ್ನು ಆರಿಸಿಕೊಳ್ಳುತ್ತೇವೆ" ಎಂದು ಅವರು ಅಭಿಪ್ರಾಯಪಟ್ಟರು.

ಇಂಡಿಯಾ ಎಐ ಇಂಪ್ಯಾಕ್ಟ್ ಶೃಂಗಸಭೆಯಲ್ಲಿ ನಡೆದ ಈ ಸಹಿ ಹಾಕುವಿಕೆಯು ಸ್ಪಷ್ಟ  ಸಂದೇಶವನ್ನು ನೀಡಿದೆ: ಕೃತಕ ಬುದ್ಧಿಮತ್ತೆ ಮತ್ತು ಸುಧಾರಿತ ತಂತ್ರಜ್ಞಾನಗಳ ಭವಿಷ್ಯವನ್ನು ಕೇವಲ ಕಾಕತಾಳೀಯಕ್ಕೆ ಬಿಡಲಾಗುವುದಿಲ್ಲ. ಸ್ವಾತಂತ್ರ್ಯ, ಪಾಲುದಾರಿಕೆ ಮತ್ತು ದೀರ್ಘಕಾಲೀನ ಸ್ಥಿತಿಸ್ಥಾಪಕತ್ವಕ್ಕೆ ಬದ್ಧವಾಗಿರುವ ರಾಷ್ಟ್ರಗಳು ಇದನ್ನು ಉದ್ದೇಶಪೂರ್ವಕವಾಗಿ ನಿರ್ಮಿಸುತ್ತವೆ.

ಪ್ಯಾಕ್ಸ್ ಸಿಲಿಕಾ ಸಹಿ ಹಾಕುವಿಕೆಯ ನಂತರ, ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಕಾರ್ಯದರ್ಶಿ ಶ್ರೀ ಎಸ್. ಕೃಷ್ಣನ್, ಭಾರತದ ಅಮೆರಿಕ ರಾಯಭಾರಿ ಶ್ರೀ ಸೆರ್ಗಿಯೋ ಗೋರ್, ಮೈಕ್ರಾನ್ ಟೆಕ್ನಾಲಜಿಯ ಸಿಇಒ ಶ್ರೀ ಸಂಜಯ್ ಮೆಹ್ರೋತ್ರಾ ಮತ್ತು ಟಾಟಾ ಎಲೆಕ್ಟ್ರಾನಿಕ್ಸ್‌ ನ ಸಿಇಒ ಮತ್ತು ಎಂಡಿ ಶ್ರೀ ರಣಧೀರ್ ಠಾಕೂರ್ ಅವರನ್ನೊಳಗೊಂಡ ಉನ್ನತ ಮಟ್ಟದ ಸಂವಾದವು ಎಐ ಮಹತ್ವಾಕಾಂಕ್ಷೆ ಮತ್ತು ಸೆಮಿಕಂಡಕ್ಟರ್ ಸ್ಥಿತಿಸ್ಥಾಪಕತ್ವದ ಕಾರ್ಯತಂತ್ರದ ಸಂಯೋಜನೆಯನ್ನು ಒತ್ತಿಹೇಳಿತು.

ಎಐ, ಸೆಮಿಕಂಡಕ್ಟರ್‌ ಗಳು ಮತ್ತು ನಿರ್ಣಾಯಕ ಖನಿಜಗಳಾದ್ಯಂತ ಭಾರತದ ಸಂಘಟಿತ ಪ್ರಯತ್ನವನ್ನು ಒತ್ತಿಹೇಳಿದ ಶ್ರೀ ಎಸ್. ಕೃಷ್ಣನ್ ಅವರು, ಇದರ ಗುರಿಯು ನಮ್ಮ ಮೌಲ್ಯಗಳನ್ನು ಹಂಚಿಕೊಳ್ಳುವ ವಿಶ್ವಾಸಾರ್ಹ ಪಾಲುದಾರರೊಂದಿಗೆ ಸ್ಥಿತಿಸ್ಥಾಪಕ ಸಹಯೋಗವಾಗಿದೆ ಮತ್ತು ಇದು ಭವಿಷ್ಯದ ಜಾಗತಿಕ ತಂತ್ರಜ್ಞಾನ ಪರಿಸರ ವ್ಯವಸ್ಥೆಯೊಳಗೆ ಭಾರತವನ್ನು ಪ್ರತಿಷ್ಠಾಪಿಸುತ್ತದೆ ಎಂದರು.

ಬದಲಾವಣೆಯ ತಕ್ಷಣದ ಅಗತ್ಯವನ್ನು ಎತ್ತಿ ತೋರಿಸಿದ ಶ್ರೀ ಸೆರ್ಗಿಯೋ ಗೋರ್ ಅವರು, "ಎಐ ಕ್ರಾಂತಿಯು ಕೇವಲ ದೂರದಲ್ಲಿಲ್ಲ — ಅದು ಈಗಾಗಲೇ ಇಲ್ಲಿದೆ" ಎಂದು ಹೇಳಿದರು. ಪೂರೈಕೆ ಸರಪಳಿಯ ಆಯಾಮವನ್ನು ಪುನರುಚ್ಚರಿಸಿದ ಶ್ರೀ ಮೆಹ್ರೋತ್ರಾ ಅವರು, ಇದನ್ನು ಸ್ಥಿತಿಸ್ಥಾಪಕ, ಸುರಕ್ಷಿತ ಪೂರೈಕೆ ಸರಪಳಿಗಳನ್ನು ನಿರ್ಮಿಸುವ ಹಂಚಿಕೆಯ ಬದ್ಧತೆ ಮತ್ತು ಎಐ ಅನ್ನು ಒಳಿತಿಗಾಗಿ ಮುನ್ನಡೆಸಲು ಪರಸ್ಪರ ಗೆಲುವಿನ ಪರಿಸರ ವ್ಯವಸ್ಥೆ ಎಂದು ಕರೆದರು. ಶ್ರೀ ಠಾಕೂರ್ ಅವರು ಪ್ಯಾಕ್ಸ್ ಸಿಲಿಕಾವನ್ನು "ಸಕಾಲಿಕ ಮತ್ತು ವ್ಯೂಹಾತ್ಮಕ ಹೆಜ್ಜೆ" ಎಂದು ಬಣ್ಣಿಸಿದರು, ಸೆಮಿಕಂಡಕ್ಟರ್ ಪ್ರಯಾಣವು ಯಾವಾಗಲೂ "ವಸ್ತುಗಳು, ನಾವೀನ್ಯತೆ ಮತ್ತು ಕಂಪ್ಯೂಟ್" ನಿಂದ ನಡೆಸಲ್ಪಡುತ್ತದೆ ಎಂದು ಅವರು ಹೇಳಿದರು.

*****