ਭਾਰਤ ਸਰਕਾਰ ਦੇ ਸੂਚਨਾ ਅਤੇ ਪ੍ਰਸਾਰਣ ਮੰਤਰਾਲੇ ਦੇ ਅਧੀਨ ਨੈਸ਼ਨਲ ਫਿਲਮ ਡਿਵੈਲਪਮੈਂਟ ਕਾਰਪੋਰੇਸ਼ਨ ਲਿਮਿਟੇਡ (ਐੱਨਐੱਫਡੀਸੀ) ਨੇ ਬਰਲਿਨ ਅੰਤਰਰਾਸ਼ਟਰੀ ਫਿਲਮ ਫੈਸਟੀਵਲ ਨਾਲ ਬਰਲਿਨ ਵਿੱਚ ਆਯੋਜਿਤ ਯੂਰੋਪੀਅਨ  ਫਿਲਮ ਮਾਰਕਿਟ (ਈਐੱਫਐੱਮ) 2026 ਵਿੱਚ ਮਹਾਰਾਸ਼ਟਰ ਦੇ ਵਫ਼ਦ ਦੀ ਭਾਗੀਦਾਰੀ ਨੂੰ ਸੁਵਿਧਾਜਨਕ ਬਣਾਇਆ।

ਯੂਰੋਪੀਅਨ ਫਿਲਮ ਮਾਰਕਿਟ (ਈਐੱਫਐੱਮ) ਫਿਲਮ ਫਾਈਨਾਂਸਿੰਗ, ਵਿਕਰੀ, ਵੰਡ ਅਤੇ ਅੰਤਰਰਾਸ਼ਟਰੀ ਸਹਿ-ਨਿਰਮਾਣ ਲਈ ਦੁਨੀਆ ਦੇ ਸਭ ਤੋਂ ਪ੍ਰਭਾਵਸ਼ਾਲੀ ਪਲੈਟਫਾਰਮਾਂ ਵਿੱਚੋਂ ਇੱਕ ਹੈ। ਈਐੱਫਐੱਮ ਦੁਨੀਆ ਭਰ ਦੇ ਮੋਹਰੀ ਨਿਰਮਾਤਾਵਾਂ, ਸਟੂਡੀਓ, ਵਿਕਰੀ ਏਜੰਟਾਂ ਅਤੇ ਫੈਸਲਾ ਲੈਣ ਵਾਲਿਆਂ ਨੂੰ ਇਕੱਠੇ ਲਿਆਉਂਦਾ ਹੈ। ਇਹ ਮਾਰਕਿਟ ਚੋਣਵੀਆਂ ਰਾਸ਼ਟਰੀ ਪ੍ਰਦਰਸ਼ਨੀਆਂ ਅਤੇ ਰਣਨੀਤਕ ਉਦਯੋਗਿਕ ਕਨੈਕਸ਼ਨਾਂ ਲਈ ਇੱਕ ਪ੍ਰਭਾਵਸ਼ਾਲੀ ਪਲੈਟਫਾਰਮ ਪ੍ਰਦਾਨ ਕਰਦਾ ਹੈ, ਜਿਸ ਨਾਲ ਅਰਥਪੂਰਣ ਸਹਿਯੋਗ ਅਤੇ ਗਲੋਬਲ ਮਾਰਕਿਟ ਤੱਕ ਪਹੁੰਚ ਸੰਭਵ ਹੁੰਦੀ ਹੈ।

ਇਹ ਸਮਾਗਮ ਭਾਰਤ ਪਰਵ ਵਿਖੇ ਭਾਰਤ ਦੀ ਵਿਆਪਕ ਸੱਭਿਆਚਾਰਕ ਅਤੇ ਉਦਯੋਗਿਕ ਪ੍ਰਮੋਸ਼ਨ ਮੁਹਿੰਮ ਦਾ ਹਿੱਸਾ ਸੀ। ਇਹ ਵੇਵਸ ਬਜ਼ਾਰ ਦੁਆਰਾ ਭਾਰਤ ਦੀਆਂ ਰਚਨਾਤਮਕ ਸ਼ਕਤੀਆਂ ਨੂੰ ਵਿਸ਼ਵਵਿਆਪੀ ਦਰਸ਼ਕਾਂ ਦੇ ਸਾਹਮਣੇ ਪ੍ਰਦਰਸ਼ਿਤ ਕਰਨ ਲਈ ਤਿਆਰ ਕੀਤਾ ਗਿਆ ਇੱਕ ਪਲੈਟਫਾਰਮ ਹੈ।

ਮਹਾਰਾਸ਼ਟਰ ਦੇ ਵਫ਼ਦ ਦੀ ਅਗਵਾਈ ਮਹਾਰਾਸ਼ਟਰ ਸਰਕਾਰ ਦੇ ਸੂਚਨਾ ਤਕਨਾਲੋਜੀ ਅਤੇ ਸੱਭਿਆਚਾਰਕ ਮਾਮਲੇ ਮੰਤਰੀ, ਸ਼੍ਰੀ ਆਸ਼ੀਸ਼ ਸ਼ੈਲਾਰ ਨੇ ਕੀਤੀ। ਇਸ ਵਫ਼ਦ ਵਿੱਚ ਸੱਭਿਆਚਾਰਕ ਮਾਮਲੇ ਦੇ ਸਕੱਤਰ ਸ਼੍ਰੀ ਕਿਰਣ ਕੁਲਕਰਣੀ; ਸੱਭਿਆਚਾਰਕ ਮਾਮਲੇ ਦੇ ਡਿਪਟੀ ਸਕੱਤਰ ਸ਼੍ਰੀ ਮਹੇਸ਼ ਵਾਵ੍ਹਲ (Mr. Mahesh Wavhal); ਮਹਾਰਾਸ਼ਟਰ ਫਿਲਮ ਸਟੇਜ ਐਂਡ ਕਲਚਰਲ ਡਿਵੈਲਪਮੈਂਟ ਕਾਰਪੋਰੇਸ਼ਨ ਲਿਮਿਟੇਡ ਦੇ ਪ੍ਰਬੰਧ ਨਿਰਦੇਸ਼ਕ ਸ਼੍ਰੀਮਤੀ ਸਵਾਤੀ ਮਹੇਸੇ ਪਾਟਿਲ; ਸੰਯੁਕਤ ਪ੍ਰਬੰਧ ਨਿਰਦੇਸ਼ਕ ਸ਼੍ਰੀ ਪ੍ਰਸ਼ਾਂਤ ਸਜਣੀਕਰ; ਵਿਸ਼ੇਸ਼ ਕਾਰਜ ਅਧਿਕਾਰੀ ਸ਼੍ਰੀਮਤੀ ਸੁਚਿੱਤ੍ਰਾ ਦੇਸ਼ਪਾਂਡੇ; ਸੱਭਿਆਚਾਰਕ ਤਾਲਮੇਲ ਅਧਿਕਾਰੀ ਸ਼੍ਰੀ ਮੰਗੇਸ਼ ਰਾਉਲ ਅਤੇ ਫਿਲਮ ਨਿਰਮਾਤਾ ਸ਼੍ਰੀ ਮਨੋਜ ਕਦਮ ਸ਼ਾਮਲ ਸਨ।

ਪੇਸ਼ਕਾਰੀ ਦੌਰਾਨ, ਮਹਾਰਾਸ਼ਟਰ ਫਿਲਮ ਸਟੇਜ ਐਂਡ ਕਲਚਰਲ ਡਿਵੈਲਪਮੈਂਟ ਕਾਰਪੋਰੇਸ਼ਨ ਲਿਮਿਟੇਡ ਨੇ ਰਾਜ ਦੇ ਜੀਵੰਤ ਫਿਲਮ ਈਕੋਸਿਸਟਮ ਅਤੇ ਫਿਲਮ ਨਿਰਮਾਣ, ਸਹਿ-ਨਿਰਮਾਣ ਅਤੇ ਸੱਭਿਆਚਾਰਕ ਅਦਾਨ-ਪ੍ਰਦਾਨ ਲਈ ਮਹਾਰਾਸ਼ਟਰ ਨੂੰ ਇੱਕ ਗਲੋਬਲ ਹੱਬ ਵਜੋਂ ਸਥਾਪਿਤ ਕਰਨ ਦੇ ਆਪਣੇ ਦ੍ਰਿਸ਼ਟੀਕੋਣ ਬਾਰੇ ਦੱਸਿਆ।

ਮੁੰਬਈ ਦੇ ਦਾਦਾਸਾਹੇਬ ਫਾਲਕੇ ਚਿੱਤ੍ਰਨਗਰੀ - ਫਿਲਮ ਸਿਟੀ ਵਿੱਚ ਵਿਸ਼ਵ ਪੱਧਰੀ ਬੁਨਿਆਦੀ ਢਾਂਚੇ ਵੱਲ ਵਿਸ਼ੇਸ਼ ਧਿਆਨ ਦਿੱਤਾ ਗਿਆ। ਇਹ ਇੱਕ ਏਕੀਕ੍ਰਿਤ ਨਿਰਮਾਣ ਕੇਂਦਰ ਹੈ ਜੋ ਫਿਲਮ ਨਿਰਮਾਣ ਦੇ ਹਰ ਪਹਿਲੂ ਦਾ ਸਮਰਥਨ ਕਰਨ ਲਈ ਤਿਆਰ ਕੀਤਾ ਗਿਆ ਹੈ, ਜਿਸ ਵਿੱਚ ਖਾਸ ਤੌਰ ‘ਤੇ ਡਿਜ਼ਾਈਨ ਕੀਤਾ ਗਿਆ ਸਟੂਡੀਓ, ਬਾਹਰੀ ਸੈੱਟ, ਪੋਸਟ-ਪ੍ਰੋਡਕਸ਼ਨ ਸਹੂਲਤਾਂ ਅਤੇ ਤਕਨੀਕੀ ਬੁਨਿਆਦੀ ਢਾਂਚਾ ਇੱਕ ਹੀ ਥਾਂ ‘ਤੇ ਮੌਜੂਦ ਹਨ।

ਵਫ਼ਦ ਨੇ ਮਰਾਠੀ ਸਿਨੇਮਾ ਦੀ ਰਚਨਾਤਮਕ ਅਤੇ ਵਪਾਰਕ ਸਮਰੱਥਾ ਦਾ ਪ੍ਰਦਰਸ਼ਨ ਕੀਤਾ ਅਤੇ ਅੰਤਰਰਾਸ਼ਟਰੀ ਫਿਲਮ ਸਮਾਰੋਹਾਂ ਵਿੱਚ ਇਸ ਦੀ ਵਧਦੀ ਮੌਜੂਦਗੀ ਨੂੰ ਉਜਾਗਰ ਕੀਤਾ। ਚਰਚਾਵਾਂ ਦਾ ਕੇਂਦਰ ਬਿੰਦੂ ਸਹਿ-ਨਿਰਮਾਣ ਦੇ ਮੌਕਿਆਂ ਦਾ ਵਿਸਤਾਰ, ਪ੍ਰਤਿਭਾ ਦੇ ਅਦਾਨ-ਪ੍ਰਦਾਨ ਅਤੇ ਫਿਲਮ ਟੂਰਿਜ਼ਮ ਸੀ, ਨਾਲ ਹੀ ਖੇਤਰੀ ਕਹਾਣੀ ਸੁਣਾਉਣ ਦੀ ਕਲਾ ਨੂੰ ਬਦਲਦੇ ਵਿਸ਼ਵਵਿਆਪੀ ਬਾਜ਼ਾਰ ਰੁਝਾਨਾਂ ਦੇ ਅਨੁਸਾਰ ਢਾਲਣਾ ਵੀ ਸੀ।

ਮਹਾਰਾਸ਼ਟਰ ਦੇ ਪ੍ਰਗਤੀਸ਼ੀਲ ਨੀਤੀਗਤ ਢਾਂਚੇ, ਵਿੱਤੀ ਸਹਾਇਤਾ ਪ੍ਰਣਾਲੀ ਅਤੇ ਫਿਲਮ ਨਿਰਮਾਤਾ-ਅਨੁਕੂਲ ਵਾਤਾਵਰਣ ਨੂੰ ਅੰਤਰਰਾਸ਼ਟਰੀ ਸਹਿਯੋਗ ਲਈ ਮੁੱਖ ਕਾਰਕਾਂ ਵਜੋਂ ਪੇਸ਼ ਕੀਤਾ ਗਿਆ। ਵਫ਼ਦ ਨੇ ਮਜ਼ਬੂਤ ​​ਸੰਸਥਾਗਤ ਸਮਰਥਨ ਅਤੇ ਨਿਰਮਾਣ ਲਈ ਤਿਆਰ ਬੁਨਿਆਦੀ ਢਾਂਚੇ ਦੇ ਜ਼ੋਰ ‘ਤੇ ਵਿਸ਼ਵਵਿਆਪੀ ਹਿੱਸੇਦਾਰਾਂ ਨਾਲ ਭਾਈਵਾਲੀ ਕਰਨ ਅਤੇ ਵਿਦੇਸ਼ੀ ਨਿਵੇਸ਼ ਨੂੰ ਆਕਰਸ਼ਿਤ ਕਰਨ ਲਈ ਰਾਜ ਦੀ ਤਿਆਰੀ ਨੂੰ ਉਜਾਗਰ ਕੀਤਾ।

ਐੱਨਐੱਫਡੀਸੀ ਨੇ ਅੰਤਰਰਾਸ਼ਟਰੀ ਭਾਈਵਾਲੀ ਬਣਾਉਣ ਅਤੇ ਮੁੱਖ ਵਿਸ਼ਵਵਿਆਪੀ ਫਿਲਮ ਬਾਜ਼ਾਰਾਂ ਵਿੱਚ ਭਾਰਤ ਦੀ ਮੌਜੂਦਗੀ ਨੂੰ ਮਜ਼ਬੂਤ ​​ਕਰਨ ਵਿੱਚ ਮਹਾਰਾਸ਼ਟਰ ਦਾ ਸਮਰਥਨ ਕਰਨ ਦੀ ਆਪਣੀ ਵਚਨਬੱਧਤਾ ਨੂੰ ਦੁਹਰਾਇਆ।

****

ਮਹੇਸ਼ ਕੁਮਾਰ/ਵਿਵੇਕ ਵਿਸ਼ਵਾਸ/ਏਕੇ