ویوز بازار، جو رِٹز میں بھارت پرو کے حصے کے طور پر منعقد کیا گیا، میں عالمی سینما کے ماہرین، ٹیکنالوجی کے جدت کاروں اور پالیسی سازوں کی ایک تاریخی اجتماعیت دیکھنے میں آئی۔ ورلڈ آڈیو ویژول و انٹرٹینمنٹ سمٹ (ویوز) اقدام کے تحت نیشنل فلم ڈیولپمنٹ کارپوریشن (این ایف ڈی سی) کی میزبانی میں منعقدہ اس پروگرام نے ’’عالمی مواد سازی کے مرکز‘‘ کے طور پر بھارت کے بڑھتے ہوئے مقام کو اجاگر کیا اور سینما، ذرائع ابلاغ اور ابھرتی ہوئی تخلیقی ٹیکنالوجیز کے میدان میں ملک کے بڑھتے ہوئے اثر و رسوخ کو نمایاں کیا۔

بھارت: عالمی مواد سازی کا مرکز

دن کا آغاز این ایف ڈی سی کے جنرل منیجر جناب گوتم بھانوت کے افتتاحی کلمات سے ہوا، جنہوں نے بھارت کے آڈیو، بصری، کھیل اور تخلیقی (اینیمیشن) اور فلمی شعبوں کے لیے ’’آئندہ کا لائحۂ عمل‘‘ بیان کیا۔ اس کے بعد ’’بھارت: عالمی مواد سازی کا مرکز—پیمانہ، صلاحیت اور نئے کاروباری نمونے‘‘ کے عنوان سے ایک اعلیٰ سطحی پینل مباحثہ منعقد ہوا، جس کی نظامت این ایف ڈی سی کی جنرل منیجر (میڈیا و مواصلات)، ودوشی کین نے کی۔ اس مباحثے میں بین الاقوامی کہانی گوئی کی قیادت کے لیے بھارت کی بڑھتی ہوئی صلاحیت پر گفتگو کی گئی۔ اس نشست میں مارٹن رابرٹس، کتھرینا سوکالے اور تومازو پریانتے نے شرکت کی۔ مباحثے میں اس بات کو نمایاں کیا گیا کہ فلم بازار اور ویوز بازار جیسے پلیٹ فارمز اور حکومت کی معاونت سے چلنے والے اقدامات، مثلاً ویویکس اور سی آئی سی چیلنجز، بھارت میں فلمی پیداوار کے پیمانے کو مضبوط بنا رہے ہیں، صلاحیتوں کی پرورش کر رہے ہیں اور سرحد پار اشتراک کو ممکن بنا رہے ہیں۔ اس کے نتیجے میں بھارت تخلیقی صنعتوں اور جدت طرازی کے میدان میں عالمی سطح پر ایک مسابقتی مرکز کے طور پر ابھر رہا ہے۔

وزارتی پیشکشیں: دہلی اور مہاراشٹر

علاقائی فلمی سیاحت کو فروغ دینے کی ایک اہم کوشش کے تحت دہلی اور مہاراشٹر دونوں نے اپنے اسٹریٹجک ایجنڈے پیش کیے۔ جناب کپل مشرا، معزز وزیرِ سیاحت، فنون و ثقافت (دہلی) نے دہلی ٹورزم کی جانب سے پیشکش کی قیادت کی اور فلم سازوں کے لیے دارالحکومت کی ازسرِ نو مرتب کی گئی پالیسیوں کو نمایاں کیا۔ اس کے بعد جناب آشیش شیلار، معزز وزیرِ ثقافت (مہاراشٹر) نے مہاراشٹر فلم سٹی کے حوالے سے پیشکش کی۔ وزیر نے مقامی اور بین الاقوامی منصوبوں کو فروغ دینے کے لیے ریاست کی جانب سے فراہم کی جانے والی مکمل پروڈکشن معاونت اور مالی مراعات سے متعلق اقدامات کی تفصیل بیان کی۔ دونوں وزراء کو ثقافتی معیشت میں ان کی خدمات کے اعتراف میں اعزاز سے نوازا گیا۔

عالمی مشترکہ پروڈکشن پر توجہ: ’’کورنجی‘‘ منصوبہ

13 فروری کو بھارت پرو کے موقع پر یورپی فلم مارکیٹ میں ویوز بازار کی عالمی رابطہ وفد نے ’’کورنجی‘‘ نامی بین الاقوامی فیچر فلم کو ایک پینل مباحثے کے ذریعے پیش کیا، جس میں بھارت–فرانس–جرمنی کے مشترکہ پروڈکشن ماڈل پر گفتگو کی گئی۔ اس نشست میں مصنفہ و ہدایت کار پائل سیٹھی اور ان کے بین الاقوامی پروڈیوسنگ شراکت دار شریک تھے۔

کورنجی کو برلینالے ٹیلنٹس فیلوشپ حاصل ہو چکی ہے اور این ایف ڈی سی ویوز فلم بازار کے مشترکہ پروڈکشن مارکیٹ میں اسے پہلا انعام بھی ملا ہے۔ یہ کرداروں پر مبنی ایک ڈرامہ ہے جو کیرالہ میں ترتیب دیا گیا ہے اور ہجرت، شناخت اور استقامت جیسے موضوعات کو اجاگر کرتا ہے۔ یہ منصوبہ فلم کاروان کی جانب سے تیار کیا گیا ہے، جو بین الاقوامی ایمی ایوارڈ یافتہ سیریز ’’دہلی کرائم‘‘ کے لیے معروف ہے۔ یہ منصوبہ مضبوط سرحد پار اشتراک کی عکاسی کرتا ہے اور عالمی سطح پر متعلقہ کہانی گوئی میں بھارت کی بڑھتی ہوئی موجودگی کو نمایاں کرتا ہے۔

نئی صلاحیتوں کو بااختیار بنانا: اوپن پچ اور سی آئی سی

ایک مخصوص حصے کے تحت ’’فلم ساز اور ٹیکنالوجی سے وابستہ نئی کمپنیوں کا اوپن پچ‘‘ منعقد کیا گیا، جس میں نو فیچر فلم منصوبے پیش کیے گئے، جو مختلف اصناف اور خطّوں پر مشتمل تھے۔ ان میں ’’کبوتَر‘‘ شامل تھا، جو ہندی-جاپانی اسراری ڈرامہ ہے اور مشترکہ پروڈکشن شراکت داروں کی تلاش میں ہے، ’’یہ میرا گھر (مائی ہوم)‘‘ شامل تھا، جو مکمل ہو چکا آرٹ ہاؤس ڈرامہ ہے اور ہجرت کے موضوع پر مبنی ہے، جبکہ ’’دا جی او اے ٹی‘‘ بھی شامل تھا، جو تمل-انگریزی زبان میں تیار کیا گیا بچوں کے لیے اینیمیٹڈ فیچر اور ایک توسیعی حقیقت پر مبنی منصوبہ ہے، جو مالی معاونت کے مرحلے میں ہے۔

13 فروری کو بھارت پرو میں پیش کیے گئے دیگر منصوبوں میں ایکؤز آف دی ہرڈ شامل تھا، جو ہمالیائی پس منظر پر مبنی ایک انعام یافتہ ڈرامہ ہے، وائٹ گائی (سفید فام) شامل تھا، جو 1980 کی دہائی کے برطانیہ میں ترتیب دیا گیا بلوغت کی عمر کا ایک میوزیکل ہے، مسٹر فرانسس اینڈ دی لاسٹ اسٹینڈنگ پی سی او شامل تھا، جو کونکنی-ہندی زبان میں ایک فینٹسی رومانوی کہانی ہے، کہیں دور (ابھی بھی… کہیں) شامل تھا، جو برلن اور بھارت کے پس منظر میں پیش آنے والا ڈرامہ ہے، آدے (ایک ہفتہ وار چھٹی پر) شامل تھا، جو ناگالینڈ سے تعلق رکھنے والی ٹینیڈی زبان میں بلوغت کی عمر کی ایک کہانی ہے اور آئیس-پائس شامل تھا، جو جیل کے ماحول میں ترتیب دیا گیا ایک ہندی ڈرامہ ہے۔

جدت طرازی کو ویو ایکس کے مظاہرے کے ذریعے مزید نمایاں کیا گیا، جس میں کریوبیلا کا غیرمرکزی فیسٹیول مالیاتی پلیٹ فارم، ٹوٹی فروٹی گیمز کی مصنوعی ذہانت پر مبنی اساطیری گیم سازی کی دانشورانہ ملکیت، زینگوہ کے تخلیقی مصنوعی ذہانت پر مبنی مقامیت سازی کے آلات اور فوک لاگ کا اینیمیشن کے ذریعے لوک ورثے کو فروغ دینے والا پلیٹ فارم شامل تھا۔

بھارت میں تخلیق چیلنج (سی آئی سی) کے فاتحین نے بھی خاص دلچسپی پیدا کی، جن میں روڈ ٹو جنجی شامل ہے، جو راجارام کے فرار پر مبنی ایک تاریخی اینیمیٹڈ فیچر فلم ہے اور دی ڈریم بیلون شامل ہے، جو بڑے پیمانے پر تیار کی جانے والی اینیمیٹڈ فینٹسی مہماتی کہانی ہے، جو ترقی کے اعلیٰ مرحلے میں ہے۔

دوپہر کا اختتام ’’کورنجی‘‘ منصوبے پر ایک خصوصی پینل مباحثے کے ساتھ ہوا، جو بھارت، فرانس اور جرمنی کے درمیان ایک بین الاقوامی مشترکہ پروڈکشن ہے۔ اس کے بعد عالمی شراکت داریوں کو فروغ دینے کے لیے بھارتی وفد کی شرکت سے کاروبار سے کاروبار کی سطح پر تفصیلی ملاقاتیں منعقد کی گئیں۔

******

ش ح۔ ش ا ر۔ ول

Uno-2494