জৈৱ বৈচিত্ৰ্য সংৰক্ষণৰ নিৰন্তৰ প্ৰচেষ্টাৰ অংশ হিচাপে আৰু জৈৱ সম্পদৰ ব্যৱহাৰৰ পৰা লাভালাভৰ ন্যায্য আৰু ন্যায়সংগত ভাগ-বাটোৱাৰা নিশ্চিত কৰাৰ বাবে ৰাষ্ট্ৰীয় জৈৱ বৈচিত্ৰ্য কৰ্তৃপক্ষ (এন বি এ)ই ৰাজ্যিক জৈৱ বৈচিত্ৰ্য পৰিষদ আৰু কেন্দ্ৰীয়শাসিত অঞ্চলৰ জৈৱ বৈচিত্ৰ্য পৰিষদৰ জৰিয়তে দাবী কৰাসকলৰ বাবে ৪৫.০৫ লাখ টকা বিতৰণ কৰিছে।

এই ধন আদায়ৰ ফলত তেলেংগানা, কৰ্ণাটক, অন্ধ্ৰপ্ৰদেশ, গোৱা, মহাৰাষ্ট্ৰ, অসম, উত্তৰ প্ৰদেশ, উত্তৰাখণ্ড, হাৰিয়ানা, হিমাচল প্ৰদেশ, ৰাষ্ট্ৰীয় ৰাজধানী অঞ্চল দিল্লী আৰু কেন্দ্ৰীয়শাসিত অঞ্চল লাডাখকে ধৰি ১০ ৰাজ্য আৰু দুই কেন্দ্ৰীয়শাসিত অঞ্চলৰ ৯০ খনতকৈও অধিক জৈৱ বৈচিত্ৰ্য ব্যৱস্থাপনা সমিতি (বিএমচি) উপকৃত হ’ব। এই বিএমচিসমূহে গ্ৰামাঞ্চল, স্থানীয় নগৰ-নিকায়, জলাহভূমি অঞ্চল আৰু ঔদ্যোগিক নিকটৱৰ্তী অঞ্চলকে ধৰি বিভিন্ন পৰিবেশগত আৰু প্ৰাতিষ্ঠানিক পৰিস্থিতিক প্ৰতিনিধিত্ব কৰে।

বিভিন্ন জৈৱিক সম্পদৰ ব্যৱহাৰৰ পৰা লাভ ভাগ-বাটোৱাৰা কৰা পৰিমাণটো সৃষ্টি হৈছিল, যাৰ ভিতৰত আছে কিছুমান পোক-পতংগ, মাটি আৰু পানীত পোৱা অণুজীৱ আৰু ৰঙা চন্দনৰ খেতি। এই সম্পদসমূহ বিভিন্নধৰণৰ সামগ্ৰী বিকশিত কৰিবলৈ ব্যৱহাৰ কৰা হৈছিল, যিয়ে দেখুৱাইছে জৈৱ বৈচিত্ৰ্যই কেনেদৰে বৈজ্ঞানিক উদ্ভাৱন আৰু জৈৱ-অৰ্থনীতিত সহায় কৰে। প্ৰৱেশাধিকাৰ আৰু লাভ ভাগ-বাটোৱাৰা ব্যৱস্থাৰ জৰিয়তে কোম্পানীসমূহে লাভ কৰা বাণিজ্যিক লাভালাভৰ এটা অংশ সম্প্ৰদায়সমূহক ঘূৰাই দিয়া হয়, যাৰ ফলত জীৱিকা উন্নত কৰাত সহায় হয় আৰু সম্প্ৰদায়সমূহক সক্ৰিয়ভাৱে জৈৱ বৈচিত্ৰ্য সুৰক্ষা আৰু সংৰক্ষণ কৰিবলৈ উৎসাহিত কৰা হয়।

শেহতীয়া বছৰবোৰত এন বি এই স্বচ্ছতা উন্নত কৰিবলৈ আৰু ব্যৱসায় কৰাৰ সূচলতা বৃদ্ধি কৰিবলৈ সৰল নিয়মাৱলী প্ৰণয়ন কৰিছে, লগতে সম্প্ৰদায়ৰ স্বাৰ্থ আৰু জৈৱ বৈচিত্ৰ্য সুৰক্ষিত কৰি আহিছে। এন বি এই জৈৱ বৈচিত্ৰ্য সংৰক্ষণ আৰু ইয়াৰ বহনক্ষম ব্যৱহাৰৰ বাবে সজাগতা বিয়পাবলৈ আৰু সামৰ্থ্য নিৰ্মাণ কৰিবলৈ ৰাজ্য, স্থানীয় সংস্থা, গৱেষক, উদ্যোগ আৰু সম্প্ৰদায়ৰ সৈতে ঘনিষ্ঠভাৱে কাম কৰে। ই তৃণমূল পৰ্যায়ত জৈৱ বৈচিত্ৰ্যৰ ব্যৱস্থাপনা আৰু সুৰক্ষাৰ ক্ষেত্ৰত পৰম্পৰাগত জ্ঞানৰ বিৱৰণ আৰু অংশগ্ৰহণমূলক দৃষ্টিভংগীকে ধৰি জনসাধাৰণৰ জৈৱ বৈচিত্ৰ্য পঞ্জীয়নৰ নথিভুক্তিক সমৰ্থন কৰে।

সামূহিকভাৱে, এই ব্যৱস্থাসমূহৰ ফলত এ বি এছৰ মুঠ পৰিশোধ ১৪৫ কোটি টকা (প্ৰায় ১৬ নিযুত আমেৰিকান ডলাৰ) অতিক্ৰম কৰিছে। এন বি এই ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত জৈৱ বৈচিত্ৰ্যৰ ওপৰত সন্মিলন আৰু এ বি এছৰ ওপৰত নাগোয়া প্ৰট’কলৰ অধীনত ভাৰতৰ দায়বদ্ধতাক আগুৱাই নিয়াৰ লগতে ৰাষ্ট্ৰীয় জৈৱ বৈচিত্ৰ্য লক্ষ্য আৰু কুনমিং-মণ্ট্ৰীল গোলকীয় জৈৱ বৈচিত্ৰ্য ফ্ৰেমৱৰ্কৰ লক্ষ্যত উপনীত হোৱাৰ দিশত এক গুৰুত্বপূৰ্ণ ভূমিকা পালন কৰি আহিছে।

*****

VM/GS/HS