কেন্দ্ৰীয় গৃহ আৰু সমবায় মন্ত্ৰী শ্ৰী অমিত শ্বাহে আজি জম্মু ভ্ৰমণৰ দ্বিতীয় দিনা ভাৰত-পাকিস্তান সীমান্তত অৱস্থিত সীমান্ত চকী (বি অ’ পি) ‘গুৰনাম’ আৰু ‘ববিয়া’ পৰিদৰ্শন কৰে। কেন্দ্ৰীয় গৃহমন্ত্ৰীগৰাকীয়ে ‘অজেয় প্ৰহৰী’ স্মৃতিসৌধত শ্বহীদসকলক শ্ৰদ্ধাঞ্জলি জ্ঞাপন কৰাৰ লগতে বি অ’ পি ‘ববিয়া’ প্ৰাংগণত এটি গছপুলিও ৰোপণ কৰে। শ্ৰী শ্বাহে জোৱানসকলৰ কল্যাণৰ বাবে ৭ কোটি টকাৰ প্ৰকল্প উদ্বোধন কৰে, য’ত নতুনকৈ নিৰ্মাণ কৰা সৌৰচালিত পানী গৰম কৰা যন্ত্ৰ, সৌৰ শক্তি কেন্দ্ৰ আৰু এটা বিষয়াৰ মেছ আদিও আছে। তেওঁ লগতে সীমান্ত সুৰক্ষা বাহিনী (বিএছএফ)ৰ বাবে ২৪২ কোটি টকাৰ আন্তঃগাঁথনি প্ৰকল্পৰ আধাৰশিলা স্থাপন কৰে। এই অনুষ্ঠানত জম্মু-কাশ্মীৰৰ উপ-ৰাজ্যপাল শ্ৰী মনোজ সিনহা, কেন্দ্ৰীয় গৃহ সচিব, চোৰাংচোৱা ব্যুৰো (আই বি)ৰ সঞ্চালক, সীমান্ত সুৰক্ষা বাহিনীৰ সঞ্চালকপ্ৰধানকে ধৰি অন্যান্য জ্যেষ্ঠ বিষয়াসকল উপস্থিত থাকে।

কেন্দ্ৰীয় গৃহমন্ত্ৰী শ্ৰী অমিত শ্বাহে সীমান্ত সুৰক্ষা বাহিনীৰ জোৱানসকলক সম্বোধন কৰি কয় যে যেতিয়াই তেওঁ কুচ, ৰাজস্থান বা জম্মু-কাশ্মীৰৰ দুৰ্গম আৰু প্ৰত্যাহ্বানমূলক অঞ্চলত অৱস্থিত বি এছ এফৰ পোষ্টবোৰলৈ যায়, তেতিয়াই তেওঁ তাত নিয়োজিত বি এছ এফৰ জোৱানসকলৰ পৰা কৰ্তব্য সচেতনতাৰ মূল্যবোধ আৰু অটল দায়বদ্ধতাৰ গুণসমূহ শিকি সদায় উভতি আহে। তেওঁ কয় যে এনে ভ্ৰমণৰ সময়ত তেওঁ বিএছএফৰ জোৱানসকলে কঠিন আৰু প্ৰত্যাহ্বানমূলক পৰিস্থিতিত গভীৰ নিষ্ঠাৰে নিজৰ কৰ্তব্যসমূহ কেনেদৰে পালন কৰে সেই কথা প্ৰত্যক্ষ কৰে। গৃহমন্ত্ৰীগৰাকীয়ে বি এছ এফৰ জোৱানসকলক অনুশাসন আৰু নিষ্ঠাৰ উত্তম উদাহৰণ বুলি অভিহিত কৰে, তেওঁলোকে দিনে-নিশাই দৃঢ়তাৰে থিয় দি দেশৰ সীমান্তক সুৰক্ষা দিয়ে। তেওঁ লগতে কয় যে বি এছ এফৰ গৌৰৱময় ৬০ বছৰীয়া ইতিহাসে দেশবাসীৰ হৃদয়ত এই একে অনুভূতিৰ সঞ্চাৰ কৰিছে।

কেন্দ্ৰীয় গৃহমন্ত্ৰী শ্ৰী অমিত শ্বাহে কয় যে যেতিয়াই দেশৰ সীমান্তত অনুপ্ৰৱেশ বা বেদখলৰ ভাবুকিৰ সৃষ্টি হয়, তেতিয়াই বি এছ এফে সদায় অভেদ্য প্ৰাচীৰৰ দৰে দৃঢ়তাৰে থিয় হৈ দেশক সুৰক্ষিত কৰি ৰখাৰ বাবে দৃঢ়প্ৰতিজ্ঞ হৈ আহিছে। তেওঁ উল্লেখ কৰে যে ‘অপাৰেচন সিন্দুৰ’ৰ সময়ত বি এছ এফে প্ৰদৰ্শন কৰা সাহস আৰু বীৰত্বই ইয়াৰ ছয় দশকৰ ইতিহাসত এক সোণালী অধ্যায় সংযোজন কৰিছে। সেই কঠিন সময়তো বি এছ এফৰ জোৱানসকলে "আমি সীমান্তৰ প্ৰহৰী" মনোভাৱ সদায় ৰক্ষা কৰিছিল। তেওঁ কয় যে বি এছ এফৰ জম্মু-কাশ্মীৰ ফ্ৰন্টিয়াৰে ১১৮টা পাকিস্তানী চকী আৰু তিনিটা সন্ত্ৰাসবাদী লঞ্চ পেড সম্পূৰ্ণৰূপে ধ্বংস কৰি পেলাইছে। এই অভিযানত কৰ্তব্যৰত অৱস্থাত প্ৰাণ আহুতি দিয়া উপ-পৰিদৰ্শক মহম্মদ ইমতিয়াজ আহমেদ আৰু কনিষ্টবল দীপক চিংগাখামক বীৰ চক্ৰৰে সন্মানিত কৰা হয়। এয়া আমাৰ বাবে অপৰিসীম গৌৰৱৰ বিষয়। শ্ৰী শ্বাহে লগতে কয় যে এই সময়ছোৱাত বি এছ এফে ১৬টা বীৰত্বৰ পদক আৰু বহু প্ৰশংসা-পত্ৰও লাভ কৰে।

শ্ৰী অমিত শ্বাহে কয় যে সীমান্তত নিয়োজিতই হওক, মণিপুৰৰ দুৰ্গম অঞ্চলতে হওক, বা মাওবাদী প্ৰভাৱিত অঞ্চল ওড়িশা আৰু ছত্তীশগড়তেই হওক, বি এছ এফে সকলোতে নিজৰ বীৰত্ব প্ৰদৰ্শন কৰিছে। তেওঁ প্ৰাকৃতিক দুৰ্যোগৰ সময়ত বিশেষকৈ পঞ্জাবত বি এছ এফে উল্লেখযোগ্য মানৱীয় সেৱা প্ৰদৰ্শন কৰাৰ বাবে প্ৰশংসা কৰে। শ্ৰী শ্বাহে কয় যে পঞ্জাৱৰ মুখ্যমন্ত্ৰীয়ে তেওঁক জনাইছিল যে বি এছ এফ নথকা হ’লে বানপানীৰ সময়ত হোৱা প্ৰত্যাহ্বান বহুগুণে বৃদ্ধি পালেহেঁতেন। বি এছ এফে পঞ্জাবৰ জনসাধাৰণক অমূল্য সেৱা আগবঢ়াইছিল আৰু সংকটৰ সময়ত তেওঁলোকক অপৰিসীম সহায় কৰিছিল।

কেন্দ্ৰীয় গৃহমন্ত্ৰী শ্ৰী অমিত শ্বাহে কয় যে দেশৰ সীমান্ত সম্পূৰ্ণ সুৰক্ষিত আৰু সতৰ্ক কৰি ৰখাটো আমাৰ সামূহিক দায়িত্ব। তেওঁ উল্লেখ কৰে যে বিগত ৬০ বছৰত সীমান্ত সম্পৰ্কীয় প্ৰত্যাহ্বানসমূহ সম্পূৰ্ণৰূপে সলনি হৈছে। তেওঁ কয় যে জোৱানসকলৰ সাহস, সজাগতা আৰু অটল নিষ্ঠা গুৰুত্বপূৰ্ণ যদিও বহু উদীয়মান প্ৰত্যাহ্বান এতিয়া প্ৰযুক্তিৰ দ্বাৰা পৰিচালিত। গতিকে এই প্ৰত্যাহ্বানসমূহ মোকাবিলা কৰিবলৈ উন্নত প্ৰযুক্তিগত সমাধান গ্ৰহণ কৰিব লাগিব। গৃহমন্ত্ৰীয়ে স্মৰণ কৰে যে বি এছ এফৰ প্ৰতিষ্ঠা দিৱস উদযাপনৰ সময়ত তেওঁ উল্লেখ কৰিছিল যে বি এছ এফৰ ৬১ সংখ্যক বাৰ্ষিকী বাহিনীটোৰ বাবে আধুনিকীকৰণৰ বছৰ হ’ব, লগতে বি এছ এফৰ জোৱান আৰু তেওঁলোকৰ পৰিয়ালৰ বাবে কল্যাণৰ বছৰ হ’ব। তেওঁ লগতে কয় যে গৃহ পৰিক্ৰমা মন্ত্ৰালয়ৰ এটা নিষ্ঠাবান দলে দুয়োটা ক্ষেত্ৰতে অবিৰতভাৱে কাম কৰি আছে।

শ্ৰী অমিত শ্বাহে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত ভাৰত চৰকাৰ নিৰাপত্তাৰক্ষীৰ কল্যাণৰ প্ৰতি সম্পূৰ্ণ দায়বদ্ধ। তেওঁ ঘোষণা কৰে যে শীঘ্ৰে বি এছ এফৰ জোৱানসকলৰ বাবে বিশেষ কল্যাণমূলক আঁচনি প্ৰৱৰ্তন কৰা হ’ব। তদুপৰি সমগ্ৰ সীমান্ত সুৰক্ষা ব্যৱস্থাক প্ৰযুক্তিগতভাৱে আধুনিকীকৰণৰ বাবে চৰকাৰে যথেষ্ট ধন বিনিয়োগ কৰিব। এই আধুনিকীকৰণে বিএছএফৰ জোৱানসকলৰ বাবে উন্নত সীমান্ত আন্তঃগাঁথনি আৰু উন্নত সঁজুলিৰ ব্যৱস্থা কৰিব, যিবোৰ তেওঁলোকৰ কৰ্তব্য পালনত সহায়ক হ’ব। তেওঁ কয় যে এই সুবিধাসমূহে জোৱানসকলে সন্মুখীন হোৱা কষ্ট বহু পৰিমাণে হ্ৰাস কৰিব আৰু তেওঁলোকক নিজৰ কৰ্তব্য অধিক ফলপ্ৰসূভাৱে পালন কৰিবলৈ সক্ষম কৰি তুলিব। গৃহমন্ত্ৰীগৰাকীয়ে লগতে কয় যে সীমান্তত নিয়োজিত বি এছ এফৰ জোৱানসকলৰ অদম্য কৰ্তব্যবোধ, নিষ্ঠা, আৰু দায়বদ্ধতাৰ বাবেই সমগ্ৰ ৰাষ্ট্ৰই শান্তিৰে শুব পাৰে আৰু নিৰাপত্তা অনুভৱ কৰে।

গৃহমন্ত্ৰীগৰাকীয়ে সীমান্ত সুৰক্ষাৰ ক্ষেত্ৰত বি এছ এফৰ মহিলা জোৱানসকলৰ উল্লেখযোগ্য অৱদানৰ শলাগ লয়। ইয়াৰ পাছত তেওঁ জোৱানসকলৰ সৈতে দুপৰীয়াৰ আহাৰ গ্ৰহণ কৰে।

*****

RK/RR/PR/PS/KD