কেন্দ্রগী মন্ত্রীমন্দলদা লৈরিবা ঐহাক্কী মরুপশিং, সংসদকী মীহুৎ পুম্নমক, ভিক্সিৎ ভারত য়ং লীদর্স চেলেঞ্জগী মনা ফংলবশিং, অতৈ মকোক থোংবা মীওইশিং, অমসুং মপান্দগী লাকপশিং য়াওনা লৈবাক শিনবা থুংবদগী মফম অসিদা লাকখিবা ঐহাক্কী নহা ওইরিবা মরুপশিং, পুম্নমক্না মফম অসিদা অনৌবা এক্সপরিয়েন্স অমা ফংলমগনি। নখোয় চোকথবা ফাওব্রা? নুমিৎ নিনিগী মমাংদগী নখোয়না য়াওরক্লি, মরম অদুনা হন্না হন্না ঙাংবদা নখোয়না তাবদা অৱাবা পোকপ্রা? অমরোমদা, ঐহাক্কী ঐহাক্না ফমফমদগী মথৌ তাবা অদু হান্ননা হায়খ্রে। ঐহাক্না অহানবা ওইনা মুখ্য মন্ত্রী ওইনা ৱাশক লৌরকপা মতমদা, ঐহাক্না থাজৈ মদুদি অদোমগী মরক্তগী কয়া অমদি পোকপা ফাওবা পোক্ত্রি। অমসুং ঐহাক্না ২০১৪দা প্রধান মন্ত্রী ওইনা ৱাশক লৌখিবা মতমদা, অদোমগী মরক্তগী অয়াম্বদি অঙাং ওইরমগনি। অদুবু মুখ্য মন্ত্রী ওইনা নৎত্রগা হৌজিক প্রধান মন্ত্রী ওইনা, ঐহাক্না মতম পুম্নমক্তা নহা ওইরিবা মীরোলশিংদা থাজবা য়াম্না লৈ। ঐনা মতম পুম্নমক্তা অদোমগী তৌবা ঙম্বশিং অমসুং হৈশিংবশিংদগী ইনর্জী লৌরকখি। অমসুং ঙসি, অদোম্না চাউখৎলবা ভারত অমা শেমগৎনবা মিসনগী ৱায়েল চুপ্লি পাইরি।

মরুপশিং,

২০৪৭দা, ভারতনা নীংতম্বা চহি ১০০ মপুং ফারকপা মতমদা, মাইলস্তোন অদু য়ৌনবগী খোঙচৎ অসি লৈবাক অসিগী ওইনা য়াম্না মরু ওই। মসিগা লোয়ননা, চহিশিং অসি অদোমগী পুন্সিগী খ্বাইদগী মরু ওইবা মতমসু ওইরি। মসি অদোমগীদমক্তা অচৌবা খুদোংচাবা অমনি। অদোমগী কেপাসিতীনা ভারতকী কেপাসিতী ওইগনি, অমসুং অদোমগী মায় পাকপা অসিনা ভারতকী মায় পাকপা অসি অনৌবা থাক্তা পুখৎকনি। ঐহাক্না ময়াম পুম্নমকপু ভিক্সিৎ ভারত য়ং লীদর্স দাইলোগতা শরুক য়াবগীদমক থাগৎচরি। ঐহাক্না মসিগী হীরম অসিগী মতাংদা অকুপ্পা মরোল কয়া অমা তুংদা নৈনগনি, অদুবু অহানবদা ঙসিগী তাঙ্কক অসিগী মরুওইবা অদু য়েংলসি।

মরুপশিং,

ঙসি অসি স্বামী বিবেকানন্দগী মপোক কুমওননি। ঙসি ফাওবদা, মহাক্কী ৱাখল্লোনশিংনা নহা ওইরিবা মীওই খুদিংমকপু পুক্নিং থৌগৎলি। ঐখোয়গী পুন্সিগী পান্দম করি ওইবগে? ঐখোয়গী পান্দমদি করি ওইবগে? ঐখোয়না 'নেসন ফার্ষ্ট'কী স্পিরিৎ অদুগা লোয়ননা করম্না হিংগদগে? ঐখোয়গী এক্সন খুদিংমক্তা, খুন্নাই অমসুং লৈবাক্কী য়াইফ-থৌরাং অসি সেন্ত্রেল ওইগদবনি। মতাং অসিদা, স্বামী বিবেকানন্দগী পুন্সি অসি অচৌবা লমজিং-লমতাক অমসুং ইথিলগী হৌরকফম অমা ওইরি। মহাক্কী নীংশিংনবগীদমক, চহি খুদিংগী জনুৱারী ১২ অসি নেস্নেল য়ুথ দে ওইনা পাংথোক্লি। অমসুং মহাক্কী ইথিলদগী, হায়রিবা নুমিৎ অসি 'ভিক্সিৎ ভারত য়ং লীদর্স দাইলোগ'কীদমক্তা খনখ্রে।

মরুপশিং,

অসিগুম্বা অতেনবা মতমগী মনুংদা, ভিক্সিৎ ভারত য়ং লীদর্স দাইলোগ অসি অসিগুম্বা মরুওইবা প্লেৎফোর্ম অমা ওইরকপদা ঐহাক নুংঙাইবা ফাওই। মসিদা নহারোলশিংনা লৈবাক অসিগী চাউখৎপগী মায়কৈ অসি শেমগৎপদা হকথেংননা শরুক য়াবা য়াহল্লি। নহারোল মিলিয়ন মঙা হেন্না রেজিস্তর তৌখি, মিলিয়ন অহুম হেনবনা ভিক্সিৎ ভারত চেলেঞ্জ অসিদা থৌনা লৈনা শরুক য়াখি, অমসুং ভারতকী তুংলমচৎকীদমক মখোয়গী ৱাখল্লোনশিং অদু শরুক য়াখি। অসিগুম্বা পাক-চাউবা স্কেল অমদা নহারোলশিংনা শরুক য়াবা অসি মমাংদা অমুক্তা ওইখিদ্রি। মালেম শিনবা থুংনা, ‘থিংক তেঙ্ক’ হায়বা ৱাহৈ অসি য়াম্না তোয়না শীজিন্নৈ। থিঙ্ক তেঙ্কশিংনা খন্ন-নৈনবা পাংথোকই অমসুং মীৎয়েং শেমগৎপদা ইথিল পী। অদুম ওইনমক ঙসিগী প্রেজেন্তেসনশিং অমসুং অদোম্না শিংননিংঙাই ওইবা ৱাখল্লোনশিং পুখৎলকপগী মওং য়েংলবা মতুংদা, ঐহাক্না থাজৈ মদুদি ফোরম অসি মশামক অসি ইন্সতিত্যুসন অমা ওইরক্লি- মালেমগী থিংক তেঙ্ক অমা ওইরক্লি। করিগুম্বা মীওই মিলিয়ন কয়ানা অকক্নবা পান্দম অমগা লোইননা ময়েক শেংবা হীরমশিংদা পুন্না ৱাখল তামিন্নবা তারবদি, ৱাখল তামিন্নবদগী হেন্না ফবা এক্সরসাইজ অমা লৈব্রা? তশেংনমক, 'থিংক তেঙ্ক' হায়বা ৱাহৈসি মতিক চাদে। "তেঙ্ক" অসি পীকচরবসু মসিগী থৌরাং অসি সমুদ্রদগী হেন্না পাক চাউই অমসুং ৱাখল্লোনগী মওংদা মসিদগী হেন্না লুই। ঙসি অদোম্না খন্ন-নৈনখিবা হীরমশিং-অখন্ননা ৱুমেন-লেদ দিবেলপমেন্ত অমসুং দিমোক্রেসীদা নহাশিংগী শরুক য়াবা- অসি মশক থোক্না মপুং ফানা খন্ন-নৈনখি। অদোমগী প্রজেন্তেসনশিং অসিনা ঐখোয়গী অমৃত জেনরেসন অসিনা চাউখৎলবা ভারত অমা শেমগৎনবা মতৌ করম্না লেপ্লবগে হায়বদু উৎলি। মখোয়না ভারতকী জেন-জেদকী মওং-মতৌসু উৎলি: ক্রিএতিব, কনফিদেন্ত অমসুং কম্মিতেদ। ঐহাক্না ঐহাক্কী নহা ওইরিবা মরুপশিং অমসুং য়ুবা ভারত ওর্গনাইজেসনগা মরী লৈনবা মীওই খুদিংমকপু থৌরম অসি মায়পাক্না পাংথোকপগীদমক থাগৎচরি।

মরুপশিং,

মমাংদা ঐনা ২০১৪গী মতাংদা পনখিবা মতমদা, মফম অসিদা লৈরিবা নহাক অয়াম্বনা চহি ৮ নৎত্রগা ১০ খক্তমক ওইরমগনি। মতম অদুদা অদোম্না পাউচেশিং পাবগী হৈনবী লৈরম্লোই। সরকারশিংদা ৱারেপ লৌবদা থিন্থবগী ক্রিরিতাইজ তৌবা অমসুং ৱারেপ লৌরবসু মখোয় অদু নীংথিনা থবক পাইখৎতবগী পোলিসী পেরালাইসিসকী মতম অদু উরমলোই। চৎন-কাঙলোন অমসুং কাংলোনশিং অসিনা নহাশিংনা অনৌবা অমা তৌবগী ৱাখল্লোন ফাওবা শাগৎপা ঙমহন্দে। নহাশিংগী খোঙথাং খুদিংমক্তা অথিংবা কয়া থমখি।

মরুপশিং,

মতম অদুদা, একজামিনেসন নত্ত্রগা থবক অমগীদমক্তা এপ্লাই তৌবগুম্না অচম্বা থবক অমা তৌবদা, ওফিস অমদগী ওফিস অমদা চত্তুনা সর্তিফিকেৎ অমা লৌবা মথৌ তাই। ফীশিং পীবগীদমক্তা বেঙ্ক অমসুং পোস্ত ওফিসশিংদা চৎতুনা দিমান্দ দ্রাফতশিং লৌবা মথৌ তাই। বিজিনেস অমা হৌরকপদা অপীকপা লোন অমা লৌরবসু গেরেন্তী ময়াম অমা মথৌ তাই। ঙসিদি, অসিগুম্বা থৌওংশিং অসি থাজবা ঙমলমলোই, অদুবু মসিদি চহি তরাগী মমাংদা ওইরম্মি।

মরুপশিং,

স্তার্ত-অপশিংগী মরমদা অদোম্না মফম অসিদা ঙাংখি, অসুম্না স্তার্ত-অপ ইকোসিস্তেমগী অহোংবা অসি ঐহাক্না শন্দোক্না তাকপীবা পাম্মি। স্তার্ত-অপ কলচর অসি মালেমগী ওইনা চহি তরাগী খুজিং কয়াগী মমাংদা হৌরক্লবসু, ভারতনা মসিগী মতাংদা হৌজিক ফাওবদা য়াম্না খন্ন-নৈনখিদে। ২০১৪ ফাওবদা লৈবাক অসিদা রেজিস্তর তৌরবা স্তার্ত-অপ ৫০০দগী তাখি। সেক্তর খুদিংমক্তা সরকারগী কন্ত্রোল য়াম্না লৈবনা নহা ওইরিবা তেলেন্তশিংদা ইনোভেসনগী খুদোংচাবা কয়া পীখিদে।

মরুপশিং,

ঐহাক্না ঐহাক্কী লৈবাক অসিগী নহারোলশিংদা থাজবা থম্লি অমসুং অদোমগী তৌবা ঙম্বশিংদা থাজবা থম্লি। মরম অদুনা ঐখোয়না তোঙানবা লম্বী অমা খনখি। নহারোলশিংবু ময়াইদা থমদুনা ঐখোয়না রিফোর্ম অমমম পুরকখি। অমসুং মসিদগী ভারত্তা স্তার্ত-অপ রিভোলুসন অসি তশেংনা খোঙজেল য়াংখৎলকখি। ইজ ওফ দুইং ব্যুজিনেস রিফোর্মশিং, স্তার্ত অপ ইন্দিয়া, দিজিতেল ইন্দিয়া, ফন্দ ওফ ফন্দশিং, অমসুং তেক্স অমসুং কমপ্লাইন্স সিম্প্লিফিকেসন অসিগুম্বা থৌরাং কয়া পায়খৎখি। মমাংদা সরকারনা মপুং ফানা দোমিনেৎ তৌরম্বা সেক্তরশিং অসি নহাশিংনা লুচিংবা ইন্নোবেসন অমসুং এন্তরপ্রিন্যুওরশিপকীদমক হাংদোকখি। হায়রিবা হোৎনরিবশিং অসিগী ইম্পেক্ত অসি মশামক্না মায় পাকপগী মশক অমা ওইরক্লি।

মরুপশিং,

স্পেস সেক্তরবু খুদম অমা ওইনা লৌরসি। চহি মঙা নৎত্রগা তরুক্কী মমাংদা, স্পেস সেক্তরদা খুমাং চাউশিলহন্নবগী থৌদাং অসি ইসরোগী খক্তদা লৈরম্মি। ঐখোয়না স্পেস সেক্তরবু প্রাইবেৎ এন্তর্প্রাইজকীদমক হাংদোকখি, তঙাই ফদবা ফ্রেমৱার্কশিং শেমখি, অমসুং সপোর্তিং ইন্সতিত্যুসনশিং লিংখৎখি। মসিনা মরম ওইদুনা, ঙসি ভারতকী স্পেস সেক্তরদা স্তার্ত-অপ ৩০০ হেনবনা থবক পায়খৎলি। অতেনবা মতমগী মনুংদা, ঐখোয়গী স্তার্ত-অপ স্কাইরুৎ এরোস্পেসনা বিক্রম-এস রোকেত শেমগৎলে। অতোপ্পা স্তার্ত-অপ, এগনিকুল কোস্মোসনা মালেমগী অহানবা থ্রি দি প্রিন্ত তৌরবা ইঞ্জিন পুথোক্তুনা মালেমবু থাগৎখি। মসি পুম্নমক অসি স্তার্ত-অপশিংগী শক্তিগী মহৈনি। ভারতকী স্পেস স্তার্ত-অপশিংনা হৌজিক চাং নাইনা মখোয়গী তৌবা ঙম্বশিং অদু উৎলি।

মরুপশিং,

হৌজিক ঐহাক্না অদোমদা ৱাহং অমা হংজগে। করিগুম্বা উরিবা দ্রোনশিংগী মখল খুদিংমক্কী অথিংবা পুং ২৪ চুপ্না লৈরম্বা তারবদি করি থোক্লমগনি হায়বসি খল্লু। মমাংদা ওইখিবা ফিভম অদু অদুখক্তনি। ঐখোয়গী লৈবাক অসিদা, ফ্লাইং অমসুং মেন্যুফেকচরিং দ্রোন অনিমক আইনগী লাং অমদা থুহনখি। লাইসেন্স অমা লৌবা হায়বসি চীং অমদা চঙলকপগা মান্নৈ, অমসুং মসিগী ইসু অসি সেক্যুরিতীগী মীৎয়েংদগী খক্তদা য়েংখি। ঐখোয়না অনৌবা কাংলোনশিং পুথোকখি অমসুং মখোয়বু লায়থোকহনখি। মসিনা মরম ওইদুনা, নহা কয়া অমা ঙসিদি দ্রোনগা মরী লৈনবা সেক্তরদা মাংলোমদা চঙবগী খুদোংচাবা ফংলি। লানফমদা, মেদ ইন ইন্দিয়া দ্রোনশিংনা লৈবাক অসিগী য়েক্নবশিংবু মায় থিবা পীরি। অমসুং লৌউ-শিংউগী লমদা, ঐখোয়গী নমো দ্রোন দিদিগী ইচিল-ইনাওশিংনা লৌউ-শিংউদা দ্রোন তেক্নোলোজী শীজিন্নরি।

মরুপশিং,

ঙল্লিঙৈ মতমদা দিফেন্স সেক্তর অসি গবর্নমেন্ত কম্পেনীশিংদা মপুং ফানা মখা পোল্লি। ঐখোয়গী সরকারনা মসিসু হোংদোকখি অমসুং স্তার্ত-অপশিংগীদমক ভারতকী দিফেন্স ইকোসিস্তেমগী থোঙ হাংদোকখি। মসিনা ঐখোয়গী নহারোলশিংদা অচৌবা কান্নবা কয়া অমা পীরি। ঙসিদি, দিফেন্স স্তার্ত-অপ ১০০০ হেন্না ভারত্তা থবক তৌরি। নহা ওইরিবা এন্তরপ্রিন্যুওর অমনা দ্রোনশিং শাগৎলি, অতোপ্পা অমনা এন্তি-দ্রোন সিস্তেমশিং শেমগৎলি, খরনা এ.আই.দা য়ুম্ফম ওইবা কেমেরাশিং শেমগৎলি, অদুগা অতোপ্পশিংনা রোবোতিক্সকী লমদা থবক তৌরি।

মরুপশিং,

দিজিতেল ইন্দিয়ানা ভারত্তা ক্রিএতরশিংগী অনৌবা কম্ম্যুনিতী অমসু শেমখ্রে। ঙসিদি, ভারতনা ওরেঞ্জ ইকোনোমী হায়বদি, কলচর, কন্তেন্ত, অমসুং ক্রিয়েতিবিতীদা মমাংদা অমুক্তা ওইখিদ্রিবা মওংদা চাউখৎলক্লি। ভারত অসি মীদিয়া, ফিল্ম, গেমিং, ম্যুজিক, দিজিতেল কন্তেন্ত অমসুং ভি.আর.এক্স.আর. তেক্নোলোজীশিংগুম্বা লমশিংদা মালেমগী মরুওইবা মফম অমা ওইরক্লি। মফম অসিদা পীখিবা প্রেজেন্তেসন অমদা ঐখোয়গী কলচর পুথোক-পুশিন তৌবগী মতাংদা ঙাংখি। মফম অসিদা লৈরিবা নহাশিংদা ঐনা হায়জরি মদুদি ঐখোয়গী মফমদা ৱারী অমসুং ৱারীমচা কয়া অমা লৈরি। রামায়ন, মহাভারত অমসুং অতৈ কয়া অমসু লৈরি। ঐখোয়না মখোয়শিং অসি গেমিংগী মালেমদা পুশিল্লকপা য়াগদ্রা? মালেমগী ওইনা, গেমিং অসি অচৌবা কৈথেল অমসুং অচৌবা শেন্মিৎলোন অমনি। ঐখোয়না ঐখোয়গী পুৱারীগী ৱারীশিংদা য়ুম্ফম ওইবা অনৌবা গেমশিং শেম্বা য়াই। ঐখোয়গী হনুমান জীনা মালেম শিনবা থুংনা লৈরিবা গেমরশিংগী ৱাখল্লোনবু থাগৎপা ঙম্মি। মতৌ অসুম্না, ঐখোয়গী কলচর অসি তেক্নোলোজীবু মেদিয়ম ওইনা শিজিন্নদুনা মোদর্ন ওইবা মওংদা এক্সপোর্ত তৌগনি। ঙসিসু, ভারতকী স্তার্ত-অপ কয়া অমা ঐহাক্না উবা ফংলি। মখোয়না গেমশিংগী খুত্থাংদা ভারতকী ৱারীশিং অদু ফজনা উৎলি। মসিনা অঙাংশিংনা শান্নরিঙৈদা ভারতপু হেন্না ময়েক শেংনা খঙবা ঙমহল্লি।

মরুপশিং,

ৱার্ল্দ ওদিও-ভিজুএল এন্দ এন্তর্তেন্মেন্ত সমিৎ (ৱেবস) অসি নহা ওইরিবা ক্রিএতিবশিংগীদমক শক্তি লৈরবা লোঞ্চপেদ অমা ওইরক্লি। অদোম্না সেক্তর অমা হেক্তদগী ওইরবসু, ঙসিদি ভারতনা অপুনবা ওইথোকপা য়াবা কয়াগী থোঙ হাংলি। মরম অদুনা, থৌরম অসিগা মরী লৈনরিবা নহা পুম্নমক্তা, অমসুং লৈবাক অসিগী নহা পুম্নমক্তা ঐহাক্না হায়জরি মদুদি: অদোমগী ৱাখল্লোনগা লোয়ননা মাংলোমদা চংশিনবিয়ু, রিস্ক লৌবদা পন্থগনু। সরকারনা অদোমগা লোইননা পুন্না চৎলি।

মরুপশিং,

হৌখিবা চহি তরা অসিদা, ঐখোয়না হৌদোকখিবা অহোংবা অমসুং রিফোর্মশিংগী পরিং অসি রিফোর্ম এক্সপ্রেস অমা ওইরক্লি। রিফোর্মশিং অসিগী ময়াইদা অদোম- ঐখোয়গী নহারোলশিংগী শক্তি লৈরি। জি.এস.তি.গী নেক্স জেনরেসনগী রিফোর্মশিংনা নহাশিং অমসুং ওন্তরপ্রিন্যুওরশিংগীদমক প্রোসেসশিং অসি হেন্না লায়থোকহল্লে। হৌজিক্তি লুপা লাখ ১২ ফাওবগী ইনকম অসি তেক্স ফ্রি ওইরে। মসিনা থবক শুবা হৌরকপা নত্ত্রগা অনৌবা বিজিনেস হৌরকপা মীওইশিংগী সেভিংগী পোতেন্সিএল অদু য়াম্না হেনগৎহল্লি।

মরুপশিং,

ঙসিদি, ইলেক্ত্রিসিতী অসি মঙালগী সোর্স অমা খক্তা নত্তে হায়বসি অদোম পুম্নমক্না খঙনরবনি। এ.আই. অমসুং দেতা সেন্তরদগী সেমিকন্দক্তর অমসুং মেন্যুফেকচরিং ফাওবদা, মোদর্ন ইকোসিস্তেম খুদিংমক্তা ইনর্জী য়াম্না মথৌ তাই। মসিনা মরম ওইদুনা ভারতনা এস্যুর্দ ইনর্জী ফংহল্লি। সিভিল ন্যুক্লিয়র ইনর্জীগা মরী লৈনবা রিফোর্মশিং- শান্তি এক্ত অসি পান্দম অসিগা লোয়ননা পায়খৎলি। মসিনা ন্যুক্লিয়র সেক্তরদা অনৌবা থবক লিশিং কয়া অমা লৈহল্লগনি অমসুং অতোপ্পা সেক্তরশিংদা মল্তিপ্লাইয়র ইফেক্ত মপাঙ্গল লৈহল্লগনি।

মরুপশিং,

মালেমগী তোঙান তোঙানবা লৈবাকশিংদা তোঙান তোঙানবা মথৌ তাবশিং অমসুং দিমান্দশিং লৈ, অমসুং মখোয়গী থবক শুবা মীওইশিং লেপ্তনা হন্থরক্লি। ঐখোয়গী হোৎনরিবশিং অসি ভারতকী নহারোলশিংনা মালেমগী ওইনা ওইরক্লিবা খুদোংচাবশিং অদুগীদমক শেম-শারবনি। মরম অসিনা, স্কিল দিবেলপমেন্ত সেক্তরশিংদা লেপ্তনা রিফোর্মশিং পাংথোকপা অসি তঙাইফদে অমসুং ঐখোয়না মখোয়শিং অসি এক্তিব ওইনা পাংথোক্লি। অনৌবা নেস্নেল এজুকেসন পোলিসী হৌদোক্লবা মতুংদা, হায়র এজুকেসনগা মরী লৈনবা রেগুলেসনশিংসু রিফোর্ম তৌরি। মপান লৈবাক্কী য়ুনিভর্সিতীশিংনা হৌজিক ভারত্তা মখোয়গী কেম্পসশিং হাংলি। ইকুই কুইদ্রিঙৈদা, লুপা করোর লিশিং কয়াগী শেন থাদদুনা পি.এম. সেতু প্রোগ্রাম হৌদোকখি। ইনিসিএতিব অসিনা আই.তি.আই. লিশিং কয়া অমা অপগ্রেদ তৌরগনি। মসিনা ইন্দস্ত্রীগী হৌজিক্কী অমসুং তুংগী মথৌ তাবশিংগী মতুং ইন্না নহাশিংবু ত্রেনিং পীবা ঙম্লগনি। হৌখিবা চহিশিংদা, ভারতনা লৈবাক কয়াগা লোইননা ত্রেদ এগ্রীমেন্তশিং সাইন তৌনখ্রে, মসিনা ভারতকী নহারোলশিংগীদমক অনৌবা খুদোংচাবশিং পুরক্লি।

মরুপশিং,

লৈবাক অমত্তনা মশাদা থাজবা লৈতনা মশা মথন্তা মরোমদোম লেপচবা নৎত্রগা চাউখৎপা ঙম্লোই। ঐখোয়গী তৌবা ঙম্বশিং, ঐখোয়গী হেরিতেজ, অমসুং ঐখোয়গী খুৎলায়শিংদা চাউথোকচবগী পুক্নিং চিংশিনবা লৈতবনা ঐখোয়বু মপাঙ্গল হন্থহল্লি। ঐখোয়দা অচেৎপা ফিরেপ অমসুং ইকাই খুম্নবা অমা চঙই, অমসুং ঐখোয়না থৌনা অমসুং থাজবগা লোয়ননা মাংলোমদা চংশিনগদবনি। কোলোনিয়েল পেরিয়দকী মতমদা, ভারত মচাশিংগী ৱাখল্লোন অসি নমথদুনা থম্বা জেনরেসন অমা শেমগৎনবা এজুকেসন সিস্তেমগী খুত্থাংদা থবক তৌখিবা ব্রিতিশ পোলিতিসিয়ন আকৌলেগী মরমদা অদোম্না তাবা ফংই। মসিনা লমদমসিগী চৎনবীশিং, পোত্থোকশিং, অমসুং তৌবা ঙম্বশিংগা মরী লৈনবা ইনফোরিএরিতি কমপ্লেক্স অমা শেমগৎলকখি। মীরমদগী নৎত্রগা মপান্দগী লাকপা মীওই অমা ওইবসি হেন্না ৱাংবা থাক্কী গেরেন্তী অমা ওইনা লৌনরকখি। অসিগুম্বা ৱাখল্লোন অসি ঙসিদি চৎনগদ্রা? ঐখোয় পুন্না, ঐখোয়না ইচিল-ইনাওগী ৱাখল্লোন অসি লোইশিনগদবনি। ঙসিদগী চহি ১০গী মতুংদা, মাকৌলেগী থবকশিং অসিদগী চহি ২০০ চুপ্না চত্থখিগনি, অমসুং চহিচা অনিগী অরানবশিং অসি মুত্থৎপা অসি ঙসিগী মীরোল অসিগী থৌদাংনি। ঐখোয়না চহি ১০ লৈরি, অমসুং নহা ওইরিবা জেনেরেসন অসিনা মসিগী থবক অসি পাংথোক্কনি হায়না ঐহাক্না মপুং ফানা থাজৈ। নহা ওইরিবা নাগরিক খুদিংমক্না লৈবাক অসিবু ৱাখল্লোন অসিদগী লৌথোক্নবা ৱারেপ লৌগদবনি।

মরুপশিং,

ঐখোয়গী লাইরিকশিং অসিনা হায়রি অমসুং মসি মফম অসিদা স্তার্ত-অপ প্রজেন্তেসন অমদা পনখি- “আ নো ভাদ্রাহ ক্রাতাভো য়ান্তু বিস্বাতাহ” , হায়বদি লম্বী পুম্নমক্তগী অচুম্বা, অফবা, অমসুং কান্নবা ৱাখল্লোনশিং ঐখোয়গী মফমদা লাক্কদবনি। অদোম্না মালেমগী খ্বাইদগী ফবা থৌওংশিংদগী তমগদবনি, অদুবু অদোমগী ইশাগী হেরিতেজ অমসুং ৱাখল্লোনশিংবু হন্থনা য়েংবগী চৎনবী অদুন খুদুম চংহল্লোইদবনি। স্বামী বিবেকানন্দগী পুন্সিনা ঐখোয়দা তম্বীরম্বা অসিমক্নি। মহাক্না মালেম শীনবা থুংনা চৎখি, মসিগী মপাঙ্গলশিংবু থাগৎখি, অদুবু ভারতকী সিভিলাইজেসনগী মতাংদা শন্দোরক্লিবা অরানবা ৱাখল্লোনশিংবু লেপ্পা লৈতনা শিংনখি। মহাক্না ৱাখল্লোনশিং অসি মীয়াম্না পাম্নৈ হায়বগীদমক্তা য়াখিদে। মসিগী মহুত্তা মহাক্না খুন্নাইগী ফত্তবশিং থেংনখি অমসুং হেন্না ফবা ভারত অমা শেমগৎনবা হোৎনখি। চপ মান্নবা ৱাখল্লোনগা লোইননা, ঐখোয়গী নহারোলগী শক্তি অসি হৌজিক মাংলোমদা চংশিনবা তাই। অমসুং মতম অমত্তদা, নহাক্কী ফিৎনেস ফজনা য়েংশিনবিয়ু - শান্নবিয়ু, নোকপিয়ু, অমসুং মপুং ফানা হিংবিয়ু।

ঐহাক্না অদোমগী তৌবা ঙম্বশিং অমসুং অদোমগী ইনর্জীদা থাজবা থম্লি। হায়রিবা ৱাহৈশিং অসিগা লোইননা, ঐহাক্না অমুক্কা হন্না নখোয় পুম্নমকপু নেস্নেল য়ুথ দেনা লাকপদা নুংঙাইবা ফোংদোকচরি। ঐহাক্না অদোমদা অরোইবা পাউতাক অমা পীবা পাম্মি: রাজ্যশিংগী মরক্তা চাউখৎ-থৌরাংগী মতাংদা খন্ন-নৈনবগীদমক্তা রাজ্যগী থাক্তা অসিগুম্বা দাইলোগ প্রোগ্রাম অসিসু শীনগদবনি। মদুগী মতুংদা, ঐখোয়না দিস্ত্রিক্তকী থাক্তা ৱারী শানবগী মায়কৈদা চংশিনগদবনি। মতৌ অসুম্না, ঐখোয়না থিঙ্ক তেঙ্ক হায়না কৌরিবা অসি থিঙ্ক ৱেব অমা ওইহনবা য়াই। ঐহাক্কী য়াইফ-পাউজেলশিং মতম চুপ্পগী অদোমগা লোইনগনি।

হন্না-হন্না থাগৎচরি মরুপশিং।

***