കേന്ദ്രഭരണ പ്രദേശമായ ലക്ഷദ്വീപിൽ 2026 ജനുവരി 12 മുതൽ 16 വരെ ഇന്ത്യൻ നാവികസേനയുടെ നേതൃത്വത്തിൽ സംയുക്ത സൈനിക മൾട്ടി–സ്പെഷ്യാലിറ്റി മെഡിക്കൽ ക്യാമ്പ് സംഘടിപ്പിക്കുന്നു. ആരോഗ്യപരിചരണ രംഗത്തെ ഗുണമേന്മയുള്ള സേവനങ്ങൾ പൊതുജനങ്ങളിലേക്ക് എത്തിക്കുക, സാമൂഹിക ക്ഷേമം ശക്തിപ്പെടുത്തുക, സിവിൽ–സൈനിക സഹകരണം ദൃഢമാക്കുക എന്നീ ലക്ഷ്യങ്ങളോടെയാണ് സംരംഭം നടപ്പാക്കുന്നത്. പൊതുജനാരോഗ്യത്തോടുള്ള ഇന്ത്യൻ നാവികസേനയുടെ അചഞ്ചലമായ പ്രതിബദ്ധതയാണ് ഈ ക്യാമ്പിലൂടെ വ്യക്തമാകുന്നത്.

അഞ്ചുദിവസം നീണ്ടുനിൽക്കുന്ന ഈ ആരോഗ്യ ക്യാമ്പ് നാവികസേന മേധാവി അഡ്മിറൽ ദിനേഷ് കെ. ത്രിപാഠി ഉദ്ഘാടനം ചെയ്യും. ലക്ഷദ്വീപിലെ ജനങ്ങൾക്ക് സമഗ്രവും ഗുണമേന്മയുള്ളതുമായ ആരോഗ്യപരിചരണം ഉറപ്പാക്കുകയെന്നതാണ് ക്യാമ്പിൻ്റെ മുഖ്യലക്ഷ്യം. ഇതിൻ്റെ ഭാഗമായി വിവിധ വിഭാഗങ്ങളിലെ വിദഗ്ധ ഡോക്ടർമാരുടെ ചികിത്സാ സേവനങ്ങളും വിശദമായ ആരോഗ്യ പരിശോധനകളും ലഭ്യമാക്കും. കൂടാതെ തിമിര ശസ്ത്രക്രിയ ഉൾപ്പെടെയുള്ള തിരഞ്ഞെടുക്കപ്പെട്ട ശസ്ത്രക്രിയകളും ക്യാമ്പിൻ്റെ ഭാഗമായി നടപ്പാക്കും.

നാവിക ദിന ബോധവത്കരണ പ്രവർത്തനങ്ങളുടെ ഭാഗമായി, ലക്ഷദ്വീപിലെ നിലവിലുള്ള ആരോഗ്യസംവിധാനങ്ങളെ ശക്തിപ്പെടുത്തുകയും പിന്തുണയ്ക്കുകയും ചെയ്യുന്നതിനായി നാവികസേന തുടർച്ചയായി ഇത്തരം മെഡിക്കൽ ക്യാമ്പുകൾ സംഘടിപ്പിച്ചുവരുന്നു. കഴിഞ്ഞ കുറച്ചു വർഷങ്ങളായി ലക്ഷദ്വീപിലെ ഭൂരിഭാഗം ദ്വീപുകളിലും പ്രാഥമിക ചികിത്സ, ദന്ത ശസ്ത്രക്രിയകൾ തുടങ്ങിയ സേവനങ്ങൾ ഉൾപ്പെടെയുള്ള മെഡിക്കൽ ക്യാമ്പുകൾ വിജയകരമായി നടത്തിവരുന്നു. ആരോഗ്യരംഗത്ത് കൈവരിച്ച പുരോഗതി, ലക്ഷദ്വീപ് ഭരണകൂടത്തിൻ്റെ നിരന്തരമായ പിന്തുണ, പ്രാദേശിക സമൂഹങ്ങളുടെ മികച്ച സഹകരണവും പ്രതികരണവും എന്നിവ പരിഗണിച്ചാണ് ഈ വർഷം മൾട്ടി–സ്പെഷ്യാലിറ്റി മെഡിക്കൽ ക്യാമ്പായി ഇതിനെ വിപുലീകരിക്കുന്നത്.

ജില്ലാ ആശുപത്രികൾ, സാമൂഹികാരോഗ്യ കേന്ദ്രങ്ങൾ, പ്രാഥമികാരോഗ്യ കേന്ദ്രങ്ങൾ എന്നിവ ഉൾക്കൊള്ളുന്ന ശക്തമായ സർക്കാർ ആരോഗ്യസംവിധാനങ്ങൾ ലക്ഷദ്വീപിൽ നിലവിലുണ്ട്. ഈ മൾട്ടി–സ്പെഷ്യാലിറ്റി മെഡിക്കൽ ക്യാമ്പ്, നിലവിലുള്ള ആരോഗ്യ സംവിധാനങ്ങൾക്ക് അനുപൂരകമായി പ്രവർത്തിക്കുന്നതിനോടൊപ്പം, വിദഗ്ധ ഡോക്ടർമാരുടെയും സൂപ്പർ–സ്പെഷ്യാലിറ്റി ഡോക്ടർമാരുടെയും ചികിത്സകൾ ഏകോപിതവും രോഗീകേന്ദ്രിതവുമായ രീതിയിൽ പൊതുജനങ്ങൾക്ക് ലഭ്യമാക്കുന്നതിനായും രൂപകൽപ്പന ചെയ്തതാണ്. രോഗങ്ങളുടെ പ്രാരംഭഘട്ട നിർണയം, സമയബന്ധിത ചികിത്സാ ഇടപെടലുകൾ, സാധാരണ രോഗങ്ങളും മാറാ രോഗങ്ങളും ഉൾപ്പെടെയുള്ളക്ക് ക്യാമ്പ് പ്രത്യേക ഊന്നൽ നൽകും.

ഈ മൾട്ടി–സ്പെഷ്യാലിറ്റി മെഡിക്കൽ ക്യാമ്പ് അഗത്തി, കവരത്തി, ആന്ത്രോത്ത്, അമിനി, മിനിക്കോയ് എന്നീ ദ്വീപുകളിലായി സംഘടിപ്പിക്കും. കരസേന, നാവികസേന, വ്യോമസേന എന്നീ മൂന്ന് സേനാവിഭാഗങ്ങളിൽ നിന്നുള്ള പരിചയസമ്പന്നരായ മെഡിക്കൽ ഓഫീസർമാരും വിദഗ്ധരുമടങ്ങുന്ന സംയുക്ത സൈനിക മെഡിക്കൽ സംഘമാണ് ക്യാമ്പിന് നേതൃത്വം നൽകുന്നത്. മൂന്ന് സേനകളിലെയും വിദഗ്ധരുടെ സജീവ പങ്കാളിത്തം വിപുലമായ ക്ലിനിക്കൽ പരിജ്ഞാനം ഉറപ്പാക്കുകയും, സമഗ്രവും ഏകീകൃതവുമായ ആരോഗ്യപരിചരണം പൊതുജനങ്ങൾക്ക് ലഭ്യമാക്കുകയും ചെയ്യും.