કેન્દ્રીય રેલવે, માહિતી અને પ્રસારણ તથા ઈલેક્ટ્રોનિક્સ અને ઈન્ફોર્મેશન ટેકનોલોજી મંત્રી શ્રી અશ્વિની વૈષ્ણવે આજે ભારતની પ્રથમ વંદે ભારત સ્લીપર ટ્રેનનું નિરીક્ષણ કરવા માટે નવી દિલ્હી રેલવે સ્ટેશનની મુલાકાત લીધી હતી.

નિરીક્ષણ દરમિયાન, કેન્દ્રીય મંત્રીએ બેઠક અને બર્થની વ્યવસ્થા, આધુનિક ઇન્ટિરિયર, સુરક્ષા વિશેષતાઓ અને મુસાફરોની સુવિધા પ્રણાલી સહિત સ્લીપર કોચનું નજીકથી નિરીક્ષણ કર્યું હતું. મુસાફરોની સલામતી અને ઓનબોર્ડ સુવિધાઓ પર વિશેષ ભાર મૂકવામાં આવ્યો છે.

આ ટ્રેન ઓટોમેટિક દરવાજા, કવચ (KAVACH) સુરક્ષા પ્રણાલી, સુધારેલી ફાયર સેફ્ટી મિકેનિઝમ, જંતુનાશક ટેકનોલોજી અને તમામ કોચમાં CCTV સર્વેલન્સ જેવી સુવિધાઓથી સજ્જ છે. મુસાફરોની સુવિધા અને સ્વચ્છતા પર ભારતીય રેલવેના ધ્યાન પર ભાર મૂકતા, વધુ સારી સ્વચ્છતા સુનિશ્ચિત કરવા અને પાણીના છાંટા અટકાવવા માટે, ખાસ કરીને શૌચાલયોમાં નવીન ડિઝાઇન તત્વો પર પણ ભાર મૂકવામાં આવ્યો છે.

પ્રથમ વંદે ભારત સ્લીપર ટ્રેન આસામના ગુવાહાટી અને પશ્ચિમ બંગાળના હાવડા વચ્ચે દોડશે, જે દેશમાં લાંબા અંતરની રાત્રિ રેલવે મુસાફરીમાં એક પરિવર્તનકારી પગલું હશે. ટ્રેનની ટ્રાયલ, પરીક્ષણ અને પ્રમાણપત્રનું સંપૂર્ણ ચક્ર સફળતાપૂર્વક પૂર્ણ થઈ ગયું છે. જાન્યુઆરી મહિનામાં માનનીય પ્રધાનમંત્રી શ્રી નરેન્દ્ર મોદી આ રૂટ પર પ્રથમ વંદે ભારત સ્લીપર ટ્રેનને લીલી ઝંડી બતાવી રવાના કરશે.

કેન્દ્રીય મંત્રીએ રેલવે અધિકારીઓ સાથે વાતચીત કરી હતી અને ટ્રેનના ટેકનિકલ પાસાઓની સમીક્ષા કરી હતી અને નોંધ્યું હતું કે વંદે ભારત સ્લીપર ટ્રેન સંપૂર્ણ રીતે તૈયાર છે. ટ્રેનની 16-કોચની ફોર્મેશનમાં 11 AC થ્રી-ટીયર કોચ, ચાર AC ટુ-ટીયર કોચ અને એક AC ફર્સ્ટ-ક્લાસ કોચનો સમાવેશ થાય છે, જેમાં અંદાજે 823 મુસાફરો સમાવી શકાય છે. તે અદ્યતન સસ્પેન્શન સિસ્ટમ, અર્ગોનોમિક ઇન્ટિરિયર અને ઉચ્ચ સેનિટેશન ધોરણો સાથે શ્રેષ્ઠ મુસાફરીનો અનુભવ આપવા માટે તૈયાર કરવામાં આવી છે.

વંદે ભારત સ્લીપર ટ્રેનના મુસાફરો તેમની મુસાફરી દરમિયાન પ્રદેશ-વિશિષ્ટ ભોજનનો આનંદ માણી શકશે. ગુવાહાટીથી ઉપડતી ટ્રેનમાં અસલી આસામી ભોજન હશે, જ્યારે કોલકાતાથી શરૂ થતી ટ્રેનમાં પરંપરાગત બંગાળી સ્વાદિષ્ટ વાનગીઓ પીરસવામાં આવશે, જે મુસાફરોને સાંસ્કૃતિક રીતે સમૃદ્ધ ભોજનનો અનુભવ સુનિશ્ચિત કરશે.

180 કિમી પ્રતિ કલાકની ડિઝાઇન સ્પીડ ધરાવતી આ સેમી-હાઈ-સ્પીડ ટ્રેન મુસાફરો કેન્દ્રિત સેવાઓ અને ટેકનોલોજીકલ ઇનોવેશન પર ભારતીય રેલવેના ફોકસને પ્રતિબિંબિત કરે છે.

SM/JY/GP/JD