રાષ્ટ્રીય કેડેટ કોર્પ્સ (NCC) ગણતંત્ર દિવસ શિબિર (RDC) 2026નો પ્રારંભ 30 ડિસેમ્બર, 2025ના રોજ દિલ્હી કેન્ટના કારિઅપ્પા પરેડ ગ્રાઉન્ડ ખાતે સર્વ ધર્મ પૂજા સાથે થયો હતો. એક મહિના સુધી ચાલનારા આ શિબિરમાં શ્રેષ્ઠ કેડેટ સ્પર્ધા, નાની હથિયારોની ફાયરિંગ, કર્તવ્ય પથ પર ગણતંત્ર દિવસની પરેડ દરમિયાન માર્ચિંગ ટુકડી અને ફ્લેગ એરિયા ડિઝાઇનિંગ જેવી વિવિધ આંતર-નિર્દેશાલય સ્પર્ધાઓ અને કાર્યક્રમોનો સમાવેશ થાય છે.

આ વર્ષે 28 રાજ્યો અને 8 કેન્દ્રશાસિત પ્રદેશોમાંથી 898 ગર્લ્સ કેડેટ્સ સહિત કુલ 2,406 કેડેટ્સ ભાગ લઈ રહ્યા છે, જે આજ સુધીની સૌથી વધુ સંખ્યા છે. યુવા આદાનપ્રદાન કાર્યક્રમ (વાયઇપી) હેઠળ આ વર્ષે 25 મૈત્રીપૂર્ણ વિદેશી દેશો (એફએફસી) ના કેડેટ્સ અને અધિકારીઓ પણ આ ઉજવણીમાં ભાગ લેશે.

આ પ્રસંગે એનસીસીના મહાનિર્દેશક લેફ્ટનન્ટ જનરલ વીરેન્દ્ર વત્સે કેડેટ્સનું સ્વાગત કર્યું અને પ્રતિષ્ઠિત ગણતંત્ર દિવસ શિબિર માટે તેમની પસંદગી બદલ અભિનંદન પાઠવ્યા. તેમણે કેડેટ્સને ‘રાષ્ટ્ર પ્રથમ’ના સાચા ભાવથી ધર્મ, ભાષા અને જાતિના ભેદભાવને પાર કરીને ચારિત્ર્ય, પ્રામાણિકતા, નિઃસ્વાર્થ સેવા, સૌહાર્દ અને ટીમ વર્કના સર્વોચ્ચ ગુણો પ્રદર્શિત કરવા વિનંતી કરી.

પોતાના સૂત્ર ‘એકતા અને શિસ્ત’ ને જાળવી રાખીને, ગણતંત્ર દિવસ શિબિર દેશભરમાંથી એનસીસી કેડેટ્સને એકસાથે લાવે છે. આ શિબિર કેડેટ્સને તાલીમ અને સાંસ્કૃતિક આદાનપ્રદાન માટેની તકો પૂરી પાડવાની સાથે તેમનામાં દેશભક્તિ, શિસ્ત અને નેતૃત્વની ઊંડી ભાવના જગાડે છે.

SM/DK/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com