আজি গুজৰাটৰ আহমেদাবাদত ইণ্ডিয়ান মেডিকেল এছ’চিয়েশ্যনৰ উদ্যোগত অনুষ্ঠিত হোৱা আইএণএ নেটকন ২০২৫ ৰ ৰাষ্ট্ৰীয় সন্মিলনত কেন্দ্ৰীয় গৃহমন্ত্ৰী তথা সমবায় দপ্তৰৰ মন্ত্ৰী শ্ৰীযুত অমিত শ্বাহে ভাষণ দিয়ে। এই উপলক্ষে আয়োজিত অনুষ্ঠানত গুজৰাটৰ মুখ্যমন্ত্ৰী শ্ৰীযুত ভূপেন্দ্ৰ পেটেলকে ধৰি কেইবাজনো বিশিষ্ট ব্যক্তি উপস্থিত থাকে।

কেন্দ্ৰীয় গৃহমন্ত্ৰী তথা সমবায়  মন্ত্ৰী শ্ৰী অমিত শ্বাহে কয় যে যিকোনো প্ৰতিষ্ঠানে যেতিয়া ১০০ বছৰ সম্পূৰ্ণ কৰে তেতিয়া ই এক অতি দীঘলীয়া আৰু উল্লেখযোগ্য ইতিহাস এৰি থৈ যায়। যিকোনো প্ৰতিষ্ঠানে সন্মুখীন হোৱা প্ৰত্যাহ্বানসমূহ মোকাবিলা কৰাৰ বাবেও শতবাৰ্ষিকী অত্যন্ত গুৰুত্বপূৰ্ণ। তেওঁ কয় যে দেশৰ স্বাস্থ্য খণ্ডত জনসাধাৰণৰ সেৱাত আই এম এৰ জৰিয়তে লাভ কৰা সাফল্যসমূহ এবছৰৰ ভিতৰত উজ্জ্বল কৰি সমাজৰ প্ৰতিটো শ্ৰেণীলৈ লৈ যোৱা উচিত, কিয়নো এয়াই  হৈছে জনচেতনাত সেৱাৰ মনোভাৱ, কৰ্তব্যবোধ, আৰু সাফল্যৰ সৃষ্টিৰ সৰ্বোত্তম উপায়। একে সময়তে এই ক্ষেত্ৰত পঞ্জীয়নভুক্ত চিকিৎসা প্ৰেকটিচনাৰ (আৰ এম পি)ৰ পৰা বিশেষজ্ঞতালৈকে যি পৰিৱৰ্তন হৈছে, তাৰ লগত খাপ খুৱাই সময়ৰ লগত খোজ মিলাবলৈও এয়াই সঠিক মুহূৰ্ত।

শ্ৰী অমিত শ্বাহে কয় যে স্বাস্থ্য খণ্ড মূলতঃ সেৱাৰ ক্ষেত্ৰ। গুৰুতৰভাৱে অসুস্থ ব্যক্তি এজন চিকিৎসকৰ ওচৰলৈ গ’লে তেওঁৰ চিকিৎসা কৰা চিকিৎসকজনৰ মাজতেই তেওঁ ঈশ্বৰক দেখা পায়। তেওঁ কয় যে ১০০ বছৰৰ আগতে ফ্ৰেমৱৰ্ক কৰা নৈতিকতাৰ মাত্ৰা আৰু পৰিসৰ এতিয়া অপ্রাসংগিক হৈ পৰিছে৷ ১০০ বছৰ সম্পূৰ্ণ হোৱাৰ লগে লগে এতিয়া স্বাস্থ্য খণ্ডত নৈতিক মূল্যবোধৰ মাত্ৰাসমূহ পুনৰ বিবেচনা কৰাৰ প্ৰয়োজনীয়তা আহি পৰিছে। তেওঁ আই এম এৰ প্ৰতিনিধিসকলক এই ক্ষেত্ৰখনৰ নৈতিকতাক পুনৰ সংজ্ঞায়িত কৰি বৰ্তমানৰ প্ৰয়োজনীয়তাৰ সৈতে মিলাই এটা দল গঠন কৰিবলৈ আহ্বান জনায়। শ্ৰী শ্বাহে কয়  যে কেৱল চিকিৎসা শিক্ষা লাভ কৰিলেই এজন সফল চিকিৎসক নহয়; বৰঞ্চ এই ক্ষেত্ৰত নৈতিকতাৰ সকলো মাত্ৰাও চিকিৎসা শিক্ষাৰ এক অবিচ্ছেদ্য অংশ হ'ব লাগে আৰু এই দায়িত্ব আই এম এৰ ওপৰত আছে।

তেওঁ কয় যে নৈতিকতা জাপি দিব নোৱাৰি, কোনো আইনৰ জৰিয়তেও বলৱৎ কৰিব নোৱাৰি, কাৰণ এয়া  এক নৈতিক বিষয়। কেন্দ্ৰীয় গৃহমন্ত্ৰীয়ে কয় যে যদি আই এম এয়ে নৈতিকতাৰ সকলো মাত্ৰাক পুনৰ সংজ্ঞায়িত কৰে আৰু ভাৰত চৰকাৰক পৰামৰ্শ দিয়ে যে সেইবোৰক চিকিৎসা পাঠ্যক্ৰমৰ অংশ হিচাপে গ্ৰহণ কৰিব লাগে , তেন্তে অনাগত দিনত সেৱাক পৱিত্ৰ কৰ্তব্য হিচাপে গণ্য কৰা চিকিৎসকৰ সংখ্যা বৃদ্ধি পাব, যিটো আজি অতি প্ৰয়োজনীয় কথা হৈ পৰিছে।

তেওঁ লগতে কয় যে যদি এইখিনি সম্ভৱ হয় তেন্তে এক শতিকাৰ নিষ্ঠাবান সেৱাৰ ফলত জনসাধাৰণৰ মনত যি সন্মান আৰু বিশ্বাস গঢ় লৈ উঠিছে সেয়া আগন্তুক বহু শতিকালৈকে টিকি থাকিব।

কেন্দ্ৰীয় গৃহমন্ত্ৰী শ্ৰী অমিত শ্বাহে কয় যে প্ৰধানমন্ত্ৰী শ্ৰী নৰেন্দ্ৰ মোদীয়ে বিকশিত ভাৰত নিৰ্মাণৰ সংকল্প সকলো নাগৰিকৰ সন্মুখত ৰাখিছে, যাতে ২০৪৭ চনত যেতিয়া দেশখনে স্বাধীনতাৰ ১০০ বছৰ উদযাপন কৰিব তেতিয়া এনে এটা খণ্ড থাকিব নালাগিব য’ত ভাৰতে বিশ্বৰ ভিতৰত প্ৰথম স্থান লাভ কৰিব নোৱাৰে। তেওঁ কয় যে এই লক্ষ্যত উপনীত হ’বলৈ হ’লে  সুস্থ জনগাঁথনি সৃষ্টি কৰাটো প্ৰয়োজনীয়—মানসিক বা শাৰীৰিক বা শক্তি তথা  উৎসাহৰ দিশৰ পৰাই সেয়া হোৱা ভাল—আৰু এই প্ৰচেষ্টাত চিকিৎসকৰ ভূমিকা অতি গুৰুত্বপূৰ্ণ। তেওঁ কয়, মোদী চৰকাৰে এক বিকশিত ভাৰতত এক শক্তিশালী স্বাস্থ্য পৰিৱেশ তন্ত্ৰ গঢ়ি তুলিবলৈ প্ৰতিশ্ৰুতিবদ্ধ আৰু ইয়াত চিকিৎসকে নিৰ্ণায়ক ভূমিকা পালন কৰিব।

তেওঁ কয় যে এই উদ্দেশ্যেৰে ২০১৪ চনৰ পৰা ২০২৫ চনলৈকে এক সামগ্ৰিক দৃষ্টিভংগীৰে এক বৃহৎ স্বাস্থ্য পৰিৱেশ তন্ত্ৰ গঢ়ি তোলা হৈছে।শ্ৰী শ্বাহে উল্লেখ কৰে যে এই দিশত প্ৰথম পদক্ষেপ আছিল প্ৰতিটো ঘৰতে শৌচাগাৰ নিৰ্মাণৰ বাবে স্বচ্ছতা অভিযান আৰম্ভ কৰা। তেওঁ কয় যে এই অভিযানৰ স্বাস্থ্যৰ সৈতে গভীৰ সম্পৰ্ক আছে, কিয়নো চহৰ, গাঁও, আৰু নগৰৰ পৰিষ্কাৰ-পৰিচ্ছন্নতাই বহু ৰোগৰ সংক্ৰমণ ৰোধ কৰাত সহায় কৰে। একেদৰে যোগাসনক জীৱনৰ অংগ কৰি লোৱা লোকৰ সংখ্যা ৪০ শতাংশ বৃদ্ধি পাইছে।

শ্ৰী অমিত শ্বাহে কয় যে স্বাস্থ্য খণ্ডৰ সৈতে প্ৰত্যক্ষভাৱে জড়িত আয়ুষ্মান ভাৰত অভিযান কাৰ্যকৰী কৰা হৈছে যাৰ অধীনত সমগ্ৰ ভাৰততে দৰিদ্ৰ লোকসকলক ৫ লাখ টকা পৰ্যন্ত বিনামূলীয়া চিকিৎসা প্ৰদান কৰা হৈছে আৰু কিছুমান ৰাজ্যৰ অতিৰিক্ত আঁচনিৰ বাবে দেশৰ প্ৰায় ৭০ শতাংশত ১৫ লাখ টকা  পৰ্যন্ত বিনামূলীয়া চিকিৎসা প্ৰদান কৰা হৈছে। তেওঁ কয় যে আয়ুষ্মান ভাৰত অভিযানে ভাৰতৰ স্বাস্থ্য খণ্ডত গুণগত পৰিৱৰ্তন আনিছে।

মিছন ইন্দ্ৰধনুষৰ জৰিয়তে ভাৰত চৰকাৰে এক প্ৰতিষেধক অভিযান আৰম্ভ কৰে যিয়ে শিশুসকলক প্ৰাথমিক বয়সৰ পৰাই বিভিন্ন ৰোগৰ পৰা ৰক্ষা কৰাত সহায় কৰি আহিছে। তেওঁ কয় যে সামূহিক স্বাস্থ্য কেন্দ্ৰ (চি এইচ চি) আৰু প্ৰাথমিক স্বাস্থ্য কেন্দ্ৰ (পি এইচ চি)ৰ আন্তঃগাঁথনি শক্তিশালী কৰাৰ বাবে ১.৬৫ লাখ কোটি টকা বিনিয়োগ কৰা হৈছে। সুলভ মূল্যৰ জেনেৰিক ঔষধৰ বৃহৎ নেটৱৰ্কো আৰম্ভ কৰা হৈছে আৰু জি এছ টি আঁতৰাই বীমা সস্তা কৰি তোলা হৈছে। তেওঁ লগতে কয় যে এইমছৰ সম্প্ৰসাৰণ অব্যাহত আছে, আৰু অতি শীঘ্ৰে টেলিমেডিচিন আৰু ভিডিঅ’গ্ৰাফীৰ জৰিয়তে এইমছৰ পৰা পি এইচ চি আৰু চি এইচ চিলৈ পৰামৰ্শ প্ৰদানৰ বাবে এক কাৰ্যসূচী আৰম্ভ কৰা হ’ব।

গৃহমন্ত্ৰীগৰাকীয়ে কয় যে ২০১৩–১৪ চনত কেন্দ্ৰৰ স্বাস্থ্য বাজেট মাত্ৰ ৩৭ হাজাৰ কোটি টকা আছিল, আনহাতে আজি ই ১.২৮ লাখ কোটি টকালৈ বৃদ্ধি পাইছে—এয়া ১০২ শতাংশ বৃদ্ধি—আৰু আঁচনিসমূহ কাগজৰ মাজতে আবদ্ধ নাথাকি  ৰূপায়ণ কৰা হৈছে। তেওঁ কয় যে ১.৮১ লাখ আয়ুষ্মান ভাৰত স্বাস্থ্য কেন্দ্ৰই দৰিদ্ৰ লোকৰ বাবে আশীৰ্বাদ হিচাপে প্ৰমাণিত হৈছে।

আয়ুষ্মান ভাৰত, মিছন ইন্দ্ৰধনুষ, মেলেৰিয়া ৯৭ শতাংশ হ্ৰাস, ক'লা-জ্বৰ  ৯০ শতাংশতকৈ অধিক হ্ৰাস, ডেংগুৰ মৃত্যুৰ হাৰ ১ শতাংশলৈ হ্ৰাস, মাতৃৰ মৃত্যুৰ হাৰ ২৫ শতাংশ হ্ৰাস, প্ৰতিষ্ঠানিক প্ৰসৱৰ হাৰ ২০ শতাংশ বৃদ্ধি আৰু শিশুৰ মৃত্যুৰ হাৰ আধালৈ হ্ৰাস—এই সকলোবোৰ সম্ভৱ হৈছে কাৰণ আঁচনিসমূহ কেৱল ঘোষণাতে সীমাবদ্ধ হৈ থকা নাই,  ফলপ্ৰসূভাৱে কাৰ্যকৰী কৰা হৈছে। শ্ৰী শ্বাহে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত কেৱল আন্তঃগাঁথনি সম্প্ৰসাৰণ হোৱাই নহয়, নাগৰিকৰ স্বাস্থ্যৰ ক্ষেত্ৰতো অভূতপূৰ্ব উন্নতি সাধন কৰা হৈছে। তেওঁ কয় যে চলি থকা সকলো কঠোৰ পৰিশ্ৰম এই শক্তিশালী আন্তঃগাঁথনি, এই আঁচনি  আৰু ব্যক্তিগত প্ৰচেষ্টাৰ সৈতে সম্পূৰ্ণৰূপে মিলিব লাগিব, তেতিয়াহে প্ৰকৃত আৰু উল্লেখযোগ্য ফলাফল লাভ কৰিব পৰা যাব।

কেন্দ্ৰীয় গৃহমন্ত্ৰীগৰাকীয়ে প্ৰশ্ন কৰে যে আই এম এয়ে গৱেষণাত নিয়োজিত চিকিৎসকসকলক প্ৰচাৰৰ বাবে আঁচনি প্ৰস্তুত  কৰি ভাৰত চৰকাৰক জমা দিব পাৰিবনে? ভিডিঅ’ কনফাৰেন্সিং আৰু টেলিমেডিচিনৰ জৰিয়তে বৰ্তমানৰ চিকিৎসকৰ সেৱাৰ সৰ্বাধিক ব্যৱহাৰৰ বাবে আই এম এয়ে পদক্ষেপ ল’ব পাৰিবনে বুলিও তেওঁ প্ৰশ্ন কৰে। তেওঁ কয় যে আই এম এৰ ভূমিকা হ’ব লাগে দেশৰ স্বাস্থ্য আন্তঃগাঁথনি অধিক শক্তিশালী আৰু স্থিতিস্থাপক কৰি তোলা।

আমাৰ অৱদানৰ পৰিসৰ পুনৰ পৰীক্ষা কৰি দেশখনক কেনেকৈ আগুৱাই নিব পাৰি সেয়া  নিৰ্ধাৰণৰ কাম কৰাৰ সময় আহি পৰিছে। শ্ৰী শ্বাহে কয় যে দেশখনক সুলভ আৰু মানসম্পন্ন স্বাস্থ্যসেৱাৰ দিশত পৰিচালিত হ’লে আই এম এৰ ভূমিকা কি হ’ব লাগে সেই বিষয়ে বিবেচনা কৰা উচিত।

তেওঁ কয় যে সেৱাৰ ক্ষেত্ৰত যদি কোনো সংস্থাই সৰ্বাধিক অৱদান আগবঢ়াইছে তেন্তে সেয়া হৈছে আই এম এ। এয়া  আমাৰ বাবে গৌৰৱৰ বিষয় হ’ব পাৰে, কিন্তু আত্মতুষ্টিৰ বিষয় নহয়, কাৰণ এতিয়াও বহু কাম বাকী আছে। আই এম এয়ে এই বিষয়ে চিন্তা কৰা উচিত।

কেন্দ্ৰীয় গৃহমন্ত্ৰী শ্ৰী অমিত শ্বাহে কয় যে আই এম এ এতিয়া দেশৰ বৰ্তমানৰ প্ৰয়োজন অনুসৰি আগবাঢ়িব লাগিব। ইয়াৰ বাবে মূল ধাৰণা হিচাপে অসুস্থতাৰ পৰা সুস্থতালৈ গুৰুত্ব স্থানান্তৰিত কৰিব লাগিব। ঔষধৰ লগতে সুস্থ জীৱনশৈলীৰ বাবে পৰামৰ্শ তথা পথ প্ৰদৰ্শনৰ বিষয়ত অধিক গুৰুত্ব দিব লাগিব। নতুন চিকিৎসকক এই দিশত উৎসাহিত কৰা উচিত। তেওঁ কয় যে আয়ুষ্মান ভাৰত আৰু জেনেৰিক মেডিচিন ষ্ট’ৰৰ গুৰুত্বক তুচ্ছজ্ঞান কৰা উচিত নহয়।

শ্ৰী অমিত শ্বাহে কয় যে স্বাধীনতাৰ পূৰ্বৰ সময়ছোৱাৰ পৰা বৰ্তমানলৈকে এই দেশৰ দৰিদ্ৰ ৰোগীসকলক চিকিৎসকে আগবঢ়োৱা সেৱাক তেওঁ আন্তৰিকতাৰে শ্ৰদ্ধা জনাইছে। তেওঁ কয় যে আই এম এৰ জৰিয়তে ৰোগীৰ সেৱা আৰু আয়ুস বৃদ্ধিৰ ক্ষেত্ৰত বিগত ১০০ বছৰত চিকিৎসকসকলে অভূতপূৰ্ব অৱদান আগবঢ়াইছে। এই গৌৰৱময় ১০০ বছৰীয়া যাত্ৰাক গ্ৰাম্য, তহচিল, চহৰ আৰু মহানগৰ পৰ্যায়ত সঠিকভাৱে নথিভুক্ত আৰু প্ৰচাৰ কৰা উচিত। ইয়াৰ ফলত চিকিৎসকৰ ওপৰত মানুহৰ আস্থা আৰু অধিক দৃঢ় হ’ব৷ একে সময়তে আই এম এয়েও নিজৰ ভূমিকা তথা  নিজৰ নৈতিকতাক পুনৰ সংজ্ঞায়িত কৰিব লাগে।

কেন্দ্ৰীয় গৃহমন্ত্ৰীগৰাকীয়ে য়ে কয় যে ক’ভিড-১৯ সংকটৰ সময়ত দেশৰ চিকিৎসকসকলে অতিশয় প্ৰশংসনীয় কাম কৰিছিল। তেওঁ কয় যে গৃহ পৰিক্ৰমা মন্ত্ৰালয়ে ক’ভিড মহামাৰীৰ সৈতে মোকাবিলা কৰাৰ প্ৰচেষ্টাত  তীক্ষ্ণ দৃষ্টি ৰাখিছিল। সেই সময়ত এজনো চিকিৎসকে  নিজৰ কৰ্তব্যৰ পৰা আঁতৰি যোৱা নাছিল আৰু তেওঁলোকে নিজৰ স্বাস্থ্যৰ চিন্তা নকৰাকৈয়ে ৰাইজৰ সেৱা কৰিছিল।

তেওঁ কয় যে হয়তো পৃথিৱীৰ আন ক’তো মানুহে এনে উদাহৰণ নাপাব, য’ত প্ৰতিজন চিকিৎসকে একত্ৰিতভাবে  থিয় হৈ কেৱল ৰোগীৰ যত্ন লয় আৰু নিজৰ মংগলৰ চিন্তা নকৰাকৈয়ে চিকিৎসক–ৰোগীৰ সম্পৰ্কৰ পৱিত্ৰতা ৰক্ষা কৰে। শ্ৰী শ্বাহে কয় যে সমাজ জীৱনৰ বিজ্ঞান বুজি পোৱাসকলে জানে যে তেওঁলোক দেশৰ বাবে এক অতি বৃহৎ সম্পদ। তেওঁ লগতে কয় যে লাখ লাখ চিকিৎসকে নিজৰ ব্যক্তিগত প্ৰেকটিছত নিয়োজিত হৈও সেই সময়ছোৱাত চৰকাৰৰ প্ৰতিটো নিৰ্দেশনা নিখুঁতভাৱে পালন কৰিছিল।

কেন্দ্ৰীয় গৃহমন্ত্ৰী আৰু সমবায়  মন্ত্ৰীগৰাকীয়ে  কয় যে ক’ভিড সংকটৰ সময়ত দেশত কেইবাটাও গুৰুত্বপূৰ্ণ পদক্ষেপ গ্ৰহণ কৰা হৈছিল, য’ত আই এম এই বিশেষকৈ টিকাকৰণৰ ক্ষেত্ৰত উল্লেখযোগ্য সহযোগিতা আগবঢ়াইছিল। কেৱল ২০২২ চনত ২৫০০ৰো অধিক ৰক্তদান শিবিৰৰ আয়োজন কৰা হৈছিল। নৈতিক মান শক্তিশালী কৰি আই এম এয়ে প্ৰসৱৰ পূৰ্বে লিংগ নিৰ্ণয়ৰ সমস্যা যথেষ্ট হ্ৰাস কৰিছিল। ক’ভিডৰ সময়ছোৱাত হেল্পলাইনত ২০ লাখতকৈ অধিক ফোন আহিছিল, যাৰ জৰিয়তে মানুহক সাহায্য প্ৰদান কৰা হৈছিল।

শ্ৰী অমিত শ্বাহে কয় যে আজি এই সন্মিলনত ২৭ খন ৰাজ্যৰ ৫ হাজাৰৰো অধিক আই এম এৰ প্ৰতিনিধিয়ে অংশগ্ৰহণ কৰিছে আৰু সংস্থাটোৰ নতুন সভাপতিও নিৰ্বাচিত হৈছে। নতুন সভাপতিৰ কাৰ্যকালত আই এম এই নৱীকৃত শক্তি তথা গতি লাভ কৰিব বুলি তেওঁ আস্থা প্ৰকাশ কৰে।

RK/PR/PS/DM