2025 ലെ വികസിത് ഭാരത് ഗ്യാരണ്ടി ഫോർ റോസ്ഗാർ ആൻഡ് ആജീവിക മിഷൻ (ഗ്രാമീൺ) (VB–G RAM G) നിയമത്തെക്കുറിച്ച് ചർച്ച ചെയ്യുന്നതിനായി സ്വയം സഹായ സംഘം (SHG) അംഗങ്ങളുമായി  ദേശീയതലത്തിൽ നടത്തിയ വീഡിയോ കോൺഫറൻസിംഗ് സംവാദത്തിൽ കേന്ദ്ര ഗ്രാമവികസന, കൃഷി, കർഷകക്ഷേമ മന്ത്രി ശ്രീ ശിവരാജ് സിംഗ് ചൗഹാൻ ഇന്ന് അധ്യക്ഷത വഹിച്ചു.

 രാജ്യവ്യാപകമായി 622 ജില്ലകളിലെ 4,912 ബ്ലോക്കുകളിലായി 2,55,407 ഗ്രാമങ്ങളിൽ നിന്ന് 35,29,049 ൽ അധികം പേർ പങ്കെടുത്തു. 2025 ലെ VB–G RAM G നിയമത്തിന്റെ കീഴിലുള്ള വ്യവസ്ഥകളെക്കുറിച്ച് അംഗങ്ങളെ അറിയിക്കുകയും സമൂഹത്തിന്റെ കാഴ്ചപ്പാട് മനസ്സിലാക്കുകയും ചെയ്യുക എന്നതായിരുന്നു ആശയവിനിമയത്തിന്റെ ലക്ഷ്യം.

 ഗ്രാമവികസന-വാർത്താവിനിമയ സഹമന്ത്രി ഡോ. ചന്ദ്രശേഖർ പെമ്മസാനി, ഗ്രാമവികസന സഹമന്ത്രി ശ്രീ കമലേഷ് പാസ്വാൻ, വനിതാ സ്വയം സഹായ സംഘങ്ങൾ, ഗ്രാമവികസന മന്ത്രാലയത്തിലെ മുതിർന്ന ഉദ്യോഗസ്ഥർ, സംസ്ഥാന ഗ്രാമീണ ഉപജീവന ദൗത്യങ്ങളിലെ (SRLMs) SMD/CEO-കൾ, രാജ്യത്തുടനീളമുള്ള മറ്റ് പങ്കാളികൾ എന്നിവർ യോഗത്തിൽ പങ്കെടുത്തു.

 ഇന്ത്യയുടെ ഗ്രാമീണ സമ്പദ്‌വ്യവസ്ഥയെ പരിവർത്തനം ചെയ്യുന്ന ഒരു നിയമമായി 2025 ലെ VB-G RAM G ആക്റ്റ് വിഭാവനം ചെയ്തിരിക്കുന്നതായി വെർച്വൽ യോഗത്തെ അഭിസംബോധന ചെയ്തുകൊണ്ട് കേന്ദ്ര മന്ത്രി ശ്രീ ശിവരാജ് സിംഗ് ചൗഹാൻ പറഞ്ഞു. സുസ്ഥിരമായ തൊഴിലവസരങ്ങൾ സൃഷ്ടിക്കുന്നതിനും പുനരുജ്ജീവന ശേഷിയുള്ള ഗ്രാമങ്ങൾ സൃഷ്ടിക്കുന്നതിനും ഇത് വഴിയൊരുക്കും. നിയമപ്രകാരം ഗുണഭോക്താക്കളിൽ കുറഞ്ഞത് മൂന്നിലൊന്ന് സ്ത്രീകളായിരിക്കുമെന്നും, തൊഴിൽ വിഹിതത്തിൽ മുൻഗണന ഉറപ്പാക്കാൻ അവിവാഹിതരായ സ്ത്രീകൾക്ക് പ്രത്യേക ഗ്രാമീൺ റോസ്ഗാർ ഗ്യാരണ്ടി കാർഡുകൾ നൽകുമെന്നും അദ്ദേഹം അറിയിച്ചു.

കാർഷിക സീസണുകളിൽ കർഷക തൊഴിലാളികളുടെ ലഭ്യത ഉറപ്പാക്കുന്നതിനും ജലസുരക്ഷ, ഉപജീവനമാർഗങ്ങൾ, സുസ്ഥിര ഗ്രാമവികസനം എന്നിവ ശക്തിപ്പെടുത്തുന്ന ജോലികൾക്ക് മുൻഗണന നൽകുന്നതിനും ഈ നിയമം വഴിയൊരുക്കുന്നതായി അദ്ദേഹം കൂട്ടിച്ചേർത്തു. സുസ്ഥിര ഉപജീവന അവസരങ്ങളും മെച്ചപ്പെട്ട ഗ്രാമീണ അടിസ്ഥാന സൗകര്യങ്ങളും ഉപയോഗിച്ച്, ഓരോ ഗ്രാമത്തിനും വളർച്ചാ കേന്ദ്രങ്ങളായി ഉയർന്നുവരാനാകുമെന്നും അദ്ദേഹം പ്രസ്താവിച്ചു. ഇത് ഗ്രാമീണ മേഖലയിൽ നിന്നുള്ള കുടിയേറ്റം ഗണ്യമായി കുറയ്ക്കും.

നിയമത്തിലെ വ്യവസ്ഥകളെക്കുറിച്ച് സ്വാശ്രയ സംഘങ്ങളിലെ സ്ത്രീകളുടെ ചോദ്യങ്ങൾക്ക് മന്ത്രി സംവേദനാത്മക സെഷനിലൂടെ മറുപടി നൽകി. അവരുടെ സർവ തലത്തിലെയുംക്ഷേമത്തിനായി ഇന്ത്യാ ഗവൺമെന്റ് പ്രതിജ്ഞാബദ്ധമാണെന്ന് അദ്ദേഹം സ്വയം സഹായ സംഘ ദീദികൾക്ക് ഉറപ്പ് നൽകി.

ശക്തമായ പ്രാദേശിക പങ്കാളിത്തവും സമൂഹ്യ ഉടമസ്ഥതയും ഉറപ്പാക്കുന്നതിൽ 2025 ലെ VB–G RAM G ആക്ടിന് കീഴിലുള്ള സ്വയം സഹായ സംഘങ്ങളുടെ പങ്കാളിത്തം പ്രധാന ഘടകമാണെന്ന് ഗ്രാമവികസന, വാർത്താവിനിമയ സഹമന്ത്രി ഡോ. ചന്ദ്രശേഖർ പെമ്മസാനി പറഞ്ഞു.

 കമ്മ്യൂണിറ്റി സെന്ററുകളും ഗ്രാമീണ അടിസ്ഥാന സൗകര്യങ്ങളും സൃഷ്ടിക്കുന്നതിലും കൈകാര്യം ചെയ്യുന്നതിലും, അതുവഴി ഗ്രാമങ്ങളെ ശാക്തീകരിക്കുന്നതിലും പ്രാദേശിക സമ്പദ്‌വ്യവസ്ഥകളെ ശക്തിപ്പെടുത്തുന്നതിലും SHG കൾ ഒരു പ്രധാന പങ്ക് വഹിക്കുമെന്ന് അദ്ദേഹം എടുത്തുപറഞ്ഞു.

ഗ്രാമീണ കുടുംബങ്ങൾക്ക് കൂടുതൽ വരുമാന സുരക്ഷ നൽകുന്നതിനായി നിയമപരമായ തൊഴിലുറപ്പ് 100 ൽ നിന്ന് 125 ദിവസമായി ഉയർത്തിയിട്ടുണ്ടെന്ന് ഗ്രാമവികസന സഹമന്ത്രി ശ്രീ കമലേഷ് പാസ്വാൻ ചൂണ്ടിക്കാട്ടി. 2025 ലെ VB–G RAM G ആക്ടിലെ പ്രധാന വ്യവസ്ഥകൾ അദ്ദേഹം എടുത്തുപറഞ്ഞു. ഈ നിയമപ്രകാരം ഏറ്റെടുക്കുന്ന പ്രവർത്തനങ്ങൾ ജലസുരക്ഷ, കന്നുകാലി അധിഷ്ഠിത ഉപജീവനമാർഗ്ഗങ്ങൾ തുടങ്ങിയ നിർണായക മേഖലകൾക്ക് മുൻഗണന നൽകുമെന്നും അതുവഴി ഗ്രാമീണ വരുമാനത്തിന്റെയും സുസ്ഥിര വികസനത്തിന്റെയും അടിത്തറ ശക്തിപ്പെടുത്തുമെന്നും അദ്ദേഹം ഊന്നിപ്പറഞ്ഞു.

 നേരത്തെ, ഗ്രാമവികസന മന്ത്രാലയം സെക്രട്ടറി ശ്രീ ശൈലേഷ് കുമാർ സിംഗ് പങ്കെടുത്തവരെ സ്വാഗതം ചെയ്തു. സ്വയം സഹായ സംഘങ്ങൾ, അവരുടെ ഫെഡറേഷനുകൾ, പഞ്ചായത്തീരാജ് സ്ഥാപനങ്ങൾ എന്നിവയുൾപ്പെടെയുള്ള സാമൂഹ്യ സ്ഥാപനങ്ങളുടെ ശക്തമായ കൂട്ടായ ഉടമസ്ഥതയിലാണ് VB–G RAM G യുടെ വിജയം ആശ്രയിച്ചിരിക്കുന്നതെന്ന് അദ്ദേഹം പറഞ്ഞു.

സ്ത്രീ കേന്ദ്രീകൃതവും എല്ലാവരെയും ഉൾക്കൊള്ളുന്നതുമായ വ്യവസ്ഥകൾക്ക് ശക്തമായ ഊന്നൽ നൽകിക്കൊണ്ട്, നിയമത്തിന്റെ പ്രധാന സവിശേഷതകൾ, ലക്ഷ്യങ്ങൾ, നിർവഹണ ചട്ടക്കൂട് എന്നിവ വിശദമാക്കുന്ന, 2025 ലെ VB–G RAM G ആക്ടിനെക്കുറിച്ചുള്ള ഒരു അവതരണവും പരിപാടിയിൽ ഉണ്ടായിരുന്നു. നിയമത്തിന് കീഴിലുള്ള ഗുണഭോക്താക്കളിൽ കുറഞ്ഞത് മൂന്നിലൊന്ന് പേരും സ്ത്രീകളായിരിക്കുമെന്നും, ജോലി വിഹിതത്തിൽ മുൻഗണന ഉറപ്പാക്കാൻ അവിവാഹിതരായ സ്ത്രീകൾക്ക് പ്രത്യേക ഗ്രാമീൺ റോസ്ഗാർ ഗ്യാരണ്ടി കാർഡുകൾ നൽകുമെന്നും അവതരണത്തിൽ കാണിച്ചു. സ്ത്രീകൾ നയിക്കുന്ന കുടുംബങ്ങൾക്ക് വ്യക്തിഗത ആസ്തികൾ സൃഷ്ടിക്കുന്ന ജോലികൾക്ക് മുൻഗണന നൽകും. ക്രെഷ് സൗകര്യങ്ങൾ, തൊഴിൽ ശക്തിയിൽ സ്ത്രീകളുടെ മാന്യമായ പങ്കാളിത്തം എന്നിവ സാധ്യമാക്കുന്നതിന് ശക്തമായ പരാതി പരിഹാര സംവിധാനങ്ങൾ തുടങ്ങിയ വ്യവസ്ഥകൾ ഉണ്ടായിരിക്കും. കാർഷിക സീസണുകളിൽ കർഷക തൊഴിലാളികളുടെ ലഭ്യത ഉറപ്പാക്കുന്നതിനും ജലസുരക്ഷ, ഉപജീവനമാർഗ്ഗങ്ങൾ, സുസ്ഥിര ഗ്രാമവികസനം എന്നിവ ശക്തിപ്പെടുത്തുന്ന ജോലികൾക്ക് മുൻഗണന നൽകുന്നതിനും ഈ നിയമം സഹായിക്കും.

***