• ୨୦୨୬ ମସିହା ମାର୍ଚ୍ଚ ୩୧ ତାରିଖ ସୁଦ୍ଧା ବସ୍ତର ସମେତ ସମଗ୍ର ଭାରତରୁ ଶେଷ ହେବ ନକ୍ସଲବାଦ
• ଆଗାମୀ ୫ ବର୍ଷ ମଧ୍ୟରେ ବସ୍ତର ଡିଭିଜନ ଦେଶର ସବୁଠାରୁ ବିକଶିତ ଆଦିବାସୀ ଡିଭିଜନ ସାଜିବ
• ୨୦୨୬ର ବସ୍ତର ଅଲିମ୍ପିକ୍ସ ନକ୍ସଲ ମୁକ୍ତ ବସ୍ତରରେ ଅନୁଷ୍ଠିତ ହେବ
• ଏହା ଆମ ସମସ୍ତଙ୍କ ପାଇଁ ଗର୍ବର ବିଷୟ ଯେ ୭୦୦ରୁ ଅଧିକ ଯୁବକ-ଯୁବତୀ ନକ୍ସଲବାଦ ଛାଡ଼ି ବସ୍ତର ଅଲିମ୍ପିକ୍ସ ୨୦୨୫ରେ ସାମିଲ ହୋଇଛନ୍ତି
• ଯେଉଁମାନେ ଆତ୍ମସମର୍ପଣ କରିଥିଲେ ସେମାନେ ଭୟ ଉପରେ ଆଶା ଏବଂ ବିନାଶ ଉପରେ ବିକାଶକୁ ବାଛିଥିଲେ; ଏହା ମୋଦିଜୀଙ୍କ ଦ୍ୱାରା ପରିକଳ୍ପିତ ଏକ ବିକଶିତ ବସ୍ତର
• ଏକଦା 'ଲାଲ ସଲାମ ’ ସ୍ଲୋଗାନ ଦିଆଯାଉଥିବା ବସ୍ତର ଏବେ ' ଭାରତ ମାତା କି ଜୟ ’  ସ୍ଲୋଗାନରେ ପ୍ରକମ୍ପିତ ହେଉଛି
• କେବଳ ଶାନ୍ତି ହିଁ ବିକାଶର ମାର୍ଗ ପ୍ରଶସ୍ତ କରିପାରିବ, ତେଣୁ, ନକ୍ସଲମାନେ ସେମାନଙ୍କ ଅସ୍ତ୍ରଶସ୍ତ୍ର ସମର୍ପଣ କରିବା ଉଚିତ, ମୁଖ୍ୟଧାରାରେ ଯୋଗଦେବା ଉଚିତ ଏବଂ ପୁନର୍ବାସ ନୀତିର ଲାଭ ଉଠାଇବା ଉଚିତ
• ଆଗାମୀ ରାଜ୍ୟଗୋଷ୍ଠୀ କ୍ରୀଡ଼ା ଏବଂ ଅଲିମ୍ପିକ୍ସରେ ବସ୍ତରର ଖେଳାଳିମାନେ ଯେପରି ଦେଶକୁ ଗୌରବ ପ୍ରଦାନ କରିପାରିବେ, ସେଥିପାଇଁ ବ୍ୟବସ୍ଥା କରାଯାଉଛି
• ୩,୯୧,୦୦୦ ଖେଳାଳିମାନେ ବସ୍ତର ଅଲିମ୍ପିକ୍ସ ୨୦୨୫ରେ ଅଂଶଗ୍ରହଣ କରିଥିଲେ, ଯାହା ଅଢ଼େଇ ଗୁଣ ବୃଦ୍ଧି ପାଇଛି, ଖେଳାଳିଙ୍କ ବର୍ଦ୍ଧିତ ଅଂଶଗ୍ରହଣ ହାର ଦୃଷ୍ଟିରୁ, ଭଉଣୀମାନେ ଭାଇମାନଙ୍କୁ ଅତିକ୍ରମ କରିଛନ୍ତି
• ଯେଉଁମାନେ ଆତ୍ମସମର୍ପଣ କରିଛନ୍ତି ଏବଂ ଯେଉଁମାନେ ନକ୍ସଲ ହିଂସାର ଶିକାର ହୋଇଛନ୍ତି, ସେମାନଙ୍କ ପାଇଁ ଆମେ ଅତ୍ୟନ୍ତ ଆକର୍ଷଣୀୟ ପୁନର୍ବାସ ଯୋଜନା ଆଣିବୁ
• କେନ୍ଦ୍ର ଏବଂ ଛତିଶଗଡ଼ ସରକାର ଏକ ବିକଶିତ ବସ୍ତର ଗଠନ ପାଇଁ କାନ୍ଧରେ କାନ୍ଧ ମିଶାଇ କାର୍ଯ୍ୟ କରୁଛନ୍ତି
• ସଶସ୍ତ୍ର ନକ୍ସଲମାନଙ୍କୁ ପ୍ରବର୍ତ୍ତାଇ ସମାଜର ମୁଖ୍ୟଧାରାକୁ ଫେରାଇ ଆଣିବାରେ ସାହାଯ୍ୟ କରିବାକୁ କେନ୍ଦ୍ର ଗୃହ ମନ୍ତ୍ରୀ ସମ୍ପ୍ରଦାୟର ନେତା ଏବଂ ସାମାଜିକ କର୍ମୀମାନଙ୍କୁ ଆହ୍ବାନ କରିଛନ୍ତି

କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଆଜି ଛତିଶଗଡ଼ର ଜଗଦଲପୁରରେ ବସ୍ତର ଅଲିମ୍ପିକ୍ସର ଉଦଯାପନୀ ସମାରୋହକୁ ସମ୍ବୋଧିତ କରିଛନ୍ତି। ଏହି ଅବସରରେ ଛତିଶଗଡ଼ ମୁଖ୍ୟମନ୍ତ୍ରୀ ଶ୍ରୀ ବିଷ୍ଣୁ ଦେଓ ସାଇ, ଉପମୁଖ୍ୟମନ୍ତ୍ରୀ ଶ୍ରୀ ବିଜୟ ଶର୍ମା ଏବଂ ଅନ୍ୟ ମାନ୍ୟଗଣ୍ୟ ବ୍ୟକ୍ତିମାନେ ଉପସ୍ଥିତ ଥିଲେ। 
ଏହି ଅବସରରେ କେନ୍ଦ୍ର ଗୃହମନ୍ତ୍ରୀ କହିଥିଲେ, ଆମେ ୨୦୨୬ ମସିହା ମାର୍ଚ୍ଚ ୩୧ ତାରିଖ ପୂର୍ବରୁ ସମଗ୍ର ଦେଶରୁ ବାମପନ୍ଥୀ ନକ୍ସଲବାଦକୁ ମୂଳପୋଛ କରିବା ପାଇଁ ସଂକଳ୍ପ ନେଇଛୁ ଏବଂ ଆଜି ବସ୍ତର ଅଲିମ୍ପିକ୍ସ-୨୦୨୫ରେ ଆମେ ତାହା ହାସଲ କରିବା ଦିଗରେ ଛିଡ଼ା ହୋଇଛୁ। ଆସନ୍ତା ବର୍ଷ ନଭେମ୍ବର-ଡିସେମ୍ବରରେ ହେବାକୁ ଥିବା ବସ୍ତର ଅଲିମ୍ପିକ୍ସ-୨୦୨୬ ସୁଦ୍ଧା ଛତିଶଗଡ଼ ସମେତ ଦେଶରୁ ଲାଲ ଆତଙ୍କବାଦ ସମ୍ପୂର୍ଣ୍ଣ ଭାବେ ମୂଳପୋଛ ହୋଇଥିବ ଏବଂ ଏକ ନକ୍ସଲ ମୁକ୍ତ ବସ୍ତର ଆଗକୁ ବଢ଼ିବ। 
ଶ୍ରୀ ଶାହ କହିଥିଲେ ଯେ, ପ୍ରଧାନମନ୍ତ୍ରୀଙ୍କ ନେତୃତ୍ୱରେ ଆମେ ସମଗ୍ର ବସ୍ତର ଏବଂ ଭାରତକୁ ନକ୍ସଲବାଦରୁ ମୁକ୍ତ କରିବା ଲାଗି ସଂକଳ୍ପ ନେଇଛୁ। ଆମେ ଏଠାରେ ଅଟକିବା ଉଚିତ ନୁହେଁ, ବରଂ ଏହା ସୁନିଶ୍ଚିତ କରିବା ଉଚିତ ଯେ ସାତଟି ଜିଲ୍ଲା-କଙ୍କେର, କୋଣ୍ଡଗାଓଁ, ବସ୍ତର, ସୁକମା, ବିଜାପୁର, ନାରାୟଣପୁର ଏବଂ ଦାନ୍ତେୱାଡ଼ାକୁ ନେଇ ଗଠିତ ବସ୍ତର ଡିଭିଜନ ଡିସେମ୍ବର ୨୦୩୦ ସୁଦ୍ଧା ଦେଶର ସବୁଠାରୁ ବିକଶିତ ଆଦିବାସୀ ଡିଭିଜନରେ ପରିଣତ ହେବ। ବସ୍ତରର ପ୍ରତ୍ୟେକ ବ୍ୟକ୍ତିଙ୍କୁ ଘର, ବିଜୁଳି, ଶୌଚାଳୟ, ଟ୍ୟାପ୍ ଜରିଆରେ ପାନୀୟ ଜଳ, ଗ୍ୟାସ୍ ସିଲିଣ୍ଡର୍, ୫ କିଲୋ ଖାଦ୍ୟଶସ୍ୟ ଏବଂ ୫ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ସୁବିଧା ପ୍ରଦାନ କରିବା ଆମ ସରକାରଙ୍କ ସଂକଳ୍ପ। ଆମେ ଆଗାମୀ ପାଞ୍ଚ ବର୍ଷ ମଧ୍ୟରେ ବସ୍ତରକୁ ଦେଶର ସବୁଠାରୁ ବିକଶିତ ଆଦିବାସୀ ଡିଭିଜନରେ ପରିଣତ କରିବା ଲାଗି ସଂକଳ୍ପ ନେଇଛୁ। ଏହି ପ୍ରୟାସରେ ପ୍ରଧାନମନ୍ତ୍ରୀଙ୍କ ନେତୃତ୍ୱରେ ଭାରତ ସରକାର ଏବଂ ଶ୍ରୀ ବିଷ୍ଣୁ ଦେଓ ସାଇଙ୍କ ନେତୃତ୍ୱରେ ଛତିଶଗଡ଼ ସରକାର କାନ୍ଧରେ କାନ୍ଧ ମିଶାଇ ଏକ ବିକଶିତ ବସ୍ତର ନିର୍ମାଣ ଦିଗରେ ଆଗକୁ ବଢ଼ିବେ।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ, ବସ୍ତରର ପ୍ରତ୍ୟେକ ଗ୍ରାମ ସଡ଼କ ଦ୍ୱାରା ଯୋଡି ହେବ, ବିଦ୍ୟୁତ୍ ଉପଲବ୍ଧ ହେବ, ୫ କିଲୋମିଟର ବ୍ୟାସାର୍ଦ୍ଧ ମଧ୍ୟରେ ବ୍ୟାଙ୍କିଙ୍ଗ ସୁବିଧା ମିଳିବ, ଏବଂ ଆମ ସରକାର ପିଏଚସି/ସିଏଚସିର ଏକ ବଡ ନେଟୱାର୍କ ସୃଷ୍ଟି କରିବା ପାଇଁ ମଧ୍ୟ କାର୍ଯ୍ୟ କରିବେ। ଛତିଶଗଡ଼ରେ ଜଙ୍ଗଲଜାତ ଦ୍ରବ୍ୟ ପ୍ରକ୍ରିୟାକରଣ ପାଇଁ ସମବାୟ ସମିତି ଉପରେ ଆଧାରିତ ୟୁନିଟ୍ ପ୍ରତିଷ୍ଠା କରାଯିବ। ବସ୍ତରର ସମସ୍ତ ସାତୋଟି ଜିଲ୍ଲା ସମସ୍ତ ଆଦିବାସୀ ଜିଲ୍ଲା ମଧ୍ୟରେ ସର୍ବାଧିକ ପରିମାଣର ଦୁଗ୍ଧ ଉତ୍ପାଦନ କରୁଥିବା ଜିଲ୍ଲାରେ ପରିଣତ ହେବ ଏବଂ ଦୁଗ୍ଧ ଉତ୍ପାଦନ ମାଧ୍ୟମରେ ସେମାନଙ୍କ ଆୟ ବୃଦ୍ଧି କରିବେ। ଆମେ ବସ୍ତରରେ ମଧ୍ୟ ନୂତନ ଶିଳ୍ପ ପ୍ରତିଷ୍ଠା କରିବୁ, ଉଚ୍ଚ ଶିକ୍ଷା ପାଇଁ ବ୍ୟବସ୍ଥା କରାଯିବ, ଭାରତର ସର୍ବଶ୍ରେଷ୍ଠ କ୍ରୀଡ଼ା କମ୍ପ୍ଲେକ୍ସ ଏବଂ ଅତ୍ୟାଧୁନିକ ଡାକ୍ତରଖାନା ପ୍ରତିଷ୍ଠା କରାଯିବ। ଶ୍ରୀ ଶାହ କହିଥିଲେ, ଅପପୁଷ୍ଟି ସମସ୍ୟାର ସମାଧାନ ପାଇଁ ଏକ ସ୍ୱତନ୍ତ୍ର ଯୋଜନା ମଧ୍ୟ କାର୍ଯ୍ୟକାରୀ କରାଯିବ। ଯେଉଁମାନେ ଆତ୍ମସମର୍ପଣ କରିଛନ୍ତି ଏବଂ ନକ୍ସଲବାଦ କାରଣରୁ ଆହତ ହୋଇଛନ୍ତି, ସେମାନଙ୍କ ପାଇଁ ଆମେ ଏକ ଆକର୍ଷଣୀୟ ପୁନର୍ବାସ ନୀତି ଆଣିବୁ। ଆମର ଲକ୍ଷ୍ୟ ହେଉଛି ନକ୍ସଲବାଦକୁ ସମାପ୍ତ କରିବା, କାରଣ ଏହି ଅଞ୍ଚଳର ବିକାଶ ପାଇଁ ନକ୍ସଲବାଦୀମାନେ କୋବ୍ରା ଭଳି ବସିଛନ୍ତି। ନକ୍ସଲବାଦର ସମାପ୍ତି ସହିତ ଏହି କ୍ଷେତ୍ରରେ ବିକାଶର ଏକ ନୂତନ ଆରମ୍ଭ ହେବ । ପ୍ରଧାନମନ୍ତ୍ରୀ ଏବଂ ଶ୍ରୀ ବିଷ୍ଣୁ ଦେଓଙ୍କ ନେତୃତ୍ୱରେ ଏହା ସବୁଠାରୁ ବିକଶିତ ଅଞ୍ଚଳରେ ପରିଣତ ହେବ।

ଶ୍ରୀ ଅମିତ ଶାହ କହିଥିଲେ, ବସ୍ତର ଅଲିମ୍ପିକ୍ସ-୨୦୨୫ରେ ସାତଟି ଜିଲ୍ଲାରୁ ସାତଟି ଦଳ ଏବଂ ଆତ୍ମସମର୍ପଣ କରିଥିବା ନକ୍ସଲମାନଙ୍କୁ ନେଇ ଗୋଟିଏ ଦଳ ଥିଲା। ଆତ୍ମସମର୍ପଣ କରିଥିବା ୭୦୦ରୁ ଅଧିକ ନକ୍ସଲଙ୍କୁ ଏହି ଖେଳରେ ଅଂଶଗ୍ରହଣ କରୁଥିବାର ଦେଖି ବହୁତ ଭଲ ଲାଗିଲା। ଯେଉଁମାନେ ନକ୍ସଲବାଦର ପ୍ରତାରଣା ଦ୍ୱାରା ନିଜର ସମଗ୍ର ଜୀବନ ନଷ୍ଟ କରୁଛନ୍ତି, ଏବଂ ଅସ୍ତ୍ରଶସ୍ତ୍ର ସମର୍ପଣ କରି ମୁଖ୍ୟଧାରାରେ ସାମିଲ ହୋଇଥିବା ୭୦୦ରୁ ଅଧିକ ଯୁବକ ଆଜି କ୍ରୀଡ଼ାର ପଥରେ ଆଗେଇ ଆସିଛନ୍ତି। ୨୦୨୬ ମସିହା ମାର୍ଚ୍ଚ ୩୧ ସୁଦ୍ଧା ଏହି ଦେଶ ନକ୍ସଲବାଦରୁ ମୁକ୍ତ ହୋଇଯିବ। ହିଂସାରେ ସମ୍ପୃକ୍ତ ନକ୍ସଲମାନଙ୍କୁ ନିବେଦନ କରି ଶ୍ରୀ ଶାହ କହିଥିଲେ ଯେ ଏବେ ମଧ୍ୟ ଯେଉଁମାନେ ପଥଭ୍ରଷ୍ଟ ହୋଇ ହାତରେ ଅସ୍ତ୍ର ଧରି ବସିଛନ୍ତି। ଆମ ନିଜ ଲୋକମାନେ, ସେମାନେ ଅସ୍ତ୍ର ସମର୍ପଣ କରିବା ଉଚିତ, ପୁନର୍ବାସ ନୀତିର ଲାଭ ଉଠାଇବା ଉଚିତ, ନିଜ କଲ୍ୟାଣ ଏବଂ ନିଜ ପରିବାରର କଲ୍ୟାଣ ବିଷୟରେ ଚିନ୍ତା କରିବା ଉଚିତ ଏବଂ ଏକ ବିକଶିତ ବସ୍ତର ପାଇଁ ସଂକଳ୍ପରେ ସାମିଲ ହେବା ଉଚିତ।  ନକ୍ସଲବାଦ କାହାରି ପାଇଁ ଲାଭଦାୟକ ନୁହେଁ, ଯେଉଁମାନେ ଅସ୍ତ୍ର ଉଠାନ୍ତି ସେମାନଙ୍କୁ ନୁହେଁ, ଆଦିବାସୀମାନଙ୍କୁ ନୁହେଁ, ଏବଂ ସୁରକ୍ଷା ବାହିନୀଙ୍କୁ ନୁହେଁ। ସେ କହିଥିଲେ ଯେ କେବଳ ଶାନ୍ତି ହିଁ ବିକାଶର ମାର୍ଗ ପ୍ରଶସ୍ତ କରିପାରିବ।
 
କେନ୍ଦ୍ର ସମବାୟ ମନ୍ତ୍ରୀ କହିଛନ୍ତି ଯେ, ଆତ୍ମସମର୍ପଣ କରିଥିବା ୭୦୦ ଜଣ ନକ୍ସଲ ଏହି ଖେଳରେ ଖେଳାଳି ଭାବରେ ଆଗକୁ ଆସିଛନ୍ତି ଏବଂ ସମଗ୍ର ଦେଶ ସମ୍ମୁଖରେ ଏକ ବହୁତ ବଡ଼ ଉଦାହରଣ ସୃଷ୍ଟି କରିଛନ୍ତି। ସେ କହିଥିଲେ ଯେ ଏହି ଖେଳାଳିମାନେ ଭୟ ଉପରେ ଆଶା, ବିଭାଜନ ଉପରେ ଏକତାର ମାର୍ଗ ଏବଂ ବିନାଶ ଉପରେ ବିକାଶର ମାର୍ଗକୁ ବାଛିଛନ୍ତି । ଏହା ହେଉଛି ପ୍ରଧାନମନ୍ତ୍ରୀ ମୋଦୀଙ୍କ ନୂତନ ଭାରତ ଏବଂ ଏକ ବିକଶିତ ବସ୍ତରର ଦୂରଦୃଷ୍ଟି। ଆମ ବସ୍ତରର ସଂସ୍କୃତି ବିଶ୍ୱର ସବୁଠାରୁ ସମୃଦ୍ଧ ସଂସ୍କୃତି ମଧ୍ୟରୁ ଅନ୍ୟତମ। ସେ କହିଥିଲେ ଯେ, ସମସ୍ତ ଜନଜାତିର ଖାଦ୍ୟ, ପରିବେଶ, କଳା, ବାଦ୍ୟଯନ୍ତ୍ର, ନୃତ୍ୟ ଏବଂ ପାରମ୍ପରିକ ଖେଳ କେବଳ ଛତିଶଗଡ଼ର ନୁହେଁ ବରଂ ସମଗ୍ର ଭାରତର ସବୁଠାରୁ ସମୃଦ୍ଧ ଐତିହ୍ୟ।
ଶ୍ରୀ ଶାହ କହିଥିଲେ ଯେ, ନିକଟରେ ଛତିଶଗଡ଼ ସରକାର ଏକ ଆଧୁନିକ ରେକର୍ଡିଂ ଷ୍ଟୁଡିଓ ନିର୍ମାଣ କରି ପାରମ୍ପରିକ ଗୀତର ସଂରକ୍ଷଣ ଆରମ୍ଭ କରିଛନ୍ତି। ଅନେକ ପାରମ୍ପରିକ ପର୍ବପର୍ବାଣୀ, ଯାହା ନକ୍ସଲବାଦର ଲାଲ ଆତଙ୍କ ଛାୟାରେ ବିଲୁପ୍ତ ହେବାକୁ ଯାଉଛି, ସେଗୁଡ଼ିକୁ ମଧ୍ୟ ପ୍ରୋତ୍ସାହିତ କରାଯାଇଛି। ବସ୍ତର ଅଲିମ୍ପିକ୍ସରେ ଅଂଶଗ୍ରହଣ କରିଥିବା ଖେଳାଳିଙ୍କ ପ୍ରତିଭା ଦେଖିବା ପାଇଁ ଭାରତୀୟ କ୍ରୀଡ଼ା ପ୍ରାଧିକରଣର ଏକ ଅଧିକାରୀ ଦଳ ଏଠାକୁ ଆସିଛନ୍ତି। ଏହି ଖେଳାଳିମାନଙ୍କ ପ୍ରତିଭାକୁ ସ୍ୱୀକୃତି ଦେଇ ଆମ ସରକାର ବସ୍ତରରୁ ଖେଳାଳିମାନଙ୍କୁ ସେହି ସ୍ତରକୁ ନେବା ପାଇଁ ବ୍ୟବସ୍ଥା କରିଛନ୍ତି, ଯେଉଁଠାରେ ସେମାନେ ଆଗାମୀ ରାଜ୍ୟଗୋଷ୍ଠୀ କ୍ରୀଡା ଏବଂ ଅଲିମ୍ପିକ୍ କ୍ରୀଡାରେ ଅଂଶଗ୍ରହଣ କରିପାରିବେ। ଗତ ବର୍ଷ ବସ୍ତର ଅଲିମ୍ପିକ୍ସରେ ୧ ଲକ୍ଷ ୬୫ ହଜାର ଖେଳାଳି ଅଂଶଗ୍ରହଣ କରିଥିବା ବେଳେ ଚଳିତ ବର୍ଷ ୩ ଲକ୍ଷ ୯୧ ହଜାର ଖେଳାଳି ଅଂଶଗ୍ରହଣ କରିଛନ୍ତି, ଯାହାକି ପାଖାପାଖି ୨.୫ ଗୁଣ ଅଧିକ ଏବଂ ମହିଳାମାନଙ୍କ ଅଂଶଗ୍ରହଣ ପ୍ରାୟ ୩ ଗୁଣ ବୃଦ୍ଧି ପାଇଛି। ସେ କହିଥିଲେ ଯେ ଏହି ଉତ୍ସାହକୁ ଦେଖି ଆଗାମୀ ଦିନରେ ପ୍ରଧାନମନ୍ତ୍ରୀ ମୋଦୀ ଖେଲୋ ଇଣ୍ଡିଆ ଆଦିବାସୀ କ୍ରୀଡ଼ା ପାଇଁ ଛତିଶଗଡ଼କୁ ଚୟନ କରିଛନ୍ତି।

କେନ୍ଦ୍ର ଗୃହମନ୍ତ୍ରୀ କହିଥିଲେ, ବସ୍ତର ଏବେ ବଦଳୁଛି ଏବଂ ବସ୍ତର ଏବେ ଭୟ ପରିବର୍ତ୍ତେ ଭବିଷ୍ୟତର ସମାର୍ଥକ ହୋଇଯାଇଛି। ଯେଉଁଠି ଗୁଳିମାଡ଼ର ପ୍ରତିଧ୍ୱନି ଶୁଣିବାକୁ ମିଳୁଥିଲା, ସେଠାରେ ଆଜି ସ୍କୁଲର ଘଣ୍ଟି ବାଜୁଛି। ଯେଉଁଠି ସଡ଼କ ନିର୍ମାଣ କରିବା ପୂର୍ବରୁ ଏକ ସ୍ୱପ୍ନ ଥିଲା, ଆଜି ସେଠାରେ ରେଳ ଟ୍ରାକ୍ ଏବଂ ରାଜପଥ ନିର୍ମାଣ କରାଯାଉଛି। ଯେଉଁଠାରେ 'ଲାଲ ସଲାମ’ ସ୍ଲୋଗାନ ଦିଆଯାଉଥିଲା, ସେଠାରେ ଆଜି 'ଭାରତ ମାତା କି ଜୟ’ ସ୍ଲୋଗାନ ଶୁଣା ଯାଉଛି। ସେ କହିଥିଲେ ଯେ ଆମେ ସମସ୍ତେ ଏକ ବିକଶିତ ବସ୍ତର ପାଇଁ ସଂକଳ୍ପବଦ୍ଧ।  ଭାରତ ସରକାର ଏବଂ ଛତିଶଗଡ଼ ସରକାରଙ୍କର କେବେ ବି ଏନକାଉଣ୍ଟରରେ ନକ୍ସଲମାନଙ୍କୁ ହତ୍ୟା କରିବାର ଉଦ୍ଦେଶ୍ୟ ନଥିଲା, କାରଣ ୨୦୦୦ରୁ ଅଧିକ ନକ୍ସଲ ଯୁବକ ମଧ୍ୟ ଆତ୍ମସମର୍ପଣ କରିଛନ୍ତି।  ଆମ ଆଦିବାସୀ ସମାଜର ନେତାମାନେ ଏଥିରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛନ୍ତି; ସେମାନଙ୍କ ମାର୍ଗଦର୍ଶନରେ ନକ୍ସଲ ଯୁବକମାନଙ୍କ ମଧ୍ୟରେ ଆତ୍ମବିଶ୍ୱାସ ଏବଂ ସାହସ ସୃଷ୍ଟି ହୋଇଛି। ଆଦିବାସୀ ନେତା ଏବଂ ସାମାଜିକ କର୍ମୀମାନଙ୍କୁ ନିବେଦନ କରି ସ୍ୱରାଷ୍ଟ୍ର ମନ୍ତ୍ରୀ କହିଛନ୍ତି ଯେ ଯେଉଁମାନେ ଏବେ ବି ହାତରେ ଅସ୍ତ୍ର ଧରି ବୁଲୁଛନ୍ତି ସେମାନଙ୍କୁ ସମାଜର ମୁଖ୍ୟଧାରାକୁ ଫେରିବା ପାଇଁ ପ୍ରବର୍ତ୍ତାଇବା ଉଚିତ।

HS