ہندوستان نے آج 2001 میں پارلیمنٹ پر دہشت گردانہ حملے کو یاد کرتے ہوئے  ملک کے اعلی ترین جمہوری ادارے کی تحفظ کی خاطر اپنی جانیں قربان کرنے والے بہادر حفاظتی اہلکاروں اور ملازمین کو خراج عقیدت پیش کیا ۔

نائب صدر اور راجیہ سبھا کے چیئرمین جناب سی پی رادھا کرشنن ؛ وزیر اعظم جناب نریندر مودی ؛ مرکزی وزراء ؛ حزب اختلاف لیڈر جناب راہل گاندھی ؛ راجیہ سبھا کے ڈپٹی چیئرمین  جناب ہری ونش ، ممبران پارلیمنٹ ، سابق ممبران پارلیمنٹ اور دیگر معززین نے شہیدوں کو خراج عقیدت پیش کیا ۔  لوک سبھا کے سکریٹری جنرل جناب اُتپل کمار سنگھ ؛ راجیہ سبھا کے سکریٹری جنرل جناب پی سی مودی اور شہیدوں کے اہل خانہ نے بھی خراج عقیدت پیش کیا ۔

اس سے پہلے دن میں ، لوک سبھا اسپیکر جناب اوم برلا نے ایکس پر ایک پیغام شیئر کیا ، جس میں کہا گیا ہے کہ:

’’سال 2001 میں ہندوستان کی پارلیمنٹ پر بزدلانہ دہشت گردانہ حملے میں شہید ہونے والے ہمارے بہادر سیکورٹی اہلکاروں اور مستعد عملے کی عظیم قربانی کو خراج عقیدت ۔

ان سورماؤں کا شکر گزار ہوں جنہوں نے جمہوریت کے اس اعلی ترین ادارے ، ہماری پارلیمنٹ کا دفاع کرتے ہوئے اپنی جانیں قربان کیں ۔  ملک  کے لیے ان کا پختہ عزم مسلسل تحریک کا ذریعہ ہے ۔

جس بہادری کے ساتھ ان دلیر سورماؤں نے دہشت گردوں کا مقابلہ کیا وہ فرض کے ساتھ ساتھ جمہوری اقدار اور ملک کے دفاع کے تئیں ہندوستان کی ناقابل تسخیر خواہش کی علامت ہے ۔  بھارت ہمیشہ دہشت گردی کے خلاف سختی سے پیش آیا ہے ۔  ملک کے اتحاد ، سالمیت ، سلامتی اور خودمختاری کے تحفظ کے لیے ہمارا اجتماعی عزم محض ایک رسمی اعلامیہ نہیں ہے ، بلکہ ایک مضبوط پیغام ہے کہ ہندوستان کبھی بھی کسی بھی قسم کی دہشت گردی کے سامنے نہیں جھکے گا ۔

یہ بے مثال قربانی ہماری آنے والی نسلوں کے لیے ہمت ، بے لوث خدمت اور فرض کے تئیں لگن کے لیے تحریک کا ذریعہ بنی رہے گی ۔

ملک یاد کرتا ہے کہ 13 دسمبر 2001 کو راجیہ سبھا سکریٹریٹ کے سیکورٹی اسسٹنٹ جناب جگدیش پرساد یادو اور جناب متبر سنگھ نیگی ؛ کملیش کماری ، کانسٹیبل ، سنٹرل ریزرو پولیس فورس ؛جناب  نانک چند اورجناب  رامپال ، اسسٹنٹ سب انسپکٹر ، دہلی پولیس ؛ جناب اوم پرکاش ، جناب  بیجیندر سنگھ اورجناب  گھنشیام ، ہیڈ کانسٹیبل ، دہلی پولیس ؛ اورجناب دیشراج ، گارڈنر ، سنٹرل پبلک ورکس ڈپارٹمنٹ ، پارلیمنٹ پر دہشت گردانہ حملے کو ناکام بناتے ہوئے شہید ہوئے ۔

ان کی مثالی بہادری کے اعتراف میں ، سروشری جگدیش پرساد یادو ، متبر سنگھ نیگی اور محترمہ کملیش کماری کو بعد از مرگ اشوک چکر سے نوازا گیا ، جبکہ سروشری نانک چند ، رامپال ، اوم پرکاش ، بیجیندر سنگھ اور گھنشیام کو بعد از مرگ کیرتی چکر سے نوازا گیا ۔

*****

ش ح-ا ع خ  ۔ر  ا

U-No- 3105