നമോ രാഘവേ!

നമോ രാഘവേ!

നമ്മെ എല്ലാവരെയും അനുഗ്രഹിക്കാനായി  ഇവിടെ സന്നിഹിതനായിട്ടുള്ള  ബഹുമാന്യനായ ജഗദ്ഗുരു ശ്രീ റാംഭദ്രാചാര്യ ജി ; ഇവിടെ സന്നിഹിതരായ എല്ലാ മുതിർന്ന സന്യാസിമാരും, മധ്യപ്രദേശ് ഗവർണർ ശ്രീ മംഗുഭായ് പട്ടേൽ, മുഖ്യമന്ത്രി ഭായി ശിവരാജ് ജി, ഇവിടെ സന്നിഹിതരായ മറ്റെല്ലാ പ്രമുഖരും,മഹതികളേ, മാന്യരേ!

ചിത്രകൂടം എന്ന പുണ്യഭൂമിയെ ഞാൻ വീണ്ടും വന്ദിക്കുന്നു. ഇന്ന് ദിവസം മുഴുവൻ വിവിധ ക്ഷേത്രങ്ങളിൽ ശ്രീരാമനെ ദർശിക്കാനും ഋഷിമാരുടെ അനുഗ്രഹം നേടാനും അവസരം ലഭിച്ചതിൽ ഞാൻ ഭാഗ്യവാനാണ്. ജഗദ്ഗുരു രാമഭദ്രാചാര്യ ജിയിൽ നിന്ന് എനിക്ക് ലഭിക്കുന്ന വാത്സല്യം എന്നെ അതിശയിപ്പിക്കുന്നു. എല്ലാ ബഹുമാന്യരായ ഋഷിമാരേ, ഇന്ന് ഈ പുണ്യസ്ഥലത്ത് ജഗദ്ഗുരു ജിയുടെ പുസ്തകങ്ങൾ പ്രകാശനം ചെയ്യാൻ  എനിക്ക് അവസരം ലഭിച്ചതിൽ ഞാൻ സന്തോഷിക്കുന്നു. അഷ്ടാധ്യായി ഭാഷ്യം, രാമാനന്ദാചാര്യ ചരിതം, 'ഭഗവാൻ ശ്രീകൃഷ്ണ കീ രാഷ്ട്രലീല' - ഈ ഗ്രന്ഥങ്ങളെല്ലാം ഭാരതത്തിന്റെ മഹത്തായ അറിവിന്റെ പാരമ്പര്യത്തെ കൂടുതൽ സമ്പന്നമാക്കും. ജഗദ്ഗുരു ജിയിൽ നിന്നുള്ള അനുഗ്രഹത്തിന്റെ മറ്റൊരു രൂപമായി ഞാൻ ഈ പുസ്തകങ്ങളെ കണക്കാക്കുന്നു. ഈ പുസ്തകങ്ങളുടെ പ്രകാശനത്തിന് നിങ്ങളെയെല്ലാം ഞാൻ അഭിനന്ദിക്കുന്നു.

എന്റെ കുടുംബാംഗങ്ങളേ,

ഭാരതത്തിന്റെ ഭാഷാശാസ്ത്രം, ഭാരതത്തിന്റെ ബുദ്ധിശക്തി, നമ്മുടെ ഗവേഷണ സംസ്കാരം എന്നിവയെക്കുറിച്ചുള്ള ആയിരക്കണക്കിന് വർഷങ്ങൾ പഴക്കമുള്ള ഒരു ഗ്രന്ഥമാണ് അഷ്ടാധ്യായി. വ്യാകരണത്തിന്റെ വിശാലമായ വിഷയത്തെ വ്യത്യസ്ത സൂത്രങ്ങൾക്ക് എങ്ങനെ ഉൾക്കൊള്ളാൻ കഴിയും, ഭാഷയെ  എങ്ങനെ 'സംസ്കൃത ശാസ്ത്രം' ആക്കി മാറ്റാം, ആയിരക്കണക്കിന് വർഷങ്ങൾ പഴക്കമുള്ള മഹർഷി പാണിനിയുടെ ഈ രചന ഇതിന് തെളിവാണ്. ഈ ആയിരക്കണക്കിന് വർഷങ്ങളായി ലോകത്ത് പല ഭാഷകളും വംശനാശം സംഭവിച്ചു. പഴയ ഭാഷകളെ പുതിയ ഭാഷകൾ മാറ്റിസ്ഥാപിച്ചു. പക്ഷേ, ഇന്നും നമ്മുടെ സംസ്കൃതം ഒരുപോലെ കേടുകൂടാതെയും സ്ഥിരമായും നിലനിൽക്കുന്നു. കാലക്രമേണ സംസ്കൃതം പരിഷ്കരിക്കപ്പെട്ടു, പക്ഷേ അതിന്റെ മൗലികത നഷ്ടപ്പെട്ടിട്ടില്ല. ഇതിന് കാരണം സംസ്കൃതത്തിന്റെ പക്വമായ വ്യാകരണ ശാസ്ത്രമാണ്. 14 മഹേശ്വര സൂത്രങ്ങളെ മാത്രം അടിസ്ഥാനമാക്കിയുള്ള ഈ ഭാഷ ആയിരക്കണക്കിന് വർഷങ്ങളായി ശസ്ത്ര  (ആയുധങ്ങൾ) ശാസ്ത്ര (ഗ്രന്ഥങ്ങൾ) എന്നീ രണ്ട് വിഷയങ്ങളുടെയും മാതാവാണ്. വേദങ്ങളുടെ വാക്യങ്ങൾ സംസ്കൃത ഭാഷയിൽ മാത്രമാണ് സന്യാസിമാർ അവതരിപ്പിച്ചിട്ടുള്ളത്. പതഞ്ജലി യോഗശാസ്ത്രം ഈ ഭാഷയിൽ അവതരിപ്പിച്ചിട്ടുണ്ട്. ഈ ഭാഷയിൽ, ധന്വന്തരി, ചരക് തുടങ്ങിയ മഹർഷിമാർ ആയുർവേദത്തിന്റെ സാരാംശം എഴുതിയിട്ടുണ്ട്. ഈ ഭാഷയിൽ, കൃഷി പരാശർ പോലുള്ള ഗ്രന്ഥങ്ങൾ കൃഷിയെ അധ്വാനവുമായും ഗവേഷണവുമായും ബന്ധിപ്പിച്ചു. ഈ ഭാഷയിൽ, ഭരത്മുനിയിൽ നിന്ന് നമുക്ക് നാടകത്തിന്റെയും സംഗീത ശാസ്ത്രത്തിന്റെയും സമ്മാനം ലഭിച്ചു. ഈ ഭാഷയിൽ, കാളിദാസനെപ്പോലുള്ള പണ്ഡിതന്മാർ സാഹിത്യത്തിന്റെ ശക്തിയാൽ ലോകത്തെ അത്ഭുതപ്പെടുത്തിയിട്ടുണ്ട്. ബഹിരാകാശ ശാസ്ത്രം, അമ്പെയ്ത്ത്, ആയോധനകലകൾ എന്നിവയെക്കുറിച്ചുള്ള ഗ്രന്ഥങ്ങളും ഈ ഭാഷയിൽ എഴുതിയിട്ടുണ്ട്. ഞാൻ കുറച്ച് ഉദാഹരണങ്ങൾ മാത്രമേ നൽകിയിട്ടുള്ളൂ. ഈ പട്ടിക വളരെ നീണ്ടതാണ്, ഒരു രാഷ്ട്രമെന്ന നിലയിൽ ഭാരതത്തിന്റെ വികസനത്തിന്റെ ഏത് വശം നിങ്ങൾ കണ്ടാലും, അതിൽ സംസ്കൃതത്തിന്റെ സംഭാവന നിങ്ങൾക്ക് കാണാൻ കഴിയും. ഇന്നും ലോകത്തിലെ പ്രധാന സർവകലാശാലകളിൽ സംസ്കൃതത്തെക്കുറിച്ച് ഗവേഷണം നടക്കുന്നുണ്ട്. ഭാരതത്തെ അറിയാൻ ലിത്വാനിയയുടെ അംബാസഡർ സംസ്കൃത ഭാഷ പഠിച്ചതും അടുത്തിടെ നമ്മൾ കണ്ടു. അതായത് ലോകമെമ്പാടും സംസ്കൃതത്തിന്റെ ജനപ്രീതി വർദ്ധിച്ചുകൊണ്ടിരിക്കുകയാണ്.

സുഹൃത്തുക്കളേ,

ആയിരം വർഷത്തെ കൊളോണിയൽ ഭരണകാലത്ത് ഭാരതത്തെ പിഴുതെറിയാൻ വിവിധ ശ്രമങ്ങൾ നടന്നു. സംസ്കൃത ഭാഷയുടെ പൂർണ്ണമായ നാശമായിരുന്നു അതിൽ ഒന്ന്. നമ്മൾ സ്വതന്ത്രരായി, പക്ഷേ അടിമത്തത്തിന്റെ മാനസികാവസ്ഥ ഉപേക്ഷിക്കാത്ത ആളുകൾ സംസ്കൃതത്തോട് വിദ്വേഷം തുടർന്നു. മറ്റെവിടെയോ കണ്ടെത്തിയ വംശനാശം സംഭവിച്ച ഒരു ഭാഷയുടെ ലിഖിതങ്ങളെ ഇത്തരക്കാർ മഹത്വപ്പെടുത്തുന്നു, പക്ഷേ ആയിരക്കണക്കിന് വർഷങ്ങളായി നിലനിൽക്കുന്ന സംസ്കൃതത്തെ അവർ ബഹുമാനിക്കുന്നില്ല. മറ്റ് രാജ്യങ്ങളിൽ നിന്നുള്ള ആളുകൾക്ക് അവരുടെ മാതൃഭാഷ അറിയാമെന്ന് ഈ ആളുകൾ വിലമതിക്കും, പക്ഷേ സംസ്കൃത ഭാഷ അറിയുന്നത് പിന്നോക്കാവസ്ഥയുടെ അടയാളമായി അവർ കണക്കാക്കുന്നു. ഇത്തരത്തിലുള്ള മാനസികാവസ്ഥയുള്ള ആളുകൾ കഴിഞ്ഞ ആയിരം വർഷമായി പരാജയപ്പെട്ടുകൊണ്ടിരിക്കുകയാണ്, ഭാവിയിലും അവർ വിജയിക്കില്ല. സംസ്കൃതം പാരമ്പര്യങ്ങളുടെ ഭാഷ മാത്രമല്ല, നമ്മുടെ പുരോഗതിയുടെയും സ്വത്വത്തിന്റെയും ഭാഷ കൂടിയാണ്. കഴിഞ്ഞ 9 വർഷമായി, സംസ്കൃതം പ്രോത്സാഹിപ്പിക്കുന്നതിന് ഞങ്ങൾ വിപുലമായ ശ്രമങ്ങൾ നടത്തിയിട്ടുണ്ട്. ആധുനിക സാഹചര്യത്തിൽ, 'അഷ്ടാധ്യായി ഭാഷ്യ'  പോലുള്ള ഗ്രന്ഥങ്ങൾ ഈ ശ്രമങ്ങൾ വിജയകരമാക്കുന്നതിൽ ഒരു പ്രധാന പങ്ക് വഹിക്കും.

എന്റെ കുടുംബാംഗങ്ങൾ

രാമഭദ്രാചാര്യ ജി നമ്മുടെ രാജ്യത്തെ ഒരു മഹാനായ ഋഷിവര്യനാണ് , അദ്ദേഹത്തിന്റെ അറിവിന്റെ അടിസ്ഥാനത്തിൽ മാത്രമാണ് ലോകത്തിലെ പല സർവകലാശാലകൾക്കും പഠനങ്ങളും ഗവേഷണങ്ങളും നടത്താൻ കഴിയുന്നത്. കുട്ടിക്കാലം മുതൽ കാഴ്ചശക്തി ഇല്ലെങ്കിലും, അങ്ങയുടെ  ജ്ഞാനക്കണ്ണുകൾ വളരെ വികസിതമായതിനാൽ അങ്ങ്  എല്ലാ വേദങ്ങളും മനഃപാഠമാക്കിയിട്ടുണ്ട്.താങ്കൾ നൂറുകണക്കിന് പുസ്തകങ്ങൾ എഴുതിയിട്ടുണ്ട്. ഇന്ത്യൻ അറിവിനെയും തത്ത്വചിന്തയെയും കുറിച്ചുള്ള 'പ്രസ്ഥാനത്രയി' മഹാന്മാരായ പണ്ഡിതന്മാർക്ക് പോലും ബുദ്ധിമുട്ടായി അനുഭവപ്പെടുന്നു. ജഗദ്ഗുരു ജി ആധുനിക ഭാഷയിലും അദ്ദേഹത്തിന്റേതായ  വ്യാഖ്യാനം എഴുതിയിട്ടുണ്ട്. ഈ അറിവിന്റെ നിലവാരം, ഈ ബുദ്ധിശക്തി വ്യക്തിപരമായ തലത്തിൽ മാത്രം ഒതുങ്ങുന്നില്ല. ഈ ബുദ്ധിശക്തി മുഴുവൻ രാജ്യത്തിന്റെയും പൈതൃകമാണ്. അതുകൊണ്ടാണ് നമ്മുടെ സർക്കാർ 2015 ൽ സ്വാമിജിയെ പത്മവിഭൂഷൺ നൽകി ആദരിച്ചത്.

സുഹൃത്തുക്കളേ,

സ്വാമിജി മത-ആത്മീയ മേഖലകളിൽ സജീവമായിരിക്കുന്നതുപോലെ, സമൂഹത്തിനും രാഷ്ട്രത്തിനും വേണ്ടി കൂടി  അദ്ദേഹം ഒരുപോലെ ശബ്ദമുയർത്തുന്നു. സ്വച്ഛ് ഭാരത് അഭിയാന്റെ 9 രത്നങ്ങളിൽ ഒന്നായി ഞാൻ അങ്ങയെ  നാമനിർദ്ദേശം ചെയ്തപ്പോൾ, തുല്യ സമർപ്പണത്തോടെ ആ ഉത്തരവാദിത്തം അങ്ങ്  ഏറ്റെടുത്തു. രാജ്യത്തിന്റെ അഭിമാനത്തിനായി സ്വാമിജി എടുത്ത പ്രതിജ്ഞകൾ ഇപ്പോൾ പൂർത്തീകരിക്കപ്പെടുന്നതിൽ ഞാൻ സന്തുഷ്ടനാണ്. നമ്മുടെ ഭാരതം ഇപ്പോൾ ശുദ്ധവും ആരോഗ്യകരവുമായി മാറുകയാണ്. ഗംഗാ മാതാവിൻ്റെ ഒഴുക്കും  ശുദ്ധമാകുകയാണ്. ഓരോ നാട്ടുകാരന്റെയും മറ്റൊരു വലിയ  സ്വപ്നം സാക്ഷാത്കരിക്കുന്നതിൽ ജഗദ്ഗുരു രാമഭദ്രാചാര്യ ജി ഒരു പ്രധാന പങ്ക് വഹിച്ചിട്ടുണ്ട്. അങ്കണം  മുതൽ മറ്റ് കാര്യങ്ങൾ  വരെ അങ്ങ്  വളരെയധികം സംഭാവന നൽകിയ രാമക്ഷേത്രവും തയ്യാറാകാൻ പോകുന്നു. രണ്ട് ദിവസം മുമ്പ്, പ്രാൺ പ്രതിഷ്ഠ ചടങ്ങിൽ പങ്കെടുക്കാൻ അയോധ്യയിലെ ശ്രീരാമ ജന്മഭൂമി തീർത്ഥക്ഷേത്ര ട്രസ്റ്റിൽ നിന്ന് എനിക്ക് ഒരു ക്ഷണം ലഭിച്ചു. ഇതും  എന്റെ ഭാഗ്യമായി  ഞാൻ കരുതുന്നു.

ബഹുമാന്യരായ ഋഷിമാരേ, സ്വാതന്ത്ര്യത്തിന്റെ 75-ാം വർഷം മുതൽ സ്വാതന്ത്ര്യത്തിന്റെ 100-ാം വർഷം വരെയുള്ള ഏറ്റവും പ്രധാനപ്പെട്ട കാലഘട്ടത്തിനായി, അതായത് ഈ 25 വർഷങ്ങൾ 'അമൃത് കാല'മായി രാജ്യം ഉറ്റുനോക്കുകയാണ്. ഈ 'അമൃത് കാല'ത്തിൽ, രാജ്യം വികസനവും അതിന്റെ പൈതൃകവും ഒരേസമയം മുന്നോട്ട് കൊണ്ടുപോകുന്നു . നമ്മുടെ തീർത്ഥാടന കേന്ദ്രങ്ങളുടെ വികസനത്തിനും ഞങ്ങൾ മുൻഗണന നൽകുന്നു. പ്രകൃതി സൗന്ദര്യത്തോടൊപ്പം ആത്മീയ പരിസ്ഥിതിയും ഉള്ള ഒരു സ്ഥലമാണ് ചിത്രകൂട്. 45,000 കോടി രൂപയുടെ കെൻ-ബെത്വ ലിങ്ക് പദ്ധതി, ബുന്ദേൽഖണ്ഡ് എക്സ്പ്രസ് വേ, അല്ലെങ്കിൽ പ്രതിരോധ ഇടനാഴി എന്നിവയാകട്ടെ, അത്തരം ശ്രമങ്ങൾ ഈ മേഖലയിൽ പുതിയ സാധ്യതകൾ സൃഷ്ടിക്കും. ചിത്രകൂട് വികസനത്തിന്റെ പുതിയ ഉയരങ്ങളിലെത്തണമെന്ന് ഉറപ്പാക്കാനാണ് എന്റെ ആഗ്രഹവും ശ്രമവും. ഒരിക്കൽ കൂടി, ബഹുമാന്യനായ ജഗദ്ഗുരു ശ്രീ റാംഭദ്രാചാര്യ ജിക്ക് ഞാൻ ആദരപൂർവ്വം പ്രണാമം അർപ്പിക്കുന്നു. അദ്ദേഹത്തിന്റെ അനുഗ്രഹങ്ങൾ നമുക്കെല്ലാവർക്കും പ്രചോദനം നൽകട്ടെ, നമുക്ക് ശക്തി നൽകട്ടെ, അദ്ദേഹത്തിന്റെ അറിവ് നമ്മെ തുടർന്നും നയിക്കട്ടെ. ഈ വികാരം പ്രകടിപ്പിച്ചുകൊണ്ട്, എന്റെ ഹൃദയത്തിന്റെ അടിത്തട്ടിൽ നിന്ന് ഞാൻ നിങ്ങൾക്കെല്ലാവർക്കും അങ്ങേയറ്റത്തെ  നന്ദി പറയുന്നു.

ജയ് സിയ റാം.

നിരാകരണവ്യവസ്ഥ: ഇത് പ്രധാനമന്ത്രിയുടെ പ്രസംഗത്തിന്റെ ഏകദേശ വിവർത്തനമാണ്. യഥാർത്ഥ പ്രസംഗം ഹിന്ദിയിലായിരുന്നു നടത്തിയത്.

-NK-