পার্টগলি জীবত্তম মথকী ভক্তশিং অমসুং খোঙলোয়শিং য়াইফ পাউজেল পীজরি!

শ্রী সংস্থান গোকরন পার্টগলি জীবত্তম মথকী ২৪ শুবা মহান্ত, শ্রীমদ বিদ্যধীস তির্থ শ্বামীজি, ইকায়খুম্নরবা রাজ্যপাল শ্রী অশোক গজাপতি রাজু জি, মীয়ামগী চীফ মিনিষ্টর ইনাও প্রমোদ সাৱান্ত জি, মথ কম্মিতিগী চিয়ারপর্সন শ্রী শ্রীনিভাস দেম্পো জি, ভাইস প্রসিদেন্ত শ্রী আর.আর কমাত জি, কেন্দ্রগী মন্ত্রীমন্দলগী ঐগী মরুপ শ্রী শ্রীপদ নাইক জি অমসুং দিগম্বর কমাত জি অমসুং অতোপ্পা শক্নাইরবশিং, ইবেম্মাশিং অমসুং ইবুংঙোশিং.

ঙসি শেংলবা থৌরম অসিদা ঐগী পুক্নিং শান্তিনা থল্লে। সাধুশিংগী মরক্ত ফম্বা অসিমক অধ্যাতিক্কী নুংঙাইবা অমনি। মফম অসিদা মশিং য়াম্লবা ভক্তশিং শরুক য়াবা অসিনা চহি লিশিং কয়া শুরবা মথ অসিগী মপাঙ্গল মখা তানা কনখৎহল্লে। ঙসিগী থৌরম অসিদা মীয়ামগী মরক্ত শরুক য়াবা অসি ঐগী লাইবক ফবনি। মফম অসিদা লাক্ত্রিঙৈদা ঐ রাম মন্দির অমসুং বির বিতথাল মন্দির য়েংলুরে। মফম অদুদা লৈরিবা শান্তি অমসুং ফিবম অদুনা থৌরম অসি অমুক্ক হেন্না অধ্যাতিক ওইল্লে।

মরুপশিং,

শ্রী সংস্থান গোকরন পার্টগলি জীবত্তম মথ লিংখৎপা চহি ৫৫০ মপুংফারকপগী থৌরম পাংথোক্লিবা অসি তশেংনা পুৱারি ওইরবা থৌরম অমনি। হৌখিবা চহি ৫৫০ দা, লোয়শঙ অসিনা মতমগী মশিং থিঙমদ্রবা নোংলৈ-নুংশিৎ কয়া মায়োক্নখ্রে; যুগ অসি হোংলে, চহি হোংলে, লৈবাক অমসুং খুন্নাই অওনবা কয়া লাকখ্রে অদুবু, মতমগী অহোংবশিং অমসুং শিংনবা কয়াগী মরক্ত, মথ অসিনা কৈদৌঙৈদা মসিগী মাইকৈ মাঙখিদে, মসিগী ওন্নবদা, মসি মীয়ামগী লম্বী তাকপা লমজিংফম অমা ওইরকখি অমসুং মসিগী শক্তম অসি পুৱারিদা মরা তাখি, মসি মতমগী মতুংইন্না মখা তানা হিংখি। মথ অসি লিংখৎখিবগী ৱাখল্লোন অদু ঙসি ফাওবা ফজনা লৈরি, থৌনা অমনা মীয়ামগী য়াইফনবা থবক তৌনবা চৎনবী অমসুং অমসুং থবক শম্নহনখি। মীরোল মীরোল কয়াগী মথংদা অধ্যাতিক্কী পান্দমদি তুংদু-লৈতবা, থোঙ মান্নবা অমসুং পুন্সিগী গুনশিং ফংহনবনি হায়বা ৱাখল্লোন মথ অসিনা পাউজেল পীখি। খুদোংথিবা মতম কয়া থেংনরবসু খুন্নাইগী মপাঙ্গল হনবা লৈতে হায়বা মথ অসিগী চহি ৫৫০ গী খোঙচৎনবা খুদম ওইরে। পুৱারি ওইরবা থৌরম অসিদা ঐনা মথাধিপতি শ্রীমদ বিদ্যধিস তির্থ শ্বামীজি, কম্মিতিগী মেম্বরশিং অমসুং থৌরম অসিদা শরুক য়ারিবা খুদিংমক্ত য়াইফ পাউজেল পীজরি।

মরুপশিং,

লোইশঙ অমনা অচুম্বা অমসুং মীয়ামগী থবক্কী য়ুম্ফম অমা ওইনা লেপ্পা মতমদা, মসি মতমগী অহোংবশিংনা মাইথিবা পীবা ঙমদে, মদুগী মহুত্ত মতম শাংনা লৈনবা খুন্নাইদা থৌনা পী। ঙসিদি, চৎনবী অসি মখা চৎথদুনা, মথ অসিনা অনৌবা পন্দুবা অমা ইরে। মফম অসিদা ভগবন রামগী ফিত ৭৭ ৱাংবা শেঞ্জেংগী মীতম অমা থম্লে। নুমিৎ হুমনিগী মমাংদা ঐনা অয়োধ্যাদা শ্রী রাম জন্মভুমি মন্দিরগী শেংলবা মতোন্দা ধর্ম ধৱাজা পাইহনখ্রে। ঙসি রামায়ন্দা য়ুম্ফম ওইবা থিম পার্ক অমসু শঙ্গাখ্রে।

মরুপশিং,

মথ অসিগী অনৌবা মফমশিং তুংগী মীরোলশিংগী লৌশিং, ইথিল অমসুং অধ্যাতিক্কী থবকশিংগী লেংদ্রবা মফমশিং ওইরক্লগনি। মফম অসিদা ম্যুজিয়ম শেমগৎলে অমসুং অনৌবা তেক্নোলোজি য়াওরবা থ্রি-দি থিয়েতরনা মথগী চৎনবী ঙাক-শেনবগা লোয়ননা মসিগী হেরিতেচ অনৌবা মীরোলশিংগা শম্নহনগনি। লৈবাক শীনবা থুংবগী ভক্ত লাখ কয়া শরুক য়াদুনা নুমিৎ ৫৫০ হেন্না পাংথোকখিবা শ্রী রাম নাম জপ যজ্ঞ অমসুং রাম রথ যাত্রা খুন্নাইদা কৎথোকপা অমসুং থকশি-খাসি লৈবগী অপুনবা থৌনাগী খুদমশিং ওইরে। মসিগী অপুনবা মপাঙ্গল অসিনা ঙসি লৈবাক অসিগী মফম খুদিংমক্ত অনৌবা ৱাখল্লোন অমা মিকপ থোকহল্লে।

মরুপশিং,

অধ্যাতিক অমসুং অনৌবা তেক্নোলোজি শম্নহল্লিবা থবক অসিনা মখা তানা তুংগী মীরোলশিংদা ইথিল পীগনি। মসিগী শিংথানিঙাই ওইরবা খুৎশেম অসিগীদমক ঐনা ময়াম থাগৎপা ফোঙদোকচরি। ঙসিগী অচৌবা থৌরম অসিদা, অখন্নবা থৌরম অসিগী খুদমশিং ওইনা নিংশিং শেনয়েকশিং অমসুং পোষ্টেজ ষ্টাম্পশিংসু ফোঙলে, চহি চা কয়া খুন্নাই অসি অমতা ওইনা পুনশিনখিবা অধ্যতিক্কী শক্তিদা কৎথোক্লে।

মরুপশিং,

দ্বিতা বেদান্তগী ফাউন্দেসন লিংখৎখিবা অচৌবা গুরুগী চৎনবীদগী মথ অসিদা মখা তানা মপাঙ্গল ফংলকখিবনি। ১৪৭৫ দা শ্রীমদ নরায়ান তির্থ শ্বামীজিনা লিংখৎখিবা মথ অসি অঙকপা অচার্য়া জগাদগুরু শ্রী মধবাচার্য়াগী লৌশিংগী চৎনবীগী মশা অমনি। অচার্য়াশিং অসিদা ঐনা কোক নোঞ্জরি। হায়রিবা অধ্যাতিক্কী তুরেল অসিগা চপ মান্নবা অহিংবা তুরেলশিং উদুপী অমসুং পার্টগালিনা ওইরি অমসুং মতম অদুদা গুরু-শক্তিনা ভারতকী নোংচুপ থংবা সমুদ্র মপানগী নাৎকী ইচেল লমজিংখি। নোংমা খক্তদা চৎনবী অসিগা মরী লৈনবা থৌরম অনি শরুক য়াবা ফংবা অসি ঐগী ওইনা লাইবক ফবনি।

মরুপশিং,

চৎনবী অসিগা শাগোন্নরিবা ইমুংশিংনা, মীরোল অমগী মতুংদা মীরোল অমা, থকশি-খাসি লৈহনবা, লৌশিং তানশিনবা, থবক শুবা কনবা অমসুং মখোয়গী পুন্সিগী অফবা য়ুম্ফম শেমগৎপা চাউথোকচনিঙাইনি। ললোন-ইতিক, লাইরিক-লাইশু, তেক্নোলোজি, লৌশিং, লুচিংবগী গুন অমসুং কৎথোকপা মখোয়গী পুন্সিগী পান্দমদা চেৎনা মমি তারে। চৎনবী অসিগা মরী লৈনবা ইমুং কয়াদা অমসুং লনাই মীওই কয়াগী মরক্ত মাইপাকপগী ৱারি কয়া লৈরে অমসুং হায়রিবা মাইপাকপশিং অসিগী হৌরকফম মীওইবগী ৱাখল চেনবা, গুনশিং অমসুং থবকনা ওইরে। মথ অসি হায়রিবা গুনশিং অসি ঙাক-শেনবগী মরুওইবা মফমনি অমসুং মসিনা তুংগী মীরোলশিংদা মখা তানা থৌনা হাপকনি।

মরুপশিং,

ঙসি পুৱারি ওইরবা মথ অসিগী অতোপ্পা মরুওইবা শক্তম অমা পানবা য়াম্না মরুওই। চহি চা কয়া খুন্নাইগী কাংলুপ খুদিংমক্না মীয়ামগী থবক তৌবগী ৱাখল্লোন শৌগৎপা অসি মসিগী মরুওইবা শক্তম অমনি। চহি চা কয়াগী মমাংদা, লমদম অসিদা অৱাবা তারকপা মতমদা অমসুং মীয়াম মখোয়গী য়ুমশিং থাদোকপা অমসুং অনৌবা মফমশিংদা চঙজফম লৌবা মতমদা, মথ অসিনা মীয়ামগী মতেং পাংখি, লাইশঙশিং, মোনাষ্ট্রিশিং অমসুং চঙজফমশিং অনৌবা মফমশিংদা শেমগৎখি। মথ অসিনা লাইনিং ঙাক-শেনবা খক নত্তনা মীওইবা অমসুং নাৎ ঙাক-শেনখি অমসুং মতমগী মতুংইন্না মসিগী থবক পাকথোক-চাউথোকখি। ঙসি লায়রবশিংদা লাইরিক-লাইশু তম্বা, হোষ্টেলশিং, অহলশিংদা মতেং পীরে। মতম পুম্নমক্ত মথ অসিনা মীয়ামগী য়াইফনবা মসিগী লৈজবশিং কৎথোক্লি। মথ ঙসিনা তোঙান তোঙানবা রাজ্যশিংদা হোষ্টেলশিং, অনৌবা স্কুলশিং নত্ত্রগা অৱাবা মতমদা মতেং পাংবগী থবকশিং পাংথোকপা ওইবা য়াই, অধ্যাতিক অমসুং মীয়ামগী থবক তৌবা পুন্না চৎমিন্নবা মতমদা, খুন্নাইদা তুংদু-লৈতাবা অমসুং ইথিল অনিমক ফংদুনা মাঙলোমদা চঙশিল্লি হায়বা মসিনা খুদম ওইরে।

মরুপশিং,

গৱাগী লাইশঙশিং অমসুং লমদম অসিগী চৎনবীশিং শিংনবা কয়া মায়োক্নবা মতম অমা লৈখি, লোল অমসুং নাৎতা অকনবা চৈথেং পীরকপা মতমদা, হায়রিবা ফিবমশিং অদুনা খুন্নাইগী থৱায় শোন্থহনখিদে; মদুগী মহুত্ত, মখোয়না হেন্না মপাঙ্গল কনখৎহনখি। মসি গৱাগী অঙকপা অমনা, অহোংবা খুদিংদা রাজ্য অসিগী নাৎ অমসুং চৎনবীগী ফজবা ঙাক্তুনা থমখি, অমসুং মসি মতমগী মতুংইন্না মনুংদা অমুক হিঙ্গৎহনখি; খোঙচৎ অসিদা পার্টগলি মথগুম্বা লোইশঙশিংনা মরুওইবা থৌদাং অমা লৌখি।

মরুপশিং,

ঙসি, শিংথানিঙাই ওইবা নাৎকী অওনবা অমা পুরকপা ভারতনা উরে। অয়োধ্যাদা রাম লাইশঙ অমুক শেমজিল্লে, কাসি বিশ্বনাথ ধাম অমুক হন্না শেমজিল্লে অমসুং উজয়েন্দা মহাকাল মহালোক পাকথোক-চাউথোক্লে- ঐখোয়গী লৈবাক মিকপ থোক্লকপা হায়রিবা থবকশিং অসিদা উবা ফংলে, মসিনা লৈবাক অসিগী অধ্যাতিক্কী পুক্কৈদা অনৌবা থৌনা হাপ্লে। অনৌবা ৱাশক অমসুং থাজবগা লোয়ননা কমদৌনা ঙসিগী ভারতনা মসিগী নাৎকী শক্তম ঙাক্নবা কয়া য়াম্না খুমাঙ চাউশিল্লবগে হায়বা রামায়ান সর্কুইত, কৃষ্ণ সর্কুইত, গয়া জিদা চাউখৎ-থৌরাংগী থবকশিং অমসুং মমাঙদা অমুক্ত ওইখিদ্রিবা মওংদা কুম্ভ মেলা পাংথোকখিবা অসিনা খুদমশিংনি। মিকপ থোকপা অসিনা মখোয়গী হৌরকফমশিংগা মখা তানা শম্নবা তুংগী মীরোলশিংদা ইথিল পীরে।

মরুপশিং,

কৎথোকপগী মখা তাবা ইচেল অমা, সাধুগী চৎবীশিং অমসুং চহি চা কয়াগী নাৎকী থবকশিংগা লোয়ননা, শেংলবা লমদম গৱাদা মসিগী তোপ-তোপ্পা মশাগী অধ্যাতিক্কী মশক অমা লৈরি। মহৌশাগী ফজবগা শাগোন্নরিবা লমদম অসিদা, পার্টগালি মথনা মখা তানা ফগৎহল্লবা ‘দক্ষিন কাসি’ গী শক্তম অমা উবা ফংলি। মথ অসিনা থবক তৌরিবা অসি গৱা অমসুং কোনকন খক নত্তে, মসিগী চৎনবী অসি লৈবাক অসিগী তোঙান তোঙানবা মফমশিং অমসুং বারানসীগী শেংলবা লমদমগসু মরী লৈনরি। বারানসীগী  এম.পি, অচার্য়া শ্রী নারায়ন তির্থ, ফাউন্দরনা, মহাক্কী অৱাং ভারত খোঙচৎ মনুংদা বরানাসিদা সেন্তর অমা লিংখৎখি, মফম অদুদা মথগী অধ্যতিক্কী ইচেল খাগী অৱাংদা শন্দোকখি। ঙসি ফাওবা বারানসীদা লিংখৎখিবা সেন্তর অদু মখা তানা মীয়ামগী থবক তৌরি।

মরুপশিং,

শেংলবা মথ অসি চহি ৫৫০ মপুংফারে। ঐখোয়না মসিগী পুৱারি হরাওবা ফোঙদোকপা খক নত্তনা তুংগী মাইকৈসু লেপ্লি। অপুনবগী খুৎথাংদা বিকসিত ভারত অমগী লম্বী চৎকদবনি অমসুং খুন্নাইশিং পুল্লবা মতমদা, লমদম খুদিংমক অমসুং খুন্নাইগী কাংলুপ খুদিংমক অমতা ওইরবা মতমদা, লৈবাক অসি মাঙলোমদা চঙশিনগনি। শ্রী সংস্থান গোকরন পার্টগলি জীবত্তম মথকী মরুওইবা পান্দমদি মীয়াম শম্নবা, ৱাখলশিং শম্নবা অমসুং চৎনবী অমসুং অনৌবা মতমগী মরক্ত থোঙ অমা শাবনি অমসুং মরম অদুনা বিকসিত ভারত অমগী খোঙচত্ত, ইথিল পীনবা মরুওইবা মফম অমগী থৌদাং মথ অসিনা লৌরি।

মরুপশিং,

ঐনা মীনুংশি ফাওরকপা মতম খুদিংদা, ঐনা করিগুম্বা খর মীয়ামদা হায়জৈ। একাদসি পাংথোক্নবা থবক শ্বামীজিনা ঐঙোন্দা শীন্নরে। মহাক সাধু অমনি অমসুং মহৌশানা কনাগুম্বা অমনা হায়জরকপদা সাধুনা য়াই, অদুবু ৱাফম অমা য়াবা পাম্বা কনাগুম্বা মীওই অমা ঐ নত্তে, ঙসি মীয়াম মরক্ত শরুক য়াবা অসিদা, ঐনা ফোঙদোক্নিংবা খর ঐগী পুক্নিংদা লাকখি। ঐনা মীয়ামদা অপীল ৯ থম্বা পাম্মী অমসুং অদোমগী ইন্সতিতুসনগী খুৎথাংদা, মীওই খুদিংমক্ত য়ৌহনবা য়াগনি। হায়রিবা অপীল ৯ অদু ৱারেপ ৯গুম্বনি। মালেম অসি ঐখোয়গী ইমানি হায়না খনবগা লোয়ননা, মহৌশাগী অকোয়গী ফিবম ঙাক-শেনবা অসি ঐখোয়গী ইথৌনি হায়না ঐখোয়না খনবা মতমদা বিকসিত ভারত অমগী মঙলান মঙফাওনবা ঙমগনি অমসুং মথকী পাউতাকশিংনা মহৌশাগী অকোয়বা ফিবম ইকায়খুম্নবা উৎনবা ঐখোয় লমজিংলি। মরম অদুনা অহানবা ৱারেপ ঈশিং তুংশিনবা, ঈশিং য়োকশিনবা অমসুং তুরেলশিং ঙাক-শেনবা ওইগদবনি। অনিশুবা ৱারেপনা উ পাম্বীশিং থাবা ওইগদবনি, লৈবাক শীনবা থুংনা ‘ইমাগী মিংদা উ পাম্বী অমা থাবা’ খোঙজং মাইপাক্না চঙশিল্লি অমসুং করিগুম্বা লোইশঙ অসিনা মসিদা শরুক য়ারবদি, মসিগী কান্নবা হেন্না ফংগনি। অহুমশুবা ৱারেপনা লু-নানবগী থবক ওইগদবনি, লম্বী খুদিং, লৈকায় খুদিং অমসুং সহর খুদিং লু-নান্না থমগদবনি। মরিশুবা ৱারেপনা শ্বাদেসি চৎনবনা ওইগদবনি। অত্মানির্ভর ভারত অমসুং শ্বাদেসিগী লাইৱাগা লোয়ননা ঙসিগী ভারত মাঙলোমদা চঙশিল্লি অমসুং ঐখোয় মাঙলোমদা পুখৎকদবা ৱারেপ অমা ‘ভোকেল ফোর লোকেল’ লৈবাক অসিনা হায়রি।

মরুপশিং,

প্রধান মন্ত্রীনা হায়খি ‘দেস দরশন’ না মঙাসুবা ৱারেপ ওইগদবনি, মীওই খুদিংমক্না লৈবাক অসিগী তোঙান তোঙানবা মফমশিং খঙনবা হোৎনগদবনি। মহৌশাগী লৌউ-শিংউগী থবক পুন্সিগী শরুক অমা ওইহনবা অসিনা তরুকশুবা ৱারেপ ওইগদবনি। হকচাং ফবা পুন্সি মহিং অমা চৎনবনা তরেৎসুবা ৱারেপ ওইগদবনি, শ্রী অন্না শীজিন্নগদবনি অমসুং থাউ চাবা চাদা ১০ হন্থহনগদবনি। য়োগ অমসুং শাজেল শান্নবনা নিপালসুবা ৱারেপ ওইগদবনি অমসুং করিগুম্বা মওং খরদা লায়রবগী মতেং পাংবনা ৯শুবা ৱারেপ ওইগদবনি। করিগুম্বা ঐখোয়না ইমুং অমা খক মতেং পাংলবদি, ঐখোয়গী মীৎমাঙদা ভারতকী তুংলমচৎ অওনবা পুরকপা অদু অদোম উবা ফংগনি।

মরুপশিং,

ঐখোয়গী মথনা ৱারেপশিং অসি মীয়ামগী অপুনবা থবক অমা ওন্থোকপা ঙমগনি। মতমগী মতুংইন্না খুন্নাইনা মসিগী থৌদাংশিং হেন্না পাংথোকপা মতমদা খুন্নাই মাঙলোমদা চঙশিল্লি হায়বগী চৎনবী অদু চহি ৫৫০ গী মথকী থবকশিংনা ঐখোয়দা তাক্লে অমসুং চহি চা কয়া মথনা খুন্নাইদা পীবা থৌনা অদুনা ভারতকী তুংলমচৎ শেমগৎপদা লমজিংগদবনি।

মরুপশিং,

রাজ্য অসি চাউখৎলকপগা লোয়ননা গৱাগী অধ্যতিক্কী মাইপাকপা অসি তোপ-তোপ্পা মশক্নি। পর কেপিতা ইনকম খ্বাইদগী ৱাংবা রাজ্যশিংগী মনুংদা গৱা য়াওরি অমসুং মসিদা তুরিজম, ফার্মা অমসুং সর্বিস সেক্তরনা য়াম্না চাউনা মতেং পাংলি। চহি খর অসিদা লাইরিক-লাইশু অমসুং হকশেলদা গৱাগী অনৌবা মাইপাকপশিং লৈরে অমসুং রাজ্য অসিগী ইনফ্রাষ্ট্রকচর ফগৎনবা কেন্দ্র অমসুং রাজ্য সরকারশিংনা থবক পায়খৎলি। হায়ৱেশিং, এয়রপোর্তশিং অমসুং রেলৱে পাকথোক-চাউথোকপনা ভক্তশিং অমসুং লমকোয়বা মীওই অনিমক চৎথোক-চৎশিন নুংঙাইহল্লে। ২০৪৭ দা বিকসিত ভারত অমা ওইনবা লৈবাক্কী মঙলান্দা, তুরিজম মরুওইবা মচাক অমনি অমসুং মসিগী ময়েক লারবা খুদম গৱানা ওইরি।

মরুপশিং,

ভারত মরুওইবা তাঙ্ক অমা ফাউদুনা চৎলি। নহারোলশিংগী থৌনা, লৈবাক্কী মশানা মশাবু থাজবা হেনগৎলকপা অমসুং  লৈবাক অসিনা নাৎকী হৌরকফমশিংদা নকশিনবা অসিনা পুন্না অনৌবা ভারত অমা শেম্লি। অধ্যাতিক, লৈবাক্কী থবক অমসুং চাউখৎপা পুন্না মাঙলোমচা চৎমিন্নরবা মতমদা বিকসিত ভারত অমগী মঙলান মঙফাওনবা ঙমগনি। মাইকৈ অসিদা শেংলবা লমদম গৱা অমসুং মথ অসিনা মরুওইবা থবক অমা পাংথোক্লি।

ঙসি পুজ্যা শ্বামীজিনা ঐঙোন্দা ৱাফম কয়া ফোঙদোক্লে। মাইপাকপা কয়াগী মনা মহাক্না ঐঙোন্দা পীখি। মহাক্না ফোঙদোক্লিবা ৱাখল্লোনশিং অসিগীদমক ঐনা মহাক থাগৎপা ফোঙদোকচরি। অদুবু অশেংবদি, মাইপাকপা অসি মোদীনা ওইহনবা নত্তে। মসি ভারতমচা করোর ১৪০ গী ৱাশক অমসুং থবক শুবা নোম্বা কনবগী ফলনি। মরম অদুনা ঐখোয়না অফবা ফল কয়া উবা ফংলিবনি অমসুং ঐনা ঐখোয়গী লৈবাক্কী মীওই করোর ১৪০ দা থাজবা থম্বা মরমনা অহেনবা কয়া লাক্লগনি। অদোমনা পনখিবগুম্না, ঐগী পুন্সিগী তাঙ্কক কয়াদা গৱানা মরুওইবা থৌদাং অমা লৌখি। মদু কমদৌনা ওইখিবগে, ঐনা মদু ফোঙদোক্লোই, অদুবু অফবা অওনবা লাকপা মতম খুদিংমক্ত, গৱানা ঐ মাঙলোমদা লমজিংখি। মহাক্কী থৌজালশিংগীদমক ঐনা শেংলবা সাধুদা তৌবীমল খঙবা উৎচরি। অমুক হন্না, শেংলবা থৌরম অসিদা মীয়াম পুম্নমক ঐনা য়াইফ পাউজেল পীজরি। অদোম থাগৎপা ফোঙদোকচরি।

 ***