#IFFIWood, 28 नोव्‍हेंबर 2025

आयज सांजवेळा गोंयांतल्या डॉ.स्यामा प्रसाद मुखर्जी इंडोर स्टेडियमांत भारतीय आंतरराष्ट्रीय चित्रपट महोत्सव (IFFI) 2025 चेर पडदे देंवतना, संवसाभरातल्या चित्रपट कलाकारांच्या उपस्थितीत आनी आकर्शक सांस्कृतीक सादरीकरणांनी एक जिवंत समारोप सुवाळो- उजवाडाक आयलो आनी - ह्या प्रतिश्ठीत चित्रपट महोत्सवाच्या फुडल्या आवृत्ती खातीर आस्त वाडताना, सिनेमा, संस्कृताय आनी कथाकथनाच्या ह्या मोगाळ उत्सवाची आनीक एक उल्लेखनीय आवृत्ती संपन्न जाली.

फाटल्या णव दिसांत गोंयभर पातळिल्ल्या फिल्म महोत्सवाच्या स्थळांनी आशिल्ल्या रुप्या पडद्यांचेर आनी माचयेर शक्तिशाली कथा आनी उत्साही सादरीकरणां पर्जल्ली, जाणी प्रेक्षकांक मोहित केले आनी एक सार्वत्रिक कलात्मक भावना दिसून आयली.

उदेंते वटेनचे आनी नामनेचे कलाकार आशिल्ले रेड कार्पेट खीण, अदभूत सांस्कृतीक सादरीकरण आनी नामनेच्या तशेंच नव्यान सोदून काडिल्ल्या सिनेमा प्रतिभेक भोवमान करपी पुरस्कार एकठांय करून ही सांज सिनेमा मोगीं खातीर आनी चित्रपट मोगीं खातीर याद उरपी सांज जाली.

रात्चापूम बूनबुंचाचोक हाणें दिग्दर्शीत केल्ल्या क्लोजिंग फिल्म 'ए यूज़फुल घोस्ट' ह्या सिनेमाच्या प्रदर्शना उपरांत हो महोत्सव सोंपलो — एक अतिवास्तववादी रत्न जाका जायत्या नामनेच्या आंतरराष्ट्रीय चित्रपट महोत्सवांनी आनी पुरस्कारांनी तोखणाय मेळ्ळ्या.

सांजवेळाच्या उत्सवा मदीं, आतुरतेन वाट पळोवपी पुरस्कारांची घोशणा करून ह्या महोत्सवाचे खाशेलपण उक्ते जाले. जांतूत प्रेक्षकांक आपल्या कला उत्कृश्टतायेन मोहित करपी हुशार निर्मात्यांक आनी उत्कृश्ट प्रतिभेक भोवमानीत केले.  

एश्ले मेफेयर हांणी दिग्दर्शीत केल्ल्या ‘स्किन ऑफ युथ’ फिल्माक बेस्ट फिचर फिल्मा खातीर प्रतिश्ठीत ‘गोल्डन पीकॉक’ मेळ्ळो 

एश्ले मेफेयर हाणें बरयल्लो आनी दिग्दर्शीत केल्लो व्हिएतनामी फिल्म ‘स्किन ऑफ युथ’ आंतरराष्ट्रीय सर्तीच्या विभागांत सगळ्यांत बरो फिचर फिल्म म्हणून मुखार आयलो आनी ताका लागून 56व्या इफ्फीत प्रतिश्ठीत गोल्डन पीकॉक पुरस्कार तांणी  प्राप्त केलो .

आपल्या आकर्शक कथनान हो सिनेमा एक बळिश्ट संदेश दिता-मानवीकरण करप, उजवाड घालप आनी मौनाक आव्हान दिवप. बऱ्या संगीतान आनी कुशळ संपादनान चित्रपटांतले सगळे घटक सोबीतपणान एकठांय आयले. जूरीन ह्या सिनेमाची व्याख्या अशी केली - बोल्ड आनी धाडसी, आकर्शक आनी स्टायलीश. हो सिनेमा अश्या संवसारांत मोग आनी बलिदानाचो सोद घेता जाका आमच्यामदलें खूप उणे लोक पळयतात आनी देखून हो सिनेमा आमच्या मनांत चड काळ जियेतलो. 

‘गोंधळ’ मराठी फिल्माचे दिग्दर्शक संतोष दवाखराक उत्कृश्ट दिग्दर्शक म्हणून सिल्वर पीकॉक

‘गोंधळ’ ह्या मराठी फिचर  फिल्मान 56व्या इफ्फीत उत्कृश्ट दिग्दर्शकाचो सिल्वर पीकॉक मेळयलो.

सांस्कृतीक परंपरेच्या गिरेस्त रचने आड  दिग्दर्शक संतोष दवाखरान ह्या सिनेमॅटिक रत्नाक जल्म दिला. आमकां धारेर दवरपी, आमच्या सगळ्यांत रानटी कल्पने भायर आमकां अजापीत करपी एक मनभुलोवपी कथन अशी जूरीन ह्या सिनेमाची तोखणाय केली. ‘गोंधळ’ हो खऱ्या संवसारांत घडिल्ल्या शेक्सपियराच्या दंतकथा सारको अशें जूरीन फुडें सांगलें.

स्पॅनिश फिल्म ‘अ पोएट’चो मुखेल अभिनेतो उबेइमार रियोस हाका उत्कृश्ट दादलो अभिनेतो म्हणून सिल्वर पीकॉक

स्पॅनिश फिल्म अ पोएट ह्या सिनेमाचो मुखेल अभिनेतो उबेइमार रियोस हांचो 56व्या इफ्फीत सिल्वर पीकॉक फॉर बेस्ट एक्टर (दादलो) पुरस्कार दिवन भोवमान

आर्ट आनी सर्व्हायव्हल हांचे मदल्या युगयुगीन संघर्शाचो एके खाशेले आनी अप्रत्याशित रितीन ह्या सिनेमांत अभ्यास  केला . जो मेरेन ताका आपलें जिवीत बदलपी एक प्रतिभावान किशोर मेळना तो मेरेन गंभीर भावनीक संकश्टांतल्या दुख्खी, पराभूत कवीचें चित्रण करपी अभिनेतो उबेइमार रियोस हाणें पयलेच खेपे उत्कृष्ट अभिनय ह्या सिनेमांत दाखयल्या अशें जूरीन सांगलें, . हो सिनेमा आनी उबेइमाराची भूमिका  सर्वोच्च उर्बा दिवपी आनी निमाणें अद्भुत रितीन मुक्त करपी अशें जूरीन प्रशंसा करताना  फुडें सांगलां.

स्लोवेनियाच्या लिटल ट्रबल गर्ल्स ह्या सिनेमाची मुखेल अभिनेत्री जारा सोफीजा ओस्तानाक उत्कृश्ट बायल अभिनेत्री खातीर सिल्वर पीकॉक

स्लोवेनियाच्या लिटल ट्रबल गर्ल्स ह्या सिनेमाची मुखेल अभिनेत्री जारा सोफीजा ओस्तान हिका तिच्या उल्लेखनीय सूक्ष्म आनी खोलायेन अभिव्यक्तीशील अभिनया खातीर 56व्या इफ्फीत सिल्वर पीकॉक दिवन  भोवमानीत केले.

साद्या, सत्य, ल्हान अभिव्यक्ती आनी अत्यंत नाजूक हावभावांतल्यान खूब कितें सांगला असो उल्लेख करून जूरीन तिच्या अभिनय कुशळटायेची तोखणाय केली. 

'माय फादर्स शॅडो'चे दिग्दर्शक अकिनोला डेव्हिस जुनियर हांकां स्पेशल जूरी पुरस्कार फावो

ब्रिटीश-नायजेरियन फिल्म निर्माती अकिनोला डेव्हिस जुनियराक माय फादर्स  शॅडो ह्या सिनेमा खातीर 56व्या इफ्फीत स्पेशल ज्युरी पुरस्कार दिवन भोवमानीत केले. 

दिग्दर्शक आणि पटकथा लेखकाचे ज्युरीन कवतुक केले आनी म्हळे की, या चित्रपटाच्या मनात इंटिमेट मोमेंट्स आनी ल्हान ल्हान हावभाव आसात

पर्शियन फिल्म माई डॉटर्स हेयर (राहा) खातीर हेसम फ़रहमंद आनी एस्टोनियाच्या फ्रैंक फिल्मा खातीर टोनीस पिल हांकां संयुक्तपणान दिग्दर्शकाचो बेस्ट डेब्यू फिचर फिल्म पुरस्कार फावो जालो 

इराणी फिल्म निर्मातो हेसम फ़रहमंद ताच्या पदार्पणाच्या माई डॉटर्स हेयर (राहा) ह्या फिल्मा खातीर आनी एस्टोनियाचो फिल्म निर्मातो टोनीस पिल ताच्या पदार्पणाच्या फ्रैंक ह्या फिल्मा खातीर , 56व्या इफ्फीत बेस्ट डेब्यू फिल्म ऑफ ए डायरेक्टर पुरस्काराचे संयुक्त विजेते म्हणून जाहीर केले .

जूरीन दोनूय चित्रपटांची तोखणाय केली, ह्या फिल्मांक तांणी शानदारअसो उल्लेख केलो आनी तितलेंच तांच्या कलेन ते प्रभावित जालें.

हिंदी फिल्म केसरी चॅप्टर 2 चे दिग्दर्शक करण सिंग त्यागीक ‘बेस्ट डेब्यू डायरेक्टर ऑफ इंडियन फिचर फिल्म पुरस्कार फावो 

केसरी चॅप्टर 2 दिग्दर्शक करण सिंग त्यागीक 56व्या इफ्फींतल्या पदार्पणाच्या चित्रपटाखातीर हो पुरस्कार फावो जालो. इंडियन पॅनारोमा जूरीन ह्या सिनेमाच्या दिग्दर्शक, निर्मात्याक, कलाकारांक आनी तंत्रज्ञांक परबीं दिली.

बंदिश बँडिट्स सीझन 2 हांकां बेस्ट वेब सीरीज (ओटीटी) पुरस्कार फावो

५६व्या इफ्फींचो बेस्ट वेब सिरीज (ओटीटी) पुरस्कार बँडीश बँडिट्स सीझन २ च्या पंगडाक मेळ्ळो. वेब मालिकेची कथा सगळ्यांक संगीत आनी कला उपलब्ध करता अशें जूरीक दिसलें.

"सेफ़ हाउस" ह्या नॉर्वेजियन फिल्मान  प्रतिश्ठीत आयसीएफटी–युनेस्को गांधी पदक जिखलें

एरिक स्वेनसन हाणें दिग्दर्शीत केल्ल्या नॉर्वेच्या “सेफ हाऊस” ह्या सिनेमाक शांतताय, अहिंसा आनी आंतरसंस्कृतीक संवादाक चालना दिवपी सिनेमांतल्या उत्कृश्ट योगदाना खातीर भारताच्या 56व्या आंतरराष्ट्रीय चित्रपट महोत्सवांत (IFFI 2025) आयसीएफटी-युनेस्को गांधी पदक फावो जालां. 

एक भांगराळी गाथा: भारतीय सिनेमांत रजनीकांत हांच्या 50 वर्सांच्या कारकिर्दीचो उत्सव मनयलो

भारतीय सिनेमांत 50 वर्सां पुराय केल्ले दिग्गज अभिनेते रजनीकांत हांचो आयज समारोप सुवाळ्यांत खासा भोवमान केलो- राष्ट्राच्या चित्रपट संस्कृतायेचेर ताचो टिकपी प्रभाव दाखोवपी हो एक माइलस्टोन आसा. अर्द शेंकडो भारतीय प्रेक्षकांक मोहित करपी ह्या प्रतिकात्मक नखेत्रान ह्या भोवमानाक लागून केंद्र सरकाराचे उपकार मानले. "फाटीं पळयतना वेळ उडून गेला अशें दिसता, कारण म्हाका सिनेमा आनी अभिनयाचेर मोग आसा. म्हाका एक अभिनेतो- रजनीकांत म्हणून शंबर जल्म घेवपाची इत्सा आसा -. तुमच्या मोगा खातीर आनी लगावाखातीर तुमचे खूब आभार. हो मान पुराय फिल्म उद्देगाचो-निर्माते, दिग्दर्शक, तंत्रज्ञ, वितरक, प्रदर्शक आनी हेर सगळ्यांचो," अशें दिग्गज अभिनेत्यान सांगलें.

गोंयांतल्या श्री संस्थान गोकर्ण पर्तगळी जीवोत्तम मठाच्या 550व्या वर्धापन दिन उत्सवा खातीर गोंयांत आशिल्ल्या मानादीक प्रधानमंत्रीचो अभिनंदन संदेश गोंयचे मुख्यमंत्री डॉ. प्रमोद सावंत हांणी दिलो. वसुधैव कुतुंबकमाच्या भावनांत सृजनशीलता, नवनिर्माण, तंत्रगिन्यान, कथाकथन, आनी सिनेमाचें दर्शन घडटा अशें डॉ.प्रमोद सावंत हांणी सांगलें. आमी हांगा फिल्मां आनी संवसार मुखार व्हरपी कथा मनयपाक आयल्यात अशें तांणी म्हळें. सांजवेळा फकत महोत्सवाचो समारोप न्हय, तर सृजनशील मन, कलात्मक प्रतिभा आनी जागतीक सहकार्याच्या उल्लेखनीय मेळाव्याच्या पराकाष्ठेची तेंगशी अशें तांणी सांगलें. सिनेमाच्या परिवर्तनकारी शक्तीचेर भर दितना ताणें सांगलें की सिनेमा मनरिजवणे परस खूब चड-ते भौशीक जाणविकायेक आकार दितात, समाजीक बदलाची प्रेरणा दितात, सांस्कृतीक दायज सांबाळटात आनी भारताच्या विंगड विंगड समाजांत एकचार वाडयतात. आयचे कंटेंट निर्माते ताजे कथन तयार करतात आनी भौगोलिक मर्यादा हुंपपी नव्या स्वरूपांचो प्रयोग करतात अशें डॉ. प्रमोद सावंत हांणी  सांगले. गोंय आतां वर्सां जालीं इफ्फीचें कायमस्वरूपी स्थळ अशें तांणी सांगलें आनी गोंय सरकारान ह्या महोत्सवाक संवसारीक सांस्कृतीक स्थळांत पोसवण दिवपाचे अथक यत्न केल्यात अशेंय  तांणी सांगलें.

इफ्फी २०२५ च्या समारोप  सुवाळ्यांत संबोधन करतना केंद्रीय म्हायती आनी प्रसारण आनी संसदीय वेव्हार राज्यमंत्री डॉ. एल मुरुगन हांणी सांगले की अंदूंच्या इफ्फीन गोंयभरांतल्या वेगवेगळ्या राज्यांतल्यान आनी प्रोडक्शन हाउसातल्यान फिल्मा आनी सांस्कृतीक प्रदर्शनां सादर जाल्यात , जातूंत भारताचें गिरेस्त सांस्कृतीक दायज दाखयला. दर वर्सा इफ्फी नवी रूच हाडटा अशें तांणी सांगलें. प्रधानमंत्री हांच्या दृश्टीकोनाचो उल्लेख करून तांणी सांगलें की वेव्स शिखर परिशद पयलेच खेपे मुंबयंत जाली, तातूंत 77 राश्ट्रांनी आनी चित्रपट, मनरिजवण, मीडिया, आनी सृजनशील उद्देगांतल्या मुखेल भागधारकांनी वांटो घेतिल्लो. तशेंच ह्या वर्साच्या महोत्सवांत गुरु दत्त, राज खोसला, ऋत्विक घटक, भूपेन हजारिका, पी.भानुमती, सलील चौधरी, आनी के. वैकुंठ सारक्या दिग्गज कलाकारांची शताब्दी मनयली . वेव्हज फिल्म बाजारान उदयोन्मुख चित्रपट निर्मात्यांखातीर ₹१,०५० कोटींपरस चड  व्यवसाय निर्माण केलो , जाल्यार  १२५ तरुण प्रतिभांनी सीएमओटी कार्यक्रमात भाग घेतलो, जो नव्या निर्मात्यांक घडोवपाच्या इफ्फीच्या वचनबद्धतेचे प्रतिबिंब आसा. “इफफीच्या इतिहासांत पयलेच खेपे बायलां कडल्यान दिग्दर्शीत केल्ले 50 चित्रपट दाखयले, जाका लागून सिनेमांतल्या बायलांक सशक्त करपाचेर आमचें लक्ष परतून स्पश्ट जालें,” अशें तांणी नदरेक हाडलें. सृजनशीलता आनी तंत्रगिन्यानाच्या आडमेळ्यार नवनिर्माण आनीक चालीक लावपा खातीर मुंबयंत भारतीय सृजनशील तंत्रज्ञान संस्था स्थापन केल्ल्याचेर डॉ. एल मुरुगन हांणी भर दिलो. 

ह्या संदर्भार उलयतना म्हायती आनी प्रसारण मंत्रालयाचे सचीव श्री संजय जाजू हांणी सांगलें की मानादीक प्रधानमंत्री श्री नरेंद्र मोदी हांणी WAVES समिटांत सांगलेंले की हो ऑरेंज इकॉनमीची फांतोडे जावपाचो वेळ आसा. म्हायती आनी प्रसारण सचीव श्री जाजू हांणी फुडें सांगलें की इफ्फी २०२५ न निर्मात्यांक संदी निर्माण करप आनी जागतीक मळार भारतीय प्रतिभेचें अभिमानान प्रदर्शन करप ह्या दिशेन एक धाडसी पावल उबारलां- तशेंच श्री जाजू हांणी सांगलें की भारतीय सृजनशील तंत्रज्ञान संस्था (आयआयसीटी) निर्मात्यांक फकत तांची कुशळटाय आनी कलागुण वाडोवपाक न्हय, तर खंयच्याय सृजनशील निर्मितीतलो एक अभिन्न भाग आशिल्ल्या तंत्रज्ञानाकय शिकपाक मदत करतली. आयआयसीटीचो एनएफडीसी कॅम्पस पयलींच काम करपाक लागला अशी म्हायती तांणी दिली. मुंबयंतली आयआयसीटी हब  स्पोक मॉडेला सारकी आसतली, जाचो देशभरांतल्या निर्मात्यांक फायदो जातलो अशें तांणी फुडें सांगलें.

भारतीय फिल्म इंडस्ट्रीच्या आयकॉनांनी ह्या वर्सा निधन जाल्ल्या उंचल्या पांवड्यावेल्या व्यक्तींचो उगडास केलो, तातूंत धर्मेंद्र, कामिनी कौशल, सुलक्षण पंडित, सतीश शाह, पीयूष पांडे, ऋषभ टंडन, गोवर्धन असरानी, पंकज धीर, वरिंदर सिंग घुमन, जुबीन गर्ग, बाल कर्वे , जसविंदर भल्ला, ज्योती चंदेकर, रतन थियाम, बी. सरोजा देवी, शेफाली जरीवाला, पार्थो घोष, विभू राघवे, शाजी एन.करुण, मनोज कुमार, आलोक चॅटर्जी, श्याम बेनेगल आनी जाकिर हुसेन हांकां भारतीय सिनेमांतल्या अमूल्य योगदाना खातीर तांका आर्गा ओपली. 

ह्या वेळार फिल्म इंडस्ट्रीचे नामनेचे व्यक्ती रमेश सिप्पी, नवाजुद्दीन सिद्दीकी, अभय सिन्हा, ⁠ओमप्रकाश मेहरा, किरण शांताराम हांचो  भोवमान जालो. महोत्सव संचालक शेखर कपूर, एनएफडीसी एमडी श्री प्रकाश मडगम, ईएसजी गोंयची अध्यक्ष डिलायला  लोबो, रवी किसन, ऋषभ शेट्टी, रणवीर सिंग, अमित सद्द, निहारिका कोनिडेला आनी जी.व्ही.प्रकाश कुमार हेवूय ह्या ववेळार हाजीर आशिल्ले.

गणेश वंदना, पारंपारीक नाच, दिव्यांग कलाकारांचे उल्लेखनीय सादरीकरण, ईशान्य भारताची सांस्कृतीक गिरेस्तकाय आनी कर्नाटकांतल्या यक्षगानाच्या पारंपारीक लोकनाट्यप्रकाराचें जिवें प्रदर्शन आनी राजस्थानांतल्या मंगनियारांच्या सादरीकरणांतल्यान ह्या कार्यावळींतल्यान भारतीय दायजाच्या विविधतायेचेर आनी जीवंतपणाचेर भर दिलो.

समारोप सुवाळ्यांत भारतीय सांकेतिक भाशेच्या दुभाष्यांची उपस्थितीन ह्या महोत्सवाच्या समावेशी भावनेचेर भर दिलो, जी फाटल्या णव दिसांनी इफ्फी थळांचेर जायत्या दिव्यांग-अनुकूल उपायांतल्यान दिसून आयली.

अंदूं फिल्म फेस्टिवलान एआय फिल्म फेस्टिवल आनी सिनेमाएआय हॅकथॉन सुरू केलो जो संवसारभरांतल्या निर्मात्यांक पटकथा लेखन, व्हिडियो निर्मिती, संपादन आनी निर्मिती खातीर एआय चलीत साधनांचो वापर करून कथा सांगपाची मर्यादा हुंपपाक,  प्रोत्साहन दिवपाक एक मांची दिता. तशेंच ५६ व्या इफ्फीन संवादांत, मास्टरक्लास आनी गोलमेज सत्रानी गिन्यान वाडोवपा खातीर सिनेमा आनी सृजनशीलतेचे जायते मास्टर मुखार हाडले. 

सिनेमा, कथाकथन, आनी सृजनशीलताय हांच्या उत्साही उत्सवान संपन्न  जाल्ल्या 56व्या इफ्फीन, प्रतिभावान कलाकारांच्या उत्कृष्ट सादरीकरणांनी आनी फावो त्या चित्रपटांक आनी व्यक्तींक मान दिवन, सिनेमाप्रेमी आनी जागतीक चित्रपट समाजाच्या काळजांत एक याद उरपी सुवात निर्माण केल्या,  तेच बरोबर सृजनशील अर्थवेवस्थेंतय एक उजवाडाची सुवात मेळयल्या, जांतूतल्यान  नवनिर्माण, प्रतिभा, आनी आर्टिस्टिक एंटरप्राइज  हाका चालना दिवपाची महोत्सवाची कटिबद्धता दिसता.

आतां सुरू जाता इफ्फीच्या फुडले आवृत्तीची वाट पळोवप, जी परत एक फावट सिनेमा उत्कृश्टताय मनोवपाक, उत्कृश्ट प्रतिभेक वळखुपाक आनी सृजनशील अर्थवेवस्था घटमूट करपाक जागतीक मांची प्रदान करतली.

IFFI विशीं

1952 वर्सा सुरु जाल्लो भारतीय आंतरराष्ट्रीय चित्रपट महोत्सव (IFFI) दक्षिण आशियांतलो सगळ्यांत पोरनो आनी सगळ्यांत व्हडलो चित्रपट महोत्सव. राष्ट्रीय चित्रपट विकास म्हामंडळ (एनएफडीसी), म्हायती आनी प्रसारण मंत्रालय, भारत सरकार आनी गोंय मनरिजवण सोसायटी (ईएसजी) गोंय राज्य सरकार हांणी संयुक्तपणान आयोजीत केल्लो हो महोत्सव आता जागतिक चित्रपटसृष्टीतले शक्तीघर जाला. इफ्फीक खऱ्या अर्थान चमकावपी गजाल म्हळ्यार ताचे अद्वितीय मिश्रण -आंतरराष्ट्रीय सर्ती, सांस्कृतीक प्रदर्शनां, मास्टरक्लास आनी उच्च उर्जा आशिल्लो 'व्हेवज’ (WAVES) फिल्म बाजार, जंय कल्पना, वेव्हार आनी सहयोग आकार घेतात. 20 ते 28 नोव्हेंबर मजगती गोयांत जावपी ह्या 56व्या आवृत्तीत भाशा, शैली, नवोन्मेष आणि आवाजांचो एक दोळे दिपकावपी संग्रह सादर जातलो - जागतिक स्तराचेर भारताच्या सर्जनशील प्रतिभेचो एक मन भुलोवपी उत्सव.

For more information, click on:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Post Link: https://x.com/PIB_Panaji/status/1991438887512850647?s=20

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | सुभाष जाण/उत्कर्षा भुस्कुटे/दर्शना राणे | IFFI 56