Ha ka jingialang bad ki lad pathai khubor jong ka IFFI mynta ka sngi, ka Iran bad ka Iraq ki la iasam ia ka rynsan, da kaba iathuh ia ki khana jong ki riew paidbah kiba la hap ban im ha ki jingeh kiba phylla. Ar tylli ki ri kiba don ki histori kiba dap da ka jingjynjar, artylli ki phlim kiba la mih na ki jingeh ha ka sain hima sima, bad artylli ki kynhun kiba la pyniasoh lang ha kajuh ka jingngeit ki la iawan lang ban wad ia ka jingsngew jong ki ri jong ki, da kaba pyniasoh ia ki jingkynmaw shimet bad ka jingktah ki jingeh ia baroh.

Haba mihkhmat ïa ka phlim Iran ‘My Daughter’s Hair (Raha),’ ka phlim kaba ïakhun ha ka thup ‘Best Debut Feature Film of a Director’ ha ka IFFI, u Director Seyed Hesam Farahmand Joo bad u nongpynmih phlim u Saeid Khaninamaghi ki la ïadon bynta lang ha ka jingïakren. Na ka bynta ka phlim ‘The President’s Cake’ jong ka Iraq, kaba ïakhun ban ïoh ïa ka ICFT UNESCO Gandhi Medal, u Editor u Alexandru-Radu Radu u la kren shaphang ka dur ba kyrpang jong ka phlim bad ka jingpyni dur jong ka ïa ka jingim hapoh ka jingsynshar donbor.

Ka Longïing kaba pdeng ka ioh ka kot kaba don ha ka jingeh, ka ri kaba don ha ka jingpuson shaphang ka jinglong jingman

U Hesam u la pynpaw ba ka ‘My Daughter’s Hair’ ka mih na ki jingshem jong u hi ha ka jingim. “Nga la kwah ban pyni ia ka jinglong jong ki kynthei ha ka ri jong nga,” u la ong, da kaba batai kumno ka khana shaphang ka Raha, kaba die ia u shniuh jong ka na ka bynta ka laptop, ka pyni ia ki jinglenlade kaba jar jar jong bun ki kynthei kiba iaid lyngba ka jingbym thikna ha ka liang ka pisa tyngka.

U nongpynmih phlim Khaninamaghi u la pynïar shuh shuh ïa ka jingïadei, da kaba batai kumno ki jingpynshitom ia ka ri ba dang shen ki la pynsniew shuh shuh ïa ka jinglong jingman ha Iran.

 “Ki briew ki hiar ha ka liang ka pisa tyngka. Ki longiing kiba pdeng ka ioh ka kot ki nang duk”, u la ong. “Ha ka phlim jong ngi, ka ioh ka kot jong kawei ka longïing baroh kawei ka hiar namar kawei ka laptop. Kata kadei kaei kaba jia ha ka imlang sahlang jong ngi.”

Haba kylli shaphang ki jingpyni ia ka jinglong jingman ha phlim, u Hesam u la kyntait ïa ka jinglong “jingduk kaba tasam” kaba ju don ha ki khana shaphang ki nongtrei. “Nga kwah ba ki jingring phlim kin long thik kum ka jingim”, u la ong. "Ki longïing kiba duk ruh ki don ki por kiba itynnad, kiba kmen. Ki rkhie, ki lehkmen, ki shem ïa ka jingsngewtynnad ha ka jingim jong ki. Nga la kwah ban pyni ïa kata ka jingshisha, lyngba ki jingring phlim jong nga.”

U Hesam u la kren ruh shaphang ka jingkwah ban wanrah ia kum kine ki khana kiba don tynrai ha ka imlang sahlang ha ka phlim ba pyniaid iew. "Mynshwa, ia kine ki phlim ym shym la khein kum ki phlim kiba kamai. Nga kwah ban pynkylla ia kata”, u la ong, da kaba ai jingmut ba ka projek kaba hadien jong u, ka bud ia kajuh ka jingmut jingpyrkhat.

U Khaninamaghi u la kren halor ka jinglong jingman kaba mynta ha ka kam shna phlim ha Iran, da kaba ban jur ba wat haba ki nongshna phlim ki pynkhih ïa ki pud ki sam, ka kam phlim jong ki ka dang ïakhun pyrshah ïa ka jingshah khanglad. “Ki bynta jong ki phlim ki shah ot, bad ki nongpeit ki ialeh ban sngewthuh ia ka jingiathuhkhana ba pura”, u la ong.

Ka Khana kaba don nongrim ha ka jingtieng

Haba phai pat ia ka jingiakren sha Iraq ha ki snem 1990, u Alexandru-Radu Radu u la batai ia ka ‘The President’s Cake’ kum ka phlim ba la tei halor ka jingjied ia ki briew bym pat pyntbit”. Baroh ki aktor ki dei ki bym don ka jingtbit, la jied na ka jingim ba man ka sngi, kaba ai ia ka phlim ia ka jinglong ba kyrpang jong ka.

U Radu u la batai ba kane ka phlim ka pynleit jingmut ha ka rukom ba ki jingpynshitom bad ka jingsynshar donbor ki khniot ia ki briew kiba kham duna ka ioh ka kot. “Haba jia kum kine kiei kiei, ki paidbah ki mad jingeh, ym ki nongsynshar donbor,” u la ong, da kaba ïathuh kumno ka jingpynkhreh ia ka phlim kadei kaba la wan na ka jingpeit ia u nongsynshar donbor uba pynbor ïa ki nongshong shnong ban rakhe ïa ka sngi kha jong u. Ka khana shaphang kawei ka khynnah samla, ka Lamia, kaba la shah bynshet ban shet cake na ka bynta u Saddam Hussein, ka long kaba ym lah ban mutdur bad ruh kaba ki briew ki hap ban mad.

U Director Hasan Hadi, u la ong, u la mutdur ia ka jingiathuhkhana kum ka jingiathuhkhana puriskam.

“U Hasan u kwah ba ka Lamia kan long ka dak jong ka Iraq”, la batai u Radu. “Baroh kaba jia ia ka ka pynpaw ia baroh kaba jia ha ka ri.” U Radu u la kren ruh shaphang ka kam shna phlim kaba dang sdang bad kaba dang kiew ha Iraq: “Ym kum ka Iran, ka Iraq kam don ïa ka dustur shna phlim kaba riewspah. Ka ‘The President’s Cake’ kadei ka phlim art – house ba nyngkong eh ha Iraq. Ki Director kum u Hasan mynta ki tei ia kata ka kam.”

Wat la ki wan na ki ri bapher bapher bad ki riti dustur shna phlim, baroh artylli ki phlim ki don ïa ki jingshisha kiba ïadei dur: ka jingkhia jong ki jingpynshitom, ka jingiai shah jong ki briew, bad ki jingïakren ba man la ka sngi shaphang ka burom hapoh ki jingeh kiba iadei bad ka saiñ hima sima. Ha kaba kut, ka jingiakren ka la long kum ka jingkieng kaba jrong naduh Tehran sha Baghdad, kaba la tei ym da ka sain pyrthei, hynrei da ka jingiathuhkhana.

PC Link:

Shaphang ka IFFI

La sdang ha u snem 1952, ka International Film Festival of India (IFFI) ka ieng skhem kum ka jingrakhe kaba la rim bad kaba heh tam ha South Asia ha ka kam ba iadei bad ki phlim. La pynlong lang da ka National Film Development Corporation (NFDC), ka Tnad Information and Broadcasting, Sorkar india bad ka Entertainment Society of Goa (ESG), ka Sorkar Jylla Goa,kane ka tamasa ka la nangroi sha ka jaka ba don bor ha ka pyrthei ha ka kam pynmih phlim—ha kaba ki phlim hyndai ba la pynthymmai ki ïakynduh ïa ki jingpyrshang ba shlur bad ki briew kiba la pynskhem ialade ha kane ka kam ki iakynduh ia kito kiba dang sdang ha kane ka kam. Kaba pynlong ïa ka IFFI ban tyngshaiñ shisha ka dei ka jingbun ki bynta—ki jingïakob ha kylleng ka pyrthei, ki jingpyni ïa ka kolshor, ki masterclass, ki jingai burom, bad ka WAVES Film Bazaar ba shitrhem bha, ha kaba ki jingmut, ki jingïateh bad ki jingïatreilang ki kiew shaphrang. Ha ka jingpynlong ha rud duriaw jong ka Goa naduh ka 20–28 tarik u Naiwieng, ka bynta kaba 56 kan don ki bynta jong ki ktien bapher bapher , ki jait phlim bapher bapher, ki jingsaindur thymmai, bad ki sur—ka jingrakhe ïa ka jingtbit ka India ha ka kam saindur jong ka pyrthei.

Ban ioh jingtip shuh shuh, shon ha ka:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56new/

PIB IFFIWood Broadcast Channel:  https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *