প্রধানমন্ত্রীনা নবেম্বর 29-30, 2025দা ছতিসগরগী রায়পুরদা লৈবা ইন্দিয়ন ইন্সতিত্যুত ওফ মেনেজমেন্ততা পাংথোক্কদৌরিবা পুলিসকী দিরেক্তর জেনরেল/ইন্সপেক্তর জেনরেলশিংগী অখিল ভারতীয় কনফরেন্সগী 60শুবা ইদিসন্দা শরুক য়াগদৌরি।

কনফরেন্স অসি নবেম্বর 28 দগী 30 ফাওবা চত্থগনি। মসিগী পান্দম অসি হৌজিক ফাওবদা লৈরিবা মরুওইবা পুলিসকী শিংনবশিং অসি লৈহন্দনবা তৌবদা খুমাং চাওশিনবশিং রিভিয়ু তৌবা অমসুং 'চাউখৎপা ভারত' কী লৈবাক্কী ওইবা মীৎয়েংগী মওংদা 'শোই-ঙাম্লরোইদবা ভারত' ওইহন্নবগীদমক্তা অশানবা মীৎয়েংগী ওইবা রোদমেপ অমা শেম্বনি।

'চাউখৎলবা ভারত: সেক্যুরিতী দাইমেন্সন' গী হীরমদা পাংথোকপা কনফরেন্স অসিদা লেফ্ত ৱিং এক্ত্রিমিজম, কাউন্তর তেরোরিজম, দিজাস্তর মেনেজমেন্ত, নুপীশিং অশোই-অঙাম থোকহন্দবা অমসুং পুলিসিংদা ফোরেন্সিক সাইন্স অমদি এ.আই. শীজিন্নবা য়াওনা মরুওইবা ৱাফমশিং খন্ন-নৈনগনি
 প্রধানমন্ত্রীনা থোইদোক-হেন্দোক্না অখন্নবা সর্ভিস তৌবগীদমক্তা রাস্ত্রপতি পুলিশ মেদলসু পীগনি

কনফরেন্স অসিদা লৈবাক পুম্বগী মকোক থোংবা পুলিসকী লুচিংবশিং অমসুং সেক্যুরিতী এদ্মিনিস্ত্রেতরশিংগী তোঙান-তোঙানবা ৱাফমশিংদা অরোন-অথুপকী অমদি ৱাহন্থোক লৈবা ৱাখল্লোনশিংদা ৱা খন্ননবগীদমক্তা মরুওইবা ৱারী-ৱাতাই শান্নবগী প্লেৎফোর্ম অমা ফংহনগনি। মসি পুলিস ফোর্সশিংগী মাংদা লাক্কদৌরিবা ওপরেস্নেল, ইনফ্রাস্ত্রকচরেল ওইবা অমসুং য়াইফ-থৌরাংগা মরি লৈনবা শিংনবশিং গী মতাংদা ৱা খন্নবগা লোয়ন-লোয়ননা অরানবা থবকশিং লৈহন্দনবা, ৱায়েল নিংথিনা চত্থনবা অমসুং মনুংগী ওইবা ঙাক-শেনবগী খুদোংথিবশিং লৈহন্দনবগীদমক্তা প্রোফেস্নেল ওইবা থৌরাংশিং য়াৎপা অমসুং শেয়রিং তৌবদসু লায়থোকহল্লি।

প্রধানমন্ত্রী শ্রী নরেন্দ্র মোদীনা মসিগী চহীগী ওইবা কনফরেন্স অসিদা লেপ্পা লৈতনা লুনা লৌবগী মমি তাই অমসুং মরিক চুম্বা ৱা খন্নবশিংবু পুক্নিং থৌগৎলি। মহাক্না পুলিসকী  থৌরাং অসিদা অনৌবা ৱাখল্লোন কয়া থোরক্কদবা ফীভম অমা শেমগৎলি।  বিজিনেস সেসন, মরিক চুম্বা ৱারী শান্নবা অমসুং হীরমশিংগী ওইবা ৱা খন্নবশিংদা পার্তিসিপেন্তশিংদা মরুওইবা মনুংগী ওইবা সেক্যুরিতী অমসুং থৌশীলগী মতাংদা হকথেংননা প্রধানমন্ত্রীগী মফমদা মশা-মশাগী ৱাখল্লোন থম্নবগী তাজ্ঞা ফংহল্লি।

2014 দগী প্রধানমন্ত্রীগী লমজিং-লমতাক্না কনফরেন্স অসিগী মওং অসি লেপ্তনা ফগৎলক্তুনা  লৈবাক পুম্বদগী তোঙান-তোঙানবা মফমশিংদা মসিগী থৌরম অসি পাংথোকপগী মতাংদসু য়াওরি।  কনফরেন্স অসি গুৱাহতী (অসাম), কচ্ছকী রন(গুজরাত), হাইদরাবাদ (তেলঙ্গনা), তেকনপুর(গ্বালিয়র, মধ্য পদেশ), স্তেচু ওফ য়ুনিতী(কেৱরিয়া, গুজরাত), পুনে (মহারাস্ত্র), লখনৌ(উত্তর প্রদেশ), ন্যু দিল্লী, জয়পুর (রাজস্থান) অমসুং ভুবনেস্বর(ওরিশা) দা পাংথোকখ্রে। মসিগী চৎনবী অসি মখা তানা চত্থরদুনা হন্দক্কী চহীদা 60 শুবা পুলিসকী দিরেক্তর জেনরেল/ ইন্সপেক্তর জেনরেলশিংগী কনফরেন্স অসি ছতিসগরগী রায়পুরদা পাংথোক্কদৌরি।

কনফরেন্স অসিদা কেন্দ্রগী গৃহ মন্ত্রী, নেস্নেল সেক্যুরিতী এদভাইজর, গৃহ রাজ্য মন্ত্রী, স্তেত/য়ুনিয়ন তেরিতোরীশিংগী পুলিসকী দিরেক্তর জেনরেলশিং অমসুং কেন্দ্রগী পুলিস ওর্গনাইজেসনশিংগী লুচিংবশিংনা শরুক য়াগনি। অনৌবা অমসুং ইনোভেতিব ওইবা ৱাখল্লোনশিং অসি থোরকহ্নবগীদমক্তা স্তেত/য়ুনিয়ন তেরিতোরীশিংগী হোম দিপার্তমেন্তকী হেদশিং অমসুং দি.আই.জি.শিং অমদি এস.পি.গী থাক্কী খনগৎলবা পুলিস ওফিসর খরসু কনফরেন্স অসিদা শরুক য়াগনি।

***