Da kaba pynskhem biang ïa ka bynta ba kongsan jong ki nongbishar bniah ïa ki phlim, ki nongthoh khubor bad ki nongpeit bniah ia ki kam shna phlim ha pyrthei, ka International Film Festival of India (IFFI) kaba 56 ka la pynlong ïa ka jingïamir jingmut kaba pynkhih mynsiem kaba la ai kyrteng “Beyond the Thumb – The Role of a Film Critic: A Gatekeeper, an Influencer or Something Else?” Ka jingïalang ka la pynïasoh lang ïa ki nongbishar ba pawnam na kylleng ka pyrthei ban wad bniah ïa ka jingkylla jong ka rukom bishar bniah ïa ki phlim ha ka juk ba bun ki jingpynthut ki kam digital, ka jingktah jong ka social media, bad ka jingpeit stet ïa ki prokram.

Ïa kane ka jingïakren la pynïaid da u Davide Abbatescianni bad la ïashim bynta da ki nongbishar ba pawnam ia ki phlim Barbara Lorey de Lacharrière, Deepa Gahlot, Sudhir Srinivasan, Meghachandra Kongbam, Elizabeth Kerr, bad Baradwaj Rangan.

Haba sdang ia ka jingïakren, u Davide Abbatescianni u la kren shaphang ki jingkylla ba phylla kiba pynkylla dur thymmai ïa ka jingbishar bniah ïa ki phlim mynta. Katba ki phlim ba pyniaid iew kiba pawnam kim lah ban shaniah than ha ki nongbishar, u la ong, ki nongshna phlim shimet bad kiba dang sdang ki shaniah shibun ha ki jingbishar bniah kiba pyrkhat bha bad kiba lah ban ngeit. U la pynpaw ruh ïa ka jingsngewkhia halor ka jing duna ka bor edit ha ka juk kaba palat 150,000 ki nongpynmih online bad ka jingphiah kaba nang kiew jong ka jingiakren kaba kongsan. U Davide Abbatescianni u la maham ba da ka jingkiew jong ki prokram ba la pynmih da ka AI, ka lawei jong ka jingkynthoh ka lah ban ïakynduh ïa ka “jinglong kaba wanrah jingjynjar”.

“Ki nongbishar ki dei ban pynmih ia ka jingkwah ban tip” – Barbara Lorey de Lacharrière

Ka Barbara Lorey de Lacharrière ka la ong ba ka kamram ba kongsan jong u nongbishar ka long ban long kum uba don hapdeng ka phlim bad ki nongpeitkai, ban iarap ia ki nongpeitkai ban lap ia ki phlim kiba ym da pyniaid iew. Hadien ba ka la thoh shibun shaphang ki phlim na ki thain jong ka India bad ki phlim Turkey New Wave na ka bynta ki kot khubor jong ka Europe, ka la ban jur ia ka jingsngewtynnat jong ka ban wanrah ia ki phlim kiba kham duna ka jingtip sha ki paidbah kiba kham bun. Ka la kren shaphang ka jingduna ki jingthoh bad ka jingkylla sha ki rynsan digital kum ki jingeh kiba khraw, da kaba kdew ïa ka jingwad bniah na France kaba pyni ba 80% na ki nongthoh phlim kim lah ban shaniah tang ha ka jingshah bishar na ka bynta ka kamai kajih jong ki. Ka la kren ruh shaphang ka jingpynleit jingmut kaba nang jur ha ka jingpyniaid iew dalade, ha kaba ki Nongbishar hi ki kylla long ki “product”, khamtam eh na ka bynta ki samla nongpeitkai.

“Ka Jingplie lad ka la Ialam Sha Ka jingdon nongbud, Ym Sha Ka Jingkynthoh” – Ka Deepa Gahlot

Ka Deepa Gahlot ka la buh jingkylli hato ka jingplie lad ha kane ka kam ka dei ka jingkyrkhu ne ka jingma. Ka la maham ba bun na ki jingkynthoh online mynta ki dei kiba la pynwandur da ki nongkyrshan, ka jingbym don ka jingjylliew, bad ka jingktah kaba pynshong nongrim ha ka jingïoh lad, ha kaba katto katne ki nongpeit bniah ki shah siew ban ai ïa ki rating khlem ka jingbishar bniah bha. Da kaba ki nongpeitkai ki nang kham pyndonkam ïa ki phlim ha ki rynsan OTT, ka la ïohi ïa ka jingduna ha ka jingsngewnguh ïa ka jingriewspah bad ka jingstad jong ka kam shna phlim.

Ka jingkylla sha ka digital ka dei ka jingkylla kaba khraw tam – Sudhir Srinivasan

U Sudhir Srinivasan u la ban jur ïa ka jingkylla na ki kot khubor sha ki lad pathai khubor digital kum ka jingkylla kaba khraw tam. Hadien ba u la kynriah na ka jingthoh sha ka jingpynmih ïa ki video jingbishar ba lyngkot, u la kam ba ki rukom pynïadei bad ki nongpeitkai ki la nang kiew, hynrei u la kyntait ba ka rukom kynthoh jong u ka dang sah kumjuh. U la pyrshah ïa ki jingsngewkhia shaphang ka jinghiar ha ka akor, da kaba ong ba katba mynshuwa tang katto katne ki lad pathai khubor kiba khlaiñ bor ki la synshar ïa ka jingkynthoh, mynta ki “hajar sur barit” ki pynlong ïa ka jinglong jingman kaba kham plie lad lang ia baroh. U la pynpaw ia ka jingngeit ba ki nongpeitkai ki lah ban pyniapher hapdeng ki jingbishar ba shisha bad ki jingbishar ba la kyrshan.

“Ngi Donkam Kham Shuh Shuh Ia ka Jingsngewthuh Shaphang Ka Kolshor Shna Phlim” – Meghachandra Kongbam

Haba mihkhmat ïa ka FIPRESCI (The International Federation of Film Critics), u Meghachandra Kongbam u la ban jur ïa ka jingdonkam ban kyntiew ïa ka kolshor shna phlim bad ban pynkhlaiñ ïa ka jingsngewthuh paidbah shaphang kane ka kam. Watla u pdiang ba ka jingplie lad ka la wanrah katto katne ka jingkulmar, u la kynthoh ba ki nongshna phlim shimet ki dang shaniah shibun ha ki Nongbishar bniah ban poi sha ki nongpeitkai. U la ong ba da ka jingithuh jong ka Sorkar India ia ka phlim kum shi bynta ka ioh ka kot ba thymmai, ki jingialang halor ka jingbishar bniah ia ki phlim kin long kiba kordor.

“Ki Nongbishar bniah ki dei ban shem ia la ka jong ka sur” – Elizabeth Kerr

Ka Elizabeth Kerr ka la ban jur ïa ka jingkiew ha ki rynsan bad ka jingdawa ia ki prokram ba bun jait. Kum ka nongthoh na ka bynta ki kot khubor bapher bapher kiba don ki jingthmu bapher bapher ha ka kam thoh kot, ka la ban jur ïa ka jingdonkam jong ki kritik ban pynroi ïa la ka jong ka sur, ka rukom thoh bad ki nongsngap ba kyrpang jong ki. Ka la pynpaw ka jingsngewkhia shaphang ki Nongialam ba kongsan (KOL) kiba ju shah thung ha ki nongsam bad kiba da ka jinglong tynrai ki sngewtynnad ban ai ia ki jingkynthoh kiba bha, da kaba khot ia ka kum ka jingeh kaba kongsan ha ka akor ka burom mynta. Ka la kyntu ia ki kritik ban bishar bniah ia ki phlim katkum la ka jong ka jong ka kyndon bad ban kiar na kaba kyntait ia kano kano ka kam na ka bynta kawei ka jingduna bad ban klet ia ki jingkhlain.

U Baradwaj Rangan halor ka kolshor iashim bynta lang ha ki lad pathai khubor digital

U Baradwaj Rangan u la kren shaphang ka jingïaid lynti jong u ha kylleng ki kot khubor, ki lad digital, bad ka blogging naduh ba sdang ki snem 2000, bad u la ong ba digital media ki wanrah ïa ka jingai jingmut ba mardor bad ka kolshor ïashim bynta, kaba pynïar ïa ka jingdon jong ki sur ba kynthoh bad pynduna ïa ka jingktah jong ki nongap khyrdop tynrai. Hynrei, da ka jingïakhun kaba jur, ki kritik mynta ki ïakynduh ïa ka jingpynbor ban pynmih ïa ki jingbishar bniah mardor hadien ba la pyllait ïa ka phlim—kaba ïapher bak-ly-bak na ki rukom leh ba mynshuwa jong ki kot jingbishar bniah ha ka Sngi U Trai. U la ai nuksa na ka Pauline Kael bad u Roger Ebert ban pyni kumno ki juk kiba mynshuwa ki ai kham bun ka por bad ka jaka ia ki kritik ban pynwan dur ia ki jingiakren shaphang ka kolshor. Mynta, u la kynthoh, ki kritik ki dei ban ïaid lyngba “ka bynta jong ka jingïalehkai” jong ka jingkhmih lynti ïa ka jingkynthoh jong ki paidbah, khamtam eh bad ka jingsngewtynnat jong u Gen Z ïa ki jingthoh kiba sngewtynnad, kiba stet.

Katba ka jingbishar bniah ia ki phlim ka dang iai bteng ban kylla ha ka jinglong kaba nang kylla sha ka digital bad kaba plie lad ia baroh, ki nongiashim bynta ki la pynpaw lang ia ka jingdonkam jong ka jingshisha, ka jingjylliew, ka jinglong laitluid kaba kongsan, bad ka jinglah ban pyniadei. Kane ka jingiamir jingmut ka la pynskhem biang ba watla ki rukom bad ki nongpeitkai ki lah ban kylla, hynrei ka jinglong tynrai jong ka jingbishar bniah—ka jingïadei kaba pyrkhat bha bad ki kam shna phlim—ka dang long kaba kongsan bha na ka bynta ka jingbha jong ka kam shna phlim.

Shaphang ka IFFI

La sdang ha u snem 1952, ka International Film Festival of India (IFFI) ka ieng skhem kum ka jingrakhe kaba la rim bad kaba heh tam ha South Asia ha ka kam ba iadei bad ki phlim. La pynlong lang da ka National Film Development Corporation (NFDC), ka Tnad Information and Broadcasting, Sorkar india bad ka Entertainment Society of Goa (ESG), ka Sorkar Jylla Goa,kane ka tamasa ka la nangroi sha ka jaka ba don bor ha ka pyrthei ha ka kam pynmih phlim—ha kaba ki phlim hyndai ba la pynthymmai ki ïakynduh ïa ki jingpyrshang ba shlur bad ki briew kiba la pynskhem ialade ha kane ka kam ki iakynduh ia kito kiba dang sdang ha kane ka kam. Kaba pynlong ïa ka IFFI ban tyngshaiñ shisha ka dei ka jingbun ki bynta—ki jingïakob ha kylleng ka pyrthei, ki jingpyni ïa ka kolshor, ki masterclass, ki jingai burom, bad ka WAVES Film Bazaar ba shitrhem bha, ha kaba ki jingmut, ki jingïateh bad ki jingïatreilang ki kiew shaphrang. Ha ka jingpynlong ha rud duriaw jong ka Goa naduh ka 20–28 tarik u Naiwieng, ka bynta kaba 56 kan don ki bynta jong ki ktien bapher bapher , ki jait phlim bapher bapher, ki jingsaindur thymmai, bad ki sur—ka jingrakhe ïa ka jingtbit ka India ha ka kam saindur jong ka pyrthei.

Ban ioh jingtip shuh shuh, shon ha ka:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56new/

PIB IFFIWood Broadcast Channel:  https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *