#IFFIWood, 27 नोव्‍हेंबर 2025

भारताच्या नेटान बदलपी आनी वाढत्या गतिमान कथाकथनाचे परिदृश्य प्रतिबिंबीत करपा खातीर तयार केल्ल्या इंडियन पॅनोरमा वेब सिरीज (ओटीटी) विभागाच्या ज्युरींनी आयज गोयांत 56 व्या भारतीय आंतरराष्ट्रीय चित्रपट महोत्सवात (इफ्फी) माध्यमांक संबोधित केले. ज्युरी अध्यक्ष भारतबला आनी ज्युरी वांगडी शेखर दास, मुंजल श्रॉफ आनी राजेश्वरी सचदेव हाणी डिजिटल कथाकथनाच्या विस्तारपी विश्वाचेर आनी ओटीटी प्लॅटफॉर्म भारताचे सृजनशील संस्कृतायेक कशे आकार दितात हाचेर चिंतन केले.

ओटीटी प्लॅटफॉर्मांक लागून  सुरू जाल्ल्या संरचनात्मक बदला विशीं उलयतना भारतबला हाणें ह्या माध्यमाचें वर्णन  “सुत्र आनी रूढिवादाच्या मर्यादेंतल्यान कथा मुक्त करपी एक सुवात.” अशे, केलें. जायतीं समाजीक नाटकां आनी प्रादेशिक कथा एका काळार सिनेमा हॉलांतल्यान ना जाल्ली, पूण ओटीटी प्लॅटफॉर्मांनी तांकां नव्या उर्जेन पुनरुज्जीवित केल्यात अशें तांणी नमूद केले. "भारत एका खंडा इतलो वैविध्यपूर्ण आसा. OTT आमका आमच्या शेजाऱ्यांच्यो, आमच्या परिसराच्यो, आमच्या लागींच्या समाजाच्यो काणयो सांगपाक संद दिता. ह्या माध्यमांक लागून नव्या प्रतिभेक उस्वास घेवंक मेळटा, प्रयोग करपाक मेळटात आनी तळागाळांतल्या सृजनशीलतेंतल्यान मेळिल्ल्या रत्नांक मुखेल प्रवाहांतल्या चित्रपटसृष्टीमेरेन पावपाक मेळटा,” अशें तांणी अधोरेखित केले.

तशेंच स्ट्रीमिंगच्या युगांत भारतीय कथा संवसारीक पांवड्यार पाविल्ल्याचेरूय ताणें भर दिलो. "एकदां तुमी तुमचें काम Amazon वा Netflix हांचेर घाले की ते जागतिक जाता. देखून आमच्या कथाकारांक तांची कुशळटाय धारदार करपाक प्रोत्साहन दिवंक जाय, जाका लागून आमचीं कथा  मुळांकडेन जोडिल्ल्यो, प्रामाणीक आनी तरी लेगीत सार्वत्रिक आकर्शनाच्यो उरतल्यो अशें तांणी सांगलें.

म्हालगडो फिल्म निर्मातो शेखर दास डिजिटल निर्मात्यांच्या कलात्मक जापसालदारके विशीं उलयलो. ओटीटीक सिनेमाचो उत्साही विस्तार म्हणत, ताणें ह्या स्वरूपाक लागून सामाजिक वास्तवाच्या गुंतागुंतीच्या आंगांचेर खोलायेन सोद घेवंक मेळता अशे नमूद केले. “कला समाजांतले संघर्श प्रतिबिंबीत करता,” अशें सांगून तांणी वेब मालिकेच्या निवडींची खोलाय, विविधताय आनी  आधुनीक भारताचें प्रामाणीक चित्रण सादर केल्ल्याखातीर तोखणाय केली. आठ भागांची सिरीज पळोवपाचो अणभव “आठ स्वतंत्र चित्रपट पळोवपा सारको” अशें तांणी सांगलें.

निर्मातो आनी दिग्दर्शक मुंजल श्रॉफ हाणें ओटीटी क्रांतीचें वर्णन “वितरणाचे लोकशायीकरण” अशें केलां. गेटकीपिंग उणें जाल्ल्यान आनी प्रेक्षकांचे पर्याय वाडत आशिल्ल्यान आतां प्रेक्षक स्टारडमा परस प्रामाणीकपणाक इनाम दितात अशें तांणी नदरेक हाडलें. “निर्माते वेगवेगळ्या प्रकारांचेर धाडसान प्रयोग करतात तें पळोवन खोस जाता. ओटीटी आनी युट्युबाक लागून फिल्ममेकरांक बॉक्स ऑफिसाच्या सूत्रांचो वा टेलिव्हिजनच्या निर्बंधांचो हुस्को करिनासतना अपरंपरागत कथा सांगपाचें स्वातंत्र्य आसा” अशें तांणी म्हळें.

अभिनेत्री राजेश्वरी सचदेव हाणी प्रेक्षक आनी तांच्या स्क्रीन मदलो लागींचो संबंद उजवाडाक हाडलो. "कथा थेट आमच्या हातांत पावपाक लागल्यात म्हणून नव्या दृष्टिकोनाची आवड वाडल्या" अशें तांणी निरिक्षण केलें. तांणी बंदखणीच्या जिविताचेर आधारित एका सिरीजचो उल्लेख करून दाखयले की, आदीं जे विशय टाळटाले ते आतां प्रामाणीकपणान आनी मानवी दृष्टिकोनातल्यान मांडतात.  

IFFI विशीं

1952 वर्सा सुरु जाल्लो भारतीय आंतरराष्ट्रीय चित्रपट महोत्सव (IFFI) दक्षिण आशियांतलो सगळ्यांत पोरनो आनी सगळ्यांत व्हडलो चित्रपट महोत्सव. राष्ट्रीय चित्रपट विकास म्हामंडळ (एनएफडीसी), म्हायती आनी प्रसारण मंत्रालय, भारत सरकार आनी गोंय मनरिजवण सोसायटी (ईएसजी) गोंय राज्य सरकार हांणी संयुक्तपणान आयोजीत केल्लो हो महोत्सव आता जागतिक चित्रपटसृष्टीतले शक्तीघर जाला. इफ्फीक खऱ्या अर्थान चमकावपी गजाल म्हळ्यार ताचे अद्वितीय मिश्रण -आंतरराष्ट्रीय सर्ती, सांस्कृतीक प्रदर्शनां, मास्टरक्लास आनी उच्च उर्जा आशिल्लो 'व्हेवज’ (WAVES) फिल्म बाजार, जंय कल्पना, वेव्हार आनी सहयोग आकार घेतात. 20 ते 28 नोव्हेंबर मजगती गोयांत जावपी ह्या 56व्या आवृत्तीत भाशा, शैली, नवोन्मेष आणि आवाजांचो एक दोळे दिपकावपी संग्रह सादर जातलो - जागतिक स्तराचेर भारताच्या सर्जनशील प्रतिभेचो एक मन भुलोवपी उत्सव.

For more information, Click on:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | सुभाष जाण/मोनाली प्रभू/दर्शना राणे | IFFI 56